໗. ຕຕຸຕ຺ຕຣິສິກ຺ຂາປທວຓ຺ຓນາ

໕໒໒-໔. ປຄ຺ຄາຫິກສາລໍ ວາຕິ ທຸສ຺ສປສາຣໍ ວາ. ຫຕ຺ເຖນ ປຄ຺ຄເຫຕ຺ວາ ຐຕ຺ວາ ສາລາຍໍ ປສາເຣຕພ຺ພທຸສ຺ສໍ ປສາເຣນ຺ຕີຕິ ໂຈທນາ. ຕິຈີວຣິເກເນວາຕິ ວິນຍຕິຈີວຣິເກນ. ໂສ ຫິ ອຘິຏ຺ຐຫິຕ຺ວາ ຐປິຕປຣິກ຺ຂາຣໂຈຬາທີສຸ ສນ຺ເຕສຸປິ ຕິຈີວເຣ ອຈ຺ຉິນ຺ເນ ສນ຺ຕຣຸຕ຺ຕຣປຣມໍ ວິຎ຺ຎາເປຕ຺ວາ ຄເຫຕຸໍ ລຠຕິ. ອຎ຺ຎຖາປີຕິ ‘‘ປມາຓິກໍ ຕິຈີວຣໍ ປຣິກ຺ຂາຣໂຈຬວເສນ ອຘິຏ຺ຐຫິຕ຺ວາ ປຣິຠຸຎ຺ຊໂຕ ຕສ຺ມິໍ ນຏ຺ເຐ ພຫູນິປິ ຄເຫຕຸໍ ລຠຕິ, ນ ສນ຺ຕຣຸຕ຺ຕຣປຣມ’’ນ຺ຕິ ຈ, ຕສ຺ມາ ຕໍ ວິຠາຄນ຺ຕິ ‘‘ຕິຈີວຣິກສ຺ສ ຕໍ ວິຠາຄນ຺ຕິ ອຕ຺ໂຖ, ນ ປຣິກ຺ຂາຣໂຈຬິກສ຺ສາ’’ຕິ ຈ ເກຈິ ວທນ຺ຕິ. ອາຈຣິໂຍ ປນ ‘‘ອຎ຺ເຎນາຕິ ອຕິຈີວຣິເກນ, ອຎ຺ຎຖາຕິ ອິໂຕ ວຸຕ຺ຕຄ຺ຄຫຓປຣິຈ຺ເຉທໂຕ ອຎ຺ເຎນາ’’ຕິ ເອຕ຺ຕກເມວ ວທຕິ. ອຎ຺ຎຖາຕິ ປນ ສເຈ ຕີຓິປິ ນຏ຺ຐານິ, ສນ຺ຕຣຸຕ຺ຕຣປຣມໍ ຄຓ຺ຫິຕພ຺ພໍ, ສເຈ ທ຺ເວ ວາ ເອກໍ ວາ ນຏ຺ຐໍ, ເຕນ ‘‘ອຎ຺ຎຖາປີ’’ຕິ ທສ຺ສນຕ຺ຖໍ ວຸຕ຺ຕນ຺ຕິ ເອເກ. ຄຓ຺ຐິປເທສຸ ວິຈາຣຓາ ເອວ ນຕ຺ຖິ, ຕສ຺ມາ ອຸປປຣິກ຺ຂິຕ຺ວາ ຄເຫຕພ຺ພໍ. ປກຕິຍາ ສນ຺ຕຣຸຕ຺ຕເຣນ ຈຣຕິ, ສາສງ຺ກສິກ຺ຂາປທວເສນ ວາ ຕໍສມ຺ມຸຕິວເສນ ວາ ຕຕິຍສ຺ສ ອລາເຠນ ວາ.

