໖. ເອຬກໂລມສິກ຺ຂາປທວຓ຺ຓນາ

໕໗໒-໓. ອທ຺ຘານມຄ຺ຄປ຺ປຏິປນ຺ນສ຺ສາຕິ ອິມິນາ ປກຕິຍາ ທີຆມຄ຺ຄປ຺ປຏິປນ຺ນສ຺ສ ອຸປ຺ປນ຺ນານິປິ ຕິໂຍຊນປຣມເມວ ຫຣິຕພ຺ພານິ, ປເຄວ ອປ຺ປຏິປນ຺ນສ຺ສາຕິ ທສ຺ເສຕິ. ອທ຺ຘານມຄ຺ຄປ຺ປຏິປນ຺ນສ຺ສ ນິສ຺ສຄ຺ຄິຍນ຺ຕິ ວາ ສມ຺ພນ຺ໂຘ. ເຕເນວ ວາສາຘິປ຺ປາຍສ຺ສ ປຏິປ຺ປສ຺ສທ຺ຘຄມນຸສ຺ສາຫຕ຺ຕາ ‘‘ອປ຺ປຏິປນ຺ໂນ’’ຕິ ສງ຺ຂ຺ຍໍ ຄຕສ຺ສ ອນາປຕ຺ຕີຕິ ສິທ຺ຘາ. ອິມສ຺ມິໍ ອຕ຺ຖວິກປ຺ເປ ຫິ ຠິກ຺ຂຸໂນ ປເນວ ເອຬກໂລມານິ ອຸປ຺ປຊ຺ເຊຍ຺ຍຸໍ…ເປ… ອສນ຺ເຕປິ ຫາຣເກ ອທ຺ຘານໍ ມຄ຺ຄປ຺ປຏິປນ຺ນສ຺ສ ນິສ຺ສຄ຺ຄິຍໍ ປາຈິຕ຺ຕິຍນ຺ຕິ ໂຍຊນາ ເວທິຕພ຺ພາ. ອາກງ຺ຂມາເນນ ຠິກ຺ຂຸນາ ປຏິຄ຺ຄເຫຕພ຺ພານີຕິ ອຕ຺ຕໂນ ສນ຺ຕການໍເຍວ ຕິໂຍຊນາຕິກ຺ກເມ ອາປຕ຺ຕິໍ ທສ຺ເສຕິ. ເຕນ ອນາກງ຺ຂມາເນນ ປຣສນ຺ຕການິ ປຏິຄ຺ຄຫິຕານິ ອຕິເຣກຕິໂຍຊນໍ ຫຣນ຺ຕສ຺ສ ອນາປຕ຺ຕິ ສິທ຺ຘາ. ອຍມຕ຺ໂຖ ‘‘ຠິກ຺ຂຸໂນ ອຸປ຺ປຊ຺ເຊຍ຺ຍຸ’’ນ຺ຕິ ອິມິນາ, ‘‘ອຈ຺ຉິນ຺ນໍ ປຏິລຠິຕ຺ວາ’’ຕິ ອິມິນາ ຈ ທີປິໂຕວ ໂຫຕີຕິ. ໂປຣາຓຄຓ຺ຐິປເທ ຈ ‘‘ອຎ຺ຎໍ ຠິກ຺ຂຸໍ ຫຣາເປນ຺ໂຕ ຄຈ຺ຉຕິ ເຈ, ທ຺ວິນ຺ນໍ ອນາປຕ຺ຕີຕິ ວຸຕ຺ຕໍ, ຕສ຺ມາ ທ຺ເວ ຠິກ຺ຂູ ຕິໂຍຊນປຣມໍ ປຕ຺ວາ ອຎ຺ຎມຎ຺ຎສ຺ສ ຠຓ຺ຑໍ ປຣິວຕ຺ເຕຕ຺ວາ ເຈ ຫຣນ຺ຕິ, ອນາປຕ຺ຕີຕິ ສິທ຺ຘໍ, ເຕເນວ ອນາປຕ຺ຕິວາເຣ ‘‘ອຎ຺ຎໍ ຫຣາເປຕີ’’ຕິ ວຸຕ຺ຕໍ. ກິໍ ຫຣາເປຕິ? ຊານນ຺ຕໍ ອຊານນ຺ຕໍ. ກິຎ຺ເຈຕ຺ຖ ຍທິ ຊານນ຺ຕໍ, ‘‘ອຎ຺ໂຎ ຫຣິສ຺ສຕີຕິ ຐເປຕິ, ເຕນ ຫຣິເຕປິ ອາປຕ຺ຕິເຍວາ’’ຕິ ເອກໍສໂຕ ນ ວຕ຺ຕພ຺ພໍ. ຊານນ຺ໂຕປິ ຫິ ເອກຈ຺ໂຈ ຫຣຕີຕິ. ຕໂຕ ອຏ຺ຐກຖາຍ ວິຣຸຊ຺ຌຕິ. ອຖ ອຊານນ຺ຕໍ, ‘‘ອຎ຺ຎສ຺ສ ຍາເນ ວາ ຠຓ຺ເຑ ວາ ອຊານນ຺ຕສ຺ສ ປກ຺ຂິປິຕ຺ວາ ຕິໂຍຊນໍ ອຕິກ຺ກາເມຕິ, ນິສ຺ສຄ຺ຄິຍານີ’’ຕິ ປາຬິຍາ ວິຣຸຊ຺ຌຕິ, ອຖ ອຸໂຠປິ ເອກໂຕ ເອກໍ ຠຓ຺ຑໍ ຫຣາເປນ຺ຕິ, ຕມ຺ປິ ນິສ຺ສຄ຺ຄິຍໍ ສິຍາ. ອນິສ຺ສຄ຺ຄິຍນ຺ຕິ ຍຸຕ຺ຕິຍາ ວິຣຸຊ຺ຌຕິ ‘‘ຕິໂຍຊນປຣມໍ ສຫຕ຺ຖາ ຫຣິຕພ຺ພານິ ອສນ຺ເຕ ຫາຣເກ’’ຕິ ອວິເສເສນ ຈ ປາຬິ ວຸຕ຺ຕາ. ຫາຣໂກປິ ສເຈຕໂນ ອເຈຕໂນຕິ ທຸວິໂຘ. ສເຈຕໂນປິ ເອຬກໂລມຠາວໍ ວາ ‘‘ອຫມິທໍ ຫຣາມີ’’ຕິ ວາ ‘‘ມໍ ເອສ ອິທໍ ຫຣາເປຕີ’’ຕິ ວາ ຊານນາຊານນວເສນ ທຸວິໂຘ ໂຫຕິ. ຕຕ຺ຖ ອເຈຕໂນ ນາມ ຫາຣໂກ ນທີໂສໂຕ ວາ ນາວາ ວາ ອສ຺ສາມິກຍານໍ ວາ ໂຫຕິ. ສເຈຕໂນ ປາກໂຏວ. ຕຕ຺ຖ ‘‘ມໍ ເອສ ອິທໍ ຫຣາເປຕີ’’ຕິ ເອຕ຺ຕກໍ ຊານນ຺ຕໍ ມນຸສ຺ສໍ ວາ ຕິຣຈ຺ຉານຄຕໍ ວາ ອຎ຺ຎໍ ຫຣາເປຕິ, ອນາປຕ຺ຕີຕິ ອນຸຄຓ຺ຐິປທນໂຍ. ອຍໍ ປາຬິຍາ, ອຏ຺ຐກຖາຍ ຈ ເອກຣໂສ ວິນິຈ຺ຉໂຍ, ‘‘ອສນ຺ເຕ ຫາຣເກ’’ຕິ ກິຎ຺ຈາປິ ອິທໍ ອວິເສສໂຕ ວຸຕ຺ຕໍ, ‘‘ອຎ຺ຎສ຺ສ ຍາເນ ວາ ຠຓ຺ເຑ ວາ ອຊານນ຺ຕສ຺ສາ’’ຕິ ວຈນໂຕ ປນ ສເຈຕໂນວ ຫາຣໂກ ຕຕ຺ຖ ອຘິປ຺ເປໂຕຕິ ປຎ຺ຎາຍຕິ, ໂສ ຈ ເອຬກໂລມຠາວຎ຺ຈ ‘‘ອິທໍ ຫຣາມີ’’ຕິ ຈ ຊານນ຺ໂຕ ນາຘິປ຺ເປໂຕ. ເຕນ ວຸຕ຺ຕໍ ‘‘ອຎ຺ໂຎ ຫຣິສ຺ສຕີຕິ ຐເປຕິ, ເຕນ ຫຣິເຕປິ ອາປຕ຺ຕິເຍວາ’’ຕິອາທິ. ຕຕ຺ຖ ເຫຕຸກຕ຺ຕຸໂນ ອຠາວໂຕວ. ປາຬິຍຎ຺ຫິ ‘‘ອຎ຺ຎໍ ຫຣາເປຕີ’’ຕິ ເຫຕຸກຕ຺ຕຸວເສນ ວຸຕ຺ຕາ. ອິຕເຣ ທ຺ເວ ຊານນ຺ຕາ ອິຘ ສມ຺ຠວນ຺ຕິ. ‘‘ອຊານນ຺ຕສ຺ສ ປກ຺ຂິປິຕ຺ວາ’’ຕິ ປາຬິຍໍ ‘‘ເອສ ຫຣາເປຕີ’’ຕິ ວາ ‘‘ອິທໍ ຐານໍ ອຕິກ຺ກມາເປຕີ’’ຕິ ວາ ຊານນ຺ຕສ຺ສ ຍາເນ ວາ ຠຓ຺ເຑ ວາ ປກ຺ຂິປິຕ຺ວາ ຕິໂຍຊນໍ ອຕິກ຺ກມາເປຕິ, ນ ນິສ຺ສຄ຺ຄິຍາ ໂຫນ຺ຕີຕິ ທີເປຕິ.

‘‘ຫຣາເປຕີ’’ຕິ ອິທໍ ເຫຕຸກຕ຺ຕຸວຈນຕໍ ສາເຘຕິ, ຕສ຺ມາ ອຏ຺ຐກຖາຍໍ ‘‘ສາມິກສ຺ສ ອຊານນ຺ຕສ຺ເສວາ’’ຕິ ອິທໍ ‘‘ມໍ ເອສ ຫຣາເປຕີ’’ຕິ ເອວໍ ອຊານນ຺ຕໍ ສນ຺ຘາຍ ວຸຕ຺ຕໍ. ‘‘ສາເຣຕິ ໂຈເທຕິ ອນຸພນ຺ຘາເປຕີ’’ຕິ ອິທໍ ‘‘ມໍ ເອສ ອິທໍ ຐານໍ ອຕິກ຺ກມາເປຕີ’’ຕິ ເອວໍ ຊານນ຺ຕໍ ສນ຺ຘາຍ ວຸຕ຺ຕໍ. ອຊານນ຺ໂຕປິ ສາຣຓາທີຫິ ຐິຕຏ຺ຐານໍ ນາຕິກ຺ກມຕິ, ນ ວາ ອນຸພນ຺ຘຕິ. ອຖ ສາຣຓາທີຫິ ອນຕິກ຺ກມິຕ຺ວາ ອຕ຺ຕໂນ ຣຸຈິຍາ ອຕິກ຺ກມຕິ ອາປຕ຺ຕິ ເອວ ຠິກ຺ຂຸໂນ ເຫຕຸກຕ຺ຕຸຠາວາສມ຺ຠວໂຕ.

