໙໒. ອາປຕ຺ຕິປຏິກມ຺ມວິຘິກຖາ

໑໖໙. ຠຄວຕາ…ເປ… ກາຕພ຺ໂພຕິ ອິທໍ ເວທິຕພ຺ພນ຺ຕິ ສມ຺ພນ຺ໂຘ. ‘‘ຍສ຺ສ ສິຍາ ອາປຕ຺ຕີຕິອາທິວຈເນເນວ ຈາ’’ຕິອາທິເຫຕຸຕ຺ຕເຍນ ‘‘ນ ສາປຕ຺ຕິເກນ ອຸໂປສໂຖ ກາຕພ຺ໂພ’’ຕິ ຍຖາຣຸຕໍ ອປຎ຺ຎຕ຺ຕມ຺ປິ ອຕ຺ຖໂຕ ສິທ຺ຘເມວາຕິ ທສ຺ເສຕິ. ເຫຕຸຕ຺ຕຍໍ ‘‘ເວທິຕພ຺ພ’’ນ຺ຕິ ປເທນ ໂຍເຊຕພ຺ພໍ. ຖຸລ຺ລຈ຺ຈຍາທີສູຕິ ອາທິສທ຺ເທນ ປາຈິຕ຺ຕິຍປາຏິເທສນີຍທຸກ຺ກຏທຸພ຺ຠາສິຕາປຕ຺ຕິໂຍ ສງ຺ຄຓ຺ຫາຕິ. ‘‘ຕໍ ປຏິເທເສມີ’’ຕິ ອິທໍ ສຸວຸຕ຺ຕເມວ ໂຫຕີຕິ ສມ຺ພນ຺ໂຘ. ຕນ຺ຕິ ອາປຕ຺ຕິໍ. ຕຸມ຺ຫມູເລຕິ ຕຸມ຺ຫໍ ສນ຺ຕິເກ. ນິຄ຺ຄຫິຕໂລປຎ຺ຫິ ວາກ຺ຍເມວ, ນ ສມາໂສ. ‘‘ຕຸມ຺ຫ’’ ອິຕິ ຈ ‘‘ຕຸຍ຺ຫ’’ ອິຕິ ຈ ນວກຕ຺ເຖຣານໍ ວຕ຺ຕພ຺ພາກາຣທສ຺ສນມຕ຺ຕເມວ, ນ ອິຈ຺ຉິຕຕ຺ຖວິປຕ຺ຕິທສ຺ສນໍ. ວຸຕ຺ຕມ຺ປີຕິ ປິສທ຺ເທນ ນ ເກວລໍ ປາຬິນເຍເນວ ສຸວຸຕ຺ຕໍ, ອິມິນາ ນເຍນປິ ສຸວຸຕ຺ຕນ຺ຕິ ທສ຺ເສຕິ. ‘‘ປສ຺ສສີ’’ຕິ ອິທຎ຺ຈ ວຕ຺ຕພ຺ພນ຺ຕິ ສມ຺ພນ຺ໂຘ. ວຕ຺ຕພ຺ພາກາຣໍ ປນ ສຸວິຎ຺ເຎຍ຺ຍໍ. ‘‘ອາມ ປສ຺ສາມີ’’ຕິ ອິທໍ ປນ ສຸວຸຕ຺ຕເມວ ໂຫຕີຕິ ສມ຺ພນ຺ໂຘ. ວຸຕ຺ຕມ຺ປີຕິ ປິສທ຺ໂທ ປາຬິນຍໍ ສມ຺ປິຓ຺ເຑຕິ. ອາຍຕິໍ ສໍວເຣຍ຺ຍາສີຕິ ເອຕ຺ຖ ປນ ວຕ຺ຕພ຺ໂພຕິ ສມ຺ພນ຺ໂຘ. ຄຣູສຸ ພຫຸວຈນສ຺ສ ກຕ຺ຕພ຺ພຕ຺ຕາ ວຸຕ຺ຕໍ ‘‘ສໍວເຣຍ຺ຍາຖາ’’ຕິ. ເອວໍ ວຸຕ຺ເຕນ ອາປຕ຺ຕິເທສເກນາຕິ ສມ຺ພນ຺ໂຘ.

ຕຕ຺ຣາຕິ ‘‘ຍທາ ນິພ຺ເພມຕິໂກ’’ຕິ ປາເຐ. ສູຣິເຍ ເມຆຈ຺ຉນ຺ເນ ສຕີຕິ ໂຍຊນາ. ເຕນ ຠິກ຺ຂຸນາ ວຕ຺ຕພ຺ພນ຺ຕິ ສມ຺ພນ຺ໂຘ, ວຕ຺ຖຸໍ ກິຕ຺ເຕຕ຺ວາຕິ ໂຠຊນສງ຺ຂາຕໍ ວຕ຺ຖຸໍ ກິຕ຺ເຕຕ຺ວາ. ຕາຕິ ອາປຕ຺ຕິໂຍ.

ສຠາຄາ ອາປຕ຺ຕີຕິ ເອຕ຺ຖ ທ຺ວີສຸ ວຕ຺ຖຸສຠາຄອາປຕ຺ຕິສຠາຄາສຸ ວຕ຺ຖຸສຠາຄາວ ອຘິປ຺ເປຕາຕິ ທສ຺ເສນ຺ໂຕ ອາຫ ‘‘ຍໍ ທ຺ເວປິ ຊນາ’’ຕິອາທິ. ຍໍ ອາປຕ຺ຕິນ຺ຕິ ສມ຺ພນ຺ໂຘ. ສມາໂນ ຠາໂຄ ເອຕາສນ຺ຕິ ສຠາຄາ. ເທເສຕຸໍ ວຏ຺ຏຕີຕິ ອາປຕ຺ຕິສຠາຄາປິ ວຕ຺ຖຸວິສຠາຄຕ຺ຕາ ເທເສຕຸໍ ວຏ຺ຏຕິ. ສຸເທສິຕາວາຕິ ອາປຕ຺ຕິໂຕ ຠິກ຺ຂຸ ວຸຏ຺ຐາຕິເຍວາຕິ ອຘິປ຺ປາໂຍ. ອຎ຺ຎໍ ທຸກ຺ກຏນ຺ຕິ ສມ຺ພນ຺ໂຘ. ປນສທ຺ໂທ ຄຣຫຕ຺ຖໂຊຕໂກ ສຸເທສິຕາຍ ຄຣຫາກາເຣນ ປວຕ຺ຕຕ຺ຕາ. ກິຎ຺ຈາປິ ສຸເທສິຕາວ, ປນ ຕຖາປີຕິ ໂຍຊນາ. ຕນ຺ຕິ ທຸກ຺ກຏໍ. ນານາວຕ຺ຖຸກນ຺ຕິ ເທສນາປຏິຄ຺ຄຫຓວເສນ ນານາວຕ຺ຖຸກໍ.

໑໗໐. ສຠາໂຄເຍວ ວຕ຺ຕພ຺ໂພ, ນ ວິສຠາໂຄ. ຫີຕິ ສຈ຺ຈໍ, ຍສ຺ມາ ວາ. ຕສ຺ສາຕິ ວິສຠາຄສ຺ສ. ອິໂຕຕິ ສງ຺ຆສນ຺ນິປາຕໂຕ.