൨. ദുതിയസുത്തന്തപാളിവണ്ണനാ

൧൩. പുന അഞ്ഞസ്സ സുത്തന്തസ്സ അത്ഥവസേന സച്ചപ്പടിവേധം നിദ്ദിസിതുകാമോ പുബ്ബേ മേ, ഭിക്ഖവേതിആദികം സുത്തന്തം ആഹരിത്വാ ദസ്സേസി. തത്ഥ പുബ്ബേ മേ, ഭിക്ഖവേ, സമ്ബോധാതി ഭിക്ഖവേ, മമ സമ്ബോധിതോ സബ്ബഞ്ഞുതഞ്ഞാണതോ പുബ്ബേ. അനഭിസമ്ബുദ്ധസ്സാതി സബ്ബധമ്മേ അപ്പടിവിദ്ധസ്സ. ബോധിസത്തസ്സേവ സതോതി ബോധിസത്തഭൂതസ്സേവ. ഏതദഹോസീതി ബോധിപല്ലങ്കേ നിസിന്നസ്സ ഏതം പരിവിതക്കിതം അഹോസി. അസ്സാദോതി അസ്സാദീയതീതി അസ്സാദോ. ആദീനവോതി ദോസോ. നിസ്സരണന്തി അപഗമനം. സുഖന്തി സുഖയതീതി സുഖം, യസ്സുപ്പജ്ജതി, തം സുഖിതം കരോതീതി അത്ഥോ. സോമനസ്സന്തി പീതിസോമനസ്സയോഗതോ സോഭനം മനോ അസ്സാതി സുമനോ, സുമനസ്സ ഭാവോ സോമനസ്സം, സുഖമേവ പീതിയോഗതോ വിസേസിതം. അനിച്ചന്തി അദ്ധുവം. ദുക്ഖന്തി ദുക്ഖവത്ഥുത്താ സങ്ഖാരദുക്ഖത്താ ച ദുക്ഖം. വിപരിണാമധമ്മന്തി അവസീ ഹുത്വാ ജരാഭങ്ഗവസേന പരിവത്തനപകതികം. ഏതേന അനത്തഭാവോ വുത്തോ ഹോതി. ഛന്ദരാഗവിനയോതി ഛന്ദസങ്ഖാതസ്സ രാഗസ്സ സംവരണം, ന വണ്ണരാഗസ്സ. ഛന്ദരാഗപ്പഹാനന്തി തസ്സേവ ഛന്ദരാഗസ്സ പജഹനം.

യാവകീവഞ്ചാതിആദീസു യാവ ഇമേസം പഞ്ചന്നം ഉപാദാനക്ഖന്ധാനം…പേ… യഥാഭൂതം നാബ്ഭഞ്ഞാസിം ന അധികേന ഞാണേന പടിവിജ്ഝിം, താവ അനുത്തരം സമ്മാസമ്ബോധിം അനുത്തരം സബ്ബഞ്ഞുഭാവം അഭിസമ്ബുദ്ധോ അഭിസമേതാവീ അരഹന്തി നേവാഹം പച്ചഞ്ഞാസിം നേവ പടിഞ്ഞം അകാസിന്തി സമ്ബന്ധതോ അത്ഥോ. കീവഞ്ചാതി നിപാതമത്തം. യതോതി യസ്മാ, യദാ വാ. അഥാതി അനന്തരം. ഞാണഞ്ച പന മേ ദസ്സനം ഉദപാദീതി ദസ്സനകിച്ചകരണേന ദസ്സനസങ്ഖാതം പച്ചവേക്ഖണഞാണഞ്ച മേ ഉപ്പജ്ജി. അകുപ്പാതി കോപേതും ചാലേതും അസക്കുണേയ്യാ. വിമുത്തീതി അരഹത്തഫലവിമുത്തി. ഏതായ ഏവ ഫലപച്ചവേക്ഖണായ മഗ്ഗനിബ്ബാനപച്ചവേക്ഖണാപി വുത്താവ ഹോന്തി. അയമന്തിമാ ജാതീതി അയം പച്ഛിമാ ഖന്ധപ്പവത്തി. നത്ഥിദാനി പുനബ്ഭവോതി ഇദാനി പുന ഉപ്പത്തി നത്ഥി. ഏതേന പഹീനകിലേസപച്ചവേക്ഖണാ വുത്താ. അരഹതോ ഹി അവസിട്ഠകിലേസപച്ചവേക്ഖണാ ന ഹോതി.