໒. ມຸທຸຕຣວຄ຺ໂຄ

໑. ປຏິລາຠສຸຕ຺ຕວຓ຺ຓນາ

໔໘໑. ສມ຺ມປ຺ປຘາເນ ອາຣພ຺ຠາຕິ ສມ຺ມປ຺ປຘາເນ ຠາວນາວເສນ ອາຣພ຺ຠ. ເຕນາຫ ‘‘ຠາເວນ຺ໂຕ’’ຕິ. ຍຖາ ວີຣິຍິນ຺ທ຺ຣິຍນິທ຺ເທເສ ‘‘ຈຕ຺ຕາໂຣ ສມ຺ມປ຺ປຘາເນ ອາຣພ຺ຠ ວີຣິຍໍ ປຏິລຠຕີ’’ຕິ ເທສນາ ອາຄຕາ, ເອວໍ ສຕິນ຺ທ຺ຣິຍນິທ຺ເທເສ ‘‘ຈຕ຺ຕາໂຣ ສຕິປຏ຺ຐາເນ ອາຣພ຺ຠ ສຕິໍ ປຏິລຠຕີ’’ຕິ, ຕສ຺ມາ ‘‘ສຕິນ຺ທ຺ຣິເຍປິ ເອເສວ ນໂຍ’’ຕິ ວຸຕ຺ຕໍ. ສທ຺ຘິນ຺ທ຺ຣິຍາທິນິທ຺ເທເສສຸ ປນ ນ ຕຖາ ເທເສຕິ.

