ອຘິກຣຓເຠທໍ

ອຸກ຺ໂກຏນເຠທາທິກຖາວຓ຺ຓນາ

໓໔໑. ‘‘ອລໍ ອາວຸໂສ’’ຕິ ອຕ຺ຕປຈ຺ຈຕ຺ຖິເກ ສຎ຺ຎາເປຕ຺ວາຕິ ປຕ຺ຕຈີວຣາທິອຕ຺ຖາຍ ອລໍ ຠຓ຺ຑນາທິກຣຓນ຺ຕິ ວິວາທາທີສຸ ໂທສທສ຺ສນມຕ຺ເຕນ ສຎ຺ຎາເປຕ຺ວາ ອຎ຺ຎມຎ຺ຎໍ ຂມາເປຕ຺ວາ ວູປສເມນ຺ຕິ, ນ ປນ ອຎ຺ຎມຎ຺ຎໍ ອາປຕ຺ຕານາປຕ຺ຕິທສ຺ສນວເສນາຕິ ອຘິປ຺ປາໂຍ. ເຕນາຫ ‘‘ປາຬິມຸຕ຺ຕກວິນິຈ຺ຉເຍເນວາ’’ຕິ.

ວິສມານິ ກາຍກມ຺ມາທີນິ ນິສ຺ສິໂຕ ຠິກ຺ຂຸ ວິສມນິສ຺ສິໂຕ ນາມ, ມິຈ຺ຉາທິຏ຺ຐິນິສ຺ສິໂຕ ຄຫນນິສ຺ສິໂຕ, ພລວນ຺ເຕ ປຸຣິເສ ນິສ຺ສິໂຕ ພລວນິສ຺ສິໂຕ ນາມາຕິ ທສ຺ເສນ຺ໂຕ ‘‘ເອໂກ ວິສມານີ’’ຕິອາທິມາຫ.

ອຸກ຺ໂກຏນເຠທາທິກຖາວຓ຺ຓນາ ນິຏ຺ຐິຕາ.

ອຘິກຣຓນິທານາທິວຓ຺ຓນາ

໓໔໒. ອາປຕ຺ຕິໍ ນິສ຺ສາຍ ອຸປ຺ປຊ຺ຊນກອາປຕ຺ຕິວເສນາຕິ ປເຣສໍ, ອຕ຺ຕໂນ ຈ ອາປຕ຺ຕິໍ ປຏິຈ຺ຉາເທນ຺ຕານໍ ວຊ຺ຊປຏິຈ຺ຉາທີນໍ ປາຣາຊິກາທິອາປຕ຺ຕິເມວ ສນ຺ຘາຍ ວຸຕ຺ຕໍ, ນ ສພ຺ພາປຕ຺ຕິໂຍ. ກິຈ຺ຈໍ ນິສ຺ສາຍ ອຸປ຺ປຊ຺ຊນກກິຈ຺ຈານນ຺ຕິ ອຸກ຺ເຂປນີຍາທິກມ຺ມໍ ນິສ຺ສາຍ ອຸປ຺ປຊ຺ຊນການໍ ຕທນຸວຕ຺ຕິກາຍ ຠິກ຺ຂຸນິຍາ ຍາວຕຕິຍານຸສ຺ສາວນານໍ ກິຈ຺ຈານໍ ວເສນ, ນ ສພ຺ເພສໍ ກິຈ຺ຈານໍ ວເສນາຕິ.

໓໔໔. ປາຬິຍໍ ‘‘ກຕິຫິ ອຘິກຣເຓຫີ’’ຕິ ປຸຈ຺ຉາຍ ‘‘ເອເກນ ອຘິກຣເຓນ ກິຈ຺ຈາຘິກຣເຓນາ’’ຕິ ວຸຕ຺ຕໍ. ‘‘ກຕິສຸ ຐາເນສູ’’ຕິ ປຸຈ຺ຉາຍ ‘‘ຕີສຸ ຐາເນສຸ ສງ຺ຆມຊ຺ເຌ, ຄຓມຊ຺ເຌ, ປຸຄ຺ຄລສ຺ສ ສນ຺ຕິເກ’’ຕິ ວຸຕ຺ຕໍ. ‘‘ກຕິຫິ ສມເຖຫີ’’ຕິ ປຸຈ຺ຉາຍ ‘‘ຕີຫິ ສມເຖຫີ’’ຕິ ວຸຕ຺ຕໍ. ຕີຫິປິ ເອເຕຫິ ເອໂກ ວູປສມນປ຺ປກາໂຣວ ປຸຈ຺ຉິໂຕ, ວິສ຺ສຊ຺ຊິໂຕ ຈາຕິ ເວທິຕພ຺ໂພ.

