໗໘. ປາຕິໂມກ຺ຂຸທ຺ເທສກຖາ

໑໕໐. ອິມໍ ນິທານນ຺ຕິ ປາຕິໂມກ຺ຂສ຺ສ ອິມໍ ນິທານໍ. ສຸຕາ ໂຂ ປນາຕິ ເອຕ຺ຖ ສຸຍ຺ຍິຕ຺ຖາຕິ ສຸຕາ, ສຸຍ຺ຍສ຺ສນ຺ຕີຕິ ວາ ສຸຕາ, ປາຣາຊິກຸທ຺ເທສາທໂຍ. ສຸຕາ ຈ ສຸຕາ ຈ ສຸຕາຕິ ສຣູເປກເສໂສ ກາຕພ຺ໂພ. ອວເສສນ຺ຕິ ນິທານຸທ຺ເທສາທິໂຕ ອວເສສໍ ປາຣາຊິກຸທ຺ເທສາທິ. ສຸເຕນາຕິ ສຸຕສທ຺ເທນ. ‘‘ອຕ຺ເຖ ອສມ຺ຠວໂຕ ສທ຺ເທ ວຸຕ຺ຕວິຘານໍ ໂຫຕີ’’ຕິ ຫິ ປຣິຠາສໂຕ ‘‘ສຸເຕນາ’’ຕິ ເອຕ຺ຖ ສທ຺ໂທວ ຄເຫຕພ຺ໂພ. ເຕນ ນເຍນາຕິ ເຕນ ນິທານຸທ຺ເທສນເຍນ.

ອຏວິມນຸສ຺ສຠຍນ຺ຕິ ອຏວິຍໍ ນິວສນ຺ຕສ຺ສ ມນຸສ຺ສສ຺ສ ຠຍໍ, ວນຈຣກຠຍນ຺ຕິ ອຕ຺ໂຖ. ຣາຊນ຺ຕຣາໂຍຕິອາທີສຸ ເອວໍ ວິເສໂສ ເວທິຕພ຺ໂພຕິ ໂຍຊນາ. ທວທາໂຫຕິ ທາຍໍ ທຫຕີຕິ ທວທາໂຫ ອາກາຣສ຺ສ ຣສ຺ສໍ, ຍກາຣສ຺ສ ຈ ວກາຣໍ ກຕ຺ວາ. ນນ຺ຕິ ຠິກ຺ຂຸໍ. ເອກໍ ວາ ຠິກ຺ຂຸນ຺ຕິ ໂຍຊນາ. ປຐໂມ ວາ ອຸທ຺ເທໂສຕິ ນິທານຸທ຺ເທໂສ. ເອຕ຺ຖາຕິ ປຎ຺ຈສຸ ອຸທ຺ເທເສສຸ. ຍສ຺ມິນ຺ຕິ ອຸທ຺ເທເສ. ໂສປີຕິ ອຸທ຺ເທໂສປິ. ສຸເຕເນວ ສາເວຕພ຺ໂພຕິ ສຸຕປເທເນວ ສງ຺ຆສ຺ສ ສາເວຕພ຺ໂພຕິ ເອວສທ຺ໂທ ‘‘ນ ວິຕ຺ຖາເຣນາ’’ຕິ ທສ຺ເສຕິ.

ອນຊ຺ຌິຏ຺ຐາຕິ ເອຕ຺ຖ ອຸປສຄ຺ຄວເສນ ອິສຸຘາຕຸສ຺ສ ອິຈ຺ຉາກນ຺ຕິໂຕ ອຎ຺ຎມຕ຺ຖໍ ທສ຺ເສນ຺ໂຕ ອາຫ ‘‘ອນາຓຕ຺ຕາ, ອຍາຈິຕາ ວາ’’ຕິ. ເອຕ຺ຖ ‘‘ອນາຓຕ຺ຕາ’’ຕິ ອິທໍ ເຖເຣນ ອນາຓຕ຺ຕຠາວໍ ສນ຺ຘາຍ ວຸຕ຺ຕໍ. ‘‘ອຍາຈິຕາ’’ຕິ ອິທໍ ສມ຺ມຸຕິລທ຺ເຘນ ນວເກນ ອຍາຈິຕຠາວໍ ສນ຺ຘາຍ ວຸຕ຺ຕນ຺ຕິ ທຏ຺ຐພ຺ພໍ. ເອຕ຺ຖາຕິ ‘‘ອນຊ຺ຌິຏ຺ຐາ ຘມ຺ມໍ ຠາສນ຺ຕີ’’ຕິ ວຈເນ. ຘມ຺ມຊ຺ເຌສເກຕິ ຘມ຺ມກຖນຕ຺ຖາຍ ອຊ຺ເຌສຕີຕິ ຘມ຺ມຊ຺ເຌສໂກ, ຕສ຺ມິໍ. ອາປຸຈ຺ຉິຕ຺ວາ ວາ ເຕນ ສງ຺ຆຕ຺ເຖເຣນ ຍາຈິໂຕ ຫຸຕ຺ວາ ວາຕິ ໂຍຊນາ. ວາຣປຏິປາຏິຍາຕິ ວາຣານຸກ຺ກເມນ. ເທຫີຕິ ວາຕິ ເອຕ຺ຖ ອິຕິ-ວາ-ສທ຺ໂທ ‘‘ຠຓ’’ ອິຕິປເທນ ຈ ‘‘ກເຖຫິ’’ ອິຕິປເທນ ຈ ໂຍເຊຕພ຺ໂພ. ‘‘ຠຓ’’ ອິຕິ ວາ ‘‘ກເຖຫິ’’ອິຕິ ວາ ‘‘ເທຫິ’’ອິຕິ ວາ ວຕ຺ຕພ຺ພາຕິ ໂຍຊນາ. ຕີຫິປິ ວິຘີຫີຕິ ໂອສາຣຓກຖນສຣຠຎ຺ຎສງ຺ຂາເຕຫິ ຕີຫິ ສຊ຺ຊເນຫິ. ເອຕ຺ຖ ຈ ສຸຕ຺ຕສ຺ສ ໂອສາຣິຍເຕ ອຸຈ຺ຈາຣິຍເຕ ໂອສາຣຓໍ, ອຕ຺ຖສ຺ສ ກຖິຍເຕ ກຖນໍ, ສຸຕ຺ຕສ຺ສ ຈ ຕທຕ຺ຖສ຺ສ ຈ ສເຣນ ຠຓິຍເຕ ສຣຠຎ຺ຎໍ. ໂອສາເຣຫີຕິ ສຸຕ຺ຕໍ ອຸຈ຺ຈາເຣຫິ. ກເຖຫີຕິ ອຕ຺ຖໍ ກເຖຫິ. ສຣຠຎ຺ຎນ຺ຕິ ສຸຕ຺ຕສ຺ສ ຈ ຕທຕ຺ຖສ຺ສ ຈ ສເຣນ ຠຓນໍ. ນນ຺ຕິ ສທ຺ຘິວິຫາຣິກໍ. ສຊ຺ຌາຍໍ ອຘິຏ຺ຐຫິຕ຺ວາຕິ ‘‘ສຊ຺ຌາຍໍ ກໂຣມີ’’ຕິ ອຘິຏ຺ຐຫິຕ຺ວາ. ເອຕ຺ຖາຕິ ອຊ຺ເຌສນຏ຺ຐາເນ.

ນິສ຺ສິຕເກຕິ ສທ຺ຘິວິຫາຣິກາທໂຍ. ໂສຕິ ສງ຺ຆຕ຺ເຖໂຣ, ‘‘ວຕ຺ຕພ຺ໂພ’’ຕິປເທ ກມ຺ມໍ, ‘‘ວທຕີ’’ຕິອາທີສຸ ປເທສຸ ກຕ຺ຕາ. ອາຣທ຺ຘນ຺ຕິ ສງ຺ເຆນ ອາຣທ຺ຘໍ. ຐເປຕ຺ວາຕິ ຘມ຺ມສວນໍ ຐເປຕ຺ວາ. ໂອສາເຣຕ຺ວາຕິ ປຐມໍ ສຸຕ຺ຕໍ ໂອສາເຣຕ຺ວາ. ປຸນ ກເຖນ຺ເຕນາຕິ ປຈ຺ຉາ ອຕ຺ຖໍ ກເຖນ຺ເຕນ. ອຏ຺ຐເປຕ຺ວາເຍວ ວາຕິ ສຸຕ຺ຕສ຺ສ ຈ ອຕ຺ຖສ຺ສ ຈ ອນ຺ຕຣາ ອຏ຺ຐຕ຺ວາ ເອວ ວາ. ກເຖຕພ຺ພນ຺ຕິ ອຕ຺ຖຊາຕໍ ກເຖຕພ຺ພໍ. ກເຖນ຺ຕສ຺ສ…ເປ… ນໂຍຕິ ປຐມໍ ອຕ຺ຖໍ ກເຖຕ຺ວາ ປຸນ ສຸຕ຺ຕຎ຺ຈ ອຕ຺ຖຎ຺ຈ ສເຣນ ຠຓນ຺ຕສ຺ສ ປຸນ ອາຄເຕປິ ເອເສວ ນໂຍຕິ ອຕ຺ໂຖ.

ອຸປນິສິນ຺ນກຖາຍປີຕິ ສມີເປ ນິສິນ຺ເນນ ກຖາຍປິ. ເຕນາຕິ ສງ຺ຆຕ຺ເຖເຣນ. ວຕ຺ຕຸໍ ວຏ຺ຏຕີຕິ ວິເສເສຕ຺ວາ ວຕ຺ຕຸໍ ວຏ຺ຏຕິ. ເຕນາຕິ ມນຸສ຺ເສຫິ ຊານນຠິກ຺ຂຸນາ. ສງ຺ຆຕ຺ເຖໂຣ ຠຓຕິ, ຕຸຓ຺ຫີ ວາ ໂຫຕີຕິ ສມ຺ພນ຺ໂຘ. ‘‘ປຸຈ຺ຉນ຺ຕີ’’ຕິ ວຸຕ຺ເຕຕິ ໂຍຊນາ. ອນຸໂມທນາທີສຸປີຕິອາທິສທ຺ເທນ ຘມ຺ມກຖາທໂຍ ສງ຺ຄຓ຺ຫາຕິ. ສງ຺ຆຕ຺ເຖໂຣ ອນຸຊານາຕີຕິ ສມ຺ພນ຺ໂຘ. ສພ຺ພຕ຺ຖາຕິ ສພ຺ເພສຸ ວິຫາຣອນ຺ຕຣຆເຣສຸ.

ສຊ຺ຌາຍນ຺ຕິ ສຍໍ ອິສ຺ສເຣນ ອຍນໍ ອຸຈ຺ຈາຣຓໍ, ເກນຈິ ອນຊ຺ຌິຏ຺ໂຐ ສຍໍ ອຘິອິສ຺ສເຣນ ອຍນໍ ອຸຈ຺ຈາຣຓນ຺ຕິ ອຕ຺ໂຖ. ເຖໂຣຕິ ສທ຺ຘິວິຫາໂຣ ເຖໂຣ. ວິສ຺ສມິສ຺ສາມີຕິ ເຂທວິຣຫິຕໍ ຄມິສ຺ສາມິ. ອາປຸຈ຺ຉິຕພ຺ພນ຺ຕິ ປຐມເຖຣມ຺ປິ ປຸນ ອາຄຕຕ຺ເຖຣມ຺ປິ ອາປຸຈ຺ຉິຕພ຺ພໍ. ເອເກນ ສງ຺ຆຕ຺ເຖເຣນ ອນຸຎ຺ຎາເຕນາຕິ ສມ຺ພນ຺ໂຘ. ອຎ຺ຎສ຺ມີນ຺ຕິ ອນຸຎ຺ຎາຕຕ຺ເຖຣໂຕ ອຎ຺ຎສ຺ມິໍ ເຖເຣຕິ ສມ຺ພນ຺ໂຘ. ຕນ຺ຕິ ປຸນ ອາຄຕໍ ເຖຣໍ. ອຕ຺ຕານໍ ສມ຺ມນິຕພ຺ພນ຺ຕິ ເອຕ຺ຖ ປຈ຺ຈຕ຺ເຕ ອຸປໂຍຄວຈນນ຺ຕິ ອາຫ ‘‘ອຕ຺ຕາ ສມ຺ມນິຕພ຺ໂພ’’ຕິ. ກິໍ ສມ຺ມເຕນ ປຣິສໍ ອໂນໂລເກຕ຺ວາ ປຸຈ຺ຉິຕພ຺ໂພຕິ ອາຫ ‘‘ປຸຈ຺ຉນ຺ເຕນ ປນາ’’ຕິອາທິ.

໑໕໓. ເມຕິ ມຍ຺ຫໍ. ອິໂຕຕິ ປຸຄ຺ຄລໂຕ, ອຸປ຺ປນ຺ໂນຕິ ສມ຺ພນ຺ໂຘ. ປຸຣມ຺ຫາກນ຺ຕິ ປທສ຺ສ ປຸເຣ ອມ຺ຫາກນ຺ຕິ ປທຈ຺ເຉທໍ ກຕ຺ວາ ປຸເຣສທ຺ໂທ ປຐມຕ຺ໂຖຕິ ອາຫ ‘‘ປຐມໍ ອມ຺ຫາກ’’ນ຺ຕິ. ປຏິກຈ຺ເຈວສທ຺ໂທ ປເຄວປຣິຍາໂຍ, ‘‘ປຐມຕຣເມວາ’’ຕິ ອິມິນາ ຕສ຺ສ ອຕ຺ຖໍ ທສ຺ເສຕິ. ຠູຕເມວາຕິ ວິຊ຺ຊມານເມວ, ຕຖເມວ ວາ.