໗. ຘາຕຸວາຣວຓ຺ຓນາ

໓໓໒-໓໔໐. ອປ຺ປຫີນຸປ຺ປຕ຺ຕິຣຫຠາວາ ອິຘ ອນຸຄມນສຍນານີຕິ ທສ຺ເສນ຺ໂຕ ‘‘ຍສ຺ມິໍ …ເປ… ອຕ຺ໂຖ’’ຕິ ອາຫ. ອິຘາປິ ຍຸຕ຺ຕາຕິ ປຸພ຺ເພ ວຸຕ຺ຕເມວຕ຺ຖໍ ປຣາມສຕິ. ຕຖາ ຫິ ວຸຕ຺ຕໍ ‘‘ກາຣຓລາເຠ ອຸປ຺ປຕ຺ຕິອຣຫຕໍ ທສ຺ເສຕີ’’ຕິ (ຍມ. ມູລຏີ. ອນຸສຍຍມກ ໑). ຉ ປຏິເສຘວຈນານີຕິ ຕິສ຺ສນ຺ນໍ ຘາຕູນໍ ຈຸຕູປປາຕວິສິຏ຺ຐານໍ ປຏິເສຘນວເສນ ວຸຕ຺ຕວຈນານິ, ຕໂຕ ເອວ ຘາຕຸວິເສສນິທ຺ຘາຣຓານິ ນ ໂຫນ຺ຕິ. ປຏິເສໂຘຕິ ຫິ ອິຘ ສຕ຺ຕາປຏິເສໂຘ ວຸຕ຺ໂຕຕິ ອຘິປ຺ປາເຍນ ວທຕິ. ອຎ຺ຎຕ຺ເຖ ປນ ນ-ກາເຣ ນາຍໍ ໂທໂສ. ອິມໍ ນາມ ຘາຕຸໍ. ຕໍມູລິກາສູຕິ ປຏິເສຘມູລິກາສຸ. ເອວຎ຺ຫີຕິ ‘‘ນ ກາມຘາຕຸຍາ ຈຸຕສ຺ສ ກາມຘາຕຸໍ ອຸປປຊ຺ຊນ຺ຕສ຺ສາ’’ຕິອາທິນາ ປຐມໂຍຊນາຍ ສຕິ. ນກາມຘາຕຸອາທີສຸ ອຸປປຕ຺ຕິກິຕ຺ຕເນເນວ ນກາມຘາຕຸອາທິຄ຺ຄຫເຓນປິ ຘາຕຸວິເສສສ຺ເສວ ຄຫິຕຕາຍ ອຕ຺ຖໂຕ ວິຎ຺ຎາຍມານຕ຺ຕາ. ເຕນາຫ ‘‘ນ ກາມຘາຕຸ…ເປ… ວິຎ຺ຎາຍຕີ’’ຕິ. ຠຎ຺ຊິຕພ຺ພາຕິ ວິຠຊິຕພ຺ພາ. ວິຠາໂຄ ປເນຕ຺ຖ ທຸວິໂຘ ອິຈ຺ຉິໂຕຕິ ອາຫ ‘‘ທ຺ວິຘາ ກາຕພ຺ພາຕິ ອຕ຺ໂຖ’’ຕິ. ປຸຈ຺ຉາ ຈ ວິສ຺ສຊ຺ຊນານິ ຈ ປຸຈ຺ຉາວິສ຺ສຊ຺ຊນານິ. ຍຖາ ອວຸຕ຺ເຕ ຠງ຺ຄາຠາວສ຺ສ ອວິຎ຺ຎາຕຕ຺ຕາ ‘‘ອນຸສຍາ ຠງ຺ຄາ ນຕ຺ຖີ’’ຕິ ວຕ຺ຕພ຺ພໍ, ຕຖາ ຕຍິທໍ ‘‘ກຕິ ອນຸສຍາ ຠງ຺ຄາ’’ຕິ ເອຕທເປກ຺ຂນ຺ຕິ ຕທປິ ວຕ຺ຕພ຺ພໍ. ປຸຈ຺ຉາເປກ຺ຂຎ຺ຫິ ວິສ຺ສຊ຺ຊນນ຺ຕິ.

ຘາຕຸວາຣວຓ຺ຓນາ ນິຏ຺ຐິຕາ.

ອນຸສຍຍມກວຓ຺ຓນາ ນິຏ຺ຐິຕາ.