໑໐໙. ສຕ຺ຕາຫກຣຓີຍານຸຊານນກຖາ

໑໘໗. ສຕ຺ຕາຫກຣຓີເຍສຸ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ‘‘ສຕ຺ຕາຫກຣຓີເຍນາ’’ຕິ ປທສ຺ສ ສຕ຺ຕມີສມາສຎ຺ຈ ອນີຍສທ຺ທສ຺ສ ກມ຺ມຕ຺ຖຎ຺ຈ ທສ຺ເສນ຺ໂຕ ອາຫ ‘‘ສຕ຺ຕາຫພ຺ຠນ຺ຕເຣ ຍໍ ກຕ຺ຕພ຺ພ’’ນ຺ຕິ. ຕຕ຺ຖ ‘‘ສຕ຺ຕາຫພ຺ຠນ຺ຕເຣ’’ຕິ ອິມິນາ ສຕ຺ຕມີສມາສໍ ທສ຺ເສຕິ, ‘‘ກຕ຺ຕພ຺ພ’’ນ຺ຕິ ອິມິນາ ກມ຺ມຕ຺ຖໍ. ‘‘ສຕ຺ຕາຫພ຺ຠນ຺ຕເຣ’’ຕິ ອິມິນາ ສຕ຺ຕາຫສ຺ສ ອພ຺ຠນ຺ຕຣໍ ສຕ຺ຕາຫນ຺ຕິ ອຸຕ຺ຕຣປທໂລປໍ ທສ຺ເສຕິ. ປຫິເຕ ຄນ຺ຕຸນ຺ຕິ ເອຕ຺ຖ ປຫິເຕສທ຺ທສ຺ສ ກຕ຺ຕຸກມ຺ມານິ ທສ຺ເສຕຸໍ ວຸຕ຺ຕໍ ‘‘ຠິກ຺ຂຸອາທີຫິ ທູເຕ’’ຕິ. ຕຕ຺ຖ ‘‘ຠິກ຺ຂຸອາທີຫີ’’ຕິ ອິມິນາ ກຕ຺ຕາຣໍ ທສ຺ເສຕິ, ‘‘ທູເຕ’’ຕິ ອິມິນາ ກມ຺ມໍ. ສຕ຺ຕາຫນ຺ຕິ ເອຕ຺ຖ ອຸຕ຺ຕຣປທໂລປຎ຺ຈ ຠຸມ຺ມຕ຺ເຖ ອຸປໂຍຄວຈນຎ຺ຈ ທສ຺ເສນ຺ໂຕ ອາຫ ‘‘ອນ຺ໂຕສຕ຺ຕາເຫເຍວາ’’ຕິ. ຕຕ຺ເຖວາຕິ ຕສ຺ມິໍ ປຫິຕຏ຺ຐາເນເຍວ. ‘‘ນ ອຸຏ຺ຐາເປຕພ຺ໂພ’’ຕິ ອິມິນາ ‘‘ສຕ຺ຕາເຫເຍວາ’’ຕິ ເອຕ຺ຖ ເອວສທ຺ທສ຺ສ ຜລໍ ທສ຺ເສຕິ.

໑໘໙. ຣໂສ ເອຕສ຺ມິໍ ອຕ຺ຖີຕິ ຣສວຕີຕິ ວຸຕ຺ເຕ ຠຕ຺ຕເຄຫໍ ຄເຫຕພ຺ພນ຺ຕິ ອາຫ ‘‘ຠຕ຺ຕເຄຫໍ ວຸຈ຺ຈຕີ’’ຕິ. ຠຕ຺ຕເຄຫນ຺ຕິ ຠຕ຺ຕປຈນເຄຫໍ. ປຸຣາຍໍ ສຸຕ຺ຕນ຺ໂຕຕິ ເອຕ຺ຖ ປຸຣາ ອຍນ຺ຕິ ປທຈ຺ເຉທໍ ກຕ຺ວາ ປຸຣາສທ຺ໂທ ຍາວປຣິຍາໂຍຕິ ອາຫ ‘‘ຍາວ ອຍໍ ສຸຕ຺ຕນ຺ໂຕ’’ຕິ. ນ ປລຸຊ຺ຊຕີຕິ ເອຕ຺ຖ ລຸຊຘາຕຸ ວິນາສຕ຺ໂຖຕິ ອາຫ ‘‘ນ ວິນສ຺ສຕີ’’ຕິ. ປຣິສງ຺ຂຕນ຺ຕິ ປຣິສງ຺ຂຣິຕພ຺ພໍ. ສພ຺ພຕ຺ຖາຕິ ສພ຺ເພສຸ ປຫິເຕສຸ. ອິມິນາວ ກປ຺ປິຍວຈເນນາຕິ ອິມິນາ ເອວ ກປ຺ປິເຍນ ຕິວາກ຺ຍສງ຺ຂາເຕນ ວຈເນນ. ເອເຕສນ຺ຕິ ເອເຕສໍ ຕິຓ຺ຓໍ ວາກ຺ຍານໍ. ເວວຈເນນາຕິ ‘‘ຍຎ຺ຎຎ຺ຈ ຍຊິຕຸໍ, ສຸຕ຺ຕຎ຺ຈ ອຸຄ຺ຄຓ຺ຫິຕຸໍ, ສມເຓ ຈ ທສ຺ສິຕຸ’’ນ຺ຕິ ປຣິຍາເຍນ. ສຕ຺ຕສູຕິ ອຸປາສກ ອຸປາສິກ ຠິກ຺ຂຸຠິກ຺ຂຸນີ ສິກ຺ຂມານ ສາມເຓຣ ສາມເຓຣີ ສງ຺ຂາຕາສຸ ສຕ຺ຕສຸ.