໘໖. ທິສໍຄມິກາທິວຕ຺ຖຸກຖາ

໑໖໓. ສໍຄເຫຕພ຺ໂພຕິອາທີນໍ ຈຕຸນ຺ນໍ ກິຣິຍາປທານໍ ວິເສສໍ ທສ຺ເສນ຺ໂຕ ອາຫ ‘‘ສໍຄເຫຕພ຺ໂພ’’ຕິອາທິ. ສໍຄຫສທ຺ທສ຺ສ ສງ຺ເຂປຄຫເຓສຸປິ ວຕ຺ຕນໂຕ ອິຘ ‘‘ອນຸຄ຺ຄຫຕ຺ເຖ’’ຕິ ທສ຺ເສຕຸໍ ປາຬິຍໍ ວຸຕ຺ຕໍ ‘‘ອນຸຄ຺ຄເຫຕພ຺ໂພ’’ຕິ. ເຕນ ວຸຕ຺ຕໍ ‘‘ຕຖາກຣຓວເສນາ’’ຕິ. ອຸປລາເປຕພ຺ໂພຕິ ສງ຺ເຆນ ພຫຸສ຺ສຸໂຕ ຠິກ຺ຂຸ ຠິກ຺ຂູຫິ ອຸປຄນ຺ຕ຺ວາ ລາເປຕພ຺ໂພ ກຖາເປຕພ຺ໂພ. ອຸປຏ຺ຐາເປຕພ຺ໂພຕິ ສງ຺ເຆນ ພຫຸສ຺ສຸໂຕ ຠິກ຺ຂຸ ຠິກ຺ຂູຫິ ອຸປ ອຈ຺ຈເນນ ປູຊເນນ ຐາເປຕພ຺ໂພ. ‘‘ສພ຺ເພສໍ ທຸກ຺ກຏ’’ນ຺ຕິ ວຕ຺ວາ ຕເທວ ສມຕ຺ເຖຕຸໍ ວຸຕ຺ຕໍ ‘‘ອິຘ ເນວ ເຖຣາ, ນ ທຫຣາ ມຸຈ຺ຈນ຺ຕີ’’ຕິ. ເຕນາຕິ ພຫຸສ຺ສຸເຕນ ຠິກ຺ຂຸນາ. ເອວມ຺ປິ ສຕີຕິ ເອວໍ ອສາທິຍເນປິ ສຕິ. ສາຍໍ ປາຕນ຺ຕິ ສາຍຎ຺ຈ ປາໂຕ ຈ ສາຍໍປາຕໍ. ອຸປຏ຺ຐານນ຺ຕິ ອຸປຏ຺ຐານຏ຺ຐານໍ, ອຸປຏ຺ຐານຕ຺ຖາຍ ວາ. ເຕນາຕິ ພຫຸສ຺ສຸເຕນ ຠິກ຺ຂຸນາ. ເຕສນ຺ຕິ ມຫາເຖຣານໍ. ອສ຺ສາຕິ ພຫຸສ຺ສຸຕສ຺ສ ຠິກ຺ຂຸໂນ. ສທ຺ຘິໍຈຣາຕິ ອຕ຺ຕນາ ສທ຺ຘິໍ ຈຣນ຺ຕີຕິ ສທ຺ຘິໍຈຣາ. ອຖາປີຕິ ຍທິປິ. ເອໂກ ວາ ວຕ຺ຕສມ຺ປນ຺ໂນ ວທຕີຕິ ໂຍຊນາ. ເອໂສ ຈ ອຫຎ຺ຈາຕິ ມຍໍ. ນາມຕຸມ຺ຫອມ຺ຫສທ຺ເທສຸ ຫິ ເອກເສເສນ ກຕ຺ຕພ຺ເພສຸ ປໂຣວ ຄເຫຕພ຺ໂພ. ວິຫຣນ຺ຕູຕິ ວທນ຺ຕີຕິ ໂຍຊນາ.

ໂສ ອາວາໂສ ຄນ຺ຕພ຺ໂພຕິ ເອຕ຺ຖ ກິມຕ຺ຖາຍ ຄນ຺ຕພ຺ໂພ, ກິໍ ອນຸທິວສໍ ຄນ຺ຕພ຺ໂພຕິ ອາຫ ‘‘ອຸໂປສຖກຣຓຕ຺ຖາຍ ອນ຺ວທ຺ຘມາສໍ ຄນ຺ຕພ຺ໂພ’’ຕິ. ໂສ ຈ ໂຂຕິ ອາວາໂສ. ອຸຕຸວສ຺ເສເຍວາຕິ ເຫມນ຺ຕຄິມ຺ເຫເຍວ. ອຸຕຸວສ຺ເສເຍວ ຄນ຺ຕພ຺ໂພຕິ ອຕ຺ຖສ຺ສ ຎາຕພ຺ພຠາວໍ ທສ຺ເສນ຺ໂຕ ອາຫ ‘‘ວສ຺ສາເນ ປນາ’’ຕິອາທິ. ຍນ຺ຕິ ກມ຺ມໍ. ຕຕ຺ຖາຕິ ‘‘ວສ຺ສໍ ວສນ຺ຕີ’’ຕິອາທິວຈເນ. ໂສຕິ ປາຕິໂມກ຺ຂຸທ຺ເທສໂກ ຠິກ຺ຂຸ. ອຎ຺ຎສ຺ມິນ຺ຕິ ອປຣສ຺ມິໍ ປາຕິໂມກ຺ຂຸທ຺ເທສເກ. ມາສທ຺ວຍນ຺ຕິ ສາວຓມາສປຸຓ຺ຓມິໂຕ ຍາວ ອສ຺ສຍຸຊປຸຓ຺ຓມີ, ຕາວ ມາສທ຺ວຍໍ ວສິຕພ຺ພໍ. ອິທໍ ປຸຣິມວສ຺ສໍ ອຸປຄນ຺ຕ຺ວາ ປຈ຺ຉິມິກາຍ ປກ຺ກມນາທິໍ ສນ຺ຘາຍ ວຸຕ຺ຕໍ. ສເຈ ປຈ຺ຉິມິກໍ ອຸປຄນ຺ຕ຺ວາ ອນນ຺ຕຣເມວ ປກ຺ກມນາທິໍ ກໂຣຕິ, ມາສຕ຺ຕຍມ຺ປິ ວສິຕພ຺ພໍ.