໖. ອຎ຺ຎາຕກວິຎ຺ຎຕ຺ຕິສິກ຺ຂາປທວຓ຺ຓນາ

໕໑໕. ປຣິກ຺ຂາຣານນ຺ຕິ ອຸປໂຍຄຕ຺ເຖ ສາມິວຈນໍ. ເອກສາຏກນ຺ຕິ ຠາວນປຸໍສກໍ, ‘‘ອຎ຺ຎາຕໂກ ໂມຆປຸຣິສາ’’ຕິ ວຈເນນ ປວາຣິໂຕປິ ອທາຕຸກາໂມ ອຎ຺ຎາຕໂກ ອປ຺ປວາຣິຕຏ຺ຐາເນ ຕິຏ຺ຐຕີຕິ ທີປິຕໍ ໂຫຕິ. ອຎ຺ຎຖາ ‘‘ອນາປຕ຺ຕິ ປວາຣິຕານ’’ນ຺ຕິ ອິມິນາ ວິຣຸຊ຺ຌຕິ.

໕໑໗. ເນວ ຕາວ ວິຎ຺ຎາເປຕພ຺ພໍ, ນ ຠຎ຺ຊິຕພ຺ພນ຺ຕິ ອນຈ຺ຉິນ຺ນານໍ ຈີວຣານໍ ອຕ຺ຕໂນ ສນ຺ຕການໍ ອຕ຺ຖິຕາຍ, ຕຕ຺ຖ ປຈ຺ຈາສາສພ຺ຠາວໂຕ ຈ. ປຈ຺ຈາສາ ກິຕ຺ຕກໍ ກາລໍ ຣກ຺ຂຕີຕິ? ຍາວ ຄາມນ຺ຕຣາ, ຍາວ ອທ຺ຘໂຍຊນາຕິ ເອເກ. ຍາວ ທສ຺ສນສວນູປຈາຣາຕິ ເອເກ. ຍາວ ອຎ຺ເຎ ນ ປສ຺ສນ຺ຕີຕິ ເອເກ. ຍາວ ປຈ຺ຈາສາ ຉິຊ຺ຊຕີຕິ ເອເກ. ຍາວ ສາຂາປລາສປຣິເຍສນຠຎ຺ຊນສຊ຺ຊນກາລປຣິຈ຺ເຉທາຕິ ເອເກ. ອິທໍ ສພ຺ພໍ ຍຖາສມ຺ຠວໍ ຍຸຊ຺ຊຕິ. ກຖໍ ປຎ຺ຎາຍຕີຕິ ເຈ? ‘‘ສເຈ ປນ ເອເຕສໍ ວຸຕ຺ຕປ຺ປກາຣານໍ ຄິຫິວຕ຺ຖາທີນໍ ຠິສິຉວິປຣິຍນ຺ຕານໍ ກິຎ຺ຈິ ນ ລພ຺ຠຕິ, ເຕນ ຕິເຓນ ວາ ປຓ຺ເຓນ ວາ ປຏິຈ຺ຉາເທຕ຺ວາ ອາຄນ຺ຕພ຺ພ’’ນ຺ຕິ ອຏ຺ຐກຖາວຈນໂຕ.

