໒໓໒. ອຏ຺ຐຈີວຣມາຕິກາກຖາ

໓໗໙. ອິທານິ ອາຫາຕິ ສມ຺ພນ຺ໂຘ. ປຸຄ຺ຄລາຘິຏ຺ຐານນເຍນາຕິ ‘‘ສີມາຍ ເທຕີ’’ຕິ ກຕ຺ຕຸວາຈເກນ ກິຣິຍາປເທນ ທາຍກປຸຄ຺ຄລສງ຺ຂາຕກຕ຺ຕຸໂນ ອຘິຏ຺ຐານວເສນ ວຸຕ຺ຕຕ຺ຕາ ປຸຄ຺ຄລາຘິຏ຺ຐາເນນ ນເຍນ. ເອຕ຺ຖາຕິ ເອຕາສຸ ອຏ຺ຐສຸ ມາຕິກາສຸ. ອຏ຺ຐມາ ມາຕິກາຕິ ໂຍຊນາ. ຕຕ຺ຖາຕິ ອຏ຺ຐສຸ ມາຕິກາສຸ. ສພ຺ພຕ຺ຖາຕິ ສພ຺ເພສຸ ‘‘ກຕິກາຍ ເທຕີ’’ຕິອາທີສຸ.

ສີມາຍ…ເປ… ຠາເຊຕພ຺ພນ຺ຕິອາທິມ຺ຫິ ມາຕິການິທ຺ເທເສ ປນ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ສີມາຍ ເທຕີຕິ ເອຕ຺ຖ ປນ຺ນຣສ ສີມາ ເວທິຕພ຺ພາຕິ ສມ຺ພນ຺ໂຘ.

ຕຕ຺ຖາຕິ ປນ຺ນຣສສຸ ສີມາສຸ. ອຸປຈາຣສີມາ ປຣິຈ຺ຉິນ຺ນາ ໂຫຕີຕິ ສມ຺ພນ຺ໂຘ. ເອຕ຺ຕກໍ ຐານນ຺ຕິ ປຣິກ຺ເຂປາຣຫຏ຺ຐານສ຺ສ ເອກນ຺ເຕນ ອວຸຕ຺ຕຕ຺ຕາ ເອກນ຺ເຕນ ປຣິກ຺ເຂປາຣຫຏ຺ຐານໍ ທສ຺ເສນ຺ໂຕ ອາຫ ‘‘ອປິຈາ’’ຕິອາທິ. ຘຸວສນ຺ນິປາຕໂຕ ວາ ຂິປິຕານນ຺ຕິ ສມ຺ພນ຺ໂຘ. ‘‘ປຣິຍນ຺ເຕ’’ຕິ ປທໍ ປຸພ຺ພາປຣາເປກ຺ຂໍ. ຕສ຺ມາ ຕີສຸ ນິສ຺ສກ຺ກປເທສຸ ໂຍເຊຕພ຺ພໍ. ສາ ປນາຕິ ອຸປຈາຣສີມາ ປນ. ຠິກ຺ຂູສຸ ວຑ຺ຒນ຺ເຕສຸ ອາວາໂສປິ ວຑ຺ຒຕີຕິ ມນສິກຕ຺ວາ ວຸຕ຺ຕໍ ‘‘ຠິກ຺ຂູສຸ ວຑ຺ຒນ຺ເຕສູ’’ຕິ. ສພ຺ເພສໍ ຠິກ຺ຂູນນ຺ຕິ ສມ຺ພນ຺ໂຘ. ວຸຕ຺ຕເມວາຕິ ສີມກຖາຍໍ (ມຫາວ. ອຏ຺ຐ. ໑໓໘, ໑໔໔) ວຸຕ຺ຕເມວ.

ອປິຈ ໂຂຕິ ເອຕ຺ຖ ອປິສທ຺ໂທ ປຸຈ຺ຉຕ຺ຖວາຈໂກ. ເກຫິ ຐປິຕາຕິ ຫິ ອຕ຺ໂຖ. ຣາຊຣາຊມຫາມຕ຺ຕາ ຐເປນ຺ຕີຕິ ສມ຺ພນ຺ໂຘ. ລາຠສີມາຕິ ລາຠສ຺ສ ມຣິຍາໂທ. ຍນ຺ຕິ ໂຍ ລາໂຠ. ເອຕ຺ຖນ຺ຕເຣຕິ ເອຕສ຺ມິໍ ຄາວຸຕາທິອນ຺ຕເຣ. ລາຠສີມາ ນາມາຕິ ລາເຠນ ປຣິຈ຺ຉິນ຺ນາ ສີມາ ນາມ. ຕຕ຺ຖາຕິ ພຫູສຸ ຊນປເທສຸ. ອນ຺ຕຣທີປາ ຈາຕິ ມຫາທີປໂຕ ອຎ຺ຎທີປາ ຈ, ຂຸທ຺ທກທີປາຕິ ອຘິປ຺ປາໂຍ.