ອິທານິ ຍຖາຐິຕຏ຺ຐານໂຕ ປຏ຺ຐາຍ ວກ຺ຂາມ, ‘‘ອສນ຺ເຕປິ ຫາຣເກ’’ຕິ ຫາຣກາລາຠປຈ຺ຈຍາປິ ສຍໍ ຫຣຓໂຕ ນິສ຺ສຄ຺ຄິຍເມວ, ປເຄວ ສຕິ ຫາຣເກຕິ ອຍເມໂກ ອຕ຺ໂຖ. ອວຘາຣຓຕ຺ຖໍ ອປິ-ສທ຺ທໍ ຄເຫຕ຺ວາ ອສນ຺ເຕ ເອວ ຫາຣເກ ນິສ຺ສຄ຺ຄິຍໍ, ສຕິ ປນ ຫາຣເກ ນ ເຕນ ຫຣາເປນ຺ຕສ຺ສ ນິສ຺ສຄ຺ຄິຍນ຺ຕິ ອຍໍ ທຸຕິໂຍ ອຕ຺ໂຖ. ‘‘ສງ຺ຆໂຕ ວາ…ເປ… ອຕ຺ຕໂນ ວາ ຘເນນາ’’ຕິ ອິມິນາ ກິຎ຺ຈາປິ ອຈິຕ຺ຕກມິທໍ ສິກ຺ຂາປທໍ, ສງ຺ຆາທິໂຕ ປນ ອຕ຺ຕນາ ອາກງ຺ຂມາເນນ ປຏິຄ຺ຄຫິຕສ຺ເສວ ເອຬກໂລມສ຺ສ ຕິໂຍຊນາຕິກ຺ກເມ ອາປຕ຺ຕິ, ນ ອຊານໂຕ ອປ຺ປຏິຄ຺ຄຫິຕສ຺ສ ຈີວຣາທີສຸ ກຸໂຕຈິ ລຄ຺ຄສ຺ສ ອຕິກ຺ກມເນຕິ ທີເປຕິ. ອນຸຄຓ຺ຐິປເທ ປນ ‘‘ກມ຺ພລສ຺ສ ອຸປຣິ ນິປຊ຺ຊິຕ຺ວາ ຄຈ຺ຉນ຺ຕສ຺ສ ສເຈ ເອກມ຺ປິ ໂລມໍ ຈີວເຣ ລຄ຺ຄໍ ໂຫຕິ, ອາປຕ຺ຕິ ເອວ ກມ຺ພລໂຕ ວິຊຏິຕຕ຺ຕາ’’ຕິ ວຸຕ຺ຕໍ, ຕໍ ກມ຺ພລສ຺ສ ປຏິຄ຺ຄຫິຕຕ຺ຕາ ອຕ຺ຕໂນ ອິຈ຺ຉາຍ ປຏິຄ຺ຄຫິຕເມວ ໂຫຕີຕິ ຍຸຕ຺ຕໍ. ຍສ຺ມາ ‘‘ອນາປຕ຺ຕິ ກຕຠຓ຺ເຑ’’ຕິ ວຸຕ຺ຕໍ, ຕສ຺ມາ ຕໍ ອເນກມ຺ປິ ກຕຠຓ຺ຑຏ຺ຐານິຍເມວ ໂຫຕິ. ຕຎ຺ຫິ ອເນນ ປຏິຄ຺ຄຫິຕໍ, ນ ໂລມໍ. ອຖ ໂລມມ຺ປິ ອຄ຺ຄຫິຕເມວ ໂຫຕິ, ກຕຠຓ຺ຑໍ ທຸປ຺ປຣິຫາຣິຍໂລມວິນິພ຺ໂຠຄກຕຠຓ຺ໂຑ ນິຍໂມ. ເອວໍ ສນ຺ເຕ ອກຕຠຓ຺ເຑ ຕິກປາຈິຕ຺ຕິຍໍ, ກຕຠຓ຺ເຑ ຕິກທຸກ຺ກຏຎ຺ຈ ນຍໂຕ ທສ຺ເສຕພ຺ພໍ ຠເວຍ຺ຍ, ອຎ຺ຎຖາ ຕິກສ຺ສ ທສ຺ສິຕຕ຺ຕາ. ສອຸສ຺ສາຫຕ຺ຕາຕິ ອປ຺ປຏິປ຺ປສ຺ສທ຺ຘຄມນຕ຺ຕາ. ອຈິຕ຺ຕກຕ຺ຕາ ຈາຕິ ຠິກ຺ຂຸໂນ ອຸສ຺ສາຫານຸຣູປໍ ໂລມານໍ ຕິໂຍຊນາຕິກ຺ກມນໂຕ ວິນາປິ ປໂຍຄຈິຕ຺ເຕນ ຫຣຓຈິຕ຺ເຕນ ອາປຊ຺ຊຕິ ເອວາຕິ ອຘິປ຺ປາໂຍ. ສາ ອນາປຕ຺ຕິ ປາຬິຍາ ນ ສເມຕີຕິ ອນ຺ໂຕ ປນ ປໂຍເຄນ ຕິໂຍຊນປຣມໍ ອຕິກ຺ກມິຕຕ຺ຕາ ອນາປຕ຺ຕິ. ‘‘ຕິໂຍຊນໍ ຫຣຕີ’’ຕິ ອິມິນາ ຕິໂຍຊນໍ ປທສາ ເນຕຸກາໂມປິ ອນ຺ໂຕຕິໂຍຊເນ ປເທ ປເທ ທຸກ຺ກຏໍ ນາປຊ຺ຊຕີຕິ ທສ຺ເສຕິ, ຕໍ ຍຸຕ຺ຕໍ ‘‘ຕິໂຍຊນໍ ວາສາຘິປ຺ປາໂຍ ຄນ຺ຕ຺ວາ ຕໂຕ ປຣໍ ຫຣຕີ’ຕິ ວຈນສ຺ສຕ຺ຖິຕາຍາ’’ຕິ ວຸຕ຺ຕໍ. ປຸນປິ ວຸຕ຺ຕໍ ‘‘ອຎ຺ຎໍ ຫຣາເປຕີຕິ ‘ອິທໍ ຫຣິສ຺ສາມີ’ຕິ ສອຸສ຺ສາຫເມວ ອຎ຺ຎໍ ຫຣາເປຕີຕິ ອຕ຺ໂຖ. ອິຕຣຖາ ຄຈ຺ຉນ຺ຕສ຺ສ ສີເສ ຐເປສິ, ຕສ຺ມິໍ ອຊານນ຺ເຕປິ ອນາປຕ຺ຕິ ສິຍາ’’ຕິ. ສເຈ ປນ ‘‘ອຄຈ຺ຉນ຺ເຕ ຍາເນ ວາ’’ຕິອາທິນາ ນເຍນ ວຸຕ຺ຕຕ຺ຕາ ຫຣຓາທີຫິ ຊນິຕອຸສ຺ສາຫານໍ ຫຕ຺ຖິອາທີນໍ ‘ອິທໍ ກຣິສ຺ສາມາ’ຕິ ວາ ‘ຫຣິສ຺ສາມາ’ຕິ ວາ ອາໂຠເຄ ຊນິເຕ ເອວ ອນາປຕ຺ຕິ, ນ ອຊນິເຕຕິ ອຸປຕິສ຺ສຕ຺ເຖໂຣ ອາຫາ’’ຕິ ຈ ວຸຕ຺ຕໍ. ປຣິວຕ຺ເຕຕ຺ວາ ຐປິເຕຕິ ທ຺ວິນ຺ນມ຺ປິ ພຫິ ນິກ຺ຂິປິຕຕ຺ຕາຕິ ອຸປຕິສ຺ສຕ຺ເຖໂຣ. ພຫິສີມາຍ ຐປິຕໍ ຠຓ຺ຑິກໍ ອນ຺ໂຕ ອນ຺ໂຕສີມາຍໍ ຐປິຕໍ ພຫິ ກໂຣໂຕ ອນາປຕ຺ຕີຕິ ເກຈິ, ນ ສຸນ຺ທຣໍ ວິຍ.

໕໗໕. ປຏິລຠິຕ຺ວາ ຫຣຕີຕິ ປຐມຕິໂຍຊນໂຕ ປຣໍ ຫຣຕິ, ນ ທຸຕິຍາທິໂຕຕິ ອຕ຺ໂຖ. ກຕຠຓ຺ເຑ ອຸປ຺ປນ຺ໂນກາສາຠາວາ ອນາປຕ຺ຕິ.

ເອຬກໂລມສິກ຺ຂາປທວຓ຺ຓນາ ນິຏ຺ຐິຕາ.