໑໐໘. ວສ຺ສາເນຈາຣິກາປຏິກ຺ເຂປາທິກຖາ

໑໘໕. ອາປຕ຺ຕິ ເວທິຕພ຺ພາຕິ ອນເປກ຺ຂຄມເນນ ອຸປຈາຣາຕິກ຺ກເມ ສາເປກ຺ຂຄມເນນ ອຎ຺ຎຕ຺ຖ ອຣຸຓຸຏ຺ຐາປເນ ອາປຕ຺ຕິ ເວທິຕພ຺ພາ. ວິຫາຣຄຓນາຍ ອາປຕ຺ຕິໂຍ ເວທິຕພ຺ພາຕິ ເອຕ຺ຖ ວສ຺ສູປນາຍິກທິວເສ ວສ຺ສໍ ອນຸປຄນ຺ຕຸກາມຕາຈິຕ຺ເຕນ ວິຫາຣໍ ອຕິກ຺ກເມຍ຺ຍ, ວິຫາຣຄຓນາຍ ອາປຕ຺ຕິໂຍ ເວທິຕພ຺ພາ. ຕເມວຕ຺ຖໍ ວິຕ຺ຖາເຣນ຺ໂຕ ອາຫ ‘‘ສເຈ ຫີ’’ຕິອາທິ. ຕໍ ທິວສນ຺ຕິ ຕສ຺ມິໍ ວສ຺ສູປຄມນທິວເສ. ສຕໍ ອາປຕ຺ຕິໂຍຕິ ເອຕ຺ຖ ສຕນ຺ຕິ ສງ຺ຂ຺ຍາປຘານຕ຺ຕາ ເອກວຈນນ຺ຕິ ສທ຺ທສຕ຺ເຖສຸ ວຸຕ຺ຕໍ. ເອກາ ເອວ ອາປຕ຺ຕີຕິ ອຕ຺ຕໂນ ວິຫາຣສ຺ສ ອຕິກ຺ກມເນເຍວ ເອກາ ເອວ ອາປຕ຺ຕິ. ເກນຈິ ອນ຺ຕຣາເຍນ ອນຸປຄເຕນາຕິ ສມ຺ພນ຺ໂຘ.

ວສ຺ສນາໂມ ອິມສ຺ສຕ຺ຖີຕິ ວສ຺ໂສຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ວສ຺ສນາມກ’’ນ຺ຕິ. ‘‘ປຐມໍ ມາສ’’ນ຺ຕິ ອິມິນາ ອຎ຺ຎປທສ຺ສ ສຣູປໍ ທສ຺ເສຕິ. ປຐມໍ ມາສນ຺ຕິ ຈຕູສຸ ວສ຺ສມາເສສຸ ປຐມໍ ມາສໍ. ອຸກ຺ກຑ຺ຒິຕຸກາໂມຕິ ອຸປຣິ ກຑ຺ຒິຕຸກາໂມ. ອາສຬ຺ຫີມາສເມວ, ນ ສາວຓມາສນ຺ຕິ ອຕ຺ໂຖ. ຊຸຓ຺ຫສທ຺ໂທ ຈນ຺ທປຠາຍຸຕ຺ໂຕ ມາໂສຕິ ອາຫ ‘‘ມາເສ’’ຕິ. ຈນ຺ທປຠາຍຸຕ຺ໂຕ ມາໂສຕິ ອາຫ ‘‘ມາເສ’’ຕິ. ຈນ຺ທປຠາຍຸຕ຺ໂຕ ຫິ ມາໂສ ໂຊຕຕິ ທິປ຺ປຕີຕິ ຊຸຓ຺ໂຫຕິ ວຸຈ຺ຈຕິ. ຕສ຺ມາ ‘‘ມາເສ’’ຕິ ສາມຎ຺ຎໂຕ ວຸຕ຺ເຕປິ ປຸຓ຺ຓມິຍຸຕ຺ໂຕ ມາໂສວ ຄເຫຕພ຺ໂພ. ກາຈິ ປຣິຫານິ ນາມາຕິ ກິຎ຺ຈິ ສີລາທີນໍ ຫາຍນໍ ນາມ. ອຎ຺ຎສ຺ມິມ຺ປີຕິ ວສ຺ສູປຄມນໂຕ ອຎ຺ຎສ຺ມິມ຺ປິ. ຘມ຺ມິເກຕິ ຘມ຺ເມນ ຍຸຕ຺ເຕ.