໑໑໒. ປຫິເຕເຍວອນຸຊານນກຖາ

໑໙໙. ຠິກ຺ຂຸຄຕິໂກຕິ ຠິກ຺ຂຸ ເອວ ຄຕິ ປຕິຏ຺ຐາ ເອຕສ຺ສາຕິ ຠິກ຺ຂຸຄຕິໂກຕິ ວຸຕ຺ເຕ ຠິກ຺ຂຸນິສ຺ສິຕໂກ ປຸຣິໂສຕິ ອາຫ ‘‘ຠິກ຺ຂູຫິ ສທ຺ຘິໍ ວສນກປຸຣິໂສ’’ຕິ. ປລຸຊ຺ຊຕີຕິ ວິນສ຺ສຕິ. ຠຓ຺ຑໍ ເຉທາປິຕນ຺ຕິ ເອຕ຺ຖ ຠຓ຺ຑສທ຺ໂທ ປຣິກ຺ຂາຣຕ຺ໂຖ ເອວ, ນ ມູລຘນຕ຺ໂຖຕິ ອາຫ ‘‘ທພ຺ພສມ຺ຠາຣຠຓ຺ຑ’’ນ຺ຕິ. ເຉທາປິຕນ຺ຕິ ຈຸຣາທິຄຓິກຘາຕຸໍ ‘‘ຉິນ຺ທາປິຕ’’ນ຺ຕິ ຣຸຘາທິຄຓິກຘາຕຸຍາ ວຓ຺ເຓຕິ. ທຊ຺ຊາຫນ຺ຕິ ເອກາຣໂລປສນ຺ຘີຕິ ອາຫ ‘‘ທຊ຺ເຊ ອຫ’’ນ຺ຕິ. ‘‘ທຊ຺ເຊຫ’’ນ຺ຕິປິ ປາໂຐ. ເອວຎ຺ຫິ ສຕິ ອກາຣໂລປສນ຺ຘິ. ທຊ຺ເຊຕິ ທເທຍ຺ຍໍ, ທທາມິ ວາ. ສງ຺ຆກຣຓີເຍນາຕິ ສງ຺ຆສ຺ສ ກາຕພ຺ເພນ ກິຈ຺ເຈນ. ຕມຕ຺ຖໍ ທສ຺ເສນ຺ໂຕ ອາຫ ‘‘ຍໍກິຎ຺ຈີ’’ຕິອາທິ. ຕຕ຺ຖ ຍໍກິຎ຺ຈິ ກາຕພ຺ພນ຺ຕິ ໂຍຊນາ. ເຈຕິຍຉຕ຺ຕເວທິກາທີສູຕິ ເຈຕິຍສ຺ສ ຉຕ຺ເຕ ຈ ເວທິກາຍ ຈ. ອາທິສທ຺ເທນ ສຸຘາລິມ຺ປາທໂຍ ສງ຺ຄຓ຺ຫາຕິ. ຕສ຺ສາຕິ ສງ຺ຆກຣຓີຍສ຺ສ. ນິປ຺ຜາທນຕ຺ຖໍ ຄນ຺ຕພ຺ພນ຺ຕິ ສມ຺ພນ຺ໂຘ.

ເອຕ຺ຖາຕິ ວສ຺ສູປນາຍິກກ຺ຂນ຺ຘເກ. ‘‘ອນິມນ຺ຕິເຕນາ’’ຕິ ປທໍ ‘‘ຄນ຺ຕຸ’’ນ຺ຕິ ປເທ ຠາວກຕ຺ຕາ. ຄນ຺ຕຸນ຺ຕິ ຄມິຕຸໍ, ຄມນໍ ວາ ‘‘ນ ວຏ຺ຏຕີ’’ຕິ ປເທ ກຕ຺ຕາ. ປຐມໍເຍວາຕິ ຘມ຺ມສ຺ສວນໂຕ ປຐມເມວ. ສນ຺ນິປຕິຕພ຺ພໍ ອິຕິ ກຕິກາ ກຕາ ໂຫຕີຕິ ໂຍຊນາ. ຠຓ຺ຑກນ຺ຕິ ຈີວຣາທິຠຓ຺ຑກໍ. ຄນ຺ຕຸໍ ນ ວຏ຺ຏຕີຕິ ສຍເມວ ຄນ຺ຕຸໍ ນ ວຏ຺ຏຕີຕິ ອຕ຺ໂຖ ທຏ຺ຐພ຺ໂພ. ເຕນ ວຸຕ຺ຕໍ ‘‘ສເຈ ປນາ’’ຕິອາທິ. ຕຕ຺ຖາຕິ ຕໍ ວິຫາຣໍ. ‘‘ວຏ຺ຏຕີ’’ຕິ ອິມິນາ ວສ຺ສຈ຺ເຉໂທ ຈ ອາປຕ຺ຕິ ຈ ນ ໂຫຕີຕິ ທສ຺ເສຕິ. ອຕ຺ຖາຍປີຕິ ປິສທ຺ເທນ ‘‘ຠຓ຺ຑກໍ ໂຘວິສ຺ສາມີ’’ຕິ ອຕ຺ຖໍ ອເປກ຺ຂຕິ. ນນ຺ຕິ ອນ຺ເຕວາສິກໍ. ວຏ຺ຏຕີຕິ ອາຈຣິຍສ຺ສ ອາຓາຍ ສຕ຺ຕາເຫ ອນຕິກ຺ກນ຺ເຕ ວຏ຺ຏຕິ, ວສ຺ສຈ຺ເຉໂທ ຈ ອາປຕ຺ຕິ ຈ ນ ໂຫຕິ. ສຕ຺ຕາເຫ ອຕິກ຺ກນ຺ເຕ ວສ຺ສຈ຺ເຉໂທວ ໂຫຕິ, ນ ອາປຕ຺ຕີຕິ ອຘິປ຺ປາໂຍ.