໓. ປຈ຺ຈຍວາຣວຓ຺ຓນາ

໒໔໓. ປຕິ-ສທ຺ໂທ ປຕິຏ຺ຐຕ຺ຖໍ ທີເປຕິ ‘‘ສາເຣ ປຕິຏ຺ຐິໂຕ’’ຕິອາທີສຸ, ອຍ-ສທ຺ໂທ ຄຕິໍ ທີເປຕິ ‘‘ເອຕິ ເອຕ຺ຖາຕິ ອໂຍ’’ຕິ.

ຠູຕຸປາທາຣູປານິ ສຫ ສງ຺ຄຓ຺ຫິຕ຺ວາ ວຸຕ຺ຕໍ ອຸປາທາຣູປານໍ ວິຍ ຠູຕຣູປານິ ນິສ຺ສໂຍ ໂຫຕີຕິ ກຕ຺ວາ. ຍທິ ເອວໍ ກສ຺ມາ ອຏ຺ຐກຖາຍໍ ‘‘ມຫາຠູເຕ ນິສ຺ສາຍ ຈິຕ຺ຕສມຸຏ຺ຐານໍ ອຸປາທາຣູປ’’ນ຺ຕິ ອຸປາທາຣູປໍເຍວ ທສ຺ສິຕນ຺ຕິ ອາຫ ‘‘ອຏ຺ຐກຖາຍໍ ປນາ’’ຕິອາທິ.

໒໕໕. ປຏິຈ຺ຈວາເຣ ສຫຊາເຕຕິ ປຏິຈ຺ຈວາເຣ ສຫຊາຕປຈ຺ຈຍວຓ຺ຓນາຍໍ, ກມ຺ມອຸຕຸຊານນ຺ຕິ ກມ຺ມຊານໍ ອຸຕຸຊານຎ຺ຈ ວເສນ ອຕ຺ໂຖ ວຸຕ຺ໂຕຕິ ໂຍຊນາ. ຕຖາ ຫິ ຕຕ຺ຖ ວຸຕ຺ຕໍ ‘‘ທ຺ວິສນ຺ຕຕິສມຸຏ຺ຐານຠູຕວເສນ ວຸຕ຺ຕ’’ນ຺ຕິ (ປຏ຺ຐາ. ອຏ຺ຐ. ໑.໕໗). ກມ຺ເມ ຈາຕິ ກມ຺ເມ ຊນກກມ຺ມປຈ຺ຈເຍ ຄຫິເຕ. ເອກນ຺ຕາເນກນ຺ຕກມ຺ມຊານນ຺ຕິ ເອກນ຺ເຕນ ກມ຺ມຊານໍ ນ ເອກນ຺ຕກມ຺ມຊານຎ຺ຈ. ຕຕ຺ຖ ອສຎ຺ຎຠເວ ເອກນ຺ຕກມ຺ມຊໍ ນາມ ຊີວິຕິນ຺ທ຺ຣິຍໍ, ອິຕຣໍ ອຸປາທາຣູປໍ ຠູຕຣູປຎ຺ຈ ນ ເອກນ຺ຕກມ຺ມຊໍ, ຕທຸຠຍມ຺ປິ ຕຕ຺ຖ ເອກຊ຺ຌໍ ກຕ຺ວາ ວຸຕ຺ຕໍ, ‘‘ມຫາຠູເຕ ປຏິຈ຺ຈ ກຏຕ຺ຕາຣູປ’’ນ຺ຕິ ອິທໍ ປນ ກມ຺ມສມຸຏ຺ຐານວເສເນວ ວຸຕ຺ຕນ຺ຕິ. ໂສ ນາຘິປ຺ເປໂຕຕິ ໂຍ ຍຖາທສ຺ສິໂຕ ປຏິຈ຺ຈວາເຣ ສຫຊາຕປຈ຺ຈເຍ ອຕ຺ໂຖ ວຸຕ຺ໂຕ, ໂສ ອິຘ ນ ອຘິປ຺ເປໂຕ. ກສ຺ມາຕິ ເຈ, ອາຫ ‘‘ກຏຕ຺ຕາ…ເປ… ຄຫິຕຕ຺ຕາ’’ຕິ. ຕໍ ປຫາຍາຕິ ຕໍ ປຏິຈ຺ຈວາເຣ ວຸຕ຺ຕມຕ຺ຖໍ ປຫາຍ ອຄ຺ຄເຫຕ຺ວາ. ຍຖາຄຫິຕສ຺ສາຕິ ‘‘ອສຎ຺ຎ…ເປ… ກຏຕ຺ຕາຣູປໍ ອຸປາທາຣູປ’’ນ຺ຕິ ປາຬິຍໍ ເອວ ຄຫິຕສ຺ສ. ປຏິຈ຺ຈ ປຈ຺ຈຍາຕິ ອິທໍ ທ຺ວິນ຺ນໍ ວາຣານໍ ອຸປລກ຺ຂຓໍ. ປຏິຈ຺ຈວາເຣ ອາຄຕນເຍນ ມຫາຠູເຕ ປຏິຈ຺ຈ, ປຈ຺ຈຍວາເຣ ອາຄຕນເຍນ ມຫາຠູເຕ ປຈ຺ຈຍາ ມຫາຠູຕານໍ ອຸປ຺ປຕ຺ຕິ ນ ນິວາເຣຕພ຺ພາ, ຕສ຺ມາ ‘‘ອຸປາທາຣູປສງ຺ຂາຕໍ ກຏຕ຺ຕາຣູປ’’ນ຺ຕິ ເອວໍ ອຸປາທາຣູປຄ຺ຄຫເຓນ ກຏຕ຺ຕາຣູປໍ ອວິເສເສຕ຺ວາ ອຸປາທາຣູປານໍ ນິວຕ຺ເຕຕພ຺ພານໍ ອຸຕຸຈິຕ຺ຕາຫາຣສມຸຏ຺ຐານານໍ ອຕ຺ຖິຕາຍ ກຏຕ຺ຕາ…ເປ… ວິເສສນໍ ທຏ຺ຐພ຺ພນ຺ຕິ ເອວເມຕ຺ຖ ໂຍຊນາ ເວທິຕພ຺ພາ.

໒໘໖-໒໘໗. ເອກຈ຺ຈສ຺ສ ຣູປສ຺ສາຕິ ອເຫຕຸກຈິຕ຺ຕສມຸຏ຺ຐານສ຺ສ. ອິໂຕ ປເຣສຸປິ ເອກຈ຺ຈຣູປຄ຺ຄຫເຓ ເອເສວ ນໂຍ. ຈກ຺ຂາທິຘມ຺ມວເສນາຕິ ຈກ຺ຂາຍຕນາທິຣູປຘມ຺ມວເສນ. ຈິຕ຺ຕສມຸຏ຺ຐານາທິໂກຏ຺ຐາສວເສນາຕິ ຈິຕ຺ຕຊາທິຣູປຘມ຺ມຠາຄວເສນ. ສພ຺ພໍ ລພ຺ຠຕີຕິ ສຕິປິ ອິມສ຺ສ ນຍສ຺ສ ນເຫຕຸມູລກຕ຺ເຕ ໂນນຕ຺ຖິໂນວິຄເຕສຸ ເອກນ຺ຕິ ຄຓນໍ ສພ຺ພໍ ຣູປໍ ສພ຺ພສ຺ສ ຣູປສ຺ສ ວເສນ ຄຓນາ ລພ຺ຠຕິ ຈຕຸສນ຺ຕຕິວເສນ ວຕ຺ຕມາເນສຸ ປຎ຺ຈວີສຕິຍາ ຣູປຘມ຺ເມສຸ ວຊ຺ຊິຕພ຺ພສ຺ສ ອຠາວາ.

ປຈ຺ຈຍວາຣວຓ຺ຓນາ ນິຏ຺ຐິຕາ.