ເສທໂມຈນຄາຖາ

ອວິປ຺ປວາສປຎ຺ຫາວຓ຺ຓນາ

໔໗໙. ເສທໂມຈນຄາຖາສຸ ອກປ຺ປິຍສມ຺ໂຠໂຄຕິ ອນຸປສມ຺ປນ຺ເນຫິ ສທ຺ຘິໍ ກາຕຸໍ ປຏິກ຺ຂິຕ຺ໂຕ ອຸໂປສຖາທິສໍວາໂສ ເອວ ວຸຕ຺ໂຕ. ປຎ຺ຫາ ເມສາຕິ ເອຕ຺ຖ ມ-ກາໂຣ ປທສນ຺ຘິກໂຣ. ເອສາຕິ ຈ ລິງ຺ຄວິປລ຺ລາສວເສນ ວຸຕ຺ຕໍ, ປຎ຺ໂຫ ເອໂສຕິ ອຕ຺ໂຖ. ປຎ຺ຫ-ສທ຺ໂທ ວາ ທ຺ວິລິງ຺ໂຄ ທຏ຺ຐພ຺ໂພ. ເຕນາຫ ‘‘ເອສາ ປຎ຺ຫາ’’ຕິອາທິ.

ຄຣຸຠຓ຺ຑໍ ສນ຺ຘາຍາຕິ ຄຣຸຠຓ຺ເຑນ ຄຣຸຠຓ຺ຑປຣິວຕ຺ຕນໍ ສນ຺ຘາຍ. ທສາຕິ ທສ ອວນ຺ທິຍປຸຄ຺ຄເລ. ເອກາທເສຕິ ອຠພ຺ພປຸຄ຺ຄເລ. ສິກ຺ຂາຍ ອສາຘາຣໂຓຕິ ຂຸຣຠຓ຺ຑໍ ຘາເຣຕຸໍ ອນຸຎ຺ຎາຕສິກ຺ຂາປເທນ ຠິກ຺ຂູຫິ ອສາຘາຣຓສິກ຺ຂາປໂທຕິ ອຕ຺ໂຖ.

ອຸພ຺ຠກ຺ຂເກ ນ ວທາມີຕິ ອກ຺ຂໂຕ ອຸທ຺ຘໍ ສີເສ ຐິຕມຸຂມຄ຺ເຄປິ ປາຣາຊິກໍ ສນ຺ຘາຍ ນ ວທາມິ. ອໂຘນາຠິນ຺ຕິ ນາຠິໂຕ ເຫຏ຺ຐາ ຐິຕວຈ຺ຈປສ຺ສາວມຄ຺ເຄປິ ວິວຊ຺ຊິຍ ອຎ຺ຎສ຺ມິໍ ສຣີຣປ຺ປເທເສ ເມຖຸນຘມ຺ມປຈ຺ຈຍາ ກຖໍ ປາຣາຊິໂກ ສິຍາຕິ ອຕ຺ໂຖ.

ເຉຊ຺ຊວຕ຺ຖຸນ຺ຕິ ປາຣາຊິກໍ.

ອວິປ຺ປວາສປຎ຺ຫາວຓ຺ຓນາ ນິຏ຺ຐິຕາ.

ປາຣາຊິກາທິປຎ຺ຫາວຓ຺ຓນາ

໔໘໐. ທຸສ຺ສກຸຏິອາທີນີຕິ ອາທິ-ສທ຺ເທນ ອຈ຺ຉຕຣຕິປຸປຏ຺ຏາທີຫິ, ຕິຓປຓ຺ຓາທີຫິ ຈ ປຏິຈ຺ຉນ຺ນກຸຏິໂຍ ສງ຺ຄຓ຺ຫາຕິ. ຕາທິສາຍ ຫິ ກຸຏິຍາ ພຫິ ຐຕ຺ວາ ອນ຺ໂຕ ຐິຕາຍ ອິຕ຺ຖິຍາ ມຄ຺ເຄ ທຸສ຺ສາທິນາ ສນ຺ຖຕໍ ກຕ຺ວາ ປເວເສນ຺ໂຕປິ ປາຣາຊິໂກ ສິຍາ. ລິງ຺ຄປຣິວຕ຺ຕໍ ສນ຺ຘາຍ ວຸຕ຺ຕາຕິ ລິງ຺ເຄ ປຣິວຕ຺ເຕ ປຏິຄ຺ຄຫຓສ຺ສ ວິຊຫນໂຕ ປຸນ ອປ຺ປຏິຄ຺ຄເຫຕ຺ວາ ປຣິຠຸຎ຺ຊນາປຕ຺ຕິໍ ສນ຺ຘາຍ ວຸຕ຺ຕໍ.

ປາຬິຍໍ ຠິກ຺ຂູ ສິຍາ ວີສຕິຍາ ສມາຄຕາຕິ ວີສຕິຍາ ສງ຺ຂາຕາຍ ຠິກ຺ຂູ ສມາຄຕາ, ເອເຕນ ສພ຺ພກມ຺ມາຣຫຕໍ ສງ຺ຆສ຺ສ ທສ຺ເສຕິ.

ນິວຕ຺ໂຖຕິ ຄາຖາຍ ອນ຺ຕຣວາສເກນ ນິວຕ຺ໂຖ ອຸຕ຺ຕຣາສງ຺ເຄນ ທິຄຸຓໍ ກຕ຺ວາ ປາຣຸຕສງ຺ຆາຏິໂຍ. ອິຕິ ຕານິ ຕີຓິປິ ຈີວຣານິ ກາເຍ ຄຕາເນວ ຠິກ຺ຂຸນິຍາ ພິນ຺ທຸມຕ຺ຕໍ ກາຬກໍ ອຸທເກນ ໂຘວິຕມຕ຺ເຕ ນິສ຺ສຄ຺ຄິຍານິ ໂຫນ຺ຕີຕິ ອຕ຺ໂຖ.

ອິຕ຺ຖິໍ ຫເນຕິ ຄາຖາຍ ນ ມາຕຸຠູຕໍ ອິຕ຺ຖິໍ ຫເນຍ຺ຍ, ນ ປິຕຸຠູຕໍ ປຸຣິສໍ ຫເນຍ຺ຍ. ອນຣິຍນ຺ຕິ ຕຎ຺ຈ ອນຣຫນ຺ຕເມວ ຫເນຍ຺ຍ, ເອເຕນ ອຣຫນ຺ຕຆາຕໂກປິ ນ ໂຫຕີຕິ ທສ຺ເສຕິ. ອນນ຺ຕຣໍ ຜຸເສຕິ ອານນ຺ຕຣິຍໍ ຜຸສຕີຕິ ອຕ຺ໂຖ.

໔໘໑. ສຸປ຺ປຕິຏ຺ຐິຕ-ນິຄ຺ໂຣຘສທິສນ຺ຕິ ໂຍຊນວິຕ຺ຖຕໍ ຣຸກ຺ຂໍ ສນ຺ຘາຍ ວຸຕ຺ຕໍ.

ສຕ຺ຕຣສເກສູຕິ ຠິກ຺ຂຸນີນໍ ປຎ຺ຎຕ຺ຕສຕ຺ຕຣສສງ຺ຆາທິເສເສສຸ.

ປາຣາຊິກາທິປຎ຺ຫາວຓ຺ຓນາ ນິຏ຺ຐິຕາ.