ນ ຕາວ ເຖຣານໍ ທາຕພ຺ພານີຕິ ນ ຕາວ ອຕ຺ຕໂນ ຣຸຈິຍາ ທາຕພ຺ພານິ, ຍທາ ເຖຣາ ‘‘ເທຖາວຸໂສ’’ຕິ ວທນ຺ຕິ, ຕທາ ທາຕພ຺ພານິ. ‘‘ເອວໍ ສຕິ ທຫຣາປິ ອຈ຺ຉິນ຺ນຈີວຣຏ຺ຐາເນ ຕິຏ຺ຐນ຺ຕິ, ສາຂາປລາສໍ ຠຎ຺ຊິຕຸໍ ວຏ຺ຏຕິ, ນ ອຎ຺ຎຖາ. ‘ເຍຫິ ເກຫິຈິ ວາ ອຈ຺ຉິນ຺ນໍ ໂຫຕີ’ຕິ ຫິ ວຸຕ຺ຕ’’ນ຺ຕິ ວຸຕ຺ຕໍ. ອາຈຣິໂຍ ປນ ເອວໍ ວທຕິ ‘‘ອຕ຺ຕໂນ ຣຸຈິຍາປິ ທາຕຸໍ ລຠນ຺ຕີ’’ຕິ. ຕຖາ ຫິ ອຏ຺ຐກຖາຍໍ ‘‘ປຣິໂຠຄຊິຓ຺ຓໍ ວາ’ຕິ ເອຕ຺ຖ ຈ ‘ອຈ຺ຉິນ຺ນຈີວຣານໍ ອາຈຣິຍຸປຊ຺ຌາຍາທີນໍ ອຕ຺ຕນາ ຕິຓປຓ຺ເຓຫິ ປຏິຈ຺ຉາເທຕ຺ວາ ທິນ຺ນຈີວຣມ຺ປິ ສງ຺ຄຫໍ ຄຈ຺ຉຕີ’ຕິ ວຕ຺ຕຸໍ ຍຸຊ຺ຊຕີ’’ຕິ ວຸຕ຺ຕໍ. ອຖາປິ ສິຍາ ອາຈຣິຍາທີຫິ ‘‘ອາຫຣາວຸໂສ’’ຕິ ວຸຕ຺ເຕເຍວ, ນາວຸຕ຺ເຕຕິ, ນ, ‘‘ເກຫິຈິ ວາ ອຈ຺ຉິນ຺ນ’’ນ຺ຕິ ເອຕ຺ຖ ວຸຕ຺ຕເລສໂຕ ທຸຕິຍເລສສ຺ສ ອວິເສສຠາວປ຺ປສງ຺ຄໂຕຕິ. ອຖ ກິມຕ຺ຖໍ ‘‘ນ ຕາວ ເຖຣານໍ ທາຕພ຺ພານີ’’ຕິ ວຸຕ຺ຕນ຺ຕິ ເຈ? ຍາວ ເຖຣານໍ ອຕ຺ຖາຍ ສາຂາປລາສານິ ຠຎ຺ຊຕິ, ຕາວ ນ ທາຕພ຺ພານິ, ຕໂຕ ຕານິ ເຖຣຸທ຺ທິສ຺ສການິ ສາຂາປລາສານິ ສຍໍ ປຣິທຫິຕ຺ວາ ວິນາປິ ເຖຣາຓຕ຺ຕິຍາ ອຕ຺ຕໂນ ຣຸຈິຍາ ທາຕພ຺ພານິ, ຠູຕຄາມປາຕພ຺ຍຕາຍ ປາຈິຕ຺ຕິຍໍ ນ ໂຫຕິ ສຕ຺ຖຸນາປິ ອນຸຎ຺ຎາຕຕ຺ຕາ. ‘‘ຕິເຓນ ວາ ປຓ຺ເຓນ ວາ’’ຕິ ຫິ ວຸຕ຺ຕໍ, ຕໍ ກປ຺ປິຍເມວ ສນ຺ຘາຍ ວຸຕ຺ຕນ຺ຕິ ເຈ? ນ, ‘‘ຕທລາເຠ ນ ຕ຺ເວວ…ເປ… ທຸກ຺ກຏສ຺ສາ’’ຕິ ວຈນວິໂຣຘໂຕ. ເອຕ຺ຖາຫ – ທຸກ຺ກຏຠຍາ ປາຈິຕ຺ຕິຍວຕ຺ຖຸ ເຈ ອຕິກ຺ກມິຕພ຺ພໍ, ຕທລາເຠ ຖຸລ຺ລຈ຺ຈຍວຕ຺ຖຸ ສງ຺ຆິກໍ, ຕທລາເຠ ປາຣາຊິກວຕ຺ຖຸປິ ອຕິກ຺ກມິຕພ຺ພໍ ສິຍາຕິ? ນ, ປາຣາຊິກສ຺ສ ໂລກວຊ຺ຊຕ຺ຕາ. ອປິຈ ນ ສພ຺ພໍ ຠູຕຄາມໍ ປາຈິຕ຺ຕິຍວຕ຺ຖຸເມວ, ຕໂຕ ທຸກ຺ກຏາທິວຕ຺ຖຸປິ ອຕ຺ຖິ, ອນາປຕ຺ຕິວຕ຺ຖຸປິ ກາໂລທິສກໍ, ຕສ຺ມາ ອິທໍ ຕທາ ອນາປຕ຺ຕິວຕ຺ຖຸກນ຺ຕິ ເວທິຕພ຺ພໍ. ກິຕ຺ຕາວຕາ ຠິກ຺ຂຸ ອຈ຺ຉິນ຺ນຈີວໂຣ ນຏ຺ຐຈີວໂຣ ໂຫຕີຕິ? ເອຕ຺ຕາວຕາ ນຄ຺ໂຄ ໂຫຕີຕິ ເອເກ. ວິກປ຺ປນຸປຄປຈ຺ຉິມຠາເວນ, ວິກປ຺ປນຸປຄປຈ຺ຉິມມາທິໍ ກຕ຺ວາ ວິຎ຺ຎາເປນ຺ຕສ຺ສ ອາປຕ຺ຕີຕິ ເອເກ. ນິວາສນປາຣຸປນຸປຄາຠາເວນາຕິ ເອເກ. ຕິຈີວຣາຠາເວນາຕິ ເອເກ. ສນ຺ຕຣຸຕ຺ຕຣປຣມາຠາເວນາຕິ ເອເກ. ອຍໍ ເອເກວາໂທ ຍຸຕ຺ໂຕ ‘‘ສນ຺ຕຣຸຕ຺ຕຣປຣມໍ ຕໂຕ ຈີວຣໍ ສາທິຕພ຺ພ’’ນ຺ຕິ ຫິ ວຈນໂຕ, ຕສ຺ມາ ສນ຺ຕຣຸຕ຺ຕເຣ ສຕິ ວິກປ຺ປນຸປຄປຈ຺ຉິມໍ ວິຎ຺ຎາເປນ຺ຕສ຺ສ ປຏິລາເຠນ ນິສ຺ສຄ຺ຄິຍໍ. ຍທິ ເອວໍ ‘‘ວິຎ຺ຎາເປຕ຺ວາ ປຏິລເຠຍ຺ຍ ນິສ຺ສຄ຺ຄິຍ’’ນ຺ຕິ ສິກ຺ຂາປເທນ ຠວິຕພ຺ພນ຺ຕິ ເຈ? ຕນ຺ນ, ຕທຕ຺ຖສິທ຺ຘິໂຕ ນານຕ຺ຖຕ຺ຕາ ຘາຕູນໍ. ກິໍ ວຸຕ຺ຕໍ ໂຫຕິ? ຍຖາ ຫິ ‘‘ຕິກ຺ຂຕ຺ຕຸໍ ເມຖຸນໍ ຘມ຺ມໍ ອຠິວິຎ຺ຎາເປສີ’’ຕິ (ປາຣາ. ໓໖) ວຸຕ຺ເຕ ປວຕ຺ເຕສີຕິ ອຕ຺ໂຖ, ຕຖາ ອິຘາປິ ‘‘ຈີວຣໍ ວິຎ຺ຎາເປຍ຺ຍາ’’ຕິ ວິຎ຺ຎຕ຺ຕິຍາ ປວຕ຺ເຕຍ຺ຍ ອຸປ຺ປາເທຍ຺ຍາຕິ ອຕ຺ໂຖ.

ເຕນ ນິວຕ຺ໂຖຕິ ຕໍນິວຕ຺ໂຖ. ອຎ຺ຎສ຺ສ ອລາເຠນ ຕເມວ ປຣິຠຸຎ຺ຊໂຕ ຊິຣຕິ, ນ ເລເສນ. ອຕ຺ຕນາຕິ ສຍເມວ ວຕ຺ຕຸໍ ຍຸຊ຺ຊຕິ, ຕສ຺ມາ ອຍຸຕ຺ຕປຣິໂຠເຄນ ອປຣິຠຸຎ຺ຊິຕ຺ວາ ຍຸຕ຺ຕປຣິໂຠຄວເສນ ປຣິຠຸຎ຺ຊໂຕ ຊິຓ຺ຓໍ ປຣິໂຠຄຊິຓ຺ຓໍ ນາມ. ຕສ຺ສ ສຠາຄານໍ ອຈ຺ຉິນ຺ນກາເລ ທານມ຺ປິ ຍຸຕ຺ຕປຣິໂຠເຄ ເອວ ສງ຺ຄຫໍ ຄຈ຺ຉຕີຕິ ອຘິປ຺ປາໂຍ. ‘‘ອິເມ ກິຣ ທ຺ເວ ເລສາ ອຏ຺ຐກຖາໂຍ, ວາເຈນ຺ຕານໍ ອາຈຣິຍານໍ ມຕນ຺ຕິ ຘມ຺ມສິຣິຕ຺ເຖໂຣ ອາຫາ’’ຕິ ວຸຕ຺ຕໍ.

