ມຫາສງ຺ຄາມໍ
ໂວຫຣນ຺ເຕນ ຊານິຕພ຺ພາທິວຓ຺ຓນາ
໓໖໘-໓໗໔. ມຫາສງ຺ຄາເມ ປາຬິຍໍ ສງ຺ຄາມາວຈເຣນາຕິ ອນຸວິຊ຺ຊກໍ ສນ຺ຘາຍ ວຸຕ຺ຕໍ. ວຕ຺ຖູຕິ ເມຖຸນາທິວີຕິກ຺ກໂມ. ນິທານນ຺ຕິ ເວສາລິອາທິປຎ຺ຎຕ຺ຕິຏ຺ຐານໍ. ປຸຄ຺ຄໂລ ອກາຣໂກ ຊານິຕພ຺ໂພຕິ ເອຕ຺ຖ ສງ຺ເຆ ວາ ຄເຓ ວາ ປຣິຓາຍກຠູໂຕ ປຸຄ຺ຄໂລຕິ ທຏ຺ຐພ຺ພໍ.
໓໗໕. ວິສ຺ສຏ຺ຐິສິກ຺ຂາປທນ຺ຕິ ນີລາທິທສນ຺ນໍ ສຸກ຺ການໍ ໂມຈນວເສນ ວຸຕ຺ຕໍ ສຸກ຺ກວິສ຺ສຏ຺ຐິສິກ຺ຂາປທໍ. ຕຎ຺ຫິ ເຕລາທິມນ຺ທວຓ຺ຓານໍ ນີລາທິປຈຸຣວຓ຺ຓານໍ ວເສນ ‘‘ວຓ຺ຓາວຓ຺ຓາ’’ຕິ ວຸຕ຺ຕໍ. ປຈຸຣຕ຺ເຖ ຫິ ອິຘ ອວຓ຺ໂຓຕິ ອ-ກາໂຣ.
໓໗໙. ຍາວ ອກນິຏ຺ຐພ຺ຣຫ຺ມາໂນ ທ຺ວິຘາ ໂຫນ຺ຕີຕິ ເອຕ຺ຖ ອວິຫາທິສຸທ຺ຘາວາສິກາ ອຎ຺ຎຠູມີສຸ ອຣິຍາ ຘມ຺ມວາທີປກ຺ຂໍ ເອວ ຠຊນ຺ຕິ, ອິຕເຣ ທຸວິຘມ຺ປີຕິ ທຏ຺ຐພ຺ພໍ.
ໂວຫຣນ຺ເຕນ ຊານິຕພ຺ພາທິວຓ຺ຓນາ ນິຏ຺ຐິຕາ.