ຈູຬສງ຺ຄາມໍ

ອນຸວິຊ຺ຊກສ຺ສ ປຏິປຕ຺ຕິວຓ຺ຓນາ

໓໖໕. ຕຕ຺ຣ ຫີຕິ ຕສ຺ມິໍ ສນ຺ນິປາເຕ. ອຕ຺ຕປຈ຺ຈຕ຺ຖິກາຕິ ລຊ຺ຊິເປສລສ຺ສ ໂຈທກປາປຄຣຫີປຸຄ຺ຄລສ຺ສ ອນຕ຺ຖກາມາ ເວຣີປຸຄ຺ຄລາ. ສາສນປຈ຺ຈຕ຺ຖິກາຕິ ອຕ຺ຕໂນ ອນາຈາຣານຸຄຸຓໍ ພຸທ຺ຘວຈນໍ ປກາເສນ຺ໂຕ ຕຓ຺ຫາຄຕິກາ, ທິຏ຺ຐິຄຕິກາ ຈ. ອຊ຺ໂຌຄາເຫຕ຺ວາຕິ ອລຊ຺ຊິອຠິຠວນວເສນ ສງ຺ຆມຊ຺ຌໍ ປວິສິຕ຺ວາ. ໂສ ສງ຺ຄາມາວຈໂຣຕິ ໂສ ໂຈທໂກ ສງ຺ຄາມາວຈໂຣ ນາມ. ທິຏ຺ຐສຸຕມຸຕມ຺ປິ ຣາຊກຖາທິກນ຺ຕິ ທິຏ຺ຐສຸຕວເສເນວ ຣາຊໂຈຣາທິກຖໍ, ມຸຕວເສນປິ ອນ຺ນາທິກຖຎ຺ຈ ອກເຖນ຺ເຕນາຕິ ໂຍເຊຕພ຺ພໍ. ກປ຺ປິຍາກປ຺ປິຍນິສ຺ສິຕາ ວາຕິອາທີສຸ ຣູປາຣູປປຏິຈ຺ເຉທປເທນ ສກລອຠິຘມ຺ມຕ຺ຖປິຏກຕ຺ຕໍ ທສ຺ເສຕິ. ສມຖາຈາຣາທີຫິ ປຏິສໍຍຸຕ຺ຕນ຺ຕິ ສກລສຸຕ຺ຕນ຺ຕປິຏກຕ຺ຕໍ. ຕຕ຺ຖ ສມຖາຈາໂຣ ນາມ ສມຖຠາວນາກ຺ກໂມ. ຕຖາ ວິປສ຺ສນາຈາໂຣ. ຐານນິສຊ຺ຊວຕ຺ຕາທິນິສ຺ສິຕາຕິ ສງ຺ຆມຊ຺ຌາທີສຸ ຄຣຸຈິຕ຺ຕີກາຣໍ ປຈ຺ຈຸປຏ຺ຐເປຕ຺ວາ ຐານາທິກ຺ກມນິສ຺ສິຕາ ເຈວ ຈຸທ຺ທສມຫາວຕ຺ຕາທິວຕ຺ຕນິສ຺ສິຕາ ຈ, ອາທິ-ສທ຺ເທນ ອປ຺ປິຈ຺ຉຕາທິນິສ຺ສິຕາ ຈາຕິ ອຕ຺ໂຖ. ປຎ຺ເຫ ອຸປ຺ປນ຺ເນຕິ ເກນຈິ ອຸປ຺ປນ຺ເນ ປຎ຺ເຫ ປຸຈ຺ຉິເຕ. ອິທຎ຺ຈ ອຸປລກ຺ຂຓມຕ຺ຕໍ, ຍໍ ກິຎ຺ຈິ ອຸປຏ຺ຐິຕໍ ຘມ຺ມໍ ຠາສສ຺ສູຕິ ອຘິປ຺ປາໂຍ.

