໑໐໗. ວສ຺ສູປນາຍິການຸຊານນກຖາ

໑໘໔. ວສ຺ສູປນາຍິກກ຺ຂນ຺ຘເກ ‘‘ອນນຸຎ຺ຎາໂຕ’’ຕິ ອິມິນາ ອປຎ຺ຎຕ຺ໂຕຕິ ເອຕ຺ຖ ຎາຘາຕຸຍາ ອນຸຊານນຕ຺ຖໍ ທສ຺ເສຕິ, ‘‘ອສໍວິຫິໂຕ’’ຕິ ອິມິນາ ຎາຘາຕຸຍາ ຐປນຕ຺ຖໍ. ເຕຘາຕິ ເຕ ອິຘ. ອິຘສທ຺ໂທ ສາສນຎ຺ຈ ໂລກຎ຺ຈ ເທສຎ຺ຈ ປທປູຣຓຎ຺ຈ ອຸປາທາຍ ວຕ຺ຕຕິ, ອິຘ ປນ ປທປູຣເຓຕິ ທສ຺ເສນ຺ໂຕ ອາຫ ‘‘ອິຘສທ຺ໂທ ນິປາຕມຕ຺ໂຕ’’ຕິ. ສໍຫນນໍ ສງ຺ຆາໂຕ, ວິນາໂສຕິ ອຕ຺ໂຖ. ອິຕິ ອິມມຕ຺ຖໍ ທສ຺ເສຕິ ‘‘ວິນາສ’’ນ຺ຕິ ອິມິນາ. ສກຸນ຺ຕກສທ຺ໂທ ສກຸຓປຣິຍາໂຍຕິ ອາຫ ‘‘ສກຸຓາ’’ຕິ. ສກຸຓາຕິ ຈ ວິຫງ຺ຄມາ. ເຕ ຫິ ອາກາເສ ຄນ຺ຕຸໍ ສກ຺ໂກນ຺ຕີຕິ ສກຸຓາຕິ ວຸຈ຺ຈນ຺ຕິ. ສໍກສາຍິສ຺ສນ຺ຕີຕິ ເອຕ຺ຖ ‘‘ສໍ ກເສ ອຈ຺ຉເນ’’ຕິ ຘາຕຸປາເຐສຸ (ສທ຺ທນີຕິຘາຕຸມາລາຍໍ ໑໖ ສກາຣນ຺ຕຘາຕຸ) ວຸຕ຺ຕຕ຺ຕາ ສໍປຸພ຺ໂພ ກເສຘາຕຸ ອຈ຺ຉນຕ຺ໂຖຕິ ອາຫ ‘‘ວສິສ຺ສນ຺ຕີ’’ຕິ. ເອກາຣນ຺ໂຕຍໍ ຘາຕຸ. ນິພທ຺ຘວາສນ຺ຕິ ນິຈ຺ຈວາສໍ. ວສ຺ສານນາມເກຕິ ວສ຺ສານອຸຕຸນາມເກ. ວສ຺ສານສ຺ສ ຈຕຸມາສຕ຺ຕາ ‘‘ເຕມາເສ’’ຕິ ວຸຕ຺ຕໍ. ວສ຺ສູປນາຍິກາຕິ ເອຕ຺ຖ ນີຘາຕຸ ຄມນຕ຺ໂຖຕິ ອາຫ ‘‘ວສ຺ສູປຄມນານີ’’ຕິ. ອປຣຊ຺ຊູຕິ ປຸຓ຺ຓມິໂຕ ອປຣໍ ອຫນ຺ຕິ ອປຣຊ຺ຊຸ, ອຫຕ຺ເຖ ຊ຺ຊຸປຈ຺ຈໂຍ, ອຕ຺ຖໂຕ ປາຏິປທທິວໂສ. ອຍໍ ອປຣຊ຺ຊຸສທ຺ໂທ ປຐມນ຺ຕນິປາໂຕ. ອສ຺ສາຕິ ອາສຬ຺ຫີປຸຓ຺ຓມິຍາ. ອສມານາຘິກຣຓວິສໂຍ ພາຫິຣຕ຺ຖສມາໂສຍໍ, ອຕິກ຺ກນ຺ຕາຍ ສຕິຍາຕິ ໂຍຊນາ. ອປຣສ຺ມິໍ ທິວເສຕິ ປາຏິປທທິວເສ. ອສ຺ສາຕິ ສາວຓມາສປຸຓ຺ຓມິຍາ. ຕສ຺ມາຕິ ຍສ຺ມາ ຈ ອປຣຊ຺ຊຸຄຕາ, ຍສ຺ມາ ຈ ມາສຄຕາ, ຕສ຺ມາ. ‘‘ອນນ຺ຕເຣ ປາຏິປທທິວເສ’’ຕິ ອິມິນາ ປາຬິຍໍ ອປຣຊ຺ຊຸຄຕາຍ ອາສຬ຺ຫິຍາ ອນນ຺ຕເຣ ປາຏິປທທິວເສ ປຸຣິມິກາ ອຸປຄນ຺ຕພ຺ພາຕິ ອຕ຺ຖໍ ທສ຺ເສຕິ. ອາສຬ຺ຫິຍາຕິ ອາສຬ຺ຫີປຸຓ຺ຓມິຍາ. ປຈ຺ຉິມນເຍປິ ມາສຄຕາຍ ອາສຬ຺ຫິຍາ ອນນ຺ຕເຣ ປາຏິປທທິວເສ ປຈ຺ຉິມິກາ ອຸປຄນ຺ຕພ຺ພາຕິ ອຕ຺ໂຖ ທຏ຺ຐພ຺ໂພ. ອາສຬ຺ຫິຍາຕິ ອາສຬ຺ຫີປຸຓ຺ຓມິຍາ ສມີເປ ປວຕ຺ຕຕ຺ຕາ ອາສຬ຺ຫີສງ຺ຂາຕາຍ ສາວຓປຸຓ຺ຓມິຍາຕິ ອຕ຺ໂຖ. ປາຏິປທທິວເສເຍວ ວສ຺ສໍ ອຸປຄນ຺ຕພ຺ພນ຺ຕິ ສມ຺ພນ຺ໂຘ. ສກິໍ ວາຕິອາທີສຸ ວາສທ຺ໂທ ອນິຍມວິກປ຺ປຕ຺ໂຖ. ນິຈ຺ຉາເຣຕ຺ວາຕິ ນິຈ຺ຈາເຣຕ຺ວາ, ອຸຈ຺ຈາເຣຕ຺ວາຕິ ອຕ຺ໂຖ. ອຜຸຏ຺ຐກ຺ຂຣສຎ຺ໂຎເຄຫິ ປໂຣ ກ຺ວຈິ ຜຸຏ຺ຐຕ຺ຕມາປຊ຺ຊຕິ ‘‘ນິກ຺ຂມຕີ’’ຕິອາທີສຸ ວິຍ. ຕສ຺ມາ ປຣສ຺ສ ຈກາຣສ຺ສ ຉກາຣໍ ກຕ຺ວາ ‘‘ນິຈ຺ຉາເຣຕ຺ວາ’’ຕິ ວຸຕ຺ຕໍ.