໘໔. ປກ຺ຂຄຓນາທິອຸຄ຺ຄຫຓານຸຊານນກຖາ

໑໕໖. ກຕິນໍ ປູຣຓີຕິ ກຕິນໍ ຕິຖີນໍ ປູຣຓີ. ໂກ ທິວໂສຕິ ກິຕ຺ຕໂກ ທິວໂສ. ອຍ຺ຍາຍຕ຺ຕນ຺ຕິ ອຍ຺ເຍຫິ ຠິກ຺ຂູຫິ ອາຍຕ຺ຕໍ ອາພທ຺ຘໍ. ສໍຫຣິຕ຺ວາຕິ ປຸນ ສລາກໍ ສໍຫຣິຕ຺ວາ. ອຍໍ ປາໂຐ ເກສຸຈິ ອຏ຺ຐກຖາໂປຕ຺ຖເກສຸ ນຕ຺ຖິ. ກາລວໂຕຕິ ເອຕ຺ຖ ວນ຺ຕຸປຈ຺ຈໂຍ ສ຺ວຕ຺ໂຖຕິ ອາຫ ‘‘ກາລສ຺ເສວາ’’ຕິ. ເອວສທ຺ໂທ ປນ ສມ຺ຠວໂຕ ຍຸຊ຺ຊິຍຕິ. ປເຄວາຕິ ປາໂຕວ.

໑໕໘. ສາຍມ຺ປີຕິ ສາຍນ຺ເຫປິ. ປິສທ຺ເທນ ອຎ຺ຎມ຺ປິ ສຣຓກາລໍ ສມ຺ປິຓ຺ເຑຕິ.

໑໕໙. ອາຓາເປຕຸນ຺ຕິ ເອຕ຺ຖ ອນາຓາເປຕພ຺ພຠິກ຺ຂູ ອປເນຕ຺ວາ ອາຓາເປຕພ຺ພຠິກ຺ຂູ ທສ຺ເສຕຸໍ ວຸຕ຺ຕໍ ‘‘ກິຎ຺ຈິ ກມ຺ມ’’ນ຺ຕິອາທິ. ສທາກາລເມວ ກິຎ຺ຈິ ກມ຺ມໍ ກໂຣນ຺ໂຕຕິ ໂຍຊນາ. ຘມ຺ມກຖິກາທີສູຕິອາທິສທ຺ເທນ ຄຓວາຈກາທໂຍ ສງ຺ຄຓ຺ຫາຕິ. ວາເຣນາຕິ ປຣິຍາເຍນ. ສມ຺ມຸຎ຺ຈນິນ຺ຕິ ຍຏ຺ຐິສມ຺ມຸຎ຺ຈນິໍ ວາ ມຸຏ຺ຐິສມ຺ມຸຎ຺ຈນິໍ ວາ. ສມໍ, ສຸຏ຺ຐຸ ວາ ມຸຎ຺ຈຕິ ໂສເຘຕິ ອິມາຍາຕິ ສມ຺ມຸຎ຺ຈນີ, ຕາລຸໂຊ ປຐໂມ. ຕມ຺ປີຕິ ສາຂາຠງ຺ຄມ຺ປິ.

໑໖໐. ວຸຕ຺ຕນເຍເນວາຕິ ສມ຺ມຊ຺ຊເນ ວຸຕ຺ຕນເຍເນວ. ປຸນ ອາຫຣິຕພ຺ພານີຕິ ສງ຺ຆິກາວາສໍ ອາສນານິ ປຸນ ອາຫຣິຕພ຺ພານິ. ຕຏ຺ຏິກາໂຍປີຕິ ເວຓຸອາທິມຍາ ຕຏ຺ຏິກາໂຍປິ.

໑໖໑. ກປລ຺ລິກາ ວາຕິ ກປາເລສຸ ປຣິຍາປນ຺ນາ ປທີປກປາລາ ວາ. ຕນ຺ຕິ ເຕລາທິໍ. ປຣິເຍສິຕພ຺ພານີຕິ ອນວຊ຺ຊປຣິເຍສເນນ ປຣິເຍສິຕພ຺ພານິ.