ກຸລປເທໂສ ນາມ ຂຕ຺ຕິຍາທິຊາຕິຍມ຺ປິ ກາສິກຣາຊກຸລາທິກຸລວິເສໂສ. ເອຕເມວາຫ ‘‘ກຸລປເທໂສ ຂຕ຺ຕິຍກຸລາທິວເສເນວ ເວທິຕພ຺ໂພ’’ຕິ. ສນ຺ນິປາຕມຓ຺ຑເລຕິ ອຕ຺ຕໂນ ອນຸວິຊ຺ຊມານປ຺ປກາຣໍ ສງ຺ຆສ຺ສ ຎາປນຕ຺ຖໍ ອຸຏ຺ຐາຍ ສງ຺ຆສນ຺ນິປາຕມຊ຺ເຌ ອິໂຕ ຈິໂຕ ຈ ປເຣສໍ ມຸຂໍ ໂອໂລເກນ຺ເຕນ ນ ຈຣິຕພ຺ພໍ. ຍຖານິສິນ຺ເນເນວ ຘມ຺ມວິນຍານຸຄຸຓໍ ວິນິຈ຺ຉຍໍ ຍຖາ ສພ຺ເພ ສຸຓນ຺ຕິ, ຕຖາ ວຕ຺ຕພ຺ພນ຺ຕິ ອຕ຺ໂຖ.

ປາຬິຍໍ ອຈຓ຺ຑິກເຕນາຕິ ອກຕຈຓ຺ຑຠາເວນ, ອຜຣຸເສນາຕິ ອຕ຺ໂຖ. ‘‘ຫິຕານຸກມ຺ປິນາ’’ຕິ ເອເຕນ ເມຕ຺ຕາປຸພ຺ພຠາໂຄ ວຸຕ຺ໂຕ. ‘‘ກາຣຸຓິເກນ ຠວິຕພ຺ພ’’ນ຺ຕິ ອິມິນາ ອປ຺ປນາປ຺ປຕ຺ຕກຣຸຓາ ວຸຕ຺ຕາ. ‘‘ຫິຕປຣິສກ຺ກິນາ’’ຕິ ອິມິນາ ກຣຸຓາປຸພ຺ພຠາໂຄ. ເຕນາຫ ‘‘ກຣຸຓາ ຈ ກຣຸຓາປຸພ຺ພຠາໂຄ ຈ ອຸປຏ຺ຐາເປຕພ຺ໂພຕິ ອຍໍ ປທທ຺ວເຍປິ ອຘິປ຺ປາໂຍ’’ຕິ. ລຊ຺ຊິຍາຕິ ລຊ຺ຊິນີ.

ອນຸໂຍຄວຕ຺ຕໍ ກຖາເປຕ຺ວາຕິ ‘‘ກາເລນ ວກ຺ຂາມີ’’ຕິອາທິນາ (ປຣິ. ໓໖໒) ວຸຕ຺ຕວຕ຺ຕໍ. ອນຸຍຸຎ຺ຊນາຈາຣກ຺ກເມເນວ ອນຸຍຸຎ຺ຊນໍ ອນຸໂຍຄວຕ຺ຕໍ ນາມ, ຕໍ ກຖາເປຕ຺ວາ ເຕເນວ ກເມນ ອນຸຍຸຎ຺ຊາເປຕ຺ວາຕິ ອຕ຺ໂຖ. ອຸຊຸມທ຺ທເວນາຕິ ເອຕ຺ຖ ອຊ຺ຌາຫຣິຕພ຺ພປທໍ ທສ຺ເສຕິ ‘‘ອຸປຈຣິຕພ຺ໂພ’’ຕິ. ‘‘ຘມ຺ເມສຸ ຈ ປຸຄ຺ຄເລສຸ ຈາ’’ຕິ ອິທໍ ‘‘ມຊ຺ຌຕ຺ເຕນ ຠວິຕພ຺ພ’’ນ຺ຕິ ປກເຕນ ສມ຺ພນ຺ຘິຕພ຺ພນ຺ຕິ ອາຫ ‘‘ຘມ຺ເມສຸ ຈ ປຸຄ຺ຄເລສຸ ຈ…ເປ… ມຊ຺ຌຕ຺ໂຕຕິ ເວທິຕພ຺ໂພ’’ຕິ. ຍຎ຺ຫິ ຍຕ຺ຖ ກຕ຺ຖຈິ ກຕ຺ຕພ຺ພໍ, ຕໍ ຕຕ຺ຖ ອຕິກ຺ກມນ຺ໂຕ ມຊ຺ຌຕ຺ໂຕ ນາມ ນ ໂຫຕິ, ຘມ຺ເມສຸ ຈ ຄາຣໂວ ກຕ຺ຕພ຺ໂພ. ປຸຄ຺ຄເລສຸ ປນ ເມຕ຺ຕາຠາເວນ ປກ຺ຂປາຕຄາຣໂວ. ຕສ຺ມາ ອິມໍ ວິຘິໍ ອນຕິກ຺ກນ຺ໂຕວ ເຕສຸ ມຊ຺ຌຕ຺ໂຕຕິ ເວທິຕພ຺ໂພ.