ເອຕ຺ເຖວ ສີມາຍາຕິ ຂຓ຺ຑສີມາຍ ເອວ. ເຕສໍເຍວາຕິ ຂຓ຺ຑສີມຄຕານໍເຍວ. ເອວຕ຺ຖຜລໍ ທສ຺ເສນ຺ໂຕ ອາຫ ‘‘ອຎ຺ເຎສ’’ນ຺ຕິອາທິ. ຣຸກ຺ເຂ ວາ ປພ຺ພເຕ ວາ ຐິຕສ຺ສ ວາ ເຫຏ຺ຐາ ປຖວີມຊ຺ຌຄຕສ຺ສ ວາ ຠິກ຺ຂຸສ຺ສາຕິ ໂຍຊນາ. ອິມິສ຺ສາ ອຸປຈາຣສີມາຍ ຐິຕສ຺ສາຕິ ສມ຺ພນ຺ໂຘ. ສມານສໍວາສສີມາຍາຕິ ມຫາສີມາຍ. ຂຓ຺ຑສີມສີມນ຺ຕຣິກາສູຕິ ຂຓ຺ຑສີມາຍຎ຺ຈ ທ຺ວິນ຺ນໍ ສີມານໍ ສີມນ຺ຕຣິກາຍຎ຺ຈ. ຕຕ຺ຖ ທ຺ວິນ຺ນໍ ຄາມຏ຺ຐານມ຺ປິ ປາປຸຓາຕິ. ອວິປ຺ປວາສສີມາຍ ທິນ຺ນໍ ຄາມຏ຺ຐານໍ ນ ປາປຸຓາຕິ ‘‘ຐເປຕ຺ວາ ຄາມຎ຺ຈ ຄາມູປຈາຣຎ຺ຈາ’’ຕິ ວຸຕ຺ຕຕ຺ຕາ.

ຊມ຺ພຸຍາ ລກ຺ຂິໂຕ ທີໂປ ຊມ຺ພຸທີໂປ. ຕມ຺ໂພ ໂລຫິໂຕ ປາຓິ ຫຕ຺ໂຖ ເອເຕສນ຺ຕິ ຕມ຺ພປາຓິໂນ. ວິຊຍກຸມາຣາທໂຍ ສຕ຺ຕສຕາ ຊນາ. ເຕສໍ ນິວາໂສ ຕມ຺ພປຓ຺ຓິ, ໂສເຍວ ທີໂປຕິ ຕມ຺ພປຓ຺ຓິທີໂປ, ຕສ຺ມິໍ. ສພ຺ເພສໍ ຠາຄນ຺ຕິ ສມ຺ພນ຺ໂຘ. ຕຕ຺ເຣວາຕິ ຊມ຺ພຸທີເປເຍວ. ເອວນ຺ຕິອາທິ ນິຄມນໍ.

ໂຍ ປນ ຠຓຕີຕິ ສມ຺ພນ຺ໂຘ. ຕໂຕຕິ ກຖນໂຕ, ປຣນ຺ຕິ ສມ຺ພນ຺ໂຘ. ນນ຺ຕິ ມຫາສິວຕ຺ເຖຣໍ. ຕິໂຍຊນາປີຕິ ປິສທ຺ໂທ ຕໂຕ ອູນາປິ ໂຫຕີຕິ ທສ຺ເສຕິ. ສພ຺ພໍເປຕນ຺ຕິ ສພ຺ພໍປິ ເອຕໍ ລາຠຄຓ຺ຫນາທິໍ. ອິຕິ ອາຫໍສູຕິ ໂຍຊນາ.

ກຕິການໍ ຍຖິຈ຺ຉິຕກເຕນ ປວຕ຺ຕຕ຺ຕາ ພຫຸ ໂຫຕິ, ຕສ຺ມາ ອິຘ ອິຈ຺ຉິຕກຕິກໍ ທສ຺ເສຕຸໍ ວຸຕ຺ຕໍ ‘‘ສມານລາຠກຕິກາຍາ’’ຕິ. ຕຕ຺ຣາຕິ ‘‘ກຕິກາຍ ເທຕີ’’ຕິ ປາເຐ. ສນ຺ນິປຕິເຕຫິ ຠິກ຺ຂູຫິ ຠາເຊຕພ຺ພນ຺ຕິ ສມ຺ພນ຺ໂຘ. ຕສ຺ສາຕິ ວິຫາຣສ຺ສ. ພຸທ຺ຘາຘິວຸຕ຺ໂຖຕິ ພຸທ຺ເຘນ ອຘິ ອິສ຺ສຣວເສນ ວສິຍິຕ຺ຖາຕິ ພຸທ຺ຘາຘິວຸຕ຺ໂຖ. ເອຕ຺ຕາວຕາຕິ ເອຕ຺ຕເກນ ສາວນມຕ຺ເຕນ. ນິສິນ຺ໂນວາຕິ ນິສິນ຺ໂນ ເອວ ໂຫຕິ, ນິສິນ຺ໂນ ອິວ ວາ. ຕສ຺ມິໍ ວິຫາເຣປີຕິ ຕສ຺ມິໍ ໂປຣາຓກາທິວິຫາເຣປິ. ເອວເມວາຕິ ‘‘ອຍໍ ໂປຣາຓໂກ ວິຫາໂຣ ເຕນ ນວວິຫາເຣນ ສທ຺ຘິໍ ສມານລາຠໍ ກາຕຸໍ ສງ຺ຆສ຺ສ ຣຸຈ຺ຈຕີ’’ຕິອາທິນາ ເອວເມວ. ອິຘາຕິ ໂປຣາຓກວິຫາເຣ. ຕສ຺ມິນ຺ຕິ ນວວິຫາເຣ. ເອວນ຺ຕິ ຍຖາ ເອເກນ ວິຫາເຣນ ສທ຺ຘິໍ ເອໂກ ວິຫາໂຣ ກາຕພ຺ໂພ, ເອວໍ ຕຖາຕິ ອຕ຺ໂຖ.

ຠິກ຺ຂາປຎ຺ຎຕ຺ຕິຍາຕິ ເອຕ຺ຖ ຠິກ຺ຂາ ປຎ຺ຎປິຍຕິ ນິຈ຺ຈວເສນ ຐປິຍຕິ ເອຕ຺ຖາຕິ ຠິກ຺ຂາປຎ຺ຎຕ຺ຕີຕິ ທສ຺ເສນ຺ໂຕ ອາຫ ‘‘ອຕ຺ຕໂນ ປຣິຈ຺ຈາຄປຎ຺ຎາປນຏ຺ຐາເນ’’ຕິ. ຕສ຺ສາຕິ ‘‘ຍຕ຺ຖ ສງ຺ຆສ຺ສ ຘຸວກາຣາ ກຣິຍນ຺ຕີ’’ຕິປາຐສ຺ສ. ອຕ຺ໂຖ ເອວໍ ເວທິຕພ຺ໂພຕິ ໂຍຊນາ. ຍຕ຺ຖ ວາຕິ ຍສ຺ມິໍ ວາ ຐາເນ. ອເນນາຕິ ຈີວຣທາຍເກນ. ສລາກຠຕ຺ຕາທີນິ ວາ ນິພທ຺ຘານິ ກາຣິຕານີຕິ ສມ຺ພນ຺ໂຘ. ເຍນ ປນາຕິ ຈີວຣທາຍເກນ ປນ. ສກໂລປິ ວິຫາໂຣຕິ ສກໂລປິ ສອາຣາໂມ ວິຫາໂຣ. ຕຕ຺ຖາຕິ ຈີວຣທາຍເກ. ອິເມຕິ ປາກວຕ຺ຕສ຺ສ ວຕ຺ຕນຏ຺ຐານາທໂຍ ວິຫາຣາ. ຘຸເວນ ກຣິຍນ຺ຕີຕິ ຘຸວກາຣາ ວິຫາຣາ. ໂສຕິ ຈີວຣທາຍໂກ. ຍຕ຺ຖາຕິ ຍສ຺ມິໍ ຐາເນ. ສພ຺ພຕ຺ຖາຕິ ສພ຺ເພສຸ ພຫູສຸ ວິຫາເຣສຸ.

ເຕຫີຕິ ພຫຸຕເຣຫິ ຠິກ຺ຂູຫິ. ຘຸວກາເຣສູຕິ ນິທ຺ຘາຣເຓ ຠຸມ຺ມໍ. ເອກຕ຺ຖາຕິ ເອກສ຺ມິໍ ຘຸວກາເຣ. ‘‘ສເຈ ຠິກ຺ຂຸຄຓນາຍ ຄຓ຺ຫຖາຕິ ວທຕີ’’ຕິ ອິມິນາ ສເຈ ນ ວທຕິ, ຠິກ຺ຂຸຄຓນາຍ ຠາເຊຕ຺ວາ ຄຓ຺ຫິຕຸໍ ນ ວຏ຺ຏຕີຕິ ທສ຺ເສຕິ, ວິຫາຣຄຓນາຍ ຄຓ຺ຫິຕຸໍ ວຏ຺ຏຕີຕິ ອຘິປ຺ປາໂຍ. ຕຖາຕິ ຍຖາ ‘‘ຠິກ຺ຂຸຄຓນາຍ ຄຓ຺ຫຖາ’’ຕິ ວທຕິ, ຕຖາຕິ ອຕ຺ໂຖ. ເອຕ຺ຖາຕິ ຠາເຊຕພ຺ພວຕ຺ຖູສຸ. ຕນ຺ຕິ ມຎ຺ຈປີຐກໍ, ປຸຈ຺ຉິຕ຺ວາ ທາຕພ຺ພນ຺ຕິ ສມ຺ພນ຺ໂຘ. ປຸຈ຺ຉິຕ຺ວາຕິ ທາຍກໍ ປຸຈ຺ຉິຕ຺ວາ, ວທຕີຕິ ທາຍໂກ ວທຕິ. ສງ຺ຆສ຺ສາປີຕິ ປິສທ຺ໂທ ນ ທາຍກສ຺ເສວາຕິ ທສ຺ເສຕິ.

ອຸປຈາຣສີມາຍໍ ຐິເຕນ ສງ຺ເຆນ ຠາເຊຕພ຺ພນ຺ຕິ ສມ຺ພນ຺ໂຘ. ສີມຏ຺ຐສ຺ສາຕິ ອຸປຈາຣສີມາຍໍ ຐິຕສ຺ສ. ອສມ຺ປຕ຺ຕສ຺ສາປີຕິ ຠາຊນຏ຺ຐານໍ ອສມ຺ປຕ຺ຕສ຺ສາປິ. ອລສຊາຕິກາຕິ ໂກສຊ຺ຊຊາຕິກາ. ຐິຕິກາຕິ ປພນ຺ຘວເສນ ຐິຍເຕ ຐິຕິ, ສາເຍວ ຐິຕິກາ. ອຖ ວາ ‘‘ຐິຕຏ຺ຐານໂຕ ປຏ຺ຐາຍ ທາຕພ຺ພ’’ນ຺ຕິ ອຏ຺ຐກຖາຍໍ (ມຫາວ. ອຏ຺ຐ. ໓໗໙) ວຸຕ຺ຕຕ຺ຕາ ຕິຏ຺ຐຕິ ປພນ຺ຘວເສນ ເອຕ຺ຖາຕິ ຐິຕິ, ສາເຍວ ຐິຕິກາຕິ ວຈນຕ຺ໂຖ ກາຕພ຺ໂພ. ຐິຕິກໍ ຐເປຕ຺ວາຕິ ວີສຕິວສ຺ສສງ຺ຂາຕໍ ຐິຕິກໍ ຐເປຕ຺ວາ. ເຕສນ຺ຕິ ເຖຣານໍ.

ສມ຺ປຕ຺ຕສມ຺ປຕ຺ຕານນ຺ຕິ ຠາຊນຏ຺ຐານໍ ສມ຺ປຕ຺ຕສມ຺ປຕ຺ຕານໍ. ອຕ຺ຕໂນ ວິຫາຣທ຺ວາເຣ ວາ ອຕ຺ຕໂນ ອນ຺ໂຕວິຫາເຣເຍວ ວາຕິ ໂຍຊນາ. ສີມາຕິ ອຸປຈາຣສີມາ. ເຖຣາສນໍ ອາຣູຬ຺ເຫ ສຕີຕິ ໂຍຊນາ. ວສ຺ສຄ຺ເຄນາຕິ ວສ຺ສຄຓນາຍ.

ປາເຏກ຺ກນ຺ຕິ ປຈ຺ເຈກໍ. ສພ຺ພາເນວ ຈີວຣານີຕິ ສມ຺ພນ຺ໂຘ. ທຸພ຺ຠາສິຕທຸຄ຺ຄຫິຕານມຕ຺ຖໍ ທສ຺ເສນ຺ໂຕ ອາຫ ‘‘ຄຕຄຕຏ຺ຐາເນ ສງ຺ຆິກາເນວ ໂຫນ຺ຕີ’’ຕິ. ເອກນ຺ຕິ ທສສຸ ວຕ຺ເຖສຸ ເອກໍ.

ວຕ຺ຖສ຺ເສວ ປຸປ຺ຜໍ ວາ ວລິ ວາ ອຕ຺ຖີຕິ ໂຍຊນາ. ເຕນາຕິ ປຸປ຺ຜວລິນາ. ເອກໍ ຕນ຺ຕນ຺ຕິ ເອກໍ ສຸຕ຺ຕໍ. ຕຕ຺ຖາຕິ ເຕສຸ ຐິຕິກາຍ ຐານາຏ຺ຐາເນສຸ. ທ຺ວີຫິປິ ຄເຫຕພ຺ພໍ ຐິຕິກາຍ ອຠາວໂຕ.

ຠິກ຺ຂຸ ອຕ຺ຕໂນ ສນ຺ຕກໍ ຍໍ ຈີວຣນ຺ຕິ ໂຍຊນາ. ປໍສຸກູລິການມ຺ປິ ວຏ຺ຏຕີຕິ ‘‘ສງ຺ຆສ຺ສ ເທມາ’’ຕິ ວາ ‘‘ຕຸຍ຺ຫໍ ເທມາ’’ຕິ ວາ ອວຕ຺ວາ ‘‘ຠິກ຺ຂູນໍ ເທມ, ເຖຣານໍ ເທມາ’’ຕິ ວຸຕ຺ຕຕ຺ຕາ ປໍສຸກູລິການມ຺ປິ ວຏ຺ຏຕິ. ຠິກ຺ຂຸເຖຣາ ນາມ ຫິ ນ ອຕ຺ຕນາເຍວ ໂຫນ຺ຕິ, ອຎ຺ເຎປິ ພຫູ, ຕສ຺ມາ ວຏ຺ຏຕິ. ‘‘ສງ຺ຆສ຺ສາ’’ຕິ ວຸຕ຺ເຕ ອຕ຺ຕນາ ເອກນ຺ເຕນ ສງ຺ໂຆເຍວ, ຕສ຺ມາ ‘‘ສງ຺ຆສ຺ສາ’’ຕິ ວຸຕ຺ເຕປິ ນ ວຏ຺ຏຕິ, ປເຄວ ‘‘ຕຸຍ຺ຫ’’ນ຺ຕິ ວຸຕ຺ເຕ.

ຕໂຕຕິ ພຫຸວຕ຺ຖໂຕ. ຄເຫຕຸໍ ນ ວຏ຺ຏຕີຕິ ປໍສຸກູລິການໍ ຄເຫຕຸໍ ນ ວຏ຺ຏຕິ.

ຍນ຺ຕິ ວຕ຺ຖໍ. ຕຕ຺ຖາຕິ ປຣິກ຺ຂາເຣສຸ. ສຸຕ຺ຕນ຺ຕິ ຕນ຺ຕໍ.

ເອວໍ ອນ຺ໂຕສີມໍ ປວິສິຕ຺ວາ ‘‘ສງ຺ຆສ຺ສ ເທມາ’’ຕິ ທິນ຺ເນ ວິນິຈ຺ຉຍໍ ທສ຺ເສຕ຺ວາ ພຫິສີມາຍ ທິນ຺ເນ ຕໍ ທສ຺ເສນ຺ໂຕ ອາຫ ‘‘ສເຈ ປນາ’’ຕິອາທິ. ເອກພທ຺ຘາ ຈາຕິ ທ຺ວາທສຫຕ຺ຖມນຕິກ຺ກມິຕ຺ວາ ເອກໂຕພທ຺ຘາ ຈ. ເຍ ປນາຕິ ຠິກ຺ຂູ ປນ.

ອຸຠໂຕສງ຺ຆສ຺ສ ເທຕີຕິ ເອຕ຺ຖ ຈຕຸນ຺ນໍ ວາກ຺ຍານໍ ວເສນ ວຸຕ຺ເຕປິ ອຸຠໂຕສງ຺ຆສ຺ສ ເທຕິເຍວ ນາມາຕິ ທສ຺ເສນ຺ໂຕ ອາຫ ‘‘ອຸຠໂຕສງ຺ຆສ຺ສ ທມ຺ມີຕິ ວຸຕ຺ເຕປີ’’ຕິອາທິ. ອຸຠໂຕສງ຺ຆຄ຺ຄຫເຓນ ຄຫິຕຕ຺ຕາຕິ ປຸຄ຺ຄລສ຺ສ ອຸຠໂຕສງ຺ຆຄ຺ຄຫເຓນ ຄຫິຕຕ຺ຕາ. ‘‘ເອເສວ ນໂຍ’’ຕິ ອິມິນາ ເອກວີສຕິປຏິວີເສ ກຕ຺ວາ ເອໂກ ເຈຕິຍສ຺ສ ທາຕພ຺ໂພຕິ ນຍໍ ອຕິທິສຕິ. ປາປຸຓນໂກຏ຺ຐາໂສ ນາມ ນຕ຺ຖິ ເຈຕິຍສ຺ສ ອຸຠໂຕສງ຺ຆຄ຺ຄຫເຓນ ອຄຫິຕຕ຺ຕາ.

ຕຕ຺ຖາຕິ ອຸຠໂຕສງ຺ຆປຸຄ຺ຄລເຈຕິເຍສຸ. ເສສໍ ສຸວິຎ຺ເຎຍ຺ຍເມວ.

ປຸພ຺ເພຕິ ພຸທ຺ຘສ຺ສ ຠຄວໂຕ ຘຣມານກາເລ. ຕທາຕິ ຍທາ ພຸທ຺ໂຘ ຠຄວາ ຘຣຕິ, ຕທາ. ປຏິມໍ ວາຕິ ປຏິພິມ຺ພໍ ວາ. ຕຎ຺ຫິ ຠຄວຕາ ປຏິ ສທິສໍ ມານີຍຕີຕິ ປຏິມາຕິ ວຸຈ຺ຈຕິ. ເຈຕິຍໍ ວາຕິ ຖູປໍ ວາ. ໂສ ຫິ ເທວມນຸສ຺ເສຫິ ຈິຕິຕພ຺ພໍ, ປູເຊຕພ຺ພໍ, ອິຏ຺ຐກາທີຫິ ວາ ຈິນິຕພ຺ພນ຺ຕິ ເຈຕິຍນ຺ຕິ ວຸຈ຺ຈຕິ. ຕຕ຺ຖາຕິ ເທຍ຺ຍຘມ຺ເມສຸ. ຍນ຺ຕິ ກິຣິຍາປຣາມສນໍ. ຍໍ ເທນ຺ຕີຕິ ໂຍຊນາ. ຕຕ຺ຖາຕິ ຕສ຺ມິໍ ທາເນ. ອນິຍມວາຈກສ຺ສ ‘‘ໂຍ’’ຕິ ສພ຺ພນາມສ຺ສ ອຕ຺ຖໍ ທສ຺ເສນ຺ໂຕ ອາຫ ‘‘ປພ຺ພຊິໂຕ ວາ ຄຫຏ຺ໂຐ ວາ’’ຕິ. ວຕ຺ຕໍ ກຕ຺ວາ ປຣິຠຸຎ຺ຊິຕຸນ຺ຕິ ປຸພ຺ພກາລອປຣກາລກິຣິຍານໍ ວິກາຣວເສນ ອນິຍຕຕ຺ຕາ ວຸຕ຺ຕໍ ‘‘ຠຸຎ຺ຊິຕ຺ວາ ປຈ຺ຉາປິ ວຕ຺ຕໍ ກາຕຸ’’ນ຺ຕິ.

‘‘ທູຣມ຺ປິ ຫຣິຕ຺ວາ ປູເຊຕພ຺ພ’’ນ຺ຕິ ອິມິນາ ຊງ຺ຆເປສນິກກມ຺ມໍ ນ ໂຫຕີຕິ ທສ຺ເສຕິ. ຫຣນ຺ຕສ຺ສ ຠິກ຺ຂຸໂນຕິ ສມ຺ພນ຺ໂຘ. ຄຈ຺ຉໂຕຕິ ອນາທເຣ ສາມິວຈນໍ. ຕນ຺ຕິ ສງ຺ຆສ຺ສ ອາຫຏຠຕ຺ຕໍ.

ວສ຺ສໍວຸຕ຺ຖສງ຺ຆສ຺ສາຕິ ວສ຺ສໍ ວສິຕ຺ຖາຕິ ວສ຺ສໍວຸຕ຺ໂຖ. ອລຸຕ຺ຕກິຕນ຺ຕສມາໂສຍໍ, ໂສເຍວ ສງ຺ໂຆ ວສ຺ສໍວຸຕ຺ຖສງ຺ໂຆ, ຕສ຺ສ. ຍາວຕິກສທ຺ໂທ ຍຕ຺ຕກປຣິຍາໂຍຕິ ອາຫ ‘‘ຍຕ຺ຕກາ’’ຕິ. ທິສາປກ຺ກນ຺ຕສ຺ສາປີຕິ ອຎ຺ຎໍ ທິສໍ ປກ຺ກນ຺ຕສ຺ສປິ, ທາຕພ຺ພນ຺ຕິ ສມ຺ພນ຺ໂຘ. ວທນ຺ຕີຕິ ອຏ຺ຐກຖາຈຣິເຍຫິ ອປເຣ ອາຈຣິຍາ ວທນ຺ຕິ. ເອຕນ຺ຕິ ວຈນໍ.

ສມ຺ປຕ຺ຕານນ຺ຕິ ທິນ຺ນຏ຺ຐານໍ ສມ຺ປຕ຺ຕານໍ. ສພ຺ເພສນ຺ຕິ ຍຕ຺ຖ ກຕ຺ຖຈິ ວຸຕ຺ຖວສ຺ສານໍ ສພ຺ເພສໍ. ຕຕ຺ຣາຕິ ວິຫາເຣ. ຕຕ຺ຣາຕິ ຕສ຺ມິໍ ວທເນ ສຕິ, ເຕສຸ ຠິກ຺ຂູສຸ ວາ. ວສ຺ສໍ ວສນ຺ຕີຕິ ວສ຺ສໍວສນ຺ຕາ, ເຕສໍ. ຈີວຣມາເສຕິ ຈີວເຣນ ລກ຺ຂິເຕ ປຈ຺ຉິມກຕ຺ຕິກມາເສ.

ເຫມນ຺ຕສ຺ສ ປຈ຺ຉິໂມ ທິວໂສຕິ ຜຄ຺ຄຸຓປຸຓ຺ຓມີສງ຺ຂາໂຕ ເຫມນ຺ຕສ຺ສ ປຈ຺ຉິໂມ ທິວໂສ. ວສ຺ສາວາສິກນ຺ຕິ ວສ຺ສໍ ອາວສນ຺ຕານໍ ທາຕພ຺ພໍ ຈີວຣໍ. ອາໂຣເປຕພ຺ພາກາຣໍ ທສ຺ເສນ຺ໂຕ ອາຫ ‘‘ອຕີຕວສ຺ສາວາສສ຺ສາ’’ຕິອາທິ. ຕຕ຺ຖ ອຕີຕວສ຺ສາວາສສ຺ສາຕິ ອຕີຕວສ຺ສໍ, ອຕີຕວສ຺ເສ ວາ ອາວາສສ຺ສ ສງ຺ຆສ຺ສ. ຕນ຺ຕິ ຈີວຣໍ.

ຐເປຕ຺ວາຕິ ວິຫາເຣ ຐເປຕ຺ວາ. ສມ຺ປຕ຺ຕານນ຺ຕິ ອິມໍ ຐານໍ ສມ຺ປຕ຺ຕານໍ. ອິໂຕຕິ ຈີວຣທານກາລໂຕ. ເຕຕິ ອນ຺ໂຕວສ຺ເສ ວຸຕ຺ຖຠິກ຺ຂູ.

ອາທິສ຺ສາຕິ ປທສ຺ສ ຕ຺ວາປຈ຺ຈຍນ຺ຕຠາວໍ ທສ຺ເສນ຺ໂຕ ອາຫ ‘‘ອາທິສິຕ຺ວາ’’ຕິ. ອຍມຕ຺ໂຖ ເວທິຕພ຺ໂພຕິ ໂຍຊນາ. ຕຕ຺ຣາຕິ ‘‘ຍາຄຸຍາ ວາ’’ຕິອາທິປາເຐ. ອຊ຺ຊຕນາຍ ວາຕິ ອຊ຺ຊ ຠວານໍ ປຸຎ຺ຎານໍ ອຕ຺ຖາຍ ວາ. ເຕສນ຺ຕິ ນິມນ຺ຕການໍ, ປວິຏ຺ຐານໍ ຠິກ຺ຂູນນ຺ຕິ ສມ຺ພນ຺ໂຘ. ເຍຫິ ນິມນ຺ຕິເຕຫີຕິ ນິມນ຺ຕິເຕຫິ ເຍຫິ ຠິກ຺ຂູຫິ. ເຍສໍ ວາ ປຕ຺ຕນ຺ຕິ ສມ຺ພນ຺ໂຘ. ເຕສໍ ນ ປາປຸຓາຕີຕິ ສພ຺ເພສໍ ເຕສໍ ນ ປາປຸຓາຕິ, ກສ຺ມາ? ອນິມນ຺ຕິຕຕ຺ຕາ. ເຕສໍ ນ ປາປຸຓນ຺ຕິ, ກສ຺ມາ? ນິມນ຺ຕິຕເຄຫໍ ອປວິຏ຺ຐຕ຺ຕາ. ໂສຕິ ທາຍໂກ.

ປຸພ຺ເພປີຕິ ອິໂຕ ປຸພ຺ເພປິ. ອສ຺ສາຕິ ທາຍກສ຺ສ. ວາເສຕ຺ວາຕິ ວາສາເປຕ຺ວາ. ໂສຕິ ທາຍໂກ. ໂຍຕິ ຠິກ຺ຂຸ, ວສຕີຕິ ສມ຺ພນ຺ໂຘ. ຕານີຕິ ເຠສຊ຺ຊານິ. ອິທນ຺ຕິ ຈີວຣໍ.

‘‘ອນ຺ເຕວາສິການຎ຺ຈາ’’ຕິ ປເທນ ສທ຺ຘິວິຫາຣິກາປິ ຄເຫຕພ຺ພາ ອຸທ຺ເທສາທິວເສນ ອນ຺ເຕ ວສນສີລຕ຺ຕາ. ອຸທ຺ເທສໍ ຄເຫຕຸໍ ອາຄໂຕ ຈ ຄເຫຕ຺ວາ ຄຈ຺ຉນ຺ໂຕ ຈາຕິ ອິເມ ອນ຺ເຕ ອວສນສີລາປິ ຣູຬ຺ຫີວເສນ ອນ຺ເຕວາສິກາ ນາມ. ອິມິນາ ນິສ຺ສຍໍ ຄເຫຕຸໍ ອາຄໂຕ ຈ ເຖຣສ຺ສ ສນ຺ຕິເກ ນິສ຺ສຍໍ ຄຫິຕປຸພ຺ໂພ ຈ ອນ຺ເຕວາສິໂກ ນາມາຕິ ທສ຺ເສຕິ. ວຕ຺ຕໍ ກຕ຺ວາ ອຸທ຺ເທສປຣິປຸຈ຺ຉາທີນິ ຄເຫຕ຺ວາ ວິຈຣນ຺ຕານໍ ສພ຺ເພສໍ ອຸທ຺ເທສນ຺ເຕວາສິການໍ ປາປຸຓາຕີຕິ ໂຍຊນາ. ອິມິນາ ສທ຺ຘິວິຫາຣິກນິສ຺ສຍນ຺ເຕວາສິກອຸປສມ຺ປທນ຺ເຕວາສິກປພ຺ພຊ຺ຊນ຺ເຕວາສິກາປິ ຄເຫຕພ຺ພາ ເຕສມ຺ປິ ນິພທ຺ຘຈາຣິກຠິກ຺ຂຸຠາວໂຕ. ສພ຺ພຕ຺ຖາຕິ ສພ຺ພສ຺ມິໍ ຈີວຣກ຺ຂນ຺ຘເກ.

ອິຕິ ຈີວຣກ຺ຂນ຺ຘກວຓ຺ຓນາຍ ໂຍຊນາ ສມຕ຺ຕາ.