໘໘. ຉນ຺ທທານກຖາ

໑໖໕. ຉນ຺ທທາເນປິ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ອຸໂປສໂຖ ກໂຕ ໂຫຕີຕິ ປາຣິສຸທ຺ຘິທາຍກສ຺ສ ຈ ສງ຺ຆສ຺ສ ຈ ອຸໂປສໂຖ ກໂຕ ໂຫຕິ. ອຎ຺ຎນ຺ຕິ ອຸໂປສຖກມ຺ມໂຕ ອຎ຺ຎໍ. ຍໍ ປນ ກມ຺ມນ຺ຕິ ສມ຺ພນ຺ໂຘ. ກມ຺ມມ຺ປີຕິ ອຸໂປສຖກມ຺ມໂຕ ອຎ຺ຎໍ ກມ຺ມມ຺ປິ. ເອຕ຺ຖ ຈ ຕທຫຸໂປສເຖ ອຕ຺ຕໂນ ຈ ສງ຺ຆສ຺ສ ຈ ສເຈ ອຸໂປສຖກມ຺ມໍ ໂຫຕິ, ປາຣິສຸທ຺ຘິເຍວ ທາຕພ຺ພາ. ອຖ ອຎ຺ຎໍ ກມ຺ມໍ ໂຫຕິ, ຉນ຺ໂທເຍວ ທາຕພ຺ໂພ. ຍທິ ອຸໂປສຖກມ຺ມຎ຺ຈ ອຎ຺ຎກມ຺ມຎ຺ຈ ໂຫຕິ, ປາຣິສຸທ຺ຘິ ຈ ຉນ຺ໂທ ຈ ທາຕພ຺ໂພ. ຕໍ ສນ຺ຘາຍ ວຸຕ຺ຕໍ ‘‘ຕທຫຸໂປສເຖ ປາຣິສຸທ຺ຘິໍ ເທນ຺ເຕນ ຉນ຺ທມ຺ປິ ທາຕຸ’’ນ຺ຕິ. ສີມາຍ ວາຕິ ພທ຺ຘສີມາຍ ວາ. ອຈ຺ຉິຕຸນ຺ຕິ ອຸປເວສິຕຸໍ. ‘‘ອາສ ອຸປເວສເນ’’ຕິ ຫິ ຘາຕຸປາເຐສຸ (ສທ຺ທນີຕິຘາຕຸມາລາຍໍ ໑໖ ສກາຣນ຺ຕຘາຕຸ) ວຸຕ຺ຕໍ. ສາມຄ຺ຄີ ວາຕິ ກາຍສາມຄ຺ຄີ ວາ.

໑໖໗. ສຣຕິປິ ອຸໂປສຖໍ, ນປິ ສຣຕີຕິ ເອຕ຺ຖ ປິສທ຺ທສ຺ສ ອນິຍມວິກປ຺ປຕ຺ຖໍ ທສ຺ເສຕຸໍ ວຸຕ຺ຕໍ ‘‘ເອກທາ ສຣຕິ, ເອກທາ ນ ສຣຕີ’’ຕິ. ‘‘ເອກນ຺ຕ’’ນ຺ຕິ ອິມິນາ ເນວ ສຣຕີຕິ ເອຕ຺ຖ ເອວສທ຺ທສ຺ສ ສນ຺ນິຏ຺ຐານຕ຺ຖໍ ທສ຺ເສຕິ. ກມ຺ມໍ ນ ໂກເປຕີຕິ ສມ຺ມຸຕິລທ຺ໂຘປິ ອລທ຺ໂຘປິ ອຸມ຺ມຕ຺ຕໂກ ກມ຺ມໍ ນ ໂກເປຕິ.