໒. ສຫຊາຕວາຣວຓ຺ຓນາ

໒໓໔-໒໔໒. ສຫຊາຕປຈ຺ຈຍກຣຓນ຺ຕິ ສຫຊາຕໍ ປຈ຺ຈຍຘມ຺ມໍ ປຈ຺ຈຍໍ ກຕ຺ວາ ປວຕ຺ຕິ. ສຫຊາຕາຍຕ຺ຕຠາວຄມນນ຺ຕິ ສຫຊາເຕ ປຈ຺ຈຍຘມ຺ເມ ອາຍຕ຺ຕຠາວສ຺ສ ຄມນໍ ປຈ຺ຈຍຸປ຺ປນ຺ນສ຺ສ ອຕ຺ຕນາ ສຫຊາຕປຈ຺ຈຍາຍຕ຺ຕວຸຕ຺ຕິຕາ. ເອຕ຺ຖ ຈ ສຫຊາຕປຈ຺ຈຍສງ຺ຂາຕໍ ສຫຊາຕໍ ກໂຣຕີຕິ ສຫຊາໂຕ, ຕຖາປວຕ຺ໂຕ ປຈ຺ຈຍຸປ຺ປນ຺ນຘມ຺ໂມ. ຕຕ຺ຖ ປວຕ຺ຕມາໂນ ສຫຊາຕສທ຺ໂທ ຍສ຺ມາ ຕສ຺ສ ປຈ຺ຈຍຸປ຺ປນ຺ນສ຺ສ ອຕ຺ຕນາ ສຫຊາຕໍ ປຈ຺ຈຍຘມ຺ມໍ ປຈ຺ຈຍໍ ກຕ຺ວາ ປວຕ຺ຕິໍ ຕທາຍຕ຺ຕຠາວູປຄມນຎ຺ຈ ວທຕີຕິ ວຸຈ຺ຈຕິ, ຕສ຺ມາ ວຸຕ຺ຕໍ ‘‘ສຫຊາຕສທ຺ເທນ…ເປ… ວຸຕ຺ຕ’’ນ຺ຕິ. ຕສ຺ສ ກຣຓສ຺ສ ຄມນສ຺ສ ວາຕິ ຕສ຺ສ ຍຖາວຸຕ຺ຕສ຺ສ ສຫຊາຕປຈ຺ຈຍກຣຓສ຺ສ ສຫຊາຕາຍຕ຺ຕຠາວູປຄມນສ຺ສ ວາ. ‘‘ກຸສລໍ ຘມ຺ມໍ ສຫຊາໂຕ’’ຕິ ອິມສ຺ສ ກຸສລໍ ຘມ຺ມໍ ສຫຊາຕໍ ຕໍສຫຠາວິຕຎ຺ຈ ປຈ຺ຈຍໍ ກຕ຺ວາຕິ ອຍມຕ຺ໂຖຕິ ອາຫ ‘‘ກຸສລາທີນໍ ກມ຺ມຠາວໂຕ’’ຕິ. ສຫຊາຕປຈ຺ຈຍສຫຠາວີນໍ ປຈ຺ຈຍານໍ ສງ຺ຄຓ຺ຫຕ຺ຖຎ຺ເຫຕ຺ຖ ‘‘ສຫຊາຕາຍຕ຺ຕຠາວຄມນໍ ວາ’’ຕິ ວຸຕ຺ຕໍ.

ຕໍກມ຺ມຠາວໂຕຕິ ເຕສໍ ຍຖາວຸຕ຺ຕປຈ຺ຈຍກຣຓຕທາຍຕ຺ຕຠາວຄມນານໍ ກມ຺ມຠາວໂຕ. ອຏ຺ຐກຖາຍໍ ປນ ‘‘ກຸສລໍ ຘມ຺ມໍ ສຫຊາໂຕຕິ ກຸສລໍ ຘມ຺ມໍ ປຏິຈ຺ຈ ເຕນ ສຫຊາໂຕ ຫຸຕ຺ວາ’’ຕິ ປຏິຈ຺ຈສທ຺ທໍ ອາຫຣິຕ຺ວາ ອຕ຺ໂຖ ວຸຕ຺ໂຕ, ຕໍ ‘‘ປຏິຈ຺ຈຕ຺ໂຖ ສຫຊາຕຕ຺ໂຖ’’ຕິ ກຕ຺ວາ ວຸຕ຺ຕໍ. ສຫຊາຕສທ຺ທໂຍເຄ ກຸສລໍ ຘມ຺ມນ຺ຕິ ອຸປໂຍຄວຈນສ຺ສ ຍຸຕ຺ຕິ ນ ວຸຕ຺ຕາ, ‘‘ເຕນ ສຫຊາໂຕ ຫຸຕ຺ວາ’’ຕິ ປນ ວຸຕ຺ຕຕ຺ຕາ ກຣຓຕ຺ເຖ ອຸປໂຍຄວຈນນ຺ຕິ ທສ຺ສິຕນ຺ຕິ ເກຈິ. ນິສ຺ສຍວາເຣ ປນ ກຸສລໍ ຘມ຺ມໍ ນິສ຺ສຍຕ຺ເຖນ ປຈ຺ຈຍໍ ກຕ຺ວາຕິ ວທນ຺ເຕນ ອິຘາປິ ‘‘ກຸສລໍ ຘມ຺ມໍ ສຫຊາຕຕ຺ເຖນ ປຈ຺ຈຍໍ ກຕ຺ວາ’’ຕິ ອຍມຕ຺ໂຖ ວຸຕ຺ໂຕເຍວ ໂຫຕິ, ປຏິຈ຺ຈສທ຺ທາຫຣຓມ຺ປິ ອິມເມວຕ຺ຖໍ ຎາເປຕີຕິ ທຏ຺ຐພ຺ພໍ. ອຸປາທາຣູປໍ ກິຎ຺ຈິ ຠູຕຣູປສ຺ສ ອນຸປາລກໍ ອຸປຕ຺ຖມ຺ຠກຎ຺ຈ ໂຫນ຺ຕມ຺ປິ ສຫຊາຕລກ຺ຂເຓນ ນ ໂຫຕິ, ຕສ຺ມາ ປຏິຈ຺ຈຕ຺ຖໍ ນ ຜຣຕີຕິ ອາຫ ‘‘ປຏິຈ຺ຈາຕິ ອິມິນາ ວຈເນນ ທີປິໂຕ ປຈ຺ຈໂຍ ນ ໂຫຕີ’’ຕິ. ນິທສ຺ສນວເສນ ວຸຕ຺ຕນ຺ຕິ ອຸທາຫຣຓວເສນ ວຸຕ຺ຕໍ, ນ ອນວເສສໂຕຕິ ອຕ຺ໂຖ. ຍຖາວຸຕ຺ໂຕຕິ ປຏິຈ຺ຈຕ຺ຖຜຣຓວເສນ ວຸຕ຺ໂຕ. ຍຖາ ຈ ອຸປາທາຣູປໍ ຠູຕຣູປສ຺ສ ອຸປາທາຣູປສ຺ສ ຈ ປຈ຺ຈໂຍ ນ ໂຫຕິ, ເອວໍ ຐເປຕ຺ວາ ຉ ວຕ຺ຖູນິ ເສສຣູປານິ ອຣູປຘມ຺ມານໍ ປຈ຺ຈໂຍ ນ ໂຫຕີຕິ ທສ຺ເສນ຺ໂຕ ‘‘ວຕ຺ຖຸວຊ຺ຊານິ ຣູປານິ ຈ ອຣູປານ’’ນ຺ຕິ ອາຫ.

ສຫຊາຕວາຣວຓ຺ຓນາ ນິຏ຺ຐິຕາ.