໘. ທພ຺ພສຸຕ຺ຕວຓ຺ຓນາ

໔໗໘. ໂສໂຕ ອາປຊ຺ຊີຍຕິ ເອເຕນາຕິ ໂສຕາປຕ຺ຕິ, ອນາຄຕໍ ປຕິ ປຐມມຄ຺ໂຄ. ໂສໂຕຕິ ອຣິຍມຄ຺ຄໂສໂຕ ທຏ຺ຐພ຺ໂພ. ອາປຊ຺ຊີຍຕີຕິອາທິໂຕ ປຏິປຊ຺ຊີຍຕິ. ປຐມມຄ຺ຄປຏິລາຠນິມິຕ຺ຕານິ ໂສຕາປນ຺ນສ຺ສ ອງ຺ຄານິ ອິຘ ‘‘ໂສຕາປຕ຺ຕິຍງ຺ຄານີ’’ຕິ ວຸຕ຺ຕານິ. ຕານິ ປນ ຕີສຸ ຐາເນສຸ ສທ຺ຘາ ອຣິຍກນ຺ຕສີລຎ຺ຈາຕິ ເວທິຕພ຺ພານິ. ສວິສເຍຕິ ສກວິສເຍ. ເຊຏ຺ຐກຠາວທສ຺ສນຕ຺ຖນ຺ຕິ ປຘານຠາວທສ຺ສນຕ຺ຖໍ. ຍຕ຺ຖ ສທ຺ຘາທິອິນ຺ທ຺ຣິຍານໍ ສາຕິສຍກິຈ຺ຈໍ, ເຕສໍ ກິຈ຺ຈາຕິເຣກຕໍ ທສ຺ເສຕຸນ຺ຕິ ອຕ຺ໂຖ. ອິທານິ ຕມຕ຺ຖໍ ອຸປມາຫິ ວິຠາເວຕຸໍ ‘‘ຍຖາ ຫີ’’ຕິອາທິ ວຸຕ຺ຕໍ. ປຕ຺ວາຕິ ອຕ຺ຕໂນ ກິຈ຺ຈາຕິເຣກຏ຺ຐານໍ ປຏິລຠິຕ຺ວາ. ປຸພ຺ພງ຺ຄມນ຺ຕິ ສທ຺ທຫນກິຈ຺ເຈສຸ ປຸເຣຈາຣໍ ໂຘຣຍ຺ຫໍ. ເສສານິ ວີຣິຍິນ຺ທ຺ຣິຍາທີນິ. ຕທນ຺ວຍານີຕິ ຕທນຸຄຕານິ ຕສ຺ສ ສທ຺ຘິນ຺ທ຺ຣິຍາທິກສ຺ສ ປກ຺ຂິການິ. ເອສ ນໂຍ ເສເສສຸປິ. ຌານວິໂມກ຺ເຂຕິ ຌານສງ຺ຂາເຕ ວິໂມກ຺ເຂ ສມາຘິປຘານຕາຍ ຌານານໍ. ເອວຎ຺ຈ ກຕ຺ວາ ‘‘ໂສຕາປຕ຺ຕິຍງ຺ຄານິ ປຕ຺ວາ’’ຕິ ອິທຎ຺ຈ ວຈນໍ ສມຕ຺ຖິຕໍ ໂຫຕິ. ສທ຺ຘູປນິສຎ຺ຫິ ສີລນ຺ຕິ. ອຣິຍສຈ຺ຈານິ ປຕ຺ວາຕິ ຈຕ຺ຕາຣິ ສຈ຺ຈານິ ອຠິສເມຕພ຺ພານິ ປາປຸຓິຕ຺ວາ.