໒. ປຐມສໍຂິຕ຺ຕສຸຕ຺ຕວຓ຺ຓນາ

໔໘໒. ອິນ຺ທ຺ຣິຍານໍ ຕິກ຺ຂາທິຠາໂວ ວິປສ຺ສນາວເສນ ວາ ມຄ຺ຄວເສນ ວາ ຜລວເສນ ວາ ຄເຫຕພ຺ໂພຕິ ວຸຕ຺ຕໍ ‘‘ຕໂຕຕິ…ເປ… ເວທິຕພ຺ພ’’ນ຺ຕິ. ນນຸ ເຈຕ຺ຖ ມຸທຸຠາໂວ ເອວ ປາຬິຍໍ ຄຫິໂຕຕິ? ສຈ຺ຈເມຕໍ, ຕໍ ປນ ຕິກ຺ຂຠາເວ ອສຕິ ນ ໂຫຕິ ຕິກ຺ຂາທິຠາໂວຕິ ວຸຕ຺ຕໍ. ຍໂຕ ຫິ ອຍໍ ມຸທຸ, ອິໂຕ ຕໍ ຕິກ຺ຂນ຺ຕິ ວຕ຺ຕພ຺ພຕໍ ລຠຕິ ອເປກ຺ຂາສິທ຺ຘຕ຺ຕາ ຕິກ຺ຂມຸທຸຠາວານໍ ປາຣາປາຣໍ ວິຍ. ອິທານິ ‘‘ຕໂຕ’’ຕິອາທິນາ ສງ຺ເຂປໂຕ ວຸຕ຺ຕມຕ຺ຖໍ ວິຕ຺ຖາຣໂຕ ທສ຺ເສຕຸໍ ‘‘ສມຕ຺ຕານີ’’ຕິອາທິ ວຸຕ຺ຕໍ. ຕຕ຺ຖ ສມຕ຺ຕານີຕິ ສມ຺ປນ຺ນານິ. ອິຕຣໍ ຕສ຺ເສວ ເວວຈນໍ. ສມຕ຺ຕານີຕິ ວາ ປຣິຍຕ຺ຕານິ, ສມຕ຺ຕານີຕິ ອຕ຺ໂຖ. ‘‘ຕໂຕ ມຸທຸຕຣານິ ຘມ຺ມານຸສາຣີມຄ຺ຄສ຺ສາ’’ຕິ ກສ຺ມາ ວຸຕ຺ຕໍ? ຕໂຕຕິ ຫິ ໂສຕາປຕ຺ຕິມຄ຺ຄວິປສ຺ສນິນ຺ທ຺ຣິຍານິ ອຘິປ຺ເປຕານິເຍວ, ‘‘ຕໂຕ ມຸທຸຕຣານີ’’ຕິ ວຸຕ຺ຕປຐມມຄ຺ໂຄ ຘມ຺ມານຸສາຣີ ວາ ສິຍາ ສທ຺ຘານຸສາຣີ ວາຕິ ພ຺ຍຠິຈຣຕິ? ນາຍໍ ໂທໂສ, ໂສຕາປຕ຺ຕິມຄ຺ເຄກເທສວເສເນວ ລທ຺ຘພ຺ພປຐມມຄ຺ຄາເປກ຺ຂາຍ ວິປສ຺ສນາຍ ວິຠາຄສ຺ສ ອຘິປ຺ເປຕຕ຺ຕາ. ໂຍ ຫິ ໂສຕາປນ຺ໂນ ຫຸຕ຺ວາ ອິຣິຍາປຖໍ ອໂກເປຕ຺ວາ ຍຖານິສິນ຺ໂນວ ສກທາຄາມິມຄ຺ຄໍ ປາປຸຓາຕິ, ຕສ຺ສ ວິປສ຺ສນິນ຺ທ຺ຣິຍານິ ສນ຺ຘາຍ ອວິຠາເຄນ ວຸຕ຺ຕໍ – ‘‘ຕໂຕ ມຸທຸຕຣານິ ໂສຕາປຕ຺ຕິມຄ຺ຄສ຺ສ ວິປສ຺ສນິນ຺ທ຺ຣິຍານິ ນາມາ’’ຕິ. ໂຍ ປນ ໂສຕາປນ຺ໂນ ຫຸຕ຺ວາ ກາລນ຺ຕເຣນ ສກທາຄາມີ ໂຫຕິ, ຕສ຺ສ ໂສຕາປຕ຺ຕິມຄ຺ຄຕ຺ຖາຍ ປວຕ຺ຕານິ ວິປສ຺ສນິນ຺ທ຺ຣິຍານິ ນາມ ໂຫນ຺ຕິ. ໂສ ເຈ ຘມ຺ມານຸສາຣີໂຄຕ຺ໂຕ, ຕສ຺ສ ຍຖາວຸຕ຺ຕວິປສ຺ສນິນ຺ທ຺ຣິຍໂຕ ມຸທຸຕຣານີຕິ ‘‘ຕໂຕ ມຸທຸຕຣານິ ຘມ຺ມານຸສາຣີມຄ຺ຄສ຺ສາ’’ຕິ ວຸຕ຺ຕໍ. ວິປສ຺ສນິນ຺ທ຺ຣິຍານິ ນາມາຕິ ອາເນຕ຺ວາ ສມ຺ພນ຺ໂຘ. ຘມ຺ມານຸສາຣີວິປສ຺ສນິນ຺ທ຺ຣິຍໂຕ ສທ຺ຘານຸສາຣີວິປສ຺ສນິນ຺ທ຺ຣິຍານໍ ມຸທຸຠາວສ຺ສ ກາຣຓໍ ສຍເມວ ວກ຺ຂຕິ. ຘມ຺ເມນ ປຎ຺ຎາຍ ມຄ຺ຄໂສຕໍ ອນຸສ຺ສຣຕີຕິ ຘມ຺ມານຸສາຣີ, ປຎ຺ຎຸຕ຺ຕໂຣ ອຣິໂຍ. ສທ຺ຘາຍ ມຄ຺ຄໂສຕໍ ອນຸສ຺ສຣຕີຕິ ສທ຺ຘານຸສາຣີ, ສທ຺ຘຸຕ຺ຕໂຣ ອຣິໂຍ.

ເອວໍ ວິປສ຺ສນາວເສນ ທສ຺ເສຕ຺ວາ ມຄ຺ຄວເສນ ທສ຺ເສຕຸໍ ‘‘ຕຖາ’’ຕິອາທິ ອາຣທ຺ຘໍ. ສມ຺ປໂຍຄໂຕ ສຠາວໂຕ ຈ ອຣຫຕ຺ຕມຄ຺ຄປຣິຍາປນ຺ນານິ ອຣຫຕ຺ຕມຄ຺ຄິນ຺ທ຺ຣິຍານິ. ອຣຫຕ຺ຕຜລິນ຺ທ຺ຣິຍານີຕິ ເອຕ຺ຖາປິ ເອເສວ ນໂຍ.

