໑໑໐. ປຎ຺ຈນ຺ນໍ ອປ຺ປຫິເຕປິ ອນຸຊານນກຖາ

໑໙໓. ປເຄວ ປຫິເຕຕິ ອິມິນາ ‘‘ອປຫິເຕປິ ຄນ຺ຕພ຺ພ’’ນ຺ຕິ ເອຕ຺ຖ ປິສທ຺ທສ຺ສ ສມ຺ຠາວນຕ຺ຖໍ ທສ຺ເສຕິ. ປຎ຺ຈນ຺ນໍ ສຫຘມ຺ມິການໍ ສນ຺ຕິກໍ ຄນ຺ຕພ຺ພຠາວສ຺ສ ກາຣຓໍ ວິຠຊິຕ຺ວາ ທສ຺ເສນ຺ໂຕ ອາຫ ‘‘ຠິກ຺ຂຸ ຄິລາໂນ ໂຫຕີ’’ຕິອາທິ. ທສຫີຕິ ‘‘ສງ຺ໂຆ ກມ຺ມໍ ກຕ຺ຕຸກາໂມ ໂຫຕິ, ກຕໍ ວາ ສງ຺ເຆນ ກມ຺ມໍ ໂຫຕີ’’ຕິ ອິທໍ ອງ຺ຄໍ ເອກໍ ກຕ຺ວາ ທສຫິ. ນວຫີຕິ ປຣິວາສາຣຫໍ ອປເນຕ຺ວາ ນວຫິ. ຈຕູຫີຕິ ຄິລານອນຠິຣຕິກຸກ຺ກຸຈ຺ຈທິຏ຺ຐິຄຕອຸປ຺ປນ຺ນສງ຺ຂາເຕຫິ ຈຕູຫິ. ອິຕິ ອິເມຫິ ຉຫີຕິ ໂຍຊນາ. ສາມເຓຣສ຺ສປິ ຉຫີຕິ ເອຕ຺ຖ ຉນ຺ນໍ ສຣູປໍ ວິຕ຺ຖາເຣຕ຺ວາ ທສ຺ເສນ຺ໂຕ ອາຫ ‘‘ອາທິໂຕ’’ຕິອາທິ. ຕໍ ສຸວິຎ຺ເຎຍ຺ຍເມວ. ສາມເຓຣິຍາ ສນ຺ຕິກໍ ປຎ຺ຈຫິ ຄນ຺ຕພ຺ພນ຺ຕິ ໂຍຊນາ. ປຣໂຕຕິ ປຣສ຺ມາ, ປຣສ຺ມິໍ ວາ. ອນ຺ຘກຏ຺ຐກຖາຍໍ ວຸຕ຺ຕນ຺ຕິ ສມ຺ພນ຺ໂຘ. ເຍ ຎາຕກາ ວາ ເຍ ອຎ຺ຎາຕກາ ວາ ອຕ຺ຖິ, ເຕສມ຺ປີຕິ ໂຍຊນາ. ຕນ຺ຕິ ວຈນໍ.