໒. ຄຓໂຠຊນສິກ຺ຂາປທວຓ຺ຓນາ

໒໐໙-໒໑໘. ຄຸຬ຺ຫປຏິຈ຺ຉນ຺ໂນຕິ ອປາກໂຏວ. ເອໂກ ປຸຕ຺ເຕນາຕິ ເອກສ຺ເສກໍ ຠຕ຺ຕໍ ‘‘ອຫໍ ອຎ຺ເຎນ ນິມນ຺ຕິໂຕ’’ຕິ ນ ວຸຈ຺ຈຕິ. ‘‘ສເຈ ເອກໂຕ ຄຓ຺ຫນ຺ຕິ , ຄຓໂຠຊນໍ ໂຫຕີ’’ຕິ (ປາຈິ. ອຏ຺ຐ. ໒໑໗-໒໑໘) ວຸຕ຺ຕຕ຺ຕາ ຈຕ຺ຕາໂຣ ອຸປາສກາ ຈຕ຺ຕາໂຣ ຠິກ຺ຂູ ວິສຸໍ ວິສຸໍ ນິມນ຺ເຕຕ຺ວາ ຫຕ຺ຖປາເສ ຐິຕານໍ ເຈ ເທນ຺ຕິ, ຄຓໂຠຊນໍ ໂຫຕິ ເອວາຕິ ເອເກ, ຕໍ ນ ຍຸຕ຺ຕໍ ວິຍ. ‘‘ວິຎ຺ຎຕ຺ຕິໂຕ ປສວເນ ຄຓສ຺ສ ເອກໂຕ ຄຫເຓ ອິມິນາ ສິກ຺ຂາປເທນ ອາປຕ຺ຕິ, ວິສຸໍ ຄຫເຓ ປຓີຕໂຠຊນສູໂປທນວິຎ຺ຎຕ຺ຕີຫີ’’ຕິ ລິຂິຕໍ. ‘‘ວິຎ຺ຎຕ຺ຕິໂຕ ປສວນໍ ອຏ຺ຐຸປ຺ປຕ຺ຕິວເສນ ອຏ຺ຐກຖາຍໍ ອນຸຎ຺ຎາຕໍ. ສູໂປທນາທິວເສນ ຕຕ຺ຖ ອາປຕ຺ຕິ ເອວາ’’ຕິ ວຸຕ຺ຕໍ, ຕໍ ນ ຍຸຕ຺ຕໍ. ກສ຺ມາ? ປຣິວາເຣ (ປຣິ. ໑໖໘) ເອວ ທ຺ວິນ຺ນໍ ອາກາຣານໍ ອາຄຕຕ຺ຕາ, ຕສ຺ມາ ອຏ຺ຐກຖາຍໍ ‘‘ອນຸຎ຺ຎາຕ’’ນ຺ຕິ ທຸວຸຕ຺ຕໍ. ອຏ຺ຐຸປ຺ປຕ຺ຕິຍໍເຍວ ປາກຏນ຺ຕິ ‘‘ປທຠາຊເນ ນ ວຸຕ຺ຕ’’ນ຺ຕິ ວຕ຺ຕພ຺ພໍ. ເອກໂຕ ຄຓ຺ຫນ຺ຕີຕິ ຄຫິຕຠຕ຺ຕາປິ ອຎ຺ເຎ ຍາວ ຄຓ຺ຫນ຺ຕິ, ຕາວ ເຈ ຕິຏ຺ຐນ຺ຕິ, ເອກໂຕ ຄຓ຺ຫນ຺ຕິເຍວ ນາມ. ‘‘ຄຈ຺ຉຕິ ເຈ, ອນາປຕ຺ຕີ’’ຕິ ວທນ຺ຕິ.