໓໖໖. ສໍສນ຺ທນຕ຺ຖນ຺ຕິ ອາປຕ຺ຕິ ວາ ອນາປຕ຺ຕິ ວາຕິ ສໍສເຍ ຊາເຕ ສໍສນ຺ທິຕ຺ວາ ນິຈ຺ຉຍກຣຓຕ຺ຖໍ ວຸຕ຺ຕນ຺ຕິ ອຘິປ຺ປາໂຍ. ອຕ຺ຖທສ຺ສນາຍາຕິ ສາເຘຕພ຺ພສ຺ສ ອາປຕ຺ຕາທິອຸປເມຍ຺ຍຕ຺ຖສ຺ສ ໂຈທກຈຸທິຕເກ ອຕ຺ຕໂນ ປຏິຎ຺ຎາຍ ເອວ ສຣູປວິຠາວນຕ຺ຖໍ. ອຕ຺ໂຖ ຊານາປນຕ຺ຖາຍາຕິ ເອວໍ ວິຠາວິໂຕ ອຕ຺ໂຖ ໂຈທກຈຸທິຕກສງ຺ຆານໍ ຎາປນຕ຺ຖາຍ ນິຊ຺ຌາປນຕ຺ຖາຍ, ສມ຺ປຏິຈ຺ຉາປນຕ຺ຖາຍາຕິ ອຕ຺ໂຖ. ປຸຄ຺ຄລສ຺ສ ຐປນຕ຺ຖາຍາຕິ ໂຈທກຈຸທິຕເກ ອຕ຺ຕໂນ ປຏິຎ຺ຎາຍ ເອວ ອາປຕ຺ຕິຍໍ, ອນາປຕ຺ຕິຍໍ ວາ ປຕິຏ຺ຐາປນຕ຺ຖາຍ. ສາຣຓຕ຺ຖາຍາຕິ ປມຸຏ຺ຐສຣາປນຕ຺ຖາຍ. ສວຈນີຍກຣຓຕ຺ຖາຍາຕິ ໂທເສ ສາຣິເຕປິ ສມ຺ປຏິຈ຺ຉິຕ຺ວາ ປຏິກມ຺ມໍ ອກໂຣນ຺ຕສ຺ສ ສວຈນີຍກຣຓຕ຺ຖາຍ. ‘‘ນ ເຕ ອປສາເທຕພ຺ພາ’’ຕິ ອິທໍ ອຘິປ຺ເປຕຕ຺ຖທສ຺ສນໍ. ຕຕ຺ຖ ອວິສໍວາທກຏ຺ຐາເນ ຐິຕາ ເອວ ນ ອປສາເທຕພ຺ພາ, ນ ອິຕເຣຕິ ທຏ຺ຐພ຺ພໍ.

