໗. ເອຬກໂລມໂຘວາປນສິກ຺ຂາປທວຓ຺ຓນາ

໕໘໑. ກິຎ຺ຈາປິ ປຸຣາຓຈີວຣໂຘວນສິກ຺ຂາປເທ ຈີວຣໍ ຐເປຕ຺ວາ ‘‘ອຎ຺ຎໍ ປຣິກ຺ຂາຣໍ ໂຘວາເປຕີ’’ຕິ (ປາຣາ. ໕໐໗) ອນາປຕ຺ຕິວາເຣ ວຸຕ຺ຕໍ. ອິມສ຺ສ ປນ ສິກ຺ຂາປທສ຺ສ ອຸປ຺ປນ຺ນກາລໂຕ ປຏ຺ຐາຍ ເອຬກໂລມໂຘວາປນາທິນາ ອາປຕ຺ຕີຕິ ເອເກ. ສາ ວາ ອນາປຕ຺ຕິ ມູລາປຕ຺ຕິໂຕ ເອວ, ນ ອິມມ຺ຫາຕິ ເອເກ. ເອຬກໂລມານໍ ອປຣິກ຺ຂາຣຕ຺ຕາ ຠຏ຺ຐໍ ອຄ຺ຄຫຓເມວາຕິ ເອເກ. ອິມສ຺ສ ອນ຺ຕິມນຍສ຺ສ ອຕ຺ຖປ຺ປກາສນຕ຺ຖໍ ອິທໍ ປຎ຺ຫາກມ຺ມໍ – ‘‘ໂຘວາເປຕີ’’ຕິ ອິທໍ ຣຊາປນວິຊຏາປນຄ຺ຄຫເຓນ ນິປ຺ປເທສວາຈິປທໍ, ອຸທາຫຸ ອຄ຺ຄຫເຓນ ສປ຺ປເທສວາຈິປທໍ. ກິຎ຺ເຈຕ຺ຖ ຍທິ ນິປ຺ປເທສວາຈິປທໍ, ສພ຺ພຕ຺ຖ ອິທເມວ ວຕ຺ຕພ຺ພໍ, ນ ອິຕຣານິ. ອຖ ສປ຺ປເທສວາຈິປທໍ, ‘‘ອວຸຕ຺ຕາ ໂຘວຕິ, ອປຣິຠຸຕ຺ຕໍ ໂຘວາເປຕີ’’ຕິ ເອຕ຺ຖ ວິໂຣໂຘ. ‘‘ອວຸຕ຺ຕາ ຣຊຕິ ວິຊເຏຕິ, ນິສ຺ສຄ຺ຄິຍ’’ນ຺ຕິ ອນິຏ຺ຐປ຺ປສງ຺ຄໂຕຕິ? ເທສນາວິລາສມຕ຺ຕໍ ຠຄວໂຕ ວຈນໍ, ກຕ຺ຖຈິ ຕິກປທວຈນໍ, ກຕ຺ຖຈິ ເອກປທວຈນໍ, ນິປ຺ປເທສປທເມວ ເຕ ວທນ຺ຕີຕິ. ສເຈ ‘‘ກຕຠຓ຺ຑໍ ໂຘວາເປຕີ’’ຕິ ເອຕ຺ຖ ປຏິວິໂຣໂຘ, ‘‘ກຕຠຓ຺ຑໍ ວິຊຏາເປຕິ, ອນາປຕ຺ຕີ’’ຕິ ອນິຏ຺ຐປ຺ປສງ຺ຄໂຕ ອນາປຕ຺ຕິ ເອວາຕິ ເຈ? ນ, ອກຕຠຓ຺ຑສ຺ສ ສຸທ຺ຘໂລມສ຺ສ ວິຊຏາປນໍ ອິໂຕ ວາ ທາຕພ຺ພໍ. ອຸທກາທິໂຘວນວເສນ ປິຓ຺ເຑຕ຺ວາ ຐິຕານໍ ວິຊຏາປນໍ ລພ຺ຠຕີຕິ ເຈ? ປຸຣາຓສນ຺ຖຕສ຺ສ ວິຊຏາປເນ ອນາປຕ຺ຕິຍາ ຠວິຕພ຺ພໍ, ນ ຈ ຕໍ ຍຸຕ຺ຕໍ ‘‘ອປຣິຠຸຕ຺ຕໍ ໂຘວາເປຕີ’’ຕິ ວຈນໂຕ. ເຕນ ປຣິຠຸຕ຺ຕໍ ໂຘວາເປຕິ ຣຊາເປຕິ ວິຊຏາເປຕິ, ນິສ຺ສຄ຺ຄິຍເມວາຕິ ສິທ຺ຘໍ ໂຫຕິ, ຕຎ຺ຈ ປຣິຠຸຕ຺ຕໍ ນາມ ກຕຠຓ຺ຑເມວ ໂຫຕິ. ນ ຫິ ສກ຺ກາ ເອຬກໂລມານິ ປຣິຠຸຎ຺ຊິຕຸໍ, ອຎ຺ຎຖາ ‘‘ປຣິຠຸຕ຺ຕໍ ໂຘວາເປຕີ’’ຕິ ວຈນໍ ນິຣຕ຺ຖກໍ ໂຫຕິ. ນ ຫິ ເອຕ຺ຖ ‘‘ປຸຣາຓານິ ເອຬກໂລມານິ ໂຘວາເປຍ຺ຍ ວາ’’ຕິ ວຈນໍ ອຕ຺ຖິ ປຸຣາຓຈີວຣສິກ຺ຂາປເທ ວິຍ. ຕຕ຺ຖ ອາທິນ຺ນກປ຺ປວເສນ, ອິຘ ຕໍ ລິຂິຕໍ. ເລຂໂທໂສຕິ ເຈ? ນ, ວິເສສເຫຕຸໂນ ອຠາວາ, ປຸຣາຓຈີວຣສິກ຺ຂາປເທ ອປຣິຠຸຕ຺ຕໍ ກຕຠຓ຺ຑໍ ນາມ, ‘‘ກມ຺ພລໂກຊວສນ຺ຖຕາທິ’’ນ຺ຕິ ວຈນໂຕ ຈ. ກິຎ຺ຈາປິ ອິມິນາ ສທ຺ເທນ ອຍມຕ຺ໂຖ ສິທ຺ໂຘ, ‘‘ໂຘວາເປຕີ’’ຕິ ອິທໍ ປນ ສິຍາ ນິປ຺ປເທສໍ. ສິຍາ ສປ຺ປເທສໍ. ຕຎ຺ຫິ ‘‘ອວຸຕ຺ຕາ ໂຘວຕີ’’ຕິອາທີສຸ ນິປ຺ປເທສໍ. ‘‘ກຕຠຓ຺ຑໍ ໂຘວາເປຕີ’’ຕິ ເອຕ຺ຖ ສປ຺ປເທສໍ. ‘‘ອກຕຠຓ຺ຑໍ ໂຘວາເປຕິ ຣຊາເປຕິ, ອນາປຕ຺ຕີ’’ຕິ ‘‘ວິຊຏາເປຕິ, ອນາປຕ຺ຕີ’’ຕິ ວຈນປ຺ປມາຓໂຕ ອນາປຕ຺ຕິ ເອວາຕິ ເຈ? ນ, ວຈນປ຺ປມາຓໂຕ ເອວ ອາປຕ຺ຕີຕິ ອາປຊ຺ຊນໂຕ. ‘‘ອປຣິຠຸຕ຺ຕໍ ໂຘວາເປຕີ’’ຕິ ວຈນເມວ ຫິ ຕໍ ອປຣິຠຸຕ຺ຕໍ ສນ຺ຖຕໍ ວິຊຏາເປນ຺ຕສ຺ສ ອນາປຕ຺ຕີຕິ ທີເປຕິ ເຈ? ສິທ຺ຘໍ ປຣິຠຸຕ຺ຕໍ ວິຊຏາເປນ຺ຕສ຺ສ ອາປຕ຺ຕິ ເອວາຕິ.

ເອຬກໂລມໂຘວາປນສິກ຺ຂາປທວຓ຺ຓນາ ນິຏ຺ຐິຕາ.