໕໒໑. ນິສີທິຕຸໍ ວາ ນິປຊ຺ຊິຕຸໍ ວາ ນ ລຠຕີຕິ ຍຖາສຸຂໍ ນ ລຠຕີຕິ ອຘິປ຺ປາໂຍ. ‘‘ອຎ຺ຎສ຺ສຕ຺ຖາຍາ’’ຕິ ເອຕ຺ຖາປິ ‘‘ຎາຕການໍ ປວາຣິຕານ’’ນ຺ຕິ ອນຸວຕ຺ຕຕິ ເອວ. ອຕ຺ຖາຍ ກສ຺ສ? ຕສ຺ເສວ ອຎ຺ຎສ຺ສ. ຍຖາ ອຎ຺ຎາຕເກ ຕິກປາຈິຕ຺ຕິຍໍ, ຕຖາ ອປ຺ປວາຣິເຕປີຕິ ທສ຺ສນຕ຺ຖໍ ‘‘ຎາຕການໍ ປວາຣິຕານ’’ນ຺ຕິ ວຸຕ຺ຕໍ. ອຎ຺ຎຖາ ‘‘ຎາຕເກ ຎາຕກສຎ຺ຎີ’’ຕິ ອິມິນາ ສິທ຺ຘຕ຺ຕາ ນ ນິຈ຺ຈໍ ເສສໍ ອາປຊ຺ຊຕິ. ອປິເຈຕ຺ຖ ອຎ຺ຎາຕກຄ຺ຄຫເຓນ ອປ຺ປວາຣິຕຄ຺ຄຫຓໍ ໂຫຕິ, ອປ຺ປວາຣິຕຄ຺ຄຫເຓນ ອຎ຺ຎາຕກຄ຺ຄຫຓໍ, ອຎ຺ຎາຕກາ ຫິ ອປ຺ປວາຣິຕາ ໂຫນ຺ຕິ. ຕຖາ ຎາຕກຄ຺ຄຫເຓນ ປວາຣິຕຄ຺ຄຫຓໍ ໂຫຕິ, ກຕ຺ຖຈິ ນ ໂຫຕິ. ນ ປວາຣິຕຄ຺ຄຫເຓນ ຎາຕກຄ຺ຄຫຓໍ ໂຫຕີຕິ ອິມສ຺ສ ອຕ຺ຖວິເສສສ຺ສ ທສ຺ສນຕ຺ຖໍ ‘‘ຎາຕການໍ ປວາຣິຕານ’’ນ຺ຕິ ວຸຕ຺ຕໍ. ຕຖາ ຫິ ອຎ຺ຎາຕິກາຍ ຠິກ຺ຂຸນິຍາ ອປ຺ປວາຣິຕາຍ ຈ ຈີວຣໍ ອຎ຺ຎຕ຺ຣ ປາຣິວຕ຺ຕກາ ປຏິຄ຺ຄຓ຺ຫນ຺ຕສ຺ສ ອາປຕ຺ຕິ. ຎາຕິກາຍ ປນ ປວາຣິຕາຍ ຈ ວິສ຺ສາສໍ ຄຓ຺ຫາຕິ, ອນາປຕ຺ຕິ. ຕຖາ ປຸຣາຓຈີວຣໍ ຎາຕິກາຍ ອນາປຕ຺ຕິ, ປວາຣິຕາຍ ປນ ຕິກປາຈິຕ຺ຕິຍເມວ. ຎາຕການຎ຺ຈ ເອກຈ຺ຈານໍ ປຸຣາຓຈີວຣໍ ນາມ ທາຕຸໍ ວຏ຺ຏຕິ, ນ ປວາຣິຕານໍ. ຕິກຈ຺ເຉໂທ ຈ ມາຕິກາປເທເນວ ໂຫຕິ, ນ ອຎ຺ເຎນ. ຕຕ຺ຖາປິ ເອເກເນວ, ນ ທຸຕິຍາທີຫີຕິ ອຍໍ ວິນເຍ ຘມ຺ມຕາ ເວທິຕພ຺ພາ.

ອຎ຺ຎາຕກວິຎ຺ຎຕ຺ຕິສິກ຺ຂາປທວຓ຺ຓນາ ນິຏ຺ຐິຕາ.