໙໑. ສງ຺ຆຸໂປສຖາທິກຖາ

໑໖໘. ‘‘ສມ຺ມຊ຺ຊິຕ຺ວາ’’ຕິ ປທມເປກ຺ຂິຕ຺ວາ ໂສ ເທໂສຕິ ເອຕ຺ຖ ‘‘ອຸປໂຍຄຕ຺ເຖ ປຈ຺ຈຕ຺ຕວຈນ’’ນ຺ຕິ ວຸຕ຺ຕໍ. ເອຕນ຺ຕິ ‘‘ໂສ ເທໂສ ສມ຺ມຊ຺ຊິຕພ຺ໂພ’’ຕິອາທິວຈນໍ. ເຕນາຕິ ເຕນ ເຫຕຸນາ. ອຏ຺ຐກຖາຈຣິຍາ ‘‘ສມ຺ມຊ຺ຊນີ…ເປ… ວຸຈ຺ຈຕິ’’ ອິຕິ ອາຫູຕິ ໂຍຊນາ.

ສມ຺ມຊ຺ຊນີຕິ ສມ຺ມຊ຺ຊນກຣຓໍ. ປທີໂປຕິ ປທີປຸຊ຺ຊລນໍ. ອຸທກນ຺ຕິ ອຸທກຏ຺ຐປນໍ. ອາສເນນາຕິ ອາສນປຎ຺ຎາປເນນ. ‘‘ອິຕີ’’ຕິ ອຊ຺ຌາຫຣິຕພ຺ພໍ. ອຸໂປສຖສ຺ສາຕິ ນວວິຘສ຺ສ ອຸໂປສຖສ຺ສ ປຸພ຺ພກຣຓນ຺ຕິ ສມ຺ພນ຺ໂຘ. ເອຕານີຕິ ຈຕ຺ຕາຣິ ກມ຺ມານິ. ວຸຈ຺ຈຕີຕິ ກຖິຍຕິ. ອິທໍ ‘‘ເອຕານີ’’ຕິ ກມ຺ມສ຺ສ ຈ ‘‘ປຸພ຺ພກຣຓ’’ນ຺ຕິ ອາກາຣສ຺ສ ຈ ອເຠທຕ຺ຕາ ອາສນ຺ນໍ ອາກາຣມເປກ຺ຂິຕ຺ວາ ເອກວຈນວເສນ ວຸຕ຺ຕໍ. ‘‘ອກ຺ຂາຕານີ’’ຕິ ອິທໍ ປນ ‘‘ອິມານິ ຈຕ຺ຕາຣີ’’ຕິ ກມ຺ມມເປກ຺ຂິຕ຺ວາ ພຫຸວຈນວເສນ ວຸຕ຺ຕນ຺ຕິ ທຏ຺ຐພ຺ພໍ.

ຉນ຺ທປາຣິສຸທ຺ຘິອຸຕຸກ຺ຂານນ຺ຕິ ຉນ຺ທກ຺ຂານຎ຺ຈ ປາຣິສຸທ຺ຘິກ຺ຂານຎ຺ຈ ອຸຕຸກ຺ຂານຎ຺ຈ. ຠິກ຺ຂຸຄຓນາຕິ ຠິກ຺ຂູ ຄເຓຕ຺ວາ ອກ຺ຂານໍ. ໂອວາໂທຕິ ຠິກ຺ຂຸນີຫິ ຍາຈິຕສ຺ສ ໂອວາທສ຺ສ ອກ຺ຂານໍ. ເອຕານີຕິ ເອຕານິ ປຎ຺ຈ. ປຸພ຺ພກຣຓໂຕ ປຈ຺ຉາຕິ ປຸພ຺ພກຣຓສ຺ສ ກຣຓໂຕ ປຈ຺ຉາ. ເອຕ຺ຖ ຈ ‘‘ປຸພ຺ພກຣຓໂຕ ປຈ຺ຉາ ກຕ຺ຕພ຺ພານີ’’ຕິ ອິທໍ ກຕ຺ຕພ຺ພາກາຣສ຺ເສວ ວິເສສນໍ, ນ ອຕ຺ຖສ຺ສ. ອຍໍ ປນ ວິເສໂສ – ສງ຺ຆສນ຺ນິປາຕໂຕ ປຸພ຺ພຠາເຄ ກຕ຺ຕພ຺ພຕ຺ຕາ ປຸພ຺ພກຣຓໍ ນາມ, ອຸໂປສຖກຣຓໂຕ ປຸພ຺ພຠາເຄ ກຕ຺ຕພ຺ພຕ຺ຕາ ປຸພ຺ພກິຈ຺ຈໍ ນາມາຕິ.

ອຸໂປສໂຖຕິ ອຸໂປສຖທິວໂສ. ຍາວຕິກາ ຈ ຠິກ຺ຂູຕິ ຍຕ຺ຕກາ ຠິກ຺ຂູ. ກມ຺ມປຕ຺ຕາຕິ ອຸໂປສຖກມ຺ມສ຺ສ ປຕ຺ຕາ ຍຸຕ຺ຕາ ອນຸຣູປາ. ຕາວຕິກາ ຠິກ຺ຂູ ຫຕ຺ຖປາສໍ ອວິຊຫິຕ຺ວາ ເອກສີມາຍໍ ຐິຕາ ຈ ໂຫນ຺ຕີຕິ ໂຍຊນາ. ສຠາຄາປຕ຺ຕິໂຍຕິ ວຕ຺ຖຸສຠາຄາ ອາປຕ຺ຕິໂຍ. ວຊ຺ຊນີຍາຕິ ວຊ຺ເຊຕພ຺ພາ. ປຸຄ຺ຄລາຕິ ຄຫຏ຺ຐາທິປຸຄ຺ຄລາ. ຕສ຺ມິນ຺ຕິ ຕສ຺ມິໍ ອຸໂປສຖສີມມາຬເກ. ເອຕານິ ຈຕ຺ຕາຣີຕິ ປາຐເສໂສ.

ອາຄເຕຫິ ເຕຫິ ຠິກ຺ຂູຫີຕິ ໂຍຊນາ. ປນ຺ນຣໂສປີຕິ ປິສທ຺ເທນ ນ ເກວລໍ ປາຬິຍໍ ອາຄຕນເຍເນວ ອຘິຏ຺ຐາຕຸໍ ວຏ຺ຏຕິ, ອຖ ໂຂ ‘‘ອຊ຺ຊ ເມ ອຸໂປສໂຖ ປນ຺ນຣໂສ’’ຕິປີຕິ ທສ຺ເສຕິ.