໔. ອຸປາທິນ຺ນຕ຺ຕິກວຓ຺ຓນາ

໕໑. ອຘິປຕິຘມ຺ໂມເຍວ ໂລກຸຕ຺ຕຣຘມ຺ເມສຸ ນາຘິປຕິປຈ຺ຈຍາ ອຸປ຺ປຊ຺ຊຕີຕິ ອາຫ ‘‘ນາຘິປຕິປຈ຺ຈຍາຕິ ສຍໍ ອຘິປຕິຠູຕຕ຺ຕາ’’ຕິ. ນນຸ ອຘິປຕິຘມ຺ໂມປິ ອາຣມ຺ມຓາຘິປຕິວເສນ ອຘິປຕິປຈ຺ຈເຍນ ອຸປ຺ປຊ຺ຊຕີຕິ ໂຈທນໍ ສນ຺ຘາຍາຫ ‘‘ອວິຣຫິຕາ…ເປ… ທສ຺ເສຕີ’’ຕິ. ອວິຣຫິຕາຣມ຺ມຓາຘິປຕີສູຕິ ໂລກຸຕ຺ຕເຣ ສນ຺ຘາຍາຫ. ເຕ ຫິ ນິພ຺ພານາຣມ຺ມຓຕ຺ຕາ ເອວໍ ວຸຈ຺ຈຕິ. ປິ-ສທ຺ເທນ ໂກ ປນ ວາໂທ ວິຣຫິຕາຣມ຺ມຓາຘິປຕິອເນກນ຺ຕາຣມ຺ມຓາຘິປຕີສູຕິ ທສ຺ເສຕິ.

໗໒. ອນຸປາລນຸປຕ຺ຖມ຺ຠນວເສນາຕິ ຊີວິຕິນ຺ທ຺ຣິຍໍ ວິຍ ກຏຕ຺ຕາຣູປານໍ ອນຸປາລນວເສນ ໂອຊາ ຕສ຺ເສວ ກມ຺ມຊກາຍສ຺ສ ອຸປຕ຺ຖມ຺ຠນວເສນ ປຈ຺ຈໂຍ ໂຫຕິ, ນ ຊນກວເສນາຕິ ໂຍຊນາ. ເອຕສ຺ມິໍ ປນ ອຕ຺ເຖ ສຕີຕິ ກມ຺ມຊກລາເປ ໂອຊາ ຕສ຺ເສວ ກມ຺ມຊກາຍສ຺ສ ອຸປຕ຺ຖມ຺ຠກວເສນ ປຈ຺ຈໂຍ ໂຫຕີຕິ ເອຕສ຺ມິໍ ອຕ຺ເຖ ລພ຺ຠມາເນ. ອາຫາຣນ຺ຕິປິ ວຕ຺ຕພ຺ພນ຺ຕິ ຍຖາ ຊີວິຕິນ຺ທ຺ຣິຍວເສນ ‘‘ອຸປາທິນ຺ນຸປາທານິໂຍ ຘມ຺ໂມ ອຸປາທິນ຺ນຸປາທານິຍສ຺ສ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ’’ຕິ ວຸຕ຺ຕໍ, ເອວໍ ຍຖາວຸຕ຺ຕອາຫາຣສ຺ສປິ ວເສນ ວຕ຺ຕພ຺ພນ຺ຕິ ອຕ຺ໂຖ. ເອຕ຺ຖ ຈ ຍສ຺ມິໍ ກລາເປ ກມ຺ມຊາ ໂອຊາ ກທາຈິ ຕສ຺ເສວ ອຸປຕ຺ຖມ຺ຠນປຈ຺ຈໂຍ ໂຫຕີຕິ ອຍມຕ຺ໂຖ ອຏ຺ຐກຖາຍໍ ທສ຺ສິໂຕ. ຍທິ ກມ຺ມຊາ ໂອຊາ ເອກໍສໂຕ ສກລາປຣູປູປຕ຺ຖມ຺ຠນວເສເນວ ປວຕ຺ຕຕິ, ຕຖາ ສຕິ ອິມາຍ ປາຬິຍາ ວິໂຣໂຘ ສິຍາຕິ ທສ຺ເສນ຺ໂຕ ‘‘ຍທິ ຈ…ເປ… ໂຫຕີ’’ຕິ ອຏ຺ຐກຖາວຈນໍ ອຸທ຺ຘຣິຕ຺ວາ ຕຕ຺ຖ ໂທສໍ ວິຠາເວນ຺ໂຕ ‘‘ເອວໍ ສຕີ’’ຕິ ອາຫ. ຕຕ຺ຖ ຕນ຺ຕິ ຕໍ ວຈນໍ. ອນຊ຺ໂຌຫຏາຍ ອຕ຺ຕໂນ ປຈ຺ຈຍໂຕ ນິພ຺ພຕ຺ຕາຍ, ປຈ຺ຈໂຍ ເຈຕ຺ຖ ກມ຺ມໍເຍວ. ເຕນາຫ ‘‘ສສນ຺ຕານຄຕາຍ ອຸປາທິນ຺ໂນຊາຍາ’’ຕິ.