໓໔໘. ວິວາທາຘິກຣຓໍ ໂຫຕິ ອນຸວາທາຘິກຣຓນ຺ຕິອາທີສຸ ວິວາທາຘິກຣຓເມວ ອນຸວາທາຘິກຣຓາທິປິ ໂຫຕີຕິ ປຸຈ຺ຉາຍ ວິວາທາຘິກຣຓໍ ວິວາທາຘິກຣຓເມວ ໂຫຕິ, ອນຸວາທາທໂຍ ນ ໂຫຕີຕິ ວິສ຺ສຊ຺ຊນໍ.

ອຘິກຣຓນິທານາທິວຓ຺ຓນາ ນິຏ຺ຐິຕາ.

ສຕ຺ຕສມຖນານາຕ຺ຖາທິວຓ຺ຓນາ

໓໕໔. ອຘິກຣຓປຸຈ຺ຉາວິສ຺ສຊ຺ຊເນ ປາຬິຍໍ ວິປຈ຺ຈຍຕາຍ ໂວຫາໂຣຕິ ວິຣູປວິປາກາຍ ອຎ຺ຎມຎ຺ຎໍ ທຸກ຺ຂຸປ຺ປາທນາຍ ກາຍວຈີໂວຫາໂຣ. ເມຘຄນ຺ຕິ ວຸທ຺ຘິປ຺ປຕ຺ໂຕ ກລໂຫ.

ອນຸສມ຺ປວງ຺ກຕາຕິ ວິປຕ຺ຕິໂຈທນາຍ ອນຸ ອນຸ ສໍຍຸຊ຺ຊນວເສນ ນິນ຺ນຕາ.

ອພ຺ຠຸສ຺ສຫນຕາຕິ ອຕິວິຍ ສຎ຺ຊາຕຸສ຺ສາຫຕາ. ອນຸພລປ຺ປທານນ຺ຕິ ໂຈທການມ຺ປິ ອຸປຕ຺ຖມ຺ຠກຣຓໍ. ກມ຺ມສງ຺ຄຫາຠາເວນາຕິ ສງ຺ຆສມ຺ມຸຂຕາທິມຕ຺ຕສ຺ສ ສມ຺ມຸຂາວິນຍສ຺ສ ສງ຺ຆາທີຫິ ກຕ຺ຕພ຺ພກິຈ຺ເຈສຸ ສງ຺ຄຫາຠາວາ.

ສຕ຺ຕສມຖນານາຕ຺ຖາທິວຓ຺ຓນາ ນິຏ຺ຐິຕາ.

ອຘິກຣຓເຠທວຓ຺ຓນານໂຍ ນິຏ຺ຐິໂຕ.

ທຸຕິຍຄາຖາສງ຺ຄຓິກໍ

ໂຈທນາທິປຸຈ຺ຉາວິສ຺ສຊ຺ຊນາວຓ຺ຓນາ

໓໕໙. ທຸຕິຍຄາຖາສງ຺ຄຓິກາຍ ‘‘ໂຈທນາ ກິມຕ຺ຖາຍາ’’ຕິອາທິກາ ປຸຈ຺ຉາ ອຸປາລິຕ຺ເຖເຣນ ກຕາ. ‘‘ໂຈທນາ ສາຣຓຕ຺ຖາຍາ’’ຕິອາທິວິສ຺ສຊ຺ຊນໍ ຠຄວຕາ ວຸຕ຺ຕໍ. ອຸປາລິຕ຺ເຖໂຣ ສຍເມວ ປຸຈ຺ຉິຕ຺ວາ ວິສ຺ສຊ຺ຊນໍ ອກາສີຕິປິ ວທນ຺ຕິ.

ມນ຺ຕຄ຺ຄຫຓນ຺ຕິ ເຕສໍ ວິຈາຣຓາຄຫຓໍ, ສຸຕ຺ຕນ຺ຕິກຕ຺ເຖຣານໍ, ວິນຍຘຣຕ຺ເຖຣານຎ຺ຈ ອຘິປ຺ປາຍຄຫຓນ຺ຕິ ອຕ຺ໂຖ. ປາເຏກ຺ກໍ ວິນິຈ຺ຉຍສນ຺ນິຏ຺ຐາປນຕ຺ຖນ຺ຕິ ເຕສໍ ປຈ຺ເຈກໍ ອຘິປ຺ປາຍໍ ຎຕ຺ວາ ເຕຫິ ສມຸຏ຺ຐາປິຕນຍມ຺ປິ ຄເຫຕ຺ວາ ວິນິຈ຺ຉຍປຣິໂຍສາປນຕ຺ຖນ຺ຕິ ອຘິປ຺ປາໂຍ.

