໗໖. ຄາມສີມາທິກຖາ

໑໔໗. ອຸໂປສຖກມ຺ມສ຺ສ ວິສຸໍ ຄຫິຕຕ຺ຕາ ເສສກມ຺ມວເສນ ສມານສໍວາສກຕາ ຄເຫຕພ຺ພາ ໂຄພລິພທ຺ທນເຍນ ວາ ປາຣິເສສນເຍນ ວາ. ຕນ຺ຕິ ສມານສໍວາສເອກູໂປສຖຠາວໍ. ‘‘ອປຣິຈ຺ຉິນ຺ນາຍາ’’ຕິ ອິມິນາ ອຏ຺ຐປິຕາຍາຕິ ເອຕ຺ຖ ຐປຘາຕຸຍາ ອຘິປ຺ປາຍຕ຺ຖໍ ທສ຺ເສຕິ. ຄາມໍ ວາ ນິຄມໍ ວາຕິ ເອຕ຺ຖ ນຄຣໍ ເກນ ສງ຺ຄຫິຕນ຺ຕິ ອາຫ ‘‘ຄາມຄ຺ຄຫເຓນ ເຈຕ຺ຖາ’’ຕິອາທິ. ຕຕ຺ຖ ເອຕ຺ຖາຕິ ‘‘ຄາມໍ ວາ ນິຄມໍ ວາ’’ຕິ ປາເຐ, ຄາມຄ຺ຄຫເຓນາຕິ ສມ຺ພນ຺ໂຘ. ອຖ ວາ ເອຕ຺ຖາຕິ ຄາມນິຄມນຄເຣສຸ, ນຄຣມ຺ປີຕິ ສມ຺ພນ຺ໂຘ. ຄາມາທີນໍ ປຣິຈ຺ເຉທໍ ວິຕ຺ຖາເຣນ ທສ຺ເສນ຺ໂຕ ອາຫ ‘‘ຕຕ຺ຖາ’’ຕິອາທິ. ຕຕ຺ຖ ຕຕ຺ຖາຕິ ຄາມນິຄມນຄເຣສຸ. ຄາມໂຠຊກາຕິ ຄາມໍ ຠຸຎ຺ຊນ຺ຕີຕິ ຄາມໂຠຊກາ. ພລິນ຺ຕິ ກຣໍ. ໂສ ຫິ ຕໍ ນິສ຺ສາຍ ຄາມໂຠຊກາ ພລນ຺ຕິ ຊີວນ຺ຕິ ອເນນາຕິ ພລີຕິ ວຸຈ຺ຈຕິ. ຍມ຺ປິ ເອກໍ ປເທສໍ ປຣິຈ຺ຉິນ຺ທິຕ຺ວາ ເທຕີຕິ ໂຍຊນາ. ຄາມເຂຕ຺ເຕຕິ ຣຎ຺ໂຎ ອາຓາ ຂິປິຍຕິ ເອຕ຺ຖາຕິ ເຂຕ຺ຕໍ, ຄາໂມເຍວ ເຂຕ຺ຕໍ ຄາມເຂຕ຺ຕໍ, ຕສ຺ມິໍ. ອຍມ຺ປີຕິ ອຍໍ ປເທໂສປິ. ໂສປີຕິ ປເທໂສປິ. ວິສຸໍຄາໂມ ນາມາຕິ ໂຍຊນາ. ໂສປິ ວິສຸໍຄາໂມ ຄາມສີມາ ໂຫຕິເຍວາຕິ ໂຍຊນາ. ວິສຸໍ ປຣິຈ຺ຉິນ຺ທິຕ຺ວາ ທິນ຺ໂນ ຄາໂມ ວິສຸໍຄາໂມ. ຕສ຺ມາຕິ ຍສ຺ມາ ວິສຸໍ ຄາໂມ ໂຫຕິ, ຕສ຺ມາ. ສາ ຈາຕິ ວິສຸໍຄາມສີມາ ຈ. ອິຕຣາຕິ ວິສຸໍຄາມສີມໂຕ ອຎ຺ຎາ ປກຕິຄາມນຄຣນິຄມສີມາ ຈາຕິ ໂຍຊນາ.