ອິທານິ ຜລວເສນ ທສ຺ເສຕຸໍ ‘‘ສມຕ຺ຕານິ ປຣິປຸຓ຺ຓານີ’’ຕິອາທິ ວຸຕ຺ຕໍ. ໂສຕາປຕ຺ຕິມຄ຺ຄຏ຺ຐປຸຄ຺ຄລວເສນ ນານຕ຺ຕໍ ຊາຕໍ, ຕສ຺ມາ ເຕ ທ຺ເວປິ ອິຘ ຕຕິຍວາເຣ ນ ລພ຺ຠນ຺ຕີຕິ ອຘິປ຺ປາໂຍ. ຘມ຺ມານຸສາຣີສທ຺ຘານຸສາຣີນໍ ນານຕ຺ຕໍ ກຖໍ ຊາຕນ຺ຕິ ອາຫ ‘‘ອາຄມເນນປິ ມຄ຺ເຄນປີ’’ຕິ. ຕທຸຠຍໍ ທສ຺ເສນ຺ໂຕ ‘‘ສທ຺ຘານຸສາຣີປຸຄ຺ຄໂລ’’ຕິອາທິມາຫ. ອຸທ຺ທິສາເປນ຺ໂຕຕິ ອຸທ຺ເທສໍ ຄຓ຺ຫນ຺ໂຕ.

ມຄ຺ໂຄ ຕິກ຺ໂຂ ໂຫຕິ ອຸປນິສ຺ສຍິນ຺ທ຺ຣິຍານໍ ຕິກ຺ຂວິສທຠາວໂຕ. ເຕນາຫ ‘‘ສູຣໍ ຎາຓໍ ວຫຕີ’’ຕິ. ອສງ຺ຂາເຣນາຕິ ສຣເສເນວ. ອປ຺ປໂຍເຄນາຕິ ຕສ຺ເສວ ເວວຈນໍ. ຘມ຺ມານຸສາຣີປຸຄ຺ຄໂລ ຫິ ອາຄມນມ຺ຫິ ກິເລເສ ວິກ຺ຂມ຺ເຠນ຺ໂຕ ອປ຺ປທຸກ຺ເຂນ ອປ຺ປກສິເຣນ ອກິລມນ຺ໂຕວ ວິກ຺ຂມ຺ເຠຕຸໍ ສກ຺ໂກຕິ. ສທ຺ຘານຸສາຣີປຸຄ຺ຄໂລ ປນ ທຸກ຺ເຂນ ກສິເຣນ ກິລມນ຺ໂຕ ຫຸຕ຺ວາ ວິກ຺ຂມ຺ເຠຕຸໍ ສກ຺ໂກຕິ, ຕສ຺ມາ ຘມ຺ມານຸສາຣິສ຺ສ ປຸພ຺ພຠາຄມຄ຺ຄກ຺ຂເຓ ກິເລສຈ຺ເຉທກຎາຓໍ ອທນ຺ຘໍ ຕິຂິຓໍ ຫຸຕ຺ວາ ວຫຕິ, ຍຖາ ນາມ ຕິຂິເຓນ ອສິນາ ກທລິໍ ຉິນ຺ທນ຺ຕສ຺ສ ຉິນ຺ນຏ຺ຐານໍ ມຏ຺ຐໍ ໂຫຕິ, ອສິ ຂິປ຺ປໍ ວຫຕິ, ສທ຺ໂທ ນ ສຸຍ຺ຍຕິ, ພລວວາຍາມກິຈ຺ຈໍ ນ ໂຫຕິ, ເອວຣູປາ ຘມ຺ມານຸສາຣິໂນ ປຸພ຺ພຠາຄຠາວນາ ໂຫຕິ, ສທ຺ຘານຸສາຣິໂນ ປນ ປຸພ຺ພຠາຄກ຺ຂເຓ ກິເລສຈ຺ເຉທກຎາຓໍ ທນ຺ຘໍ ນ ຕິຂິຓໍ ອສູຣໍ ຫຸຕ຺ວາ ວຫຕິ, ຍຖາ ນາມ ນາຕິຕິຂິເຓນ ອສິນາ ກທລິໍ ຉິນ຺ທນ຺ຕສ຺ສ ຉິນ຺ນຏ຺ຐານໍ ນ ມຏ຺ຐໍ ໂຫຕິ, ອສິ ສີຆໍ ນ ວຫຕິ, ສທ຺ໂທ ສຸຍ຺ຍຕິ, ພລວວາຍາມກິຈ຺ຈໍ ອິຈ຺ຉິຕພ຺ພໍ ໂຫຕິ, ເອວຣູປາ ສທ຺ຘານຸສາຣິໂນ ປຸພ຺ພຠາຄຠາວນາ ໂຫຕິ. ເອວໍ ສນ຺ເຕປິ ກິເລສກ຺ຂເຍ ນານຕ຺ຕໍ ນຕ຺ຖິ. ເຕນາຫ ‘‘ກິເລສກ຺ຂເຍ ປນາ’’ຕິອາທິ. ອວເສສາ ຈ ກິເລສາ ຂີຍນ຺ຕິ ສໍໂຍຊນກ຺ຂຍາຍ ໂຍຄຕ຺ຕາ.

