໙໕. ອນາປຕ຺ຕິປນ຺ນຣສກາທິກຖາ

໑໗໒. ເຕ ນ ຊານິໍສູຕິ ເອຕ຺ຖ ຊານນາກາຣທສ຺ສນຕ຺ຖໍ ‘‘ສີມໍ ໂອກ຺ກນ຺ຕາຕິ ວາ ໂອກ຺ກມນ຺ຕີຕິ ວາ’’ຕິ ວຸຕ຺ຕໍ. ໂອກ຺ກນ຺ຕາຕິ ວາຕິ ປວິສິຕ຺ຖ ອິຕິ ວາ. ເຕສນ຺ຕິ ຈຕຸນ຺ນໍ ວາ ອຕິເຣການໍ ວາ ຠິກ຺ຂູນໍ. ວຄ຺ຄາ ສມຄ຺ຄສຎ຺ຎິໂນຕິ ເອຕ຺ຖ ກສ຺ມາ ວຄ຺ຄາ, ກສ຺ມາ ສມຄ຺ຄສຎ຺ຎິໂນຕິ ອາຫ ‘‘ເຕສ’’ນ຺ຕິອາທິ. ຕຕ຺ຖ ເຕສນ຺ຕິ ອຎ຺ເຎສໍ ຠິກ຺ຂູນໍ. ສີມໍ ໂອກ຺ກນ຺ຕຕ຺ຕາຕິ ສີມໍ ປວິສິຕຕ຺ຕາ, ວຄ຺ຄາ ຫຸຕ຺ວາຕິ ສມ຺ພນ຺ໂຘ. ສມຄ຺ໂຄ ອິຕິ ສຎ຺ຎາ ສມຄ຺ຄສຎ຺ຎາ, ສາ ເອເຕສມຕ຺ຖີຕິ ສມຄ຺ຄສຎ຺ຎິໂນ.

໑໗໕. ກຸກ຺ກຸຈ຺ຈປກຕາຕິ ປທສ຺ສ ‘‘ອິຈ຺ຉາປກໂຕ’’ຕິ ປເທນ ສມານຠາວໍ ທສ຺ເສຕຸໍ ວຸຕ຺ຕໍ ‘‘ຍຖາ’’ຕິອາທິ. ປຸພ຺ພຠາເຄຕິ ອຸໂປສຖກມ຺ມໂຕ ປຸພ຺ພຠາເຄ. ສນ຺ນິຏ຺ຐານໍ ກຕ຺ວາປີຕິ ກປ຺ປເຕວາຕິ ສນ຺ນິຏ຺ຐານໍ ກຕ຺ວາປິ. ‘‘ອຠິຠູຕາ’’ຕິ ອິມິນາ ປກຕາຕິ ເອຕ຺ຖ ປປຸພ຺ພກຣຘາຕຸຍາ ອຸປສຄ຺ຄວເສນ ອຠິຠວນຕ຺ຖໍ ທສ຺ເສຕິ.

໑໗໖. ຍຖາ ເຫຏ຺ຐາ ວຄ຺ຄາວຄ຺ຄສຎ຺ຎີປນ຺ນຣສກາທີສຸ ທຸກ຺ກຏໍ ວຸຕ຺ຕໍ, ເອວມກຕ຺ວາ ກສ຺ມາ ‘‘ຖຸລ຺ລຈ຺ຈຍ’’ນ຺ຕິ ອາຫ ‘‘ອກຸສລພລວຕາຍາ’’ຕິ.