ອຍມ຺ປິ ປຎ຺ໂຫ, ນ ເກວລໍ ປຸພ຺ເພ ວຸຕ຺ຕອາຫາໂຣເຍວາຕິ ອຘິປ຺ປາໂຍ. ອຸທ຺ຘຣິຕພ຺ໂພ ສິຍາ, ນ ຈ ອຸທ຺ຘໂຏ. ຕສ຺ມາຕິ ເອຕສ຺ສ ‘‘ວາໂທ ພລວຕໂຣ’’ຕິ ເອເຕນ ສມ຺ພນ຺ໂຘ. ກສ຺ມາ ປນ ຍຖາວຸຕ຺ເຕສຸ ທ຺ວີສຸ ປຎ຺ເຫສຸ ອາຫາໂຣ ນ ອຸທ຺ຘໂຏຕິ ອາຫ ‘‘ອຊ຺ໂຌຫຏສ຺ສາ’’ຕິອາທິ. ຕຕ຺ຖ ທຸຕິຍປຎ຺ໂຫຕິ ທຸກມູລເກ ທຸຕິຍປຎ຺ໂຫຕິ ໂຍຊນາ. ທຸຕິຍປຎ຺ໂຫ ຈ ນ ອຸທ຺ຘໂຏຕິ ເອຕ຺ຖາປິ ‘‘ອຊ຺ໂຌຫຏສ຺ສ…ເປ… ອຠາວໂຕ’’ຕິ ອິທໍ ອາເນຕ຺ວາ ສມ຺ພນ຺ຘິຕພ຺ພໍ. ອິຕຣສ຺ສາຕິ ອນຊ຺ໂຌຫຏສ຺ສ. ອຊ຺ໂຌຫຏເມວ ນ ອນຊ຺ໂຌຫຏໍ, ຍຖາວຸຕ຺ໂຕຊນ຺ຕິ ອຘິປ຺ປາໂຍ. ‘‘ພລວຕໂຣ’’ຕິ ວຕ຺ວາ ຕສ຺ສ ພລວຕຣຠາວໍ ທສ຺ເສນ຺ໂຕ ‘‘ນ ຫີ’’ຕິອາທິມາຫ. ກຕິປຍາໂລເປ ອຊ຺ໂຌຫຣິຕ຺ວາ ວສິຕ຺ວາ ຐິຕສ຺ສ ວິຍ ອຊ຺ໂຌຫຏມຕ຺ຕາຫິ ມຓ຺ຑູກາທີຫິ ອຊ຺ໂຌຫາຣກສ຺ສ ສຣີເຣ ວິເສສາຘານໍ ເວທິຕພ຺ພໍ.

