໔. ປຸຣາຓຈີວຣສິກ຺ຂາປທວຓ຺ຓນາ

໕໐໓-໕໐໕. ຠຕ຺ຕວິສ຺ສຄ຺ຄນ຺ຕິ ຠຕ຺ຕກິຈ຺ຈາຘິຏ຺ຐານໍ. ຠຕ຺ຕກິຈ຺ຈາຘິຏ຺ຐານວິຠາຄນ຺ຕິ ໂປຣາຓາ. ຕຕ຺ຖ ນາມ ຕ຺ວນ຺ຕິ ຕຕ຺ຖ ຕຍາ ກຕກມ຺ເມ ເອວໍ ອກຕ຺ຕພ຺ເພ ສຕິ ໂຘວາປິສ຺ສສິ ນາມ. ອຖ ວາ ໂສ ນາມ ຕ຺ວນ຺ຕິ ອຕ຺ໂຖ. ອຸຠໂຕສງ຺ເຆ ອຸປສມ຺ປນ຺ນາຕິ ຠິກ຺ຂູນໍ ສນ຺ຕິເກ ອຸປສມ຺ປທາຍ ປຏິກ຺ຂິຕ຺ຕຕ຺ຕາ ຕທນຸປສງ຺ຄຠຍາ ເອວໍ ວຸຕ຺ຕນ຺ຕິ ເວທິຕພ຺ພໍ. ‘‘ປຸຣາຓຈີວຣ’’ນ຺ຕິ ເອຕ຺ຖ ປຸຣາຓຠາວທີປນຕ຺ຖເມວ ‘‘ສກິໍ ນິວຕ຺ຖມ຺ປິ ສກິໍ ປາຣຸຕມ຺ປີ’’ຕິ ວຸຕ຺ຕໍ, ຕສ຺ມາ ‘‘ຈີວຣໍ ນາມ ຉນ຺ນໍ ຈີວຣານໍ ອຎ຺ຎຕຣໍ ຈີວຣໍ ວິກປ຺ປນຸປຄໍ ປຈ຺ຉິມ’’ນ຺ຕິ ວຈນສ຺ສ ໂອກາໂສ ນ ຊາໂຕຕິ ເອເກ. ຍສ຺ມາ ວິກປ຺ປນຸປຄປຈ຺ຉິມໍ ອິຘ ນາຘິປ຺ເປຕໍ, ນິວາສນປາຣຸປນຸປຄເມວາຘິປ຺ເປຕໍ, ເຕເນວ ນິສີທນປຈ຺ຈຕ຺ຖຣເຓ ທຸກ຺ກຏໍ ວຸຕ຺ຕໍ, ຕສ຺ມາ ນ ວຸຕ຺ຕນ຺ຕິ ເອເກ. ຊາຕິປ຺ປມາຓາວຈນໂຕ ຍໍ ກິຎ຺ຈິ ປຸຣາຓວຕ຺ຖໍ ໂຘວາເປນ຺ຕສ຺ສ ນິສ຺ສຄ຺ຄິຍເມວ, ເຕເນວ ‘‘ອນາປຕ຺ຕິ ຈີວຣໍ ຐເປຕ຺ວາ ອຎ຺ຎໍ ປຣິກ຺ຂາຣໍ ໂຘວາເປຕີ’’ຕິ ວຸຕ຺ຕໍ. ຖວິກມ຺ປິ ຫິ ອສຸຈິມກ຺ຂິຕໍ ປຣິຠຸຕ຺ຕໍ ໂຘວາເປຕິ, ນິສ຺ສຄ຺ຄິຍເມວ ໂອຬາຣິກຕ຺ຕາ, ອປ຺ປຕິຣູປຕ຺ຕາ ຈ. ເຕເນວ ກງ຺ຂາວິຕຣຓິຍໍ ອິມສ຺ມິໍ ຐາເນ ຈີວຣປຣິຈ຺ເຉໂທ ນ ວຸຕ຺ໂຕຕິ ເອເກ, ວິຈາເຣຕ຺ວາ ຍຸຕ຺ຕຕຣໍ ຄເຫຕພ຺ພໍ. ‘‘ຣຊິຕ຺ວາ ກປ຺ປໍ ກຕ຺ວາຕິ ກປ຺ປິຍໍ ກຕເມວ ນິວາເສຕຸໍ, ປາຣຸປິຕຸໍ ວາ ວຏ຺ຏຕິ, ເນຕຣ’’ນ຺ຕິ ວຸຕ຺ຕໍ. ອິມິນາ ຈ ມຊ຺ຌິມຕ຺ເຖຣວາໂທ ອຸປຕ຺ຖມ຺ຠິໂຕ ໂຫຕິ, ໂນປຕ຺ຖມ຺ຠິໂຕ. ຣຊິຕ຺ວາຕິອາທິ ປນ ວິນຍວິຘິທສ຺ສນຕ຺ຖໍ ວຸຕ຺ຕນ຺ຕິ ມມ ຕກ຺ໂກ. ຍຖາ ອຎ຺ຎາຕິກາຍ ອຎ຺ຎາຕິກສຎ຺ຎີວາເຣ ຕີຓິ ຈຕຸກ຺ການິ, ເອວໍ ເວມຕິກຎາຕິກວາເຣສຸ ຈາຕິ ນວ ຈຕຸກ຺ການິ ໂຫນ຺ຕິ. ເອຕ຺ຖາຫ – ເອກວາຣໍ ໂຘວິຕ຺ວາ ໂຘວເນສຸ ຘຸຣໍ ນິກ຺ຂິປິຕ຺ວາ ປຸນ ‘‘ທຸທ຺ໂຘຕ’’ນ຺ຕິ ມຎ຺ຎມານາ ໂຘວຕິ, ອນາປຕ຺ຕິຍາ ຠວິຕພ຺ພໍ, ທຸຕິຍວາຣໍ ອວຸຕ຺ຕາ ໂຘວຕິ ນາມ ໂຫຕີຕິ? ວຸຈ຺ຈເຕ – ສເຈ ຠິກ຺ຂຸ ‘‘ອລໍ ເອຕ຺ຕາວຕາ ໂຘເຕນາ’’ຕິ ປຏິກ຺ຂິປຕິ, ປຸນ ໂຘວນ຺ຕີ ອວຸຕ຺ຕາ ໂຘວຕິ ນາມາຕິ ຍຸຊ຺ຊຕິ. ໂນ ເຈ, ວຸຕ຺ຕາວ ໂຫຕີຕິ ເວທິຕພ຺ພໍ. ຠິກ຺ຂຸສ຺ສ ລິງ຺ຄປຣິວຕ຺ຕເນ ເອກໂຕອຸປສມ຺ປນ຺ນາຍ ວເສນ ອາປຕ຺ຕິ ສາກິຍານີນໍ ວິຍ.

໕໐໖. ເອເກນ ວຕ຺ຖຸນາຕິ ເຍນ ເກນຈິ ປຐເມນ. ‘‘ຕິຓ຺ຓໍ ຈຕຸກ຺ການໍ ວເສນາ’’ຕິ ປາໂຐ. ຠິກ຺ຂູນໍ ສນ຺ຕິເກ ອຏ຺ຐວາຈິກາຍ ອຸປສມ຺ປນ຺ນາຍ ປາກຏຕ຺ຕາ ຕໍ ອວຕ຺ວາ ສາກິຍານິໂຍວ ວຸຕ຺ຕາ ອປາກຏຕ຺ຕາ.

ປຸຣາຓຈີວຣສິກ຺ຂາປທວຓ຺ຓນາ ນິຏ຺ຐິຕາ.