໙-໑໐. ປຐມວິຠງ຺ຄສຸຕ຺ຕາທິວຓ຺ຓນາ

໔໗໙-໔໘໐. ເນປກ຺ກໍ ວຸຈ຺ຈຕິ ປຎ຺ຎາຕິ ອາຫ – ‘‘ປຎ຺ຎາເຍຕໍ ນາມ’’ນ຺ຕິ. ນິປາຍຕິ ສໍກິເລສຘມ຺ເມ ວິໂສເສຕິ ນິກ຺ຂາເມຕີຕິ ນິປໂກ, ຖິຣຕິກ຺ຂສຕິປຸຄ຺ຄໂລ, ຕສ຺ສ ຠາໂວ ເນປກ຺ກນ຺ຕິ ສຕິຍາປິ ເນປກ຺ກຠາໂວ ຍຸຊ຺ຊເຕວ. ເອວຎ຺ຫິ ‘‘ສຕິເນປກ຺ເກນາ’’ຕິ ອິທໍ ວຈນໍ ສມຕ຺ຖິຕໍ ໂຫຕິ, ສຕິຍາ ຈ ເນປກ຺ເກນາຕິ ເອວໍ ວຸຈ຺ຈມາເນນ ສຕິນິທ຺ເທໂສ ນາມ ກໂຕ ໂຫຕິເຍວ. ອສຸກໍ ນາມ ສຸຕ຺ຕໍ ວາ ກມ຺ມຏ຺ຐານໍ ວາ ເມ ຠາສິຕນ຺ຕິ. ໂວສ຺ສຊ຺ຊີຍຕິ ສງ຺ຂາຣຄຕໍ ເອຕສ຺ມິໍ ອຘິຄເຕຕິ ໂວສ຺ສຄ຺ໂຄ, ນິພ຺ພານໍ. ຕໍ ອາຣມ຺ມຓໍ ກຣິຕ຺ວາຕິ ອາຫ – ‘‘ນິພ຺ພານາຣມ຺ມຓໍ ກຕ຺ວາ’’ຕິ. ຄຈ຺ຉນ຺ຕິຍາຕິ ສງ຺ຂາຣານໍ ອຸທຍຎ຺ຈ ວຍຎ຺ຈ ອຸທຍພ຺ພຍໍ ຄຈ຺ຉນ຺ຕິຍາ ພຸຊ຺ຌນ຺ຕິຍາ. ເຕນາຫ ‘‘ອຸທຍພ຺ພຍປຣິຄ຺ຄາຫິກາຍາ’’ຕິ. ສທ຺ຘາສຕິປຎ຺ຎິນ຺ທ຺ຣິຍານິ ປຸພ຺ພຠາຄານິ ‘‘ອິຕິປິ ໂສ ຠຄວາ ອຣຫໍ, ຈິຣກຕມ຺ປິ ຈິຣຠາສິຕມ຺ປິ ສຣິຕາ ອນຸສ຺ສຣິຕາ, ອຸທຍຕ຺ຖຄາມິນິຍາ ປຎ຺ຎາຍາ’’ຕິ ຈ ວຸຕ຺ຕຕ຺ຕາ. ‘‘ອາຣທ຺ຘວີຣິໂຍ ວິຫຣຕິ, ໂສ ອນຸປ຺ປນ຺ນານ’’ນ຺ຕິອາທິນາ ຈ ວຸຕ຺ຕຕ຺ຕາ ວີຣິຍິນ຺ທ຺ຣິຍໍ ມິສ຺ສກໍ. ‘‘ໂວສ຺ສຄ຺ຄາຣມ຺ມຓໍ ກຣິຕ຺ວາ’’ຕິ ວຸຕ຺ຕຕ຺ຕາ ສມາຘິນ຺ທ຺ຣິຍໍ ນິພ຺ພຕ຺ຕິຕໂລກຸຕ຺ຕຣເມວ. ອຍເມວາຕິ ຍ຺ວາຍໍ ນວເມ ວຸຕ຺ໂຕ. ອຍເມວ ປຸພ຺ພຠາຄມິສ຺ສກໂລກຸຕ຺ຕຣຕ຺ຕຘມ຺ມປຣິຈ຺ເຉໂທ.

ສຸທ຺ຘິກວຄ຺ຄວຓ຺ຓນາ ນິຏ຺ຐິຕາ.