ອິຘ ວຸຕ຺ເຕຫີຕິ ອິມສ຺ມິໍ ອຸປາທິນ຺ນຕ຺ຕິເກ ວຸຕ຺ເຕຫິ. ເອກມູລກທຸກຕິກາວສານປຎ຺ຫວິສ຺ສຊ຺ຊເນຫີຕິ ເອກປທມູລເກຫິ ທຸກາວສາເນຫິ ຕິກາວສາເນຫິ ຈ ປຎ຺ຫວິສ຺ສຊ຺ຊເນຫິ. ເຕ ປນ ‘‘ອນຸປາທິນ຺ນຸປາທານິໂຍ ຘມ຺ໂມ ອຸປາທິນ຺ນຸປາທານິຍສ຺ສ ອນຸປາທິນ຺ນຸປາທານິຍສ຺ສ ຈ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ, ອນຸປາທິນ຺ນອນຸປາທານິໂຍ ຘມ຺ໂມ ອຸປາທິນ຺ນຸປາທານິຍສ຺ສ ອນຸປາທິນ຺ນຸປາທານິຍສ຺ສ ອນຸປາທິນ຺ນອນຸປາທານິຍສ຺ສ ຈ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ’’ຕິ ເອວໍ ເວທິຕພ຺ໂພ. ອິຘາຕິ ອິມສ຺ມິໍ ອຸປາທິນ຺ນຕ຺ຕິເກ. ທຸຕິຍທຸກາວສາເນ ວິຍາຕິ ທຸຕິຍທຸກາວສາເນ ປຎ຺ຫວິສ຺ສຊ຺ຊເນ ວິຍ, ‘‘ອນຸປາທິນ຺ນຸປາທານິໂຍ ຘມ຺ໂມ ອຸປາທິນ຺ນຸປາທານິຍສ຺ສ ອນຸປາທິນ຺ນຸປາທານິຍສ຺ສ ຈ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ, ສຫຊາຕໍ ປຈ຺ຉາຊາຕ’’ນ຺ຕິ ເອຕສ຺ສ ວິສ຺ສຊ຺ຊເນ ວິຍາຕິ ອຕ຺ໂຖ. ອຍຎ຺ຈ ອຕ຺ໂຖ ຕຕິຍປທມູລເກສຸ ທຸກຕິກາວສານປຎ຺ເຫສຸປິ ລພ຺ຠເຕວ. ຍທິ ປນ ເຕ ປຎ຺ຫາ ກຸສລຕ຺ຕິເກປິ ລພ຺ຠນ຺ຕິ, ອຖ ກສ຺ມາ ຕຕ຺ຖ ນ ອຸທ຺ຘຏາຕິ ອາຫ ‘‘ສຸຂາວໂພຘນຕ຺ຖໍ ປນ ຕຕ຺ຖ ສຫຊາຕວເສເນວ ວິສ຺ສຊ຺ຊນໍ ກຕ’’ນ຺ຕິ. ສຫຊາຕວເສເນວາຕິ ສຫຊາຕອຕ຺ຖິປຈ຺ຈຍວເສເນວ. ເອກມູລກທຸກາວສານາຕິ ‘‘ກຸສໂລ ຘມ຺ໂມ ກຸສລສ຺ສ ຈ ອພ຺ຍາກຕສ຺ສ ຈາ’’ຕິ ເອວໍປກາຣາ ປຎ຺ຫາ. ຕຕ຺ຖ ກຸສລຕ຺ຕິເກ ອຸທ຺ຘຏາ. ອິຘ ປນ ອິມສ຺ມິໍ ອຸປາທິນ຺ນຕ຺ຕິເກ. ເອເຕຫິ ຍຖາວຸຕ຺ເຕຫິ ວິສ຺ສຊ຺ຊເນຫິ. ເອໂກ ຘມ຺ໂມຕິ ເອໂກ ເວທນາທິໂກ ປຈ຺ຈຍຘມ຺ໂມ. ອເນເກຫີຕິ ສຫຊາຕປຈ຺ຉາຊາຕາທີຫິ ອເນເກຫິ ອຕ຺ຖິປຈ຺ຈຍວິເສເສຫິ. ອເນເກສໍ ຘມ຺ມານນ຺ຕິ ອເນເກສໍ ປຈ຺ຈຍຸປ຺ປນ຺ນຘມ຺ມານໍ. ເອໂກ ອຕ຺ຖິປຈ຺ຈໂຍຕິ ອິທໍ ອຕ຺ຖິປຈ຺ຈຍຕາສາມຎ຺ຎໂຕ ວຸຕ຺ຕໍ.