໓. ທຸຕິຍສໍຂິຕ຺ຕສຸຕ຺ຕວຓ຺ຓນາ

໔໘໓. ຕໂຕຕິ ຜລໂຕ ຜລເວມຕ຺ຕຕາຍ ຈຣິຍມານຕ຺ຕາ. ອິນ຺ທ຺ຣິຍເວມຕ຺ຕຕາ ສທ຺ຘາທີນໍ ອິນ຺ທ຺ຣິຍານໍ ນານຕ຺ເຕນ. ຜລນານຕ຺ຕນ຺ຕິ ອຣຫຕ຺ຕຜລາທິນານຕ຺ຕໍ. ປຸຄ຺ຄລນານຕ຺ຕນ຺ຕິ ອນາຄາມິອາທິປຸຄ຺ຄລນານຕ຺ຕໍ.

໔. ຕຕິຍສໍຂິຕ຺ຕສຸຕ຺ຕວຓ຺ຓນາ

໔໘໔. ສີລກ຺ຂນ຺ຘາທີຫິ ສທ຺ຘິນ຺ທ຺ຣິຍາທີຫິ ຈ ປຣິໂຕ ປູຣເຓນ ປຣິປູຣໍ ອຣຫຕ຺ຕມຄ຺ຄໍ ກໂຣນ຺ໂຕ ນິປ຺ຜຕ຺ຕິໂຕ ອຣຫຕ຺ຕຜລໍ ອາຣາເຘຕິ ນິປ຺ຜາເທຕິ. ຕໂຍ ປເທສມຄ຺ເຄຕິ ສີລກ຺ຂນ຺ຘາທີນໍ ອປາຣິປູຣິຍາ ເອກເທສຠູເຕ ຕໂຍ ເຫຏ຺ຐິມມຄ຺ເຄ. ປເທສໍ ເຫຏ຺ຐິມຜລຕ຺ຕຍໍ. ຈຕູສູຕິ ອິມສ຺ມິໍ ວຄ຺ເຄ ປຐມາທີສຸ ຈຕູສຸ ສຸຕ຺ເຕສຸ. ກາມຎ຺ເຈຕ຺ຖ ຕຕິເຍ ‘‘ຕໂຕຕິ ຜລວເສນ ນິສ຺ສກ຺ກ’’ນ຺ຕິ ວຸຕ຺ຕໍ, ຈຕຸຕ຺ເຖ ‘‘ປຣິປູຣໍ ປຣິປູຣກາຣີ ອາຣາເຘຕິ, ປເທສໍ ປເທສກາຣີ’’ຕິ, ‘‘ຈຕູສຸປິ ສຸຕ຺ເຕສຸ ມິສ຺ສກາເນວ ອິນ຺ທ຺ຣິຍານິ ກຖິຕານີ’’ຕິ ປນ ວຈນໂຕ ວິປສ຺ສນາວເສນປິ ໂຍຊນາ ລພ຺ຠເຕວາຕິ ທຏ຺ຐພ຺ພໍ.

