໖. ວິຕກ຺ກຕ຺ຕິກວຓ຺ຓນາ

໒໒. ວິຕກ຺ກຕ຺ຕິເກ ສຕ຺ຕສຸ ມູລເກສູຕິ ‘‘ສວິຕກ຺ກສວິຈາຣໍ ຘມ຺ມໍ ປຏິຈ຺ຈາ’’ຕິອາທິນາ ອາຄຕານິ ຕີຓິ ເອກການິ, ຕີຓິ ທຸການິ, ເອກໍ ຕິກນ຺ຕິ ເອວໍ ເອກມູລການິ ຍານິ ສຕ຺ຕມູລການິ, ເຕສຸ. ຍຖາກ຺ກມນ຺ຕິ ປາຬິຍໍ ອາຄຕານຸກ຺ກເມນ. ສຕ຺ຕາຕິ ປຐເມ ເອກເກ ສຕ຺ຕ. ປຎ຺ຈາຕິ ທຸຕິເຍ ປຎ຺ຈ. ຕານິມານິ ເຫຕຸປຈ຺ຈເຍ ວຸຕ຺ຕນເຍນ ເວທິຕພ຺ພານິ. ອິຘ ປນ ປວຕ຺ຕິວເສເນວ ໂຍເຊຕພ຺ພໍ. ຕີຓີຕິອາທີສຸ ຕຕິເຍ ຕີຓິ, ຈຕຸຕ຺ເຖ ເອກໍ, ປຎ຺ຈເມ ຕີຓິ, ຉຏ຺ເຐປິ ຕີຓິ, ສຕ຺ຕເມ ເອກໍ. ຕານິ ປນ ຍຖາກ຺ກມໍ ຕຕິຍປທໍ ປຏິຈ຺ຈ ຕຕິຍປທທຸຕິຍປທຕທຸຠຍວເສນ, ປຐມປທຕຕິຍປທານິ ປຏິຈ຺ຈ ຕຕິຍປທວເສນ, ປຐມປທທຸຕິຍປທານິ ປຏິຈ຺ຈ ປຐມປທຕຕິຍປທຕທຸຠຍວເສນ, ທຸຕິຍປທຕຕິຍປທານິ ປຏິຈ຺ຈ ປຐມປທຕຕິຍປທຕທຸຠຍວເສນ, ປຐມທຸຕິຍຕຕິຍປທານິ ປຏິຈ຺ຈ ຕຕິຍປທວເສເນວ ເວທິຕພ຺ພານິ. ອຎ຺ຎມຎ຺ເຎ ອຏ຺ຐວີສາຕິອາທີສຸປິ ອິມິນາວ ນເຍນ ຄຓນາ ເວທິຕພ຺ພາ. ເອວນ຺ຕິ ຍຖາວຸຕ຺ຕໍ ຄຓນໍ ປຈ຺ຈາມສຕິ. ທຸຕິຍຕຕິຍມູລເກສຸ ເອກໍ ເອກນ຺ຕິ ທຸຕິຍມູລເກ ເອກໍ, ຕຕິຍມູລເກ ເອກນ຺ຕິ ໂຍເຊຕພ຺ພໍ. ຕຖາ ອາເສວເນຕິ ຍຖາ ປຸເຣຊາເຕ ເອກາທສ, ຕຖາ ອາເສວເນຕິ ອຕ຺ໂຖ. ອຎ຺ຎານີຕິ ອຘິປຕິອຎ຺ຎມຎ຺ຎປຸເຣຊາຕາເສວນໂຕ ອຎ຺ເຎສຸ ປຈ຺ຈເຍສຸ ຄຓນານິ. ເຫຕຸອາຣມ຺ມຓສທິສານີຕິ ເຫຕຸອາຣມ຺ມຓປຈ຺ຈເຍສຸ ຄຓນາສທິສານິ.

໓໑. ອວິເສເສນາຕິ ‘‘ວິປາກ’’ນ຺ຕິ ວິເສສນໍ ອກຕ຺ວາ ນ ປນ ວິສ຺ສຊ຺ຊນໍ ກຕນ຺ຕິ ໂຍຊນາ. ຕຕ຺ຖ ກາຣຓໍ ວຕ຺ຕຸໍ ‘‘ກສ຺ມາ’’ຕິອາທິມາຫ. ອິຕເຣສນ຺ຕິ ໂລກິຍວິປາການໍ. ເຕ ວິສຸໍ ນິທ຺ຘາເຣຕ຺ວາ ວຸຕ຺ຕາຕິ ເຕ ຍຖາວຸຕ຺ຕໂລກິຍວິປາກາ ອວິຕກ຺ກວິຈາຣມຕ຺ຕສາມຎ຺ຎໂຕ ວິສຸໍ ນີຫຣິຕ຺ວາ ວຸຕ຺ຕາ. ‘‘ອວິຕກ຺ກວິຈາຣມຕ຺ເຕ ຂນ຺ເຘ ປຏິຈ຺ຈ ອວິຕກ຺ກວິຈາຣມຕ຺ຕາ ອຘິປຕີ’’ຕິ ວຸຕ຺ຕຣາສິ ປຸຣິມໂກຏ຺ຐາໂສ.

໓໘. ເອຕນ຺ຕິ ‘‘ອວິຕກ຺ກວິຈາຣມຕ຺ຕໍ ອວິຕກ຺ກ…ເປ… ສຫ ຄຈ຺ຉນ຺ເຕນາ’’ຕິ ອາຄຕປາຬິປທໍ. ຕສ຺ສ ອຕ຺ຖໍ ທສ຺ເສຕຸໍ ‘‘ມູລໍ…ເປ… ວຸຕ຺ຕໍ ໂຫຕີ’’ຕິ ອາຫ. ຕຕ຺ຖ ອວິຕກ຺ກ…ເປ… ໂຍເຊນ຺ເຕນາຕິ ອວິຕກ຺ເກຫິ ອວິຕກ຺ກປຣິຍາເຍນ ວຸຕ຺ເຕຫິ ອວິຕກ຺ກວິຈາຣມຕ຺ຕອວິຕກ຺ກອວິຈາຣປເທຫິ ສຫ ມູລປທໍ, ອາເສວນມູລກເມວ ວາ ຄຈ຺ຉນ຺ເຕນ ໂຍເຊນ຺ເຕນ ນປຸເຣຊາຕສທິສໍ ນາເສວເນ ປາຬິຄມນໍ ກາຕພ຺ພໍ, ປຐິຕພ຺ພນ຺ຕິ ອຕ຺ໂຖ. ໂປຕ຺ຖເກສຸ ປນ ‘‘ອວິຕກ຺ກວິຈາຣມຕ຺ຕໍ ວິປາເກນ ສຫ ຄຈ຺ຉນ຺ເຕນາ’’ຕິ ທິສ຺ສຕິ, ວິປາເກນ ວິເສສນຠູເຕນ ສຫ ໂຍເຊນ຺ເຕນາຕິ ອຕ຺ໂຖ. ເຕເນວາຫ ‘‘ວິປາກໍ ອວິຕກ຺ກວິຈາຣມຕ຺ຕນ຺ຕິອາທິ ໂຍເຊຕພ຺ພ’’ນ຺ຕິ.

ເອກມູລເກ ປາຬິຍໍ ໂຍຊິຕເມວາຕິ ‘‘ທຸມູລເກສຸ ປຐເມ’’ຕິ ວຸຕ຺ຕໍ.

໔໙. ມູລປທເມວ ອວສານຠາເວນາຕິ ‘‘ສວິຕກ຺ກສວິຈາຣໍ ຘມ຺ມໍ ປຈ຺ຈຍາ ສວິຕກ຺ກສວິຈາໂຣ ຘມ຺ໂມ ອຸປ຺ປຊ຺ຊຕິ ນເຫຕຸປຈ຺ຈຍາ’’ຕິອາທິນາ ມູລປທເມວ ອວສານຠາເວນ ໂຍຊິຕໍ. ສຕ຺ຕ ໂມຫາ ອຸທ຺ຘຣິຕພ຺ພາຕິ ອິທໍ ນເຫຕຸປຈ຺ຈຍໍ ສນ຺ຘາຍ ວຸຕ຺ຕໍ. ປຏິຈ຺ຈວາເຣ ຫິ ອເຫຕຸກໂມໂຫ ຕິກ຺ຂຕ຺ຕຸເມວ ອາຄໂຕ. ອິຘ ປນ ‘‘ວຕ຺ຖຸໍ ປຈ຺ຈຍາ’’ຕິອາທິນາ ຈຕູສຸປິ ມູລເກສຸ ອາຄໂຕ, ຕສ຺ມາ ສຕ຺ຕກ຺ຂຕ຺ຕຸໍ ອາຄມນໍ ສນ຺ຘາຍ ‘‘ສຕ຺ຕ ໂມຫາ’’ຕິ ວຸຕ຺ຕນ຺ຕິ ເວທິຕພ຺ພໍ.

ອຸປນິສ຺ສເຍນ ສງ຺ຄຫິຕຕ຺ຕາຕິ ອຸປນິສ຺ສຍປຈ຺ຈເຍເນວ ກມ຺ມປຈ຺ຈຍສ຺ສ ສງ຺ຄຫິຕຕ຺ຕາ. ສພ຺ພສ຺ສປິ ຣູປາຣູປາວຈຣກມ຺ມສ຺ສ ພລວຠາວໂຕ ອຸປນິສ຺ສຍຕ຺ຕາຠາໂວ ນຕ຺ຖິ, ຍໂຕ ຕໍ ‘‘ຄຣູ’’ຕິ ວຸຈ຺ຈຕິ, ກມ຺ມກ຺ຂຍກຣສ຺ສ ປນ ກມ຺ມສ຺ສ ພລວຠາເວ ວຕ຺ຕພ຺ພເມວ ນຕ຺ຖີຕິ ອິມມຕ຺ຖໍ ປາຬິຍາ ເອວ ວິຠາເວຕຸໍ ວຸຕ຺ຕໍ ‘‘ອຸປາທິນ຺ນຕ຺ຕິກປຎ຺ຫາວາຣປຈ຺ຈນີເຍ ຫິ…ເປ… ວິຎ຺ຎາຍຕີ’’ຕິ.

ວິຕກ຺ກຕ຺ຕິກວຓ຺ຓນາ ນິຏ຺ຐິຕາ.