ອິທານິ ຍຖາວຸຕ຺ຕໍ ອວຸຕ຺ຕຎ຺ຈ ອຕ຺ຖິປຈ຺ຈເຍ ລພ຺ຠມານໍ ວິເສສໍ ວິຕ຺ຖາຣໂຕ ທສ຺ເສນ຺ໂຕ ‘‘ເອໂກ ຫີ’’ຕິອາທິມາຫ. ຕຕ຺ຖ ເອໂກຕິ ອຕ຺ຖິປຈ຺ຈຍວິເສເສສຸ ເອໂກ. ເອກສ຺ສາຕິ ຕາທິສສ຺ເສວ ເອກສ຺ສ. ອຎ຺ຎຖາ ຫິ ເອໂກ ຘມ຺ໂມ ເອກສ຺ສ ຘມ຺ມສ຺ສ ປຈ຺ຈໂຍ ນາມ ນຕ຺ຖິ. ເອເກເນວາຕິ ສຫຊາຕອຕ຺ຖິປຈ຺ຈເຍເນວ ຍຖາ ໂອກ຺ກນ຺ຕິກ຺ຂເຓ ວຕ຺ຖຸ. ຕຎ຺ຫິ ອຕ຺ຕນາ ສຫຊາຕສ຺ສ ນາມສ຺ສ ສຫຊາຕອຕ຺ຖິປຈ຺ຈເຍເນວ ປຈ຺ຈໂຍ ໂຫຕິ, ນ ປຸເຣຊາຕາທິນາ. ເອໂກ ສຫຊາຕອຣູປກ຺ຂນ຺ໂຘ ອເນເກສໍ ອຕ຺ຕນາ ສຫຊາຕານໍ ອຣູປກ຺ຂນ຺ຘານໍ ເອເກນ ສຫຊາຕອຕ຺ຖິປຈ຺ຈເຍນ, ອເນເກຫິ ສຫຊາຕປຈ຺ຉາຊາຕອຕ຺ຖິປຈ຺ຈເຍຫິ ຍຖາກ຺ກມໍ ອຕ຺ຕນາ ສຫຊາຕານໍ ຈິຕ຺ຕສມຸຏ຺ຐານຣູປານໍ ປຸເຣຊາຕານໍ ເຕສມຸຏ຺ຐານິກຣູປານໍ. ອເນໂກ ປຸເຣຊາຕວຕ຺ຖຸຣູປຎ຺ເຈວ ສຫຊາຕອຣູປກ຺ຂນ຺ຘາ ຈ ເອກສ຺ສ ອຣູປກ຺ຂນ຺ຘສ຺ສ ຍຖາກ຺ກມໍ ປຸເຣຊາຕສຫຊາຕອຕ຺ຖິປຈ຺ຈເຍຫິ. ອເນໂກ ອຣູປຘມ຺ໂມ ອເນເກສໍ ສຫຊາຕອຣູປຘມ຺ມານໍ ປຸເຣຊາຕຣູປຘມ຺ມານຎ຺ຈ ສຫຊາຕປຈ຺ຉາຊາຕອຕ຺ຖິປຈ຺ຈເຍຫິ. ອເນໂກ ວາ ອາຫາຣິນ຺ທ຺ຣິຍປ຺ປກາໂຣ ອເນເກສໍ ຣູປຘມ຺ມານໍ ຍຖາຣຫໍ ສຫຊາຕປຸເຣຊາຕປຈ຺ຉາຊາຕາຫາຣິນ຺ທ຺ຣິຍວເສນ ອຕ຺ຖິປຈ຺ຈເຍນ ປຈ຺ຈໂຍ ໂຫຕິ. ເອວໍ ປຈ຺ຈຍຸປ຺ປນ຺ນານໍ ອສມານຕ຺ເຕປິ ອຍມຕ຺ໂຖ ສມ຺ຠວຕິ, ສມານຕ຺ເຕ ປນ ວຕ຺ຕພ຺ພເມວ ນຕ຺ຖິ. ເຕນາຫ ‘‘ສມານຕ຺ເຕ ປຈ຺ຈຍຸປ຺ປນ຺ນຘມ຺ມານ’’ນ຺ຕິ. ສຫຊາຕໍ ປຸເຣຊາເຕເນວ ສຫ ອຕ຺ຖິປຈ຺ຈໂຍ ໂຫຕີຕິ ສຫຊາຕອຕ຺ຖິປຈ຺ຈຍຘມ຺ໂມ ປຸເຣຊາຕອຕ຺ຖິປຈ຺ຈຍຘມ຺ເມນ ສເຫວ ອຕ຺ຖິປຈ຺ຈໂຍ ໂຫຕິ. ຍຖາ ວຕ຺ຖຸນາ ປຸເຣຊາຕອຕ຺ຖິປຈ຺ຈຍໍ ລຠນ຺ຕາ ເອວ ກຸສລາທິຘມ຺ມາ ສຫຊາຕານໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານໍ ສຫຊາຕອຕ຺ຖິປຈ຺ຈໂຍ ໂຫນ຺ຕິ, ຕຖາ ເຕ ປຸເຣຊາຕສ຺ສ ກາຍສ຺ສ ປຈ຺ຉາຊາຕປຈ຺ຈໂຍປິ ໂຫນ຺ຕິເຍວ. ເຕນາຫ ‘‘ປຈ຺ຉາຊາເຕນ ຈາ’’ຕິ. ອຕ຺ຖິປຈ຺ຈໂຍ ໂຫຕີຕິ ສມ຺ພນ຺ໂຘ. ອຍໍ ສຫຊາຕປຈ຺ຉາຊາຕານໍ ອຕ຺ຖິປຈ຺ຈຍຠາໂວ ປຈ຺ຈຍຘມ຺ມານໍ ອເຠເທ ເອວ ອິຈ຺ຉິໂຕ, ນ ເຠເທ. ເຕນາຫ ‘‘ອນຎ຺ຎຘມ຺ມຕ຺ເຕນ…ເປ… ນານາຘມ຺ມຕ຺ເຕ’’ຕິ.

ອິທານິ ຕສ຺ສ ນານາຘມ຺ມຕ຺ເຕ ອຠາວໍ ປາຬິຍາ ວິຠາເວນ຺ໂຕ ‘‘ຍທິ ສິຍາ’’ຕິອາທິມາຫ. ຕຕ຺ຖ ເອໂກ ອຕ຺ຖິປຈ຺ຈຍຠາໂວ ນຕ຺ຖີຕິ ເອກສ຺ເສວ ປຈ຺ຈຍຘມ຺ມສ຺ສ ວເສນ ລພ຺ຠມາໂນ ເອໂກ ອຕ຺ຖິປຈ຺ຈຍຠາໂວ ນຕ຺ຖິ. ກສ຺ມາ? ວິໂຣຘໂຕ. ເຕນ ວຸຕ຺ຕໍ ‘‘ສຫຊາຕ…ເປ… ນ ວຸຕ຺ຕ’’ນ຺ຕິ. ເອວຎ຺ຈ ກຕ຺ວາຕິ ສຫຊາຕປຈ຺ຉາຊາຕານໍ ເອກຘມ຺ມວເສນ ສຫ ອລາຠໂຕ ເອວ. ເອກຘມ຺ມວເສນາຕິ ເອກສ຺ເສວ ປຈ຺ຈຍຘມ຺ມສ຺ສ ວເສນ. ເຕນາຫ ‘‘ນານາຘມ຺ມານໍ ວິຣຸທ຺ຘສຠາວຕ຺ຕາ’’ຕິ. ວິຣຸທ຺ຘສຠາວຕາ ຈ ສຫຊາຕປຈ຺ຉາຊາຕວເສນ ເວທິຕພ຺ພາ, ອິຘ ປນ ໂລກິຍໂລກຸຕ຺ຕຣາທິຠາວໂຕຕິ. ອຎ຺ຎຖາຕິ ເຕສໍ ສຫຊາຕປຈ຺ຉາຊາຕານໍ ເອກຊ຺ຌໍ ລາເຠ. ອິນ຺ທ຺ຣິຍປຏິກ຺ເຂເປປີຕິ ອິນ຺ທ຺ຣິຍປຈ຺ຈເຍ ປຈ຺ຈນີກໂຕ ຐິເຕປິ. ຕສ຺ສ ປຎ຺ຫສ຺ສ ລາຠໂຕຕິ ‘‘ອຸປາທິນ຺ນຸປາທານິໂຍ ຈ ອນຸປາທິນ຺ນຸປາທານິໂຍ ຈ ຘມ຺ມາ ອຸປາທິນ຺ນຸປາທານິຍສ຺ສ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ’’ຕິ ເອຕສ຺ສ ປຎ຺ຫສ຺ສ ລາຠໂຕ. ພາວີສາຕິ ເອກມູລກາວສານາ ນວ, ເອກມູລກທຸກາວສານາ ປຎ຺ຈ, ເອກມູລກຕິກາວສານເມກໍ, ທຸກມູລເກກາວສານາ ຈຕ຺ຕາໂຣ, ທຸກມູລກາວສານາ ທ຺ເວ, ທຸກມູລກຕິກາວສານເມກນ຺ຕິ ເອວໍ ພາວີສຕິ. ຍຖາ ປຸພ຺ເພ ສຫຊາຕໍ ປຸເຣຊາເຕນ ສເຫວ ອຕ຺ຖິປຈ຺ຈໂຍ ໂຫຕີຕິ ວຸຕ຺ຕໍ, ເອວໍ ປຸເຣຊາຕມ຺ປິ ເຕນາຕິ ທສ຺ເສນ຺ໂຕ ອາຫ ‘‘ປຸເຣຊາຕໍ ສຫຊາເຕເນວ ສຫ ອຕ຺ຖິປຈ຺ຈໂຍ ໂຫຕີ’’ຕິ. ຕຕ຺ຖ ສຫຊາເຕເນວ ສຫາຕິ ສຫຊາເຕນ ສເຫວ. ອຏ຺ຐານປ຺ປຍຸຕ຺ໂຕ ຫິ ອຍໍ ເອວ-ສທ຺ໂທ, ສຫຊາເຕນ ນ ວິນາ ປຸເຣຊາຕອຕ຺ຖິປຈ຺ຈໂຍຕິ ອຕ຺ໂຖ. ອິຕເຣສຸ ປນ ອຕ຺ຖິປຈ຺ຈຍຘມ຺ເມສຸ ນິຍໂມ ນຕ຺ຖິ ເຕຫິ ສຫາປິ ວິນາປິ ຠາວໂຕ. ເຕນາຫ ‘‘ນ ອິຕເຣຫີ’’ຕິ. ຕມ຺ປິ ວຕ຺ຖຸ ຕໍສຫິຕປຸເຣຊາຕເມວາຕິ ຍໍ ‘‘ປຸເຣຊາຕໍ ສຫຊາເຕເນວ ສຫ ອຕ຺ຖິປຈ຺ຈໂຍ ໂຫຕີ’’ຕິ ວຸຕ຺ຕໍ, ຕມ຺ປິ ວຕ຺ຖຸປຸເຣຊາຕຎ຺ເຈວ ຕໍສຫິຕາຣມ຺ມຓປຸເຣຊາຕເມວ ຈ, ນ ເກວລໍ ອາຣມ຺ມຓປຸເຣຊາຕໍ. ເຕນາຫ ‘‘ນ ອິຕຣ’’ນ຺ຕິ.