໕໒໖. ‘‘ປມາຓເມວ ວຏ຺ຏຕີ’’ຕິ ສລ຺ເລຂທສ຺ສນຕ຺ຖໍ ວຸຕ຺ຕໍ. ຕໍ ມິຈ຺ຉາ ຄເຫຕ຺ວາ ຎາຕກາທິຏ຺ຐາເນ ຕທຸຕ຺ຕຣິ ຄຓ຺ຫນ຺ຕສ຺ສ ອາປຕ຺ຕີຕິ ເຈ? ຕໍ ປາຬິຍາ ນ ສເມຕິ, ‘‘ອນາປຕ຺ຕິ ຎາຕການໍ ປວາຣິຕານ’’ນ຺ຕິ ຫິ ປາຬິ. ເອຕ຺ຖ ຈ ປວາຣິຕາ ນາມ ອຈ຺ຉິນ຺ນກາລໂຕ ປຸພ຺ເພ ເອວ ປວາຣິຕາ, ນ ອຈ຺ຉິນ຺ນກາເລ. ‘‘ອຠິຫຏ຺ຐຸໍ ປວາເຣຍ຺ຍາ’’ຕິ ຫິ ວຸຕ຺ຕໍ, ຕສ຺ມາ ໂຍ ອຈ຺ຉິນ຺ນກາລສ຺ສຕ຺ຖາຍ ປວາເຣຕິ, ອຸໂຠປິ ອປ຺ປວາຣິຕາ ເອວາຕິ ເວທິຕພ຺ພາ. ເຕ ຫິ ອຈ຺ຉິນ຺ນກາຣຓາ ນຏ຺ຐກາຣຓາວ ເທນ຺ຕິ ນາມ. ອປິຈ ຍຖາ ປິຏ຺ຐິສມເຍ ສຕຸປ຺ປາທໍ ກຕ຺ວາ ຎາຕກປວາຣິຕຏ຺ຐານໂຕ ວສ຺ສິກສາຏິກໍ ນິປ຺ຜາເທນ຺ຕສ຺ສ ເຕນ ສິກ຺ຂາປເທນ ນິສ຺ສຄ຺ຄິຍໍ, ຕຖາ ອິຘາປິ ຎາຕກປວາຣິຕຏ຺ຐາເນປິ ອຈ຺ຉິນ຺ນນຏ຺ຐກາຣຓາ ນ ວຏ຺ຏຕິ, ຕສ຺ມາ ‘‘ອຏ຺ຐກຖາສຸ ປມາຓເມວ ວຏ຺ຏຕີ’ຕິ ວຸຕ຺ຕວຈນເມວ ປມາຓ’’ນ຺ຕິ ຘມ຺ມສິຣິຕ຺ເຖໂຣ ອາຫ, ຕໍ ອຍຸຕ຺ຕໍ, ກສ຺ມາ? ຍສ຺ມາ ອິທໍ ສິກ຺ຂາປທໍ ຕທຸຕ຺ຕຣິ ວິຎ຺ຎາເປນ຺ຕສ຺ສ ປຎ຺ຎຕ຺ຕໍ, ຕສ຺ມິຎ຺ຈ ‘‘ອຎ຺ຎາຕໂກ ຄຫປຕິ ວາ ຄຫປຕານີ ວາ’’ຕິ ມາຕິກາຍ ປາຬິ, ວິຠງ຺ເຄ ຈ ‘‘ອຎ຺ຎາຕໂກ ນາມ ມາຕິໂຕ ວາ…ເປ… ອສມ຺ພທ຺ໂຘ’’ຕິ ປາຬິ, ອນາປຕ຺ຕິວາເຣ ຈ ‘‘ຎາຕການໍ ປວາຣິຕານ’’ນ຺ຕິ ປາຬິ, ຕສ຺ມາ ຕິວິຘາຍປິ ປາຬິຍາ ນ ສເມຕີຕິ ອຍຸຕ຺ຕເມວ, ຕສ຺ມາ ເກວລໍ ສລ຺ເລຂເມວ ສນ຺ຘາຍ ວຸຕ຺ຕນ຺ຕິ ອປເຣ. ອຸປຣິ ກາຓມາຕາສິກ຺ຂາປເທ ອຏ຺ຐກຖາສຸ ປນ ‘‘ເຕສມ຺ປິ ປາເຖຍ຺ຍປເຫຓກຕ຺ຖາຍ ປຏິຍຕ຺ຕໂຕ ປມາຓເມວ ວຏ຺ຏຕີ’’ຕິ ວຸຕ຺ຕໍ, ນ ປນ ‘‘ປາຬິຍາ ນ ສເມຕີ’’ຕິ ວຸຕ຺ຕໍ, ນ ຕຕ຺ຖ ຈ ອິຘ ຈ ນານາກຣຓໍ ປຎ຺ຎາຍຕິ, ຕສ຺ມາ ເຖຣສ຺ສ ລທ຺ຘິ ສຸນ຺ທຣາ ວິຍ ມມ ຂາຍຕິ, ວີມໍສິຕພ຺ພໍ. ຍສ຺ມາ ປນິທໍ ສິກ຺ຂາປທໍ ອຎ຺ຎສ຺ສຕ຺ຖາຍ ວິຎ຺ຎາປນວຕ຺ຖຸສ຺ມິໍເຍວ ປຎ຺ຎຕ຺ຕໍ, ຕສ຺ມາ ອິຘ ‘‘ອຎ຺ຎສ຺ສຕ຺ຖາຍາ’’ຕິ ນ ວຸຕ຺ຕໍ. ‘‘ເສສໍ ອຸຕ຺ຕານຕ຺ຖເມວາ’’ຕິ ປາໂຐ. ‘‘ອຎ຺ຎສ຺ສຕ຺ຖາຍາ’’ຕິ ນິທານວິໂຣຘໂຕ ນ ວຸຕ຺ຕໍ. ຕຖາປິ ອນນ຺ຕເຣ ວຸຕ຺ຕນເຍນ ລພ຺ຠຕີຕິ ອາຈຣິໂຍ. ເອວຣູເປສຸ ຄຫປຕິປຏິສໍຍຸຕ຺ຕສິກ຺ຂາປເທສຸ ກິຎ຺ຈາປິ ‘‘ຄຫປຕິ ນາມ ໂຍ ໂກຈິ ອຄາຣໍ ອຊ຺ຌາວສຕີ’’ຕິ ວຸຕ຺ຕໍ, ຕຖາປິ ປຎ຺ຈ ສຫຘມ຺ມິເກ ຐເປຕ຺ວາ ອວເສສາ ຈ ສິກ຺ຂາປຈ຺ຈກ຺ຂາຕໂກ ຈ ຕິຕ຺ຖິໂຍ ຈ ເວທິຕພ຺ໂພ.

ຕຕຸຕ຺ຕຣິສິກ຺ຂາປທວຓ຺ຓນາ ນິຏ຺ຐິຕາ.