ອປ຺ປຈ຺ຈຍປຣິນິພ຺ພານຕ຺ຖາຍາຕິ ອາຍຕິໍ ປຏິສນ຺ຘິຍາ ອກາຣຓຠູຕປຣິນິພ຺ພານຕ຺ຖາຍ. ປຣິນິພ຺ພານຎ຺ຫິ ນາມ ຂີຓາສວານໍ ສພ຺ພປຈ຺ຉິມາ ຈຸຕິຈິຕ຺ຕກມ຺ມຊຣູປສງ຺ຂາຕາ ຂນ຺ຘາ, ເຕ ຈ ສພ຺ພາກາຣໂຕ ສມຸຈ຺ຉິນ຺ນານຸສຍຕາຍ ປຸນພ຺ຠວາຍ ອນນ຺ຕຣາທິປຈ຺ຈຍາ ນ ໂຫນ຺ຕິ ອຎ຺ເຎຫິ ຈ ຕຓ຺ຫາທິປຈ຺ຈເຍຫິ ວິຣຫິຕຕ຺ຕາ. ຕສ຺ມາ ‘‘ອປ຺ປຈ຺ຈຍປຣິນິພ຺ພານ’’ນ຺ຕິ ວຸຈ຺ຈຕິ. ຕນ຺ຕິ ວິມຸຕ຺ຕິຎາຓທສ຺ສນໍ. ເຕເນວາຫ ‘‘ຕສ຺ມິ’’ນ຺ຕິ. ວິນຍມນ຺ຕນາຕິ ວິນຍວິນິຈ຺ຉໂຍ. ໂສຕາວຘານນ຺ຕິ ໂສຕສ຺ສ ໂອທຫນໍ, ສວນນ຺ຕິ ອຕ຺ໂຖ. ເຕນາຫ ‘‘ຍໍ ອຸປ຺ປຊ຺ຊຕິ ຎາຓ’’ນ຺ຕິ. ຍຖາວຸຕ຺ຕາຍ ວິນຍສໍວຣາທິກາຣຓປຣມ຺ປຣາຍ ວິມຸຕ຺ຕິຍາ ເອວ ປຘານຕ຺ຕາ ສາ ປຸນ ຈິຕ຺ຕສ຺ສ ວິໂມກ຺ໂຂຕິ ອຸທ຺ຘໂຏຕິ ອາຫ ‘‘ອຣຫຕ຺ຕຜລສງ຺ຂາໂຕ ວິໂມກ຺ໂຂ’’ຕິ. ອຖ ວາ ໂຍ ຍໍ ກິຎ຺ຈິ ຘມ຺ມໍ ອນຸປາທິຍິຕ຺ວາ ປຣິນິພ຺ພານວເສນ ຈິຕ຺ຕສ຺ສ ຈິຕ຺ຕສນ຺ຕຕິຍາ, ຕປ຺ປຏິພທ຺ຘກມ຺ມຊຣູປສນ຺ຕຕິຍາ ຈ ວິໂມກ຺ໂຂ ວິມຸຈ຺ຈນໍ ອປຸນປ຺ປວຕ຺ຕິວເສນ ວິຄໂມ, ເອຕທຕ຺ຖາຍ ເອຕສ຺ສ ວິຄມສ຺ສຕ຺ຖາຍ ເອວາຕິ ເອວໍ ນິຄມນວເສນເປຕ຺ຖ ອຕ຺ໂຖ ເວທິຕພ຺ໂພ.

໓໖໗. ອນຸໂຍຄວຕ຺ຕຄາຖາສຸ ກຸສເລນ ພຸທ຺ຘິມຕາຕິ ສມ຺ມາສມ຺ພຸທ຺ເຘນ. ກຕນ຺ຕິ ນິພ຺ພຕ຺ຕິຕໍ, ປກາສິຕນ຺ຕິ ອຕ຺ໂຖ. ເຕເນວາຕິອາທີສຸ ເຕເນວ ກຕາກຕສ຺ສ ອຊານເນວ ປຸພ຺ພາປຣໍ ອຊານນສ຺ສ, ອຎ຺ຎສ຺ສປິ ຠິກ຺ຂຸໂນ ຍໍ ກຕາກຕໍ ໂຫຕິ, ຕມ຺ປິ ນ ຊານາຕີຕິ ອຕ຺ໂຖ. ອຕ຺ຕໂນ ສທິສາຍາຕິ ຍຖາວຸຕ຺ເຕຫິ ໂທເສຫິ ຍຸຕ຺ຕຕາຍ ອຕ຺ຕນາ ສທິສາຍ.

ອນຸວິຊ຺ຊກສ຺ສ ປຏິປຕ຺ຕິວຓ຺ຓນາ ນິຏ຺ຐິຕາ.