ອິທານິ ຍຖາວຸຕ຺ຕມຕ຺ຖໍ ປາຐນ຺ຕເຣນ ວິຠາເວຕຸໍ ‘‘ກຸສລຕ຺ຕິເກ ຫີ’’ຕິອາທິ ວຸຕ຺ຕໍ. ຍທິ ປຸເຣຊາຕໍ ຕໍສຫຊາເຕນ ວິນາປິ ອຕ຺ຖິປຈ຺ຈໂຍ ສິຍາ, ‘‘ນວິປ຺ປຍຸຕ຺ຕປຈ຺ຈຍາ ອຕ຺ຖິຍາ ປຎ຺ຈາ’’ຕິ ວຕ຺ຕຸໍ ນ ສກ຺ກາ, ວຸຕ຺ຕຎ຺ເຈຕໍ, ຕສ຺ມາ ວິຎ຺ຎາຍຕິ ‘‘ປຸເຣຊາຕໍ ສຫຊາເຕນ ສເຫວ ອຕ຺ຖິປຈ຺ຈໂຍ ໂຫຕີ’’ຕິ. ນວິປ຺ປຍຸຕ຺ເຕ ພາວີສາຕິ ເອຕ຺ຖາປິ ເອເສວ ນໂຍ. ຕຕ຺ຖາຕິ ສນິທສ຺ສນຕ຺ຕິເກ. ອຕ຺ຖິວິຠງ຺ເຄຕິ ອຕ຺ຖິປຈ຺ຈຍສ຺ສ ວິຠຊເນ. ຕິກມູລເກກາວສານນ຺ຕິ ‘‘ສນິທສ຺ສນສປ຺ປຏິໂຆ ຈ ອນິທສ຺ສນສປ຺ປຏິໂຆ ຈ ອນິທສ຺ສນອປ຺ປຏິໂຆ ຈ ຘມ຺ມາ ອນິທສ຺ສນສປ຺ປຏິຆສ຺ສ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ’’ຕິ ເອວໍ ຕິກມູລໂກ ເອກາວສາໂນ ປຎ຺ໂຫ ອຸທ຺ຘໂຏ. ປຈ຺ຈຍຸທ຺ຘາເຣຕິ ຈ ຕຕ຺ເຖວ ປຈ຺ຈຍຸທ຺ຘາເຣ. ຕຖາ ຈ ໂສ ປຎ຺ໂຫ ອຸທ຺ຘໂຏ. ຕຍິທໍ ກຖໍ, ຍທິ ປຸເຣຊາຕໍ ສຫຊາເຕເນວ ສຫ ອຕ຺ຖິປຈ຺ຈໂຍ ໂຫຕີຕິ ໂຈທນາຍໍ ອາຫ ‘‘ຕໍ ວຕ຺ຖຸສຫິຕສ຺ສ…ເປ… ປຈ຺ຈຍຠາວໂຕ’’ຕິ. ຕສ຺ສຕ຺ໂຖ – ຍທິປິ ຕຕ຺ຖ ສນິທສ຺ສນສປ຺ປຏິຆຄ຺ຄຫເຓນ ອາຣມ຺ມຓປຸເຣຊາຕສ຺ສ ອຕ຺ຖິປຈ຺ຈຍຠາໂວ ວຸຕ຺ໂຕ, ຕຖາປິ ອນິທສ຺ສນອປ຺ປຏິຆຄ຺ຄຫຓໂຕ ວຕ຺ຖຸມ຺ປິ ຄຫິຕນ຺ຕິ ວຕ຺ຖຸສຫິຕສ຺ສ ອາຣມ຺ມຓປຸເຣຊາຕສ຺ສ ສຫຊາເຕນ ສເຫວ ອຕ຺ຖິປຈ຺ຈຍຠາໂວ ວຸຕ຺ໂຕຕິ. ປຈ຺ຉາຊາຕໍ ອາຫາຣິນ຺ທ຺ຣິເຍເຫວ ສຫ ອຕ຺ຖິປຈ຺ຈໂຍ ໂຫຕິ, ນ ປຸເຣຊາເຕນາຕິ ອຘິປ຺ປາໂຍ. ອນຎ຺ຎຘມ຺ມຕ຺ເຕຕິ ປຈ຺ຈຍຘມ຺ມສ຺ສ ອນຎ຺ຎຕ຺ເຕ. ສຫຊາເຕນ ສຫ ອຕ຺ຖິປຈ຺ຈໂຍ ໂຫຕີຕິ ໂຍຊນາ. ເສສປທທ຺ວເຍປິ ເອເສວ ນໂຍ. ຕຕ຺ຖາປິ ປຏິໂຍຄິປຸເຣຊາຕໍເຍວ ທຏ຺ຐພ຺ພໍ. ‘‘ອຕ຺ຖິປຈ຺ຈຍວິເສເສສຸ ປນາ’’ຕິອາທິນາ ອຕ຺ຕນາ ທສ຺ສິຕໍ ວິຈາຣໍ ‘‘ເອວເມຕ’’ນ຺ຕິ ນິຄມນວເສນ ປຈ຺ຈາມສຕິ.

ອຸປາທິນ຺ນຕ຺ຕິກວຓ຺ຓນາ ນິຏ຺ຐິຕາ.