໗໗. ອຸໂປສຖເຠທາທິກຖາ

໑໔໙. ປນ຺ນຣສິກສ຺ສ ປຸພ຺ພກິຈ຺ຈສ຺ສ ປາຬິຍໍ ອາຄຕຕ຺ຕາ ຈາຕຸທ຺ທສິກສ຺ເສວ ປຸພ຺ພກິຈ຺ຈໍ ທສ຺ເສນ຺ໂຕ ອາຫ ‘‘ອຊ຺ຊຸໂປສໂຖ ຈາຕຸທ຺ທໂສ’’ຕິ.

‘‘ອຘມ຺ເມນ ວຄ຺ຄ’’ນ຺ຕິອາທີສຸ ວິນິຈ຺ຉໂຍ ເອວໍ ເວທິຕພ຺ໂພຕິ ໂຍຊນາ. ອຘມ຺ເມນ ວຄ຺ຄນ຺ຕິ ເອຕ຺ຖ ອຘມ຺ມໍ ນາມ ເອກສ຺ມິໍ ວິຫາເຣ ຈຕຸນ຺ນໍ ຠິກ຺ຂູນໍ ສຸຕ຺ຕຸທ຺ເທສອຸໂປສຖມກຕ຺ວາ ປາຣິສຸທ຺ຘິອຸໂປສຖກຣຓຎ຺ຈ ຕິຓ຺ຓໍ ປາຣິສຸທ຺ຘິອຸໂປສຖມກຕ຺ວາ ສຸຕ຺ຕຸທ຺ເທສກຣຓຎ຺ຈ. ວຄ຺ຄໍ ນາມ ສພ຺ເພວ ອສນ຺ນິປຕິຕ຺ວາ ເອກສ຺ສ ຉນ຺ທປາຣິສຸທ຺ຘິຫຣຓໍ. ຉນ຺ທປາຣິສຸທ຺ຘິ ນາມ ສງ຺ຆມຊ຺ຌໍເຍວ ອາຄຈ຺ຉຕິ, ນ ຄຓມຊ຺ຌໍ, ນ ປຸຄ຺ຄລສ຺ສ ສນ຺ຕິກໍ. ອຘມ຺ເມນ ສມຄ຺ຄນ຺ຕິ ເອຕ຺ຖ ອຘມ຺ມໍ ວຸຕ຺ຕນຍເມວ. ສມຄ຺ຄໍ ນາມ ສພ຺ເພສໍ ສນ຺ນິປຕນໍ. ຘມ຺ເມນ ວຄ຺ຄນ຺ຕິ ເອຕ຺ຖ ຘມ຺ມໍ ນາມ ຈຕຸນ຺ນໍ ສຸຕ຺ຕຸທ຺ເທສອຸໂປສຖກຣຓຎ຺ຈ ຕິຓ຺ຓໍ ປາຣິສຸທ຺ຘິອຸໂປສຖກຣຓຎ຺ຈ. ວຄ຺ຄໍ ວຸຕ຺ຕນຍເມວ.