໑໑໘. ປຏິສ຺ສວທຸກ຺ກຏາປຕ຺ຕິກຖາ

໒໐໗. ປຏິສ຺ສເວ ອາປຕ຺ຕິ ທຸກ຺ກຏສ຺ສາຕິ ເອຕ຺ຖ ກິໍ ວສ຺ສາວາສປຏິສ຺ສຸເຕເຍວ ທຸກ຺ກຏາປຕ຺ຕິ ໂຫຕີຕິ ອາຫ ‘‘ນ ເກວລ’’ນ຺ຕິອາທິ. ເອຕສ຺ເສວາຕິ ວສ຺ສາວາສສ຺ເສວ. ເອວມາທິນາປີຕິ ປິສທ຺ໂທ ‘‘ປຏິສ຺ສເວ’’ຕິ ເອຕ຺ຖ ໂຍເຊຕພ຺ໂພ. ‘‘ປຏິສ຺ສເວປີ’’ຕິ ຫິ ອຕ຺ໂຖ. ຕສ຺ສ ຕສ຺ສາຕິ ກມ຺ມສ຺ສ. ຕຎ຺ຈ ໂຂຕິ ຕຎ຺ຈ ທຸກ຺ກຏໍ ວິສໍວາທນປຈ຺ຈຍາ ໂຫຕີຕິ ໂຍຊນາ. ປຐມມ຺ປີຕິ ປິສທ຺ໂທ ‘‘ປຈ຺ຉາປີ’’ຕິ ປທໍ ສມ຺ປິຓ຺ເຑຕິ. ປຐມມ຺ປິ ຫິ ປາຈິຕ຺ຕິຍໍ, ປຈ຺ຉາປິ ທຸກ຺ກຏນ຺ຕິ ອຕ຺ໂຖ.

ໂສ ຕທເຫວ ອກຣຓີໂຍຕິອາທີສຸ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ປຸຣິມິກາ ຈ ນ ປຎ຺ຎາຍຕີຕິ ເອຕ຺ຖ ປຸເຣ ຠວາ ປຸຣິມາ, ສາ ເອວ ປຸຣິມິກາ, ປາຏິປທຕິຖີ. ນານາສີມາຍ ທ຺ວີສຸ ອາວາເສສຸ ວສ຺ສໍ ອຸປຄຈ຺ຉນ຺ຕສ຺ສ ທຸຕິເຍ ‘‘ວສິສ຺ສາມີ’’ຕິ ປຐມາວາສສ຺ສ ອຸປຈາຣໂຕ ນິກ຺ຂນ຺ຕມຕ຺ເຕ ປຐມເສນາສນຄ຺ຄາຫສ຺ສ ປສ຺ສມ຺ຠນໍ ສນ຺ຘາຍ ວຸຕ຺ຕໍ ‘‘ປຸຣິມິກາ ຈ ນ ປຎ຺ຎາຍຕີ’’ຕິ. ອຣຸຓໍ ອນຸຏ຺ຐາເປຕ຺ວາຕິ ວສ຺ສໍ ອຸປຄມນວິຫາເຣ ອຣຸຓໍ ອນຸຏ຺ຐາເປຕ຺ວາ. ຕທເຫວາຕິ ຕສ຺ມິໍ ວສ຺ສູປຄມນອຫນິ ເອວ, ປກ຺ກນ຺ຕສ຺ສາປີຕິ ສມ຺ພນ຺ໂຘ. ປິສທ຺ທສ຺ສ ຄຣຫຕ຺ຖໍ ທສ຺ເສນ຺ໂຕ ອາຫ ‘‘ໂກ ປນ ວາໂທ’’ຕິອາທິ. ອາລໂຍຕິ ຈິຕ຺ຕສ຺ສ ອລ຺ລີຍນໍ. ອສຕິຍາຕິ ສຕິປມຸຏ຺ເຐນ. ວສ຺ສໍ ນ ອຸເປຕີຕິ ‘‘ອິມສ຺ມິໍ ວິຫາເຣ ອິມໍ ເຕມາສໍ ວສ຺ສໍ ອຸເປມີ’’ຕິ (ມຫາວ. ອຏ຺ຐ. ໑໘໔) ວຈີເຠທໍ ກຕ຺ວາ ວສ຺ສໍ ນ ອຸເປຕິ.

ສຕ຺ຕາຫນ຺ຕິ ສຕ຺ຕາເຫນ, ອນາຄຕາຍາຕິ ສມ຺ພນ຺ໂຘ. ນວມິໂຕຕິ ປຸພ຺ພກຕ຺ຕິກມາສສ຺ສ ຊຸຓ຺ຫປກ຺ຂນວມິໂຕ, ປຈ຺ຉິມກຕ຺ຕິກມາສສ຺ສ ຊຸຓ຺ຫປກ຺ຂນວມິໂຕ ວາ. ມາ ວາ ອາຄຈ຺ຉຕຸ, ອນາປຕ຺ຕີຕິ ວສ຺ສໍວຸຕ຺ຖຕ຺ຕາ ມາ ວາ ອາຄຈ຺ຉຕຸ, ອນາປຕ຺ຕີຕິ ອຕ຺ໂຖ.

ອິຕິ ວສ຺ສູປນາຍິກກ຺ຂນ຺ຘກວຓ຺ຓນາຍ ໂຍຊນາ ສມຕ຺ຕາ.