໕-໗. ປຐມວິຕ຺ຖາຣສຸຕ຺ຕາທິວຓ຺ຓນາ

໔໘໕-໔໘໗. ວິປສ຺ສນາວເສນ ນິສ຺ສກ຺ກໍ ເວທິຕພ຺ພໍ, ນ ມຄ຺ຄຜລວເສນ, ອິມສ຺ມິໍ ສຸຕ຺ເຕ ສພ຺ພໂສວ ວິປສ຺ສນິນ຺ທ຺ຣິຍານໍ ເອວ ອຘິປ຺ເປຕຕ຺ຕາ. ອິທານິ ຕມຕ຺ຖໍ ປາກຏໍ ກາຕຸໍ ‘‘ປຣິປຸຓ຺ຓານິ ຫີ’’ຕິອາທິ ວຸຕ຺ຕໍ. ອວິຫາທີສຸ ປຎ຺ຈສຸ ສຸທ຺ຘາວາເສສຸ ຕຕ຺ຖ ຕຕ຺ຖ ອາຍຸເວມຊ຺ຌໍ ອນຕິກ຺ກມິຕ຺ວາ ອນ຺ຕຣາ ກິເລສປຣິນິພ຺ພາເນນ ປຣິນິພ຺ພາຍນໂຕ ອນ຺ຕຣາປຣິນິພ຺ພາຍີ, ອສງ຺ຂາເຣນ ອປ຺ປໂຍເຄນ ສຣສໂຕວ ປຣິນິພ຺ພາຍນໂຕ ອສງ຺ຂາຣປຣິນິພ຺ພາຍີ, ຕພ຺ພິປຣິຍາຍໂຕ ສສງ຺ຂາຣປຣິນິພ຺ພາຍີ, ອຸທ຺ຘໍ ວາຫິຠາເວນ ອຸທ຺ຘມສ຺ສ ຕຓ຺ຫາໂສຕໍ ວຏ຺ຏໂສຕໍ ວາຕິ ອຸທ຺ຘໍໂສໂຕ, ອຸທ຺ຘໍ ວາ ຄນ຺ຕ຺ວາ ປຏິລຠິຕພ຺ພໂຕ ອຸທ຺ຘມສ຺ສ ມຄ຺ຄໂສຕນ຺ຕິ ອຸທ຺ຘໍໂສໂຕ, ອກນິຏ຺ຐຠວໍ ຄຈ຺ຉຕີຕິ ອກນິຏ຺ຐຄາມີຕິ ເອວເມຕ຺ຖ ສທ຺ທຕ຺ໂຖ ທຏ຺ຐພ຺ໂພ.

ອິມສ຺ມິໍ ປນ ຐາເນຕິ ‘‘ວິປສ຺ສນາວເສນ ນິສ຺ສກ຺ກ’’ນ຺ຕິ ວຸຕ຺ຕຏ຺ຐາເນ. ອຣຫຕ຺ຕມຄ຺ເຄເຍວ ຐຕ຺ວາຕິ ອິມສ຺ມິໍເຍວ ຠເວ ອຣຫຕ຺ຕມຄ຺ເຄເຍວ, ນ ວິປສ຺ສນາຍ ຈ ຐຕ຺ວາ. ປຎ຺ຈ ນິສ຺ສກ຺ການິ ນີຫຣິຕພ຺ພານີຕິ ‘‘ຕໂຕ ມຸທຸຕເຣຫິ ອນ຺ຕຣາປຣິນິພ຺ພາຍີ ໂຫຕີ’’ຕິອາທີນິ ປຎ຺ຈ ນິສ຺ສກ຺ການິ ນິທ຺ຘາເຣຕ຺ວາ ກເຖຕພ຺ພານິ. ອິທານິ ຕມຕ຺ຖໍ ວິວຣນ຺ໂຕ ‘‘ອຣຫຕ຺ຕມຄ຺ຄສ຺ສ ຫີ’’ຕິອາທິມາຫ. ຕຕ຺ຖ ອວິຫາທີສຸ ອຸປ຺ປຊ຺ຊິຕ຺ວາ ອຸປ຺ປນ຺ນສມນນ຺ຕຣາຍ ປຣິນິພ຺ພາຍນໂຕ ປຐມອນ຺ຕຣາປຣິນິພ຺ພາຍີ. ຕຕ຺ຖ ອາຍຸປ຺ປມາຓເວມຊ຺ຌໍ ອປ຺ປຕ຺ວາວ ປຣິນິພ຺ພາຍນໂຕ ທຸຕິຍອນ຺ຕຣາປຣິນິພ຺ພາຍີ, ອາຍຸເວມຊ຺ຌໍ ປຕ຺ວາ ປຣິນິພ຺ພາຍນໂຕ ຕໂຕ ປຣໍ ຕຕິຍອນ຺ຕຣາປຣິນິພ຺ພາຍີ ເວທິຕພ຺ໂພ. ‘‘ປຎ຺ຈ ນິສ຺ສກ຺ການີ’’ຕິ ກສ຺ມາ ວຸຕ຺ຕໍ? ນນຸ ອສງ຺ຂາຣສສງ຺ຂາຣປຣິນິພ຺ພາຍີຕິ ວຕ຺ຕພ຺ພນ຺ຕິ? ນ ວຕ຺ຕພ຺ພນ຺ຕິ ທສ຺ເສນ຺ໂຕ ອາຫ ‘‘ອສງ຺ຂາຣປຣິນິພ຺ພາຍິສ຺ສ ສສງ຺ຂາຣປຣິນິພ຺ພາຍິໂນປິ ເອເຕວ ປຎ຺ຈ ຊນາ’’ຕິ.

ຕີຓິ ນິສ຺ສກ຺ການີຕິ ‘‘ຕໂຕ ມຸທຸຕເຣຫິ ໂສຕາປນ຺ໂນ ໂຫຕີ’’ຕິອາທີນິ ຕີຓິ ນິສ຺ສກ຺ກປທານິ. ອິຘ ສກທາຄາມີ ນ ຄຫິໂຕ, ໂສ ອນາຄາມິມຄ຺ເຄ ຐຕ຺ວາ ນີຫຣິຕພ຺ໂພ, ອນາຄາມິມຄ຺ຄສ຺ສ ວິປສ຺ສນິນ຺ທ຺ຣິເຍຫິ ມຸທຸຕເຣຫິ ສກທາຄາມີ ໂຫຕິ. ສກທາ…ເປ… ມຸທຸຕຣານີຕິ ອິທໍ ສກທາຄາມິມຄ຺ຄສ຺ສ ວິປສ຺ສນິນ຺ທ຺ຣິເຍຫິ ເອກພີຊິສງ຺ຂາຕໂສຕາປນ຺ນວິປສ຺ສນິນ຺ທ຺ຣິຍານິ ມຸທຸຕຣານິ ໂຫນ຺ຕີຕິ ຕີຓິ ກຕ຺ວາ ວຸຕ຺ຕໍ. ຘມ຺ມານຸສາຣີຕິອາທິທ຺ວຍໍ ໂກລໍໂກລາທິທ຺ວເຍນ ຄຫິຕໍ ໂຫຕີຕິ. ສກທາຄາມິມຄ຺ຄສ຺ສ ຫີຕິອາທິ ວຸຕ຺ຕສ຺ເສວ ອຕ຺ຖສ຺ສ ວິວຣຓໍ. ເສສໍ ເຫຏ຺ຐາ ວຸຕ຺ຕນຍເມວ. ຉຏ຺ຐສຕ຺ຕມານິ ວຸຕ຺ຕນຍາເນວາຕິ ຉຏ຺ຐສຕ຺ຕມານິ ສຸຕ຺ຕານິ ທຸຕິຍຕຕິເຍສຸ ວຸຕ຺ຕນຍາເນວ. ຕຕ຺ຖ ປນ ມິສ຺ສການິ ອິນ຺ທ຺ຣິຍານິ ກຖິຕານິ, ອິຘ ປຸພ຺ພຠາຄວິປສ຺ສນິນ຺ທ຺ຣິຍານິ ກຖິຕານີຕິ ອຍເມວ ວິເສໂສ.

໘. ປຏິປນ຺ນສຸຕ຺ຕວຓ຺ຓນາ

໔໘໘. ຕນ຺ຕິ ມຄ຺ຄຜລວເສນ ນິສ຺ສກ຺ກໍ. ປາຬິຍໍ ວຸຕ຺ຕເມວ ‘‘ອຣຫຕ຺ຕຜລສຈ຺ຉິກິຣິຍາຍ ປຏິປນ຺ໂນ ໂຫຕີ’’ຕິອາທິນາ. ອຏ຺ຐຫີຕິ ຈຕູຫິ ຜເລຫິ ຈຕູຫິ ຈ ມຄ຺ເຄຫີຕິ ອຏ຺ຐຫິ. ພຫິຠູໂຕ ນ ອນ຺ໂຕຠາໂວ. ໂລກຸຕ຺ຕຣາເນວ ອິນ຺ທ຺ຣິຍານິ ກຖິຕານິ ມຄ຺ຄຜລຈິຕ຺ຕຸປ຺ປາທປຣິຍາປນ຺ນຕ຺ຕາ.

໙-໑໐. ສມ຺ປນ຺ນສຸຕ຺ຕາທິວຓ຺ຓນາ

໔໘໙-໔໙໐. ອິນ຺ທ຺ຣິຍສມ຺ປນ຺ໂນຕິ ເອຕ຺ຖ ສມ຺ປນ຺ນສທ຺ໂທ ປຣິປູຣິອຕ຺ໂຖຕິ ອາຫ ‘‘ປຣິປຸຓ຺ຓິນ຺ທ຺ຣິໂຍ’’ຕິ. ມິສ຺ສການິ ອິນ຺ທ຺ຣິຍານິ ກຖິຕານິ ສາມຎ຺ຎໂຕວ ເທສິຕຕ຺ຕາ.

ມຸທຸຕຣວຄ຺ຄວຓ຺ຓນາ ນິຏ຺ຐິຕາ.