‘‘ມາ ໂຂ ຕຸຣິໂຕ ອຠຓີ’’ຕິອາທິນາ ອຠິມຸເຂ ຐິຕໍ ກຎ຺ຈິ ອນຸວິຊ຺ຊກໍ ໂອວທນ຺ເຕນ ວິຍ ເຖເຣນ ອນຸວິຊ຺ຊກວຕ຺ຕໍ ກຖິຕໍ.

ອນຸຍຸຎ຺ຊນວຕ຺ຕນ຺ຕິ ອນຸຍຸຊ຺ຊນກ຺ກມໍ, ຕໍ ປນ ຍສ຺ມາ ສພ຺ພສິກ຺ຂາປທວີຕິກ຺ກມວິສເຍປິ ຕໍຕໍສິກ຺ຂາປທານຸໂລເມນ ກຕ຺ຕພ຺ພໍ, ຕສ຺ມາ ‘‘ສິກ຺ຂາປທານຸໂລມິກ’’ນ຺ຕິ ວຸຕ຺ຕໍ. ອຕ຺ຕໂນ ຄຕິໍ ນາເສຕີຕິ ອຕ຺ຕໂນ ສຸຄຕິຄມນໍ ວິນາເສຕິ.

ອນຸສນ຺ຘິຕ-ສທ຺ໂທ ຠາວສາຘໂນຕິ ອາຫ ‘‘ອນຸສນ຺ຘິຕນ຺ຕິ ກຖານຸສນ຺ຘີ’’ຕິ. ວຕ຺ຕານຸສນ຺ຘິເຕນາຕິ ເອຕ຺ຖາປິ ເອເສວ ນໂຍ. ວຕ຺ຕານຸສນ຺ຘິເຕນາຕິ ອາຈາຣານຸສນ຺ຘິນາ, ອາຈາເຣນ ສທ຺ຘິໍ ສເມນ຺ຕິຍາ ປຏິຎ຺ຎາຍາຕິ ອຕ຺ໂຖ. ເຕນາຫ ‘‘ຍາ ອສ຺ສ ວຕ຺ເຕນາ’’ຕິອາທິ.

ປາຬິຍໍ ສຎ຺ຈິຈ຺ຈ ອາປຕ຺ຕິນ຺ຕິອາທິ ອລຊ຺ຊິລຊ຺ຊິລກ຺ຂຓໍ ຠິກ຺ຂຸຠິກ຺ຂຸນີນໍ ວເສນ ວຸຕ຺ຕໍ ເຕສຎ຺ເຎວ ສພ຺ພປ຺ປກາຣໂຕ ສິກ຺ຂາປທາຘິກາຣຕ຺ຕາ. ສາມເຓຣາທີນມ຺ປິ ສາຘາຣຓວເສນ ປນ ສຎ຺ຈິຈ຺ຈ ຍຖາສກໍ ສິກ຺ຂາປທວີຕິກ຺ກມນາທິກໍ ອລຊ຺ຊິລຊ຺ຊິລກ຺ຂຓໍ ເວທິຕພ຺ພໍ.

ກຖານຸສນ຺ຘິວຈນນ຺ຕິ ຈຸທິຕກອນຸວິຊ຺ຊການໍ ກຖາຍ ອນຸສນ຺ຘິຍຸຕ຺ຕໍ ວຈນໍ ນ ຊານາຕິ, ເຕຫິ ເອກສ຺ມິໍ ກາຣເຓ ວຸຕ຺ເຕ ສຍໍ ຕໍ ອສລ຺ລກ຺ເຂຕ຺ວາ ອຕ຺ຕໂນ ອຠິຣຸຈິຕເມວ ອສມ຺ພນ຺ຘິຕຕ຺ຖນ຺ຕິ ອຕ຺ໂຖ. ວິນິຈ຺ຉຍານຸສນ຺ຘິວຈນຎ຺ຈາຕິ ອນຸວິຊ຺ຊເກນ ກຕສ຺ສ ອາປຕ຺ຕານາປຕ຺ຕິວິນິຈ຺ຉຍສ຺ສ ອນຸຄຸຓໍ, ສມ຺ພນ຺ຘວຈນຎ຺ຈ.

ໂຈທນາທິປຸຈ຺ຉາວິສ຺ສຊ຺ຊນາວຓ຺ຓນາ ນິຏ຺ຐິຕາ.