ເອຕ຺ຖາຫ – ‘‘ປຏິຄ຺ຄຫຓເມວ ເຫຕ຺ຖ ປມາຓ’’ນ຺ຕິ ວຸຕ຺ຕໍ, ອຖ ກສ຺ມາ ປາຬິຍໍ ‘‘ຄຓໂຠຊນໍ ນາມ ຍຕ຺ຖ ຈຕ຺ຕາໂຣ…ເປ… ຠຸຎ຺ຊນ຺ຕິ, ເອຕໍ ຄຓໂຠຊນໍ ນາມາ’’ຕິ (ປາຈິ. ໒໑໘) ວຸຕ຺ຕນ຺ຕິ? ວຸຈ຺ຈຕິ – ຍຕ຺ຖາຕິ ອຸປໂຍຄຕ຺ເຖ ຠຸມ຺ມວຈນໍ. ຈຕ຺ຕາໂຣຕິ ຄຓສ຺ສ ເຫຏ຺ຐິມປຣິຈ຺ເຉທນິທສ຺ສນໍ. ປຎ຺ຈນ຺ນໍ ໂຠຊນານນ຺ຕິ ອາປຕ຺ຕິປ຺ປໂຫນກໂຠຊນນິທສ຺ສນໍ. ອຎ຺ຎຕເຣນ ໂຠຊເນນ ນິມນ຺ຕິຕາຕິ ອກປ຺ປິຍນິມນ຺ຕນນິທສ຺ສນໍ. ນິມນ຺ຕນວເສເນວ ປນ ຄຓໂຠຊນສ຺ສ ວຸຕ຺ຕຕ຺ຕາ ‘‘ນິມນ຺ຕິຕາ ຠຸຎ຺ຊນ຺ຕີຕິ ວຸຕ຺ຕ’’ນ຺ຕິ ວຸຕ຺ຕໍ. ‘‘ອຎ຺ຎຕຣໍ ໂຠຊນໍ ວິຎ຺ຎາເປຕ຺ວາ ຠຸຎ຺ຊນ຺ຕີ’’ຕິ ປນ ນ ວຸຕ຺ຕໍ ອຏ຺ຐຸປ຺ປຕ຺ຕິຍໍເຍວ ປາກຏຕ຺ຕາ. ຍໍ ຠຸຎ຺ຊນ຺ຕີຕິ ເອວໍ ສມ຺ພນ຺ໂຘ ເວທິຕພ຺ໂພ. ຕຕ຺ຖ ຠຸຎ຺ຊນ຺ຕີຕິ ປຏິຄ຺ຄາຫກນິຍມວຈນໍ. ນ ຫິ ອປ຺ປຏິຄ຺ຄຫິຕກໍ ຠິກ຺ຂູ ຠຸຎ຺ຊນ຺ຕິ. ອິທໍ ວຸຕ຺ຕໍ ໂຫຕິ ‘‘ຄຓສ຺ສ ຍໂຕ ປຏິຄ຺ຄຫິຕາຫາຣໂຠຊນເຫຕຸ ປາຈິຕ຺ຕິຍ’’ນ຺ຕິ. ອາຄນ຺ຕຸກປຏ຺ຏໍ ໂມຆສຸຕ຺ເຕນ ສິພ຺ພິຕ຺ວາ ຐເປນ຺ຕິ, ຕຕ຺ຖ ອນຸວາເຕ ຍຖາ ເອກຕລໍ ໂຫຕິ, ຕຖາ ຫຕ຺ເຖຫິ ຆຏ຺ເຏຕິ. ວເລຕີຕິ ອາວຏ຺ເຏຕິ. ປຣິວຕ຺ຕນນ຺ຕິ ສຸຕ຺ຕໍ ຄຓ຺ຫນ຺ຕານໍ ສຸຂຄ຺ຄຫຓຕ຺ຖໍ ສຸຕ຺ຕປຣິວຕ຺ຕນໍ ກໂຣຕິ, ປຏ຺ຏໍ ສິພ຺ພນ຺ຕານໍ ສຸຂສິພ຺ພນຕ຺ຖໍ ປຏ຺ຏປຣິວຕ຺ຕນຎ຺ຈ. ນວຈີວຣກາຣໂກ ອິຘາຘິປ຺ເປໂຕ, ນ ອິຕໂຣຕິ. ‘‘ພິມ຺ພິສາຣໍ ອາປຸຈ຺ຉິຕ຺ວາ ສມ຺ຠາເຣ ກຍິຣມາເນເຍວ ກາລາ ອຕິກ຺ກນ຺ຕາ, ປຈ຺ຉາ ຄຓໂຠຊນສິກ຺ຂາປເທ ປຎ຺ຎຕ຺ເຕ ຠຄວນ຺ຕໍ ອຸປສງ຺ກມິຕ຺ວາ ປຸຈ຺ຉີ’’ຕິ ວທນ຺ຕິ, ອຎ຺ຎຖາ ອຏ຺ຐກຖາຍ ວິຣຸຊ຺ຌນໂຕ.

໒໒໐. ‘‘ທ຺ເວ ຕໂຍ ເອກໂຕຕິ ເຍປິ ອກປ຺ປິຍນິມນ຺ຕນໍ ສາທິຍິຕ຺ວາ’’ຕິອາທິວຈເນນ ອກປ຺ປິຍນິມນ຺ຕນປຈ຺ຈຍາ ເອວ ອນາປຕ຺ຕິ, ວິຎ຺ຎຕ຺ຕິໂຕ ອາປຕ຺ຕິເຍວາຕິ ທີເປຕິ. ອນິມນ຺ຕິໂຕ ຈຕຸຕ຺ໂຖ ຍສ຺ສ ຕເທຕໍ ອນິມນ຺ຕິຕຈຕຸຕ຺ຖໍ. ເອສ ນໂຍ ສພ຺ພຕ຺ຖ. ປເວເສຕ຺ວາຕິ ນິສີທາເປຕ຺ວາ. ຈີວຣທານສມຍລທ຺ຘກຈຕຸກ຺ກໍ ຈີວຣກາຣສມຍລທ຺ຘກຈຕຸກ຺ກນ຺ຕິ ເອວມາທີນິ. ຕານິ ຈາຕິ ເຍຫິ ໂຠຊເນຫິ ວິສງ຺ເກໂຕ ນຕ຺ຖິ, ຕານິ. ມຫາເຖເຣຕິ ອຸປສມ຺ປນ຺ເນ. ອຏ຺ຐຕ຺ວາຕິ ຐິເຕນ ນິມິຕ຺ຕໍ ທສ຺ສິຕໍ ໂຫຕິ. ຕຕ຺ຖ ຕຕ຺ຖ ຄນ຺ຕ຺ວາຕິ ຣຖິກາທີສຸ ຠິກ຺ຂຸສມີເປ ຄນ຺ຕ຺ວາ. ອິມສ຺ມິໍ ປນ ສິກ຺ຂາປເທ ກຕ຺ຖຈິ ໂປຕ຺ຖເກ ‘‘ອນຸຊານາມິ, ຠິກ຺ຂເວ, ຈີວຣທານສມເຍ ຄຓໂຠຊນໍ ຠຸຎ຺ຊິຕຸໍ. ເອວຎ຺ຈິທໍ ຠຄວຕາ ຠິກ຺ຂູນ’’ນ຺ຕິ ປາໂຐ ທິສ຺ສຕິ. ກຕ຺ຖຈິ ‘‘ຠຸຎ຺ຊິຕຸ’’ນ຺ຕິ ວຕ຺ວາ ‘‘ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖາ’’ຕິ ປາໂຐ, ອຍໍ ໂສຠໂນ.

ຄຓໂຠຊນສິກ຺ຂາປທວຓ຺ຓນາ ນິຏ຺ຐິຕາ.