໙. ຈມ຺ເປຍ຺ຍກ຺ຂນ຺ຘກໍ

໒໓໔. ກສ຺ສປໂຄຕ຺ຕຠິກ຺ຂຸວຕ຺ຖຸກຖາ

໓໘໐. ຈມ຺ເປຍ຺ຍກ຺ຂນ຺ຘເກ ຄຄ຺ຄຣາຍ ໂປກ຺ຂຣຓິຍາຕິ ເອຕ຺ຖ ຄຄ຺ຄຣສທ຺ທສ຺ສ ນາມສທ຺ທຠາວໍ ທສ຺ເສນ຺ໂຕ ອາຫ ‘‘ຄຄ຺ຄຣນາມິກາຍ ອິຕ຺ຖິຍາ’’ຕິ. ອິມິນາ ຄຄ຺ຄຣສທ຺ໂທ ຄຄ຺ຄຣອິຕິ ນາມໍ ປວຕ຺ຕິນິມິຕ຺ຕໍ ກຕ຺ວາ ອິຕ຺ຖິທພ຺ພໍ ວທຕີຕິ ທສ຺ເສຕິ. ຕນ຺ຕິປຏິພທ຺ໂຘຕິ ຕນ຺ຕິຍາ ປຏິພທ຺ໂຘ. ‘‘ອຸສ຺ສຸກ຺ກມ຺ປິ ອກາສິ ຍາຄຸຍາ’’ຕິອາທີສຸ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ຕສ຺ສ ຠິກ຺ຂຸໂນຕິ ກສ຺ສປໂຄຕ຺ຕນາມກສ຺ສ ຕສ຺ສ ຠິກ຺ຂຸໂນ. ຕຕ຺ເຖວາຕິ ວາສຠຄາເມເຍວ.

໓໘໒. ອຘມ຺ເມນ ວຄ຺ຄກມ຺ມໍ ກໂຣນ຺ຕີຕິອາທີນໍ ນານາກຣຓນ຺ຕິ ສມ຺ພນ຺ໂຘ.

໒໓໖. ຎຕ຺ຕິວິປນ຺ນກມ຺ມາທິກຖາ

໓໘໕. ອຎ຺ຎຕ຺ຣາປິ ຘມ຺ມາຕິ ເອຕ຺ຖ ຘມ຺ມາຕິ ອຸປໂຍຄຕ຺ເຖ ນິສ຺ສກ຺ກວຈນເມຕນ຺ຕິ ອາຫ ‘‘ອຎ຺ຎຕ຺ຣ ຘມ຺ມ’’ນ຺ຕິ. ‘‘ອຎ຺ຎຕ຺ຣາ’’ຕິ ນິປາຕປໂຍເຄ ທຸຕິຍາຕຕິຍາປຎ຺ຈມີສຸ ອຎ຺ຎຕຣສ຺ສ ສມ຺ຠວໂຕ ອຸປໂຍຄວຈນມ຺ປິ ໂຫຕິ. ຕສ຺ມາ ວຸຕ຺ຕໍ ‘‘ອຍເມວ ວາ ປາໂຐ’’ຕິ. ‘‘ຠູເຕນ ວຕ຺ຖຸນາ’’ຕິ ອິມິນາ ຘມ຺ມສທ຺ທສ຺ສ ສຈ຺ຈຕ຺ຖໍ ທສ຺ເສຕິ. ‘‘ເອເສວ ນໂຍ’’ຕິ ອິມິນາ ສທ຺ທສຠາວເມວ ສນ຺ຘາຍ ອຕິທິສຕິ, ນ ອຕ຺ຖໍ. ເຕນ ວຸຕ຺ຕໍ ‘‘ເອຕ຺ຖ ປນາ’’ຕິອາທິ. ສຕ຺ຖຸສາສນນ຺ຕິ ສຕ຺ຖຸ ອາຓາ. ສຕ຺ຖຸອາຓາ ນາມ ຎຕ຺ຕິອນຸສາວນານໍ ສມ຺ປທາຕິ ອາຫ ‘‘ຎຕ຺ຕິສມ຺ປທາ ອນຸສາວນສມ຺ປທາ ຈາ’’ຕິ. ‘‘ປຏິກຸຏ຺ຐຎ຺ເຈວ ກຕຎ຺ຈາ’’ຕິ ອິມິນາ ປຏິກຸຏ຺ຐກຕນ຺ຕິ ປທສ຺ສ ທ຺ວນ຺ທວາກ຺ຍໍ ທສ຺ເສຕິ. ປຏິກຸສິຕພ຺ພນ຺ຕິ ປຏິກຸຏ຺ຐໍ, ກຕ຺ຕພ຺ພນ຺ຕິ ກຕໍ, ກມ຺ມໍ. ຕເມວຕ຺ຖໍ ທສ຺ເສນ຺ໂຕ ອາຫ ‘‘ຍໍ ອຎ຺ເຎສູ’’ຕິອາທິ. ຕຕ຺ຖ ຍນ຺ຕິ ກມ຺ມໍ.

໓໘໗. ປາຬິຍາຕິ ວິນຍປາຬິຍາ. ຍນ຺ຕິ ກມ຺ມໍ, ນ ກຣິຍຕີຕິ ສມ຺ພນ຺ໂຘ. ເອຕ຺ຖາຕິ ອຏ຺ຐກຖາຍໍ. ໂສ ຈ ໂຂຕິ ໂສ ຈ ວິຕ຺ຖາໂຣ, ອາຄໂຕຕິ ສມ຺ພນ຺ໂຘ. ກສ຺ມາ ຎຕ຺ຕິທຸຕິຍຎຕ຺ຕິຈຕຸຕ຺ຖກມ຺ມານເມວ ວເສນ ອາຄໂຕ, ນນຸ ຎຕ຺ຕິອປໂລກນກມ຺ມວເສນປິ ອາຄເຕນ ຠວິຕພ຺ພນ຺ຕິ ອາຫ ‘‘ຍສ຺ມາ ປນາ’’ຕິອາທິ. ຎຕ຺ຕິທຸຕິຍຎຕ຺ຕິຈຕຸຕ຺ເຖສຸ ຫາປນໍ ວາ ອຎ຺ຎຖາ ກຣຓໍ ວາ ອຕ຺ຖິ ວິຍ ຎຕ຺ຕິກມ຺ເມ ນຕ຺ຖີຕິ ໂຍຊນາ. ຎຕ຺ຕິກມ຺ເມ ຎຕ຺ຕິຏ຺ຐປນໂຕ ອຎ຺ຎກິຈ຺ຈສ຺ສ ອສມ຺ຠວໂຕ ຫາປນໍ ວາ ອຎ຺ຎຖາ ກຣຓໍ ວາ ນຕ຺ຖີຕິ ອຘິປ຺ປາໂຍ. ຕານີຕິ ຎຕ຺ຕິກມ຺ມອປໂລກນກມ຺ມານິ. ສພ຺ເພສມ຺ປິ ກມ຺ມານນ຺ຕິ ສພ຺ເພສມ຺ປິ ຈຕຸນ຺ນໍ ກມ຺ມານໍ. ປຣໂຕຕິ ປຣສ຺ມິໍ ປຣິວາຣາວສາເນ (ປຣິ. ອຏ຺ຐ. ໔໘໒).

໒໓໗. ຈຕຸວຄ຺ຄກຣຓາທິກຖາ

໓໘໘. ຍທິທໍ ກມ຺ມນ຺ຕິ ໂຍຊນາ. ເຕສນ຺ຕິ ສງ຺ຆານໍ. ກມ຺ມປ຺ປຕ຺ໂຕຕິ ເອຕ຺ຖ ກມ຺ເມນ, ກມ຺ມສ຺ສ ວາ ປຕ຺ໂຕຕິ ອຕ຺ຖໍ ປຏິກ຺ຂິປນ຺ໂຕ ອາຫ ‘‘ກມ຺ມໍ ປຕ຺ໂຕ’’ຕິ. ‘‘ສພ຺ພກມ຺ເມສຸ ກມ຺ມປຕ຺ໂຕ’’ຕິ ປາຬິນເຍນ ‘‘ກມ຺ເມສຸ ປຕ຺ໂຕ’’ຕິ ອຕ຺ໂຖປິ ຍຸຊ຺ຊຕິ. ໂລກໂວຫາຣວເສນ ‘‘ກມ຺ເມນ ກມ຺ມສ຺ສ ວາ ປຕ຺ໂຕ’’ຕິ ອຕ຺ໂຖປິ ຍຸຊ຺ຊເຕວ.

໓໘໙. ປຣິສໂຕຕິ ປຣິສກາຣຓາ. ຕຕ຺ຖາຕິ ‘‘ຈຕຸວຄ຺ຄກຣຓຎ຺ເຈ ຠິກ຺ຂເວ’’ຕິອາທິປາເຐ, ຈຕຸວີສຕິປຸຄ຺ຄເລສຸ ວາ. ກມ຺ມນານາສໍວາສໂກຕິ ອຸກ຺ເຂປນີຍກມ຺ມກໂຕ. ລທ຺ຘິນານາສໍວາສໂກຕິ ອຸກ຺ຂິຕ຺ຕານຸວຕ຺ຕໂກ. ‘‘ຫຸຕ຺ວາ’’ຕິ ອິມິນາ ‘‘ຠິກ຺ຂຸນີຈຕຸຕ຺ໂຖ’’ຕິອາທີສຸ ຈຕຸວີສຕິຍາ ຐາເນສຸ ກິຣິຍາວິເສສນຠາວໍ ທສ຺ເສຕິ. ຠິກ຺ຂຸນີ ຈຕຸຕ຺ຖີ ເອຕສ຺ສາຕິ ຠິກ຺ຂຸນີຈຕຸຕ຺ໂຖ, ຈຕຸວຄ຺ໂຄ ສງ຺ໂຆຕິອາທິນາ ວຈນຕ຺ໂຖ ກາຕພ຺ໂພ.

໓໙໓. ປຣິວາສາທີຕິອາທິສທ຺ເທນ ມູລາຍກສ຺ສນມານຕ຺ຕອພ຺ຠານານິ ສງ຺ຄຓ຺ຫາຕິ. ເຕສນ຺ຕິ ປຣິວາສາທິກມ຺ມານໍ. ປຣໂຕຕິ ປຣສ຺ມິໍ ຈູຬວຄ຺ເຄ (ຈູຬວ. ອຏ຺ຐ. ໗໕ ອາທໂຍ).

໓໙໔. ປຏິກຸຏ຺ຐກຕກມ຺ມສ຺ສາຕິ ປຏິກຸຏ຺ຐສ຺ສ ຫຸຕ຺ວາ ກຕສ຺ສ ກມ຺ມສ຺ສ. ປກຕຕ຺ຕສ຺ສາຕິ ເອຕ຺ຖ ປກຕິສີລສງ຺ຂາໂຕ ອຕ຺ຕາ ສຠາໂວ ເອຕສ຺ສາຕິ ປກຕຕ຺ໂຕຕິ ອຕ຺ຖໍ ທສ຺ເສນ຺ໂຕ ອາຫ ‘‘ອວິປນ຺ນສີລສ຺ສາ’’ຕິ. ສງ຺ຆາທິເສສໍ ອນາປຊ຺ຊນ຺ຕສ຺ສາປິ ອວິປນ຺ນສີລຕ຺ຕາ ວຸຕ຺ຕໍ ‘‘ປາຣາຊິກໍ ອນຊ຺ຌາປນ຺ນສ຺ສາ’’ຕິ. ອິມິນາ ສງ຺ຆາທິເສສໍ ອາປຊ຺ຊນ຺ໂຕປິ ປກຕຕ຺ໂຕເຍວາຕິ ທສ຺ເສຕິ. ໂສປິ ຫິ ອິຘ ອວິປນ຺ນສີໂລ ນາມ, ອຎ຺ຎຕ຺ຖ ປນ ສງ຺ຆາທິເສສສ຺ສ ສີລວິປຕ຺ຕິຠາວໂຕ ຕໍ ອາປຊ຺ຊນ຺ໂຕປິ ວິປນ຺ນສີໂລເຍວ ນາມ. ອານນ຺ຕຣິກສ຺ສາຕິ ເອຕ຺ຖ ອນນ຺ຕຣສທ຺ທສ຺ສ ສມ຺ພນ຺ຘຎ຺ຈ ຓິກປຈ຺ຈຍສ຺ສ ອຕ຺ຖຎ຺ຈ ທສ຺ເສນ຺ໂຕ ອາຫ ‘‘ອຕ຺ຕໂນ ອນນ຺ຕຣໍ ນິສິນ຺ນສ຺ສາ’’ຕິ. ຕຕ຺ຖ ‘‘ອຕ຺ຕໂນ’’ຕິ ອິມິນາ ອນນ຺ຕຣສທ຺ທສ຺ສ ສມ຺ພນ຺ຘໍ ທສ຺ເສຕິ. ‘‘ນິສິນ຺ນສ຺ສາ’’ຕິ ອິມິນາ ຓິກປຈ຺ຈຍສ຺ສ ອຕ຺ຖໍ ທສ຺ເສຕິ.

໒໓໙. ທ຺ເວນິສ຺ສາຣຓາທິກຖາ

໓໙໕. ວຕ຺ຖຸໂຕຕິ ວຕ຺ຖຸກາຣຓາ. ຕຕ຺ຖາຕິ ‘‘ທ຺ເວມາ ຠິກ຺ຂເວ’’ຕິອາທິປາເຐ. ‘‘ສນ຺ຘາຍ ວຸຕ຺ຕ’’ນ຺ຕິ ອິມິນາ ‘‘ອປ຺ປຕ຺ໂຕ’’ຕິອາທິສຸຕ຺ຕສ຺ສ ເນຍ຺ຍຕ຺ຖຠາວໍ ທສ຺ເສຕິ. ຫີຕິ ສຈ຺ຈໍ, ຍສ຺ມາ ວາ. ຕນ຺ຕິ ປພ຺ພາຊນີຍກມ຺ມໍ. ປຸນ ຕນ຺ຕິ ປພ຺ພາຊນີຍກມ຺ມເມວ. ເອສ ຠິກ຺ຂຸ ອປ຺ປຕ຺ໂຕຕິ ສມ຺ພນ຺ໂຘ. ກສ຺ມາ ອປ຺ປຕ຺ໂຕຕິ ອາຫ ‘‘ຍສ຺ມາ’’ຕິອາທິ. ອາເວຓິກລກ຺ຂເຓນາຕິ ອວິນາ ຫຸຕ຺ວາ ປວຕ຺ເຕນ ລກ຺ຂເຓນ. ອຕ຺ຕນາ ອວິນາ ຫຸຕ຺ວາ ອຕ຺ຕໂນ ສນ຺ຕເກນ ວິສຸໍ ຠູເຕນ ລກ຺ຂເຓນາຕິ ວຸຕ຺ຕໍ ໂຫຕິ. ຍທິ ອປ຺ປຕ຺ໂຕ, ກສ຺ມາ ສຸນິສ຺ສາຣິໂຕຕິ ອາຫ ‘‘ຍສ຺ມາ ປນສ຺ສາ’’ຕິອາທິ. ອສ຺ສາຕິ ຠິກ຺ຂຸສ຺ສ, ກເຣຍ຺ຍາຕິ ສມ຺ພນ຺ໂຘ. ຕໍ ເຈ ສງ຺ໂຆ ຕຊ຺ຊນີຍກມ຺ມາທິວເສນ ນິສ຺ສາເຣຕິ, ສຸນິສ຺ສາຣິໂຕຕິ ສມ຺ພນ຺ໂຘ. ໂສຕິ ຠິກ຺ຂຸ. ຍສ຺ມາ ອນຸຎ຺ຎາຕາ, ຕສ຺ມາ ສຸນິສ຺ສາຣິໂຕຕິ ໂຍຊນາ. ກິຕ຺ຕເກນ ອງ຺ເຄນ ອນຸຎ຺ຎາຕາຕິ ອາຫ ‘‘ເອເກນປິ ອງ຺ເຄນາ’’ຕິ.

໓໙໖. ໂອສາຣຓາຕິ ເອຕ຺ຖ ໂອຕ຺ຍູປສຄ຺ຄວເສນ ສຣຘາຕຸ ປເວສນຕ຺ໂຖຕິ ອາຫ ‘‘ປເວສນາ’’ຕິ. ຕຕ຺ຖາຕິ ‘‘ໂອສາຣຓາ’’ຕິອາທິປາເຐ. ໂອສາເຣຕີຕິ ເອຕ຺ຖ ອພ຺ຠານາທິວເສນ ປເວສນໍ ປຏິກ຺ຂິປນ຺ໂຕ ອາຫ ‘‘ອຸປສມ຺ປທກມ຺ມວເສນາ’’ຕິ. ສຫສ຺ສກ຺ຂຕ຺ຕຸມ຺ປີຕິ ປິສທ຺ໂທ ຄຣຫຕ຺ໂຖ. ເອກວາຣາທິເກ ປນ ກາ ນາມ ກຖາຕິ ທສ຺ເສຕິ. ສາຕິສາຣາຕິ ສໂທສາ. ຕຖາຕິ ຍຖາ ອາຈຣິຍຸປຊ຺ຌາຍາ ສາຕິສາຣາ, ຕຖາ. ເສໂສ ກາຣກສງ຺ໂຆ ສາຕິສາໂຣຕິ ສມ຺ພນ຺ໂຘ. ‘‘ຫຕ຺ຖຈ຺ຉິນ຺ນາທໂຍ ປນ ທ຺ວຕ຺ຕິໍສ ສຸໂອສາຣິຕາ’’ຕິ ວຸຕ຺ຕຕ຺ຕາ ອນ຺ຘມູຄພຘິຣານໍ ອປພ຺ພຊິຕານມ຺ປິ ອຸປສມ຺ປທາ ຣຸຫຕີຕິ ທຏ຺ຐພ຺ພໍ. ເຕຕິ ຫຕ຺ຖຈ຺ຉິນ຺ນາທໂຍ ທ຺ວຕ຺ຕິໍສ.

໓໙໗. ອຠູຕວຕ຺ຖຸວເສນາຕິ ອສຈ຺ຈວຕ຺ຖຸວເສນ, ອສໍວິຊ຺ຊມານວຕ຺ຖຸວເສນ ວາ. ຕຕ຺ຖາຕິ ‘‘ອິຘ ປນ ຠິກ຺ຂເວ’’ຕິອາທິປາເຐ. ປຏິນິສ຺ສຊ຺ຊິຕາຕິ ເອຕ຺ຖ ຕປຈ຺ຈຍສ຺ສ ກມ຺ມຕ຺ເຖ ປວຕ຺ຕຠາວໍ ທສ຺ເສນ຺ໂຕ ອາຫ ‘‘ປຏິນິສ຺ສຊ຺ຊິຕພ຺ພາ’’ຕິ.

໒໔໑. ອຸປາລິປຸຈ຺ຉາກຖາ

໔໐໐. ຕຕ຺ຖາຕິ ອຸປາລິປຎ຺ເຫສຸ. ຕສ຺ສປາປິຍສິກາທີຫິ ສທ຺ຘິໍ ເອກາ ປຸຈ຺ຉາ ກຕາຕິ ໂຍຊນາ. ຠິກ຺ຂູນມ຺ປິ ວາເຣຕິ ສມ຺ພນ຺ໂຘ. ປິສທ຺ເທນ ‘‘ນ ເກວລໍ ອຸປາລິປຎ຺ເຫສຸເຍວ ໂຍເຊຕພ຺ພານິ, ອຖ ໂຂ ຠິກ຺ຂູນໍ ວາເຣປີ’’ຕິ ທສ຺ເສຕິ.

໒໔໒. ຕຊ຺ຊນີຍກມ຺ມກຖາ

໔໐໗. ‘‘ອິຘ ປນ ຠິກ຺ຂເວ ຠິກ຺ຂຸ ຠຓ຺ຑນກາຣໂກ’’ຕິອາທິ ວຸຕ຺ຕນ຺ຕິ ສມ຺ພນ຺ໂຘ. ຕຕ຺ຖາຕິ ‘‘ອິຘ ປນ ຠິກ຺ຂເວ’’ຕິອາທິປາເຐ. ອນປທາໂນຕິ ເອຕ຺ຖ ອປປຸພ຺ໂພ ທາສທ຺ໂທ ອວຂຓ຺ຑນຕ຺ໂຖຕິ ອາຫ ‘‘ອປທານໍ ວຸຈ຺ຈຕິ ປຣິຈ຺ເຉໂທ’’ຕິ. ນຕ຺ຖິ ອປທານໍ ອວຂຓ຺ຑນໍ ອາປຕ຺ຕິປຣິຍນ຺ໂຕ ເອຕສ຺ສາຕິ ອນປທາໂນຕິ ວຈນຕ຺ໂຖ ກາຕພ຺ໂພ. ສາເຍວ ປາຬິ ວຸຕ຺ຕາຕິ ສມ຺ພນ຺ໂຘ. ຕຕ຺ຖາຕິ ຕສ຺ສໍ ປາຬິຍໍ. ກິຎ຺ຈິ ອຕ຺ຖວິນິຈ຺ຉຍໍ ປາຬິອນຸສາເຣນ ວິທິຕຸໍ ນ ສກ຺ກາ ນ ໂຫຕີຕິ ໂຍຊນາ.

ອິຕິ ຈມ຺ເປຍ຺ຍກ຺ຂນ຺ຘກວຓ຺ຓນາຍ ໂຍຊນາ ສມຕ຺ຕາ.