൭. ചോദനാസുത്തവണ്ണനാ

൧൬൭. സത്തമേ ചോദകേനാതി വത്ഥുസന്ദസ്സനാ ആപത്തിസന്ദസ്സനാ സംവാസപ്പടിക്ഖേപോ സാമീചിപ്പടിക്ഖേപോതി ചതൂഹി ചോദനാവത്ഥൂഹി ചോദയമാനേന. കാലേന വക്ഖാമി നോ അകാലേനാതി ഏത്ഥ ചുദിതകസ്സ കാലോ കഥിതോ, ന ചോദകസ്സ. പരം ചോദേന്തേന ഹി പരിസമജ്ഝേ വാ ഉപോസഥപവാരണഗ്ഗേ വാ ആസനസാലാഭോജനസാലാദീസു വാ ന ചോദേതബ്ബോ, ദിവാട്ഠാനേ നിസിന്നകാലേ ‘‘കരോതായസ്മാ ഓകാസം, അഹം ആയസ്മന്തം വത്തുകാമോ’’തി ഏവം ഓകാസം കാരേത്വാ ചോദേതബ്ബോ. പുഗ്ഗലം പന ഉപപരിക്ഖിത്വാ യോ ലോലപുഗ്ഗലോ അഭൂതം വത്വാ ഭിക്ഖൂനം അയസം ആരോപേതി, സോ ഓകാസകമ്മം വിനാപി ചോദേതബ്ബോ. ഭൂതേനാതി തച്ഛേന സഭാവേന. സണ്ഹേനാതി മട്ഠേന മുദുകേന. അത്ഥസംഹിതേനാതി അത്ഥകാമതായ ഹിതകാമതായ ഉപേതേന. അവിപ്പടിസാരോ ഉപദഹാതബ്ബോതി അമങ്കുഭാവോ ഉപനേതബ്ബോ. അലം തേ അവിപ്പടിസാരായാതി യുത്തം തേ അമങ്കുഭാവായ. സേസമേത്ഥ ഉത്താനമേവാതി. അട്ഠമം ഹേട്ഠാ വുത്തനയത്താ പാകടമേവ.