໔. ຉພ຺ພສ຺ສສິກ຺ຂາປທວຓ຺ຓນາ

໕໖໒. ນວໍ ນາມ ກຣຓໍ ອຸປາທາຍາຕິ ອິທໍ ອາທິກຣຓໂຕ ປຏ຺ຐາຍ ວສ຺ສຄຓນໍ ທີເປຕິ. ກຣິຕ຺ວາ ວາຕິ ວຈນໍ ນິຏ຺ຐານທິວສໂຕ ປຏ຺ຐາຍາຕິ ທີເປຕິ. ຘາເຣຕພ຺ພນ຺ຕິ ວຈນໍ ປນ ປຣິໂຠຄໂຕ ປຏ຺ຐາຍາຕິ ທີເປຕິ, ຍສ຺ມາ ລທ຺ຘສມ຺ມຸຕິກສ຺ສ ຄຕຄຕຏ຺ຐາເນ ຉນ຺ນໍ ຉນ຺ນໍ ວສ຺ສານໍ ໂອຣໂຕວ ກຕານິ ພຫູນິປິ ໂຫນ຺ຕິ, ຕສ຺ມາ ອຎ຺ຎໍ ນວນ຺ຕິ ກິໍ ກຕໂຕ ອຎ຺ຎໍ, ອຸທາຫຸ ຘາຣິຕໂຕ ອຎ຺ຎນ຺ຕິ? ກິຎ຺ເຈຕ຺ຖ ຍທິ ກຕໂຕ ອຎ຺ຎໍ, ເຕສຸ ອຎ຺ຎຕຣໍ ທຸກ຺ກຕໍ ວາ ປຣິໂຠຄຊິຓ຺ຓໍ ວາ ປຸນ ກາຕຸໍ ວຏ຺ຏຕິ, ຕຎ຺ຈ ໂຂ ວິນາປິ ປຸຣາຓສນ຺ຖຕສ຺ສ ສຸຄຕວິທຕ຺ຖິໍ ອປ຺ປຏິສິທ຺ຘປຣິຍາປນ຺ນຕ຺ຕາ. ກຕໂຕ ຫິ ອຎ຺ຎໍ ປຏິສິທ຺ຘໍ, ອິທຎ຺ຈ ປຸພ຺ພກຕນ຺ຕິ ຕໂຕ ອນນ຺ຕຣສິກ຺ຂາປທວິໂຣໂຘ ໂຫຕິ. ອຖ ຘາຣິຕໂຕ ອຎ຺ຎໍ ນາມ, ສມ຺ມຸຕິ ນິຣຕ຺ຖິກາ ອາປຊ຺ຊຕິ, ປຐມກຕໍ ເຈ ອປຣິຠຸຕ຺ຕໍ, ສຕິຍາປິ ສມ຺ມຸຕິຍາ ອຎ຺ຎໍ ນວໍ ນ ວຏ຺ຏຕີຕິ ອຘິປ຺ປາໂຍ? ຕຕ຺ຣິທໍ ສນ຺ນິຏ຺ຐານນິທສ຺ສນໍ – ນິຏ຺ຐານທິວສໂຕ ປຏ຺ຐາຍ ຉນ຺ນໍ ຉນ຺ນໍ ວສ຺ສານໍ ປຣິຈ຺ເຉໂທ ເວທິຕພ຺ໂພ. ຕຕ຺ຖ ຈ ສຕ຺ຕເມ ວສ຺ເສ ສມ຺ປຕ຺ເຕ ຉພ຺ພສ຺ສານິ ປຣິປຸຓ຺ຓານິ ໂຫນ຺ຕິ. ຕຎ຺ຈ ໂຂ ມາສປຣິຈ຺ເຉທວເສນ, ນ ວສ຺ສປຣິຈ຺ເຉທວເສນ. ສຕ຺ຕເມ ປຣິປຸຓ຺ຓຎ຺ຈ ອູນກຎ຺ຈ ວສ຺ສໍ ນາມ, ຕສ຺ມາ ວິປ຺ປກຕສ຺ເສວ ສເຈ ຉພ຺ພສ຺ສານິ ປູເຣນ຺ຕິ, ປຸນ ນິຏ຺ຐານທິວສໂຕ ປຏ຺ຐາຍ ຉພ຺ພສ຺ສານິ ລຠນ຺ຕິ. ຕຎ຺ຈ ໂຂ ປຣິຠຸຕ຺ຕໍ ວາ ໂຫຕຸ ອປຣິຠຸຕ຺ຕໍ ວາ, ຘາຣິຕເມວ ນາມ. ຍສ຺ມາ ‘‘ນວໍ ນາມ ກຣຓໍ ອຸປາທາຍ ວຸຈ຺ຈຕີ’’ຕິ ວຸຕ຺ຕໍ, ຕສ຺ມາ ຉນ຺ນໍ ວສ຺ສານໍ ປຣໂຕ ຕເມວ ປຸພ຺ພກຕໍ ທຸກ຺ກຕຠາເວນ, ປຣິໂຠຄຊິຓ຺ຓຕາຍ ວາ ວິຊເຏຕ຺ວາ ປຸນ ກໂຣຕິ, ນິຏ຺ຐານທິວສໂຕ ປຏ຺ຐາຍ ຉພ຺ພສ຺ສປຣມຕາ ຘາເຣຕພ຺ພໍ, ອຕິເຣກໍ ວາ. ອນ຺ໂຕ ເຈ ກໂຣຕິ, ຕເທວ ອຎ຺ຎໍ ນວໍ ນາມ ໂຫຕິ ກຣຓໍ ອຸປາທາຍ, ຕສ຺ມາ ນິສ຺ສຄ຺ຄິຍໍ. ອຎ຺ຎຖາ ‘‘ນວໍ ນາມ ກຣຓໍ ອຸປາທາຍາ’’ຕິ ອິມິນາ ນ ໂກຈິ ວິເສໂສ ອຕ຺ຖິ. ເອວໍ ສນ຺ເຕ ກິໍ ໂຫຕິ? ອຏ຺ຐຸປ຺ປຕ຺ຕີຕິ. ‘‘ຍາຈນພຫຸລາ ວິຎ຺ຎຕ຺ຕິພຫຸລາ ວິຫຣນ຺ຕີ’’ຕິ ຫິ ຕຕ຺ຖ ວຸຕ຺ຕໍ, ຕຎ຺ຈ ອຎ຺ຎສ຺ສ ກຣຓໍ ທີເປຕິ. ຍທິ ເອວໍ ຕໍ ນິພ຺ພິເສສເມວ ອາປຊ຺ຊຕີຕິ? ນາປຊ຺ຊຕິ. ອຍໍ ປນສ຺ສ ວິເສໂສ, ຍສ຺ມາ ‘‘ອຎ຺ເຎນ ກຕໍ ປຏິລຠິຕ຺ວາ ປຣິຠຸຎ຺ຊຕິ, ອນາປຕ຺ຕີ’’ຕິ ວຸຕ຺ຕຕ຺ໂຖ ວິເສໂສຕິ. ກິໍ ວຸຕ຺ຕໍ ໂຫຕິ? ‘‘ນວໍ ນາມ ກຣຓໍ ອຸປາທາຍ ວຸຈ຺ຈຕີ’’ຕິ ວຸຕ຺ເຕ ອຕິເຣກຈີວຣສ຺ສ ອຸປ຺ປຕ຺ຕິ ວິຍ ປຏິລາເຠນສ຺ສ ອຸປ຺ປຕ຺ຕິ ນວຕາ ອາປຊ຺ຊຕິ. ຕໂຕ ປຏິລທ຺ຘທິວສໂຕ ປຏ຺ຐາຍ ຉພ຺ພສ຺ສປຣມຕາ ຘາເຣຕພ຺ພໍ. ໂອເຣນ ເຈ ຉນ຺ນໍ ວສ຺ສານໍ…ເປ… ກາຣາເປຍ຺ຍ, ນິສ຺ສຄ຺ຄິຍນ຺ຕິ ອາປຊ຺ຊຕິ, ຕສ຺ມາ ນວໍ ນາມ ກຣຓເມວ ອຸປາທາຍ ວຸຈ຺ຈຕິ, ນ ປຏິລາຠໍ. ໂອເຣນ ຉນ຺ນໍ ວສ຺ສານໍ ອຕ຺ຕໂນ ອນຸປ຺ປນ຺ນຕ຺ຕາ ‘‘ນວ’’ນ຺ຕິ ສງ຺ຂ຺ຍໍ ຄຕໍ, ອປ຺ປຏິລທ຺ຘໍ ເຈ ກາຣາເປຍ຺ຍ, ຍຖາ ລາໂຠ, ຕຖາ ກເຣຍ຺ຍ ວາ ກາຣາເປຍ຺ຍ ວາຕິ ຈ ນ ໂຫຕິ. ກສ຺ມາ? ຍສ຺ມາ ອຎ຺ເຎນ ກຕໍ ປຏິລຠິຕ຺ວາ ປຣິຠຸຎ຺ຊຕິ, ອນາປຕ຺ຕີຕິ ວິເສໂສຕິ.

ຉພ຺ພສ຺ສສິກ຺ຂາປທວຓ຺ຓນາ ນິຏ຺ຐິຕາ.