ເອວນ຺ຕິ ‘‘ອສມ຺ມຕາຍ ຠິກ຺ຂເວ’’ຕິອາທິນາ ປາເຐນ. ຕນ຺ຕິ ສີມປຣິຈ຺ເຉທໍ. ອປຣິຈ຺ຉິນ຺ເນຕິ ຣາຊູຫິ ອປຣິຈ຺ຉິນ຺ເນ. ‘‘ອຏວິປເທເສ’’ຕິ ອິມິນາ ນຕ຺ຖິ ຄາໂມ ເອຕ຺ຖາຕິ ອຄາມໂກຕິ ວຈນຕ຺ຖສ຺ສ ສຣູປໍ ທສ຺ເສຕິ. ວິຊ຺ຌາຏວິສທິເສຕິ ວິຄຕໍ ອຄ຺ຄິໂນ ຌາຍນເມຕ຺ຖາຕິ ວິຊ຺ຌາ, ໂຈຣາທໂຍ ມນຸສ຺ເສ ອາຠຸໂສ ຏວນ຺ຕິ ປີຬຍນ຺ຕິ ເອຕ຺ຖາຕິ ອາຏວິ. ວິຊ຺ຌາ ຈ ສາ ອາຏວິ ເຈຕິ ວິຊ຺ຌາຏວິ, ຕາຍ ສທິເສ ວິຊ຺ຌາຏວິສທິເສ. ເອຕ຺ຖ ປຸຣິມນເຍ ຄາມາທີຫິ ອາສນ຺ໂນ ວາ ໂຫຕຸ, ອນາສນ຺ໂນ ວາ ເຕຫິ ອປຣິຈ຺ຉິນ຺ໂນ ອຏວິປເທໂສ ຄເຫຕພ຺ໂພ. ປຈ຺ຉິມນເຍ ທູໂຣ ມນຸສ຺ສານໍ ອນາຄມນປໂຖ ອາຏວິປເທໂສ ຄເຫຕພ຺ໂພຕິ ອຍເມເຕສໍ ວິເສໂສ. ອສ຺ສາຕິ ຠິກ຺ຂຸໂນ. ສມນ຺ຕາຕິ ສມນ຺ຕໂຕ. ອຍໍ ສີມາຕິ ອຍໍ ສຕ຺ຕພ຺ຠນ຺ຕຣສີມາ. ຕຕ຺ຖາຕິ ສຕ຺ຕສຸ ອພ຺ຠນ຺ຕເຣສຸ. ສມນ຺ຕາ ຐິຕສ຺ສ ວາ ນິສິນ຺ນສ຺ສ ວາ ອພ຺ຠນ຺ຕເຣ ອນ຺ໂຕໂກຏ຺ຐາເສ ຊາຕໍ ອພ຺ຠນ຺ຕຣໍ ອຏ຺ຐວີສຫຕ຺ຖປມາຓໍ.

ຍາ ກາຈິ ນທີ ອສີມາວ ໂຫຕີຕິ ສມ຺ພນ຺ໂຘ. ນທີສີມລກ຺ຂຓປຕ຺ຕາຕິ ນທີສີມລກ຺ຂຓໍ ປຕ຺ຕາ. ອິມິນາ ສີມລກ຺ຂຓໍ ອປຕ຺ຕາ ນທີ ພນ຺ຘິຍມານາ ສີມາວ ໂຫຕີຕິ ທສ຺ເສຕິ. ສາວຘາຣເຓນ ‘‘ອຕ຺ຕໂນ ສຠາເວເນວາ’’ຕິ ອິມິນາ ຠິກ຺ຂູນໍ ພນ຺ຘນຠາເວນາຕິ ອຕ຺ຖໍ ນິວຕ຺ເຕຕິ. ເອຕ຺ຖາຕິ ນທິຍໍ. ເອຕ຺ຖາຕິ ຊາຕສ຺ສຣສມຸທ຺ເທສຸ. ເຍນ ເກນຈີຕິ ອນ຺ຕມໂສ ຕິຣຈ຺ຉານຄເຕນປິ ເຍນ ເກນຈິ. ຂຓິຕ຺ວາ ອກໂຕ ສຍໍຊາໂຕຕິ ສມ຺ພນ຺ໂຘ. ອິທໍ ເຫຕຸອນ຺ໂຕຄຘວິເສສນໍ. ຂຓິຕ຺ວາ ອກຕຕ຺ຕາຕິ ຫິ ອຕ຺ໂຖ. ສຍໍຊາໂຕຕິ ສຍເມວ ຊາໂຕຕິ ເອວກາໂຣ ໂຍເຊຕພ຺ໂພ. ເຕນ ວຸຕ຺ຕໍ ‘‘ເຍນ ເກນຈິ ຂຓິຕ຺ວາ ອກໂຕ’’ຕິ. ໂສພ຺ໂຠຕິ ສໍ ອຸໂຠຕິ ປທວິຠາໂຄ ກາຕພ຺ໂພ. ຕຕ຺ຖ ສໍສທ຺ໂທ ສມນ຺ຕຕ຺ຖວາຈໂກ, ອຸຠສທ຺ໂທ ປູຣຓຕ຺ຖວາຈໂກ. ຕສ຺ມາ ສມນ຺ຕໂຕ ອາຄເຕນ ອຸທເກນ ອຸຠຕິ ປູຣຕິ ເອຕ຺ຖາຕິ ໂສພ຺ໂຠຕິ ວຈນຕ຺ໂຖ ກາຕພ຺ໂພ. ເຕນ ວຸຕ຺ຕໍ ‘‘ສມນ຺ຕໂຕ ອາຄເຕນ ອຸທເກນ ປູຣິໂຕ ຕິຏ຺ຐຕີ’’ຕິ.

ຕຕ຺ຖາຕິ ນທີສມຸທ຺ທຊາຕສ຺ສເຣສຸ, ອາຘາເຣ ຠຸມ຺ມໍ. ຍໍສທ຺ໂທ ຐານວິສໂຍຕິ ອາຫ ‘‘ຍໍ ຐານ’’ນ຺ຕິ. ມຊ຺ຌິມສ຺ສາຕິ ຖາມມຊ຺ຌິມສ຺ສ. ວກ຺ຂຕິ ຫິ ‘‘ຖາມມຊ຺ຌິເມນາ’’ຕິ. ‘‘ສມນ຺ຕໂຕ’’ຕິ ອິມິນາ ສມນ຺ຕາຕິ ເອຕ຺ຖ ນິສ຺ສກ຺ກຕ຺ເຖ ນິສ຺ສກ຺ກວຈນນ຺ຕິ ທສ຺ເສຕິ. ‘‘ອຸທກຸກ຺ເຂເປນາ’’ຕິ ອິມິນາ ອຸທກຸກ຺ເຂປາຕິ ເອຕ຺ຖ ກຣຓຕ຺ເຖ ນິສ຺ສກ຺ກວຈນນ຺ຕິ ທສ຺ເສຕິ. ອຸທກໍ ອຸກ຺ຂິປິຕ຺ວາ ຂິປິຍຕິ ເອຕ຺ຖາຕິ ອຸທກຸກ຺ເຂໂປ. ‘‘ປຣິຈ຺ຉິນ຺ນ’’ນ຺ຕິ ອິມິນາ ປາຐເສສໍ ທສ຺ເສຕິ. ອກ຺ຂຘຸຕ຺ຕາຕິ ເອຕ຺ຖ ອກ຺ໂຂຕິ ປາສໂກ. ໂສ ຫິ ອກຕິ ກຸຏິລໍ ຄຈ຺ຉຕິ ອເນນາຕິ ອກ຺ໂຂຕິ ວຸຈ຺ຈຕິ, ຘວນ຺ຕິ ມຣິຍາທມຕິກ຺ກມ຺ມ ກີຬາທິປສຸຕໍ ຄຈ຺ຉນ຺ຕີຕິ ຘຸຕ຺ຕາ, ອກ຺ເຂສຸ ຘຸຕ຺ຕາ ອກ຺ຂຘຸຕ຺ຕາ. ທາຣຸຄຸຬນ຺ຕິ ສາຣທາຣຸມຍໍ ຄຸຬໍ. ‘‘ວາລຸກໍ ວາ’’ຕິ ອິມິນາ ‘‘ອຸທກຸກ຺ເຂປາ’’ຕິ ເອຕ຺ຖ ອຸປລກ຺ຂຓໍ ທສ຺ເສຕິ. ຍຕ຺ຖາຕິ ຍສ຺ມິໍ ປເທເສ. ອຍນ຺ຕິ ປເທໂສ. ຕສ຺ສາຕິ ອຸທກຸກ຺ເຂປສ຺ສ.

ເອຕ຺ຖາຕິ ນທີສມຸທ຺ທຊາຕສ຺ສເຣສຸ. ມຸຂທ຺ວາຣນ຺ຕິ ສມຸທ຺ທາທີນໍ ມຸຂສງ຺ຂາຕໍ ທ຺ວາຣໍ. ສພ຺ພຕ຺ຖາຕິ ສພ຺ພາຍ ນທິຍໍ. ເຖຣວາທໍ ທສ຺ເສນ຺ໂຕ ອາຫ ‘‘ຍໍ ປນາ’’ຕິອາທິ. ‘‘ໂຍຊນໍ…ເປ… ວຏ຺ຏຕີ’’ຕິ ຍໍ ປນ ວຈນໍ ມຫາສຸມຕ຺ເຖເຣນ ວຸຕ຺ຕນ຺ຕິ ໂຍຊນາ. ຕຕ຺ຣາປີຕິ ໂຍຊນນທິຍມ຺ປິ. ປຏິກ຺ຂິຕ຺ຕາກາຣໍ ວິຕ຺ຖາເຣນ຺ໂຕ ອາຫ ‘‘ຠຄວຕາ ຫີ’’ຕິອາທິ. ນທິຍາ ປມາຓນ຺ຕິ ນທິຍາ ຄມ຺ຠີຣປມາຓເມວ, ນ ອາຍາມວິຕ຺ຖາຣປມາຓນ຺ຕິ ອຕ຺ໂຖ. ‘‘ນ ໂຍຊນໍ ວາ ອທ຺ຘໂຍຊນໍ ວາ’’ຕິ ວຈນມ຺ປິ ອິທເມວ ສນ຺ຘາຍ ວຸຕ຺ຕນ຺ຕິ ທຏ຺ຐພ຺ພໍ. ກິຎ຺ຈາປິ ອາຍາມວິຕ຺ຖາຣປມາຓໍ ນ ວຸຕ຺ຕໍ, ປຠວໂຕ ປນ ຍາວ ມຸຂທ຺ວາຣາ ອາຍາມວິຕ຺ຖາຣວເສນ ກມ຺ມໍ ກາຕຸໍ ປໂຫນກນທີເຍວ ຄເຫຕພ຺ພາຕິ ທຏ຺ຐພ຺ພາ. ຍາ ນທີຕິ ສມ຺ພນ຺ໂຘ. ອິມສ຺ສ ສຸຕ຺ຕສ຺ສາຕິ ‘‘ຕິມຓ຺ຑລ’’ນ຺ຕິອາທິກສ຺ສ ອິມສ຺ສ ສຸຕ຺ຕສ຺ສ. ປຠວໂຕຕິ ສມຸທາຄມໂຕ. ເອຕ຺ຖາຕິ ນທິຍໍ. ສພ຺ເພຫິ ຠິກ຺ຂູຫິ ຐເປຕພ຺ໂພຕິ ສມ຺ພນ຺ໂຘ. ຕໂຕຕິ ເອກອຸທກຸກ຺ເຂປໂຕ.

ກິຕ຺ຕກາ ປຣິປຸຓ຺ຓາ ໂຫຕີຕິ ອາຫ ‘‘ສມຕິຕ຺ຖິກາ’’ຕິ. ຕິຕ຺ເຖນ ສມໍ ປຣິປູຣຕີຕິ ສມຕິຕ຺ຖິກາ. ອຸທກສາຏິກໍ ນິວາເສຕ຺ວາປີຕິ ປິສທ຺ໂທ ‘‘ອນິວາເສຕ຺ວາປີ’’ຕິ ທສ຺ເສຕິ. ອຸທກສາຏິກໍ ອນິວາເສນ຺ໂຕປິ ວຕ຺ເຖນ ອວິນາຠາວໂຕ ອຎ຺ຎໍ ນິວາເສຕ຺ວາຕິ ອຕ຺ໂຖ ຄເຫຕພ຺ໂພ. ນາວາຍ ຐຕ຺ວາ ກຣິຍມາເນ ກິໍ ຄຈ຺ຉນ຺ຕິຍາປິ ນາວາຍ ກາຕຸໍ ວຏ຺ຏຕີຕິ ອາຫ ‘‘ຄຈ຺ຉນ຺ຕິຍາ ປນາ’’ຕິອາທິ. ‘‘ກສ຺ມາ’’ຕິອາທິນາ ກາຣຓໍ ທສ຺ເສຕິ. ຫີຕິ ຍສ຺ມາ. ຕນ຺ຕິ ອຸທກຸກ຺ເຂປມຕ຺ຕໍ. ເອວໍ ສຕິ…ເປ… ອນຸສາວນາ ໂຫຕິ, ຕສ຺ມາ ຄຈ຺ຉນ຺ຕິຍາ ນາວາຍ ກາຕຸໍ ນ ວຏ຺ຏຕີຕິ ໂຍຊນາ. ‘‘ຕສ຺ມາ’’ຕິອາທິນາ ລທ຺ຘຄຸຓໍ ທສ຺ເສຕິ. ນ ເກວລໍ ນາວາຍເມວາຕິ ທສ຺ເສນ຺ໂຕ ອາຫ ‘‘ອນ຺ໂຕນທິຍ’’ນ຺ຕິອາທິ.

ຣຸກ຺ຂສ຺ສາຕິ ອນ຺ໂຕນທິຍໍ ຊາຕສ຺ສ ຣຸກ຺ຂສ຺ສ. ສາຂາ ວາ ປຕິຏ຺ຐິຕາຕິ ສມ຺ພນ຺ໂຘ. ສີມໍ ວາ ໂສເຘຕ຺ວາຕິ ວິຫາຣສີມຄາມສີມາສຸ ຐິຕານໍ ຫຕ຺ຖປາສານຍນພຫິກຣຓວເສນ ສີມໍ ວາ ໂສເຘຕ຺ວາ. ຊາຕຣຸກ຺ຂສ຺ສ ປວິຏ຺ຐສາຂາຍ ວາ ປາໂຣເຫ ວາຕິ ສມ຺ພນ຺ໂຘ. ອສ຺ສາຕິ ພຫິນທິຕີເຣ ຊາຕຣຸກ຺ຂສ຺ສ. ຕຕ຺ຖາຕິ ຂາຓຸເກ.

ຕສ຺ສາຕິ ປາສາຓທີປກສ຺ສ. ປຸພ຺ເພ ວຸຕ຺ຕປ຺ປກາເຣຕິ ປຸພ຺ເພ ນທີນິມິຕ຺ຕຏ຺ຐາເນ ‘‘ອນ຺ວທ຺ຘມາສ’’ນ຺ຕິອາທິນາ (ມຫາວ. ອຏ຺ຐ. ໑໓໘) ວຸຕ຺ຕປ຺ປກາເຣ. ໂສຕິ ປາສາຓທີປໂກ. ປຸນ ໂສຕິ ປາສາຓທີປໂກເຍວ. ຫີຕິ ສຈ຺ຈໍ, ຍສ຺ມາ ວາ.

ອາວຣຓນ຺ຕິ ປາຬິໍ. ຕນ຺ຕິ ອາວຣຓໍ. ອາວຣເຓນ ວາ ໂກຏ຺ຐກພນ຺ເຘນ ວາ ເຫຕຸຠູເຕນ, ປຈ຺ຉິຊ຺ຊຕີຕິ ສມ຺ພນ຺ໂຘ. ໂກຈິ ອາວຣຓປ຺ປເທໂສ ອຊ຺ໂຌຕ຺ຖຣິຍຕີຕິ ສມ຺ພນ຺ໂຘ. ຕຕ຺ຖາຕິ ອາວຣຓປ຺ປເທເສ. ຫີຕິ ສຈ຺ຈໍ, ຍສ຺ມາ ວາ. ‘‘ເຫຏ຺ຐາປາຬິ ພທ຺ຘາ’’ຕິ ອິທໍ ນທິໍ ວິນາເສຕ຺ວາ ຕຬາກກຣຓາກາຣທສ຺ສນໍ. ເອຕ຺ຖາຕິ ນທິຍໍ, ຕຬາເກ ວາ. ຉຑ຺ຑິຕໂມທກນ຺ຕິ ຕຬາກຣກ຺ຂນຕ຺ຖໍ ເອເກນ ວາຣິມຄ຺ເຄນ ຉຑ຺ຑິຕໍ ອຸທກໍ. ເທເວ ອວສ຺ສນ຺ເຕຕິ ທຸພ຺ພຸຏ຺ຐິກາລຕ຺ຕາ ວສ຺ສນ຺ຕກາເລປິ ເທເວ ອວສ຺ສນ຺ເຕ. ສາຕິ ນທິໂຕ ນີຫຏມາຕິກາ. ກາລນ຺ຕເຣນາຕິ ອຎ຺ເຎນ ກາເລນ. ອຸປ຺ປຕິຕ຺ວາຕິ ຄາມນິຄມານໍ ອຸປຣິ ປຕິຕ຺ວາ. ປວຕ຺ຕຕີຕິ ປຸພ຺ເພ ວຸຕ຺ຕປກາເຣ ວສ຺ສກາເລ ຈຕ຺ຕາໂຣ ມາເສ ອພ຺ໂຠຈ຺ຉິນ຺ນາ ສນ຺ທຕິ. ວິຫາຣສີມນ຺ຕິ ວິຫາຣສມ຺ພນ຺ຘໍ ພທ຺ຘສີມໍ.

ສມຸທ຺ເທປີຕິ ປິສທ຺ໂທ ນທິມເປກ຺ຂຕິ. ຕຕ຺ຖາຕິ ປເທເສ. ໂອຕຣິຕ຺ວາຕິ ເຫຏ຺ຐາ ຕຣິຕ຺ວາ. ‘‘ໂອສຣິຕ຺ວາ’’ຕິປິ ປາໂຐ, ອຍເມວຕ຺ໂຖ. ສຓ຺ຐຫນ຺ຕີຕິ ອຸທເກນ ສມໍ ຕິຏ຺ຐນ຺ຕິ. ໂສຕິ ປເທໂສ. ອຸທກນ຺ຕໂຕຕິ ອຸທກໂກຏິໂຕ. ຕຕ຺ຖາຕິ ສມຸທ຺ເທ. ພາຘຕີຕິ ປີຬຍຕິ. ເຕສູຕິ ນາວາອຏ຺ຏເກສຸ. ຕນ຺ຕິ ປິຏ຺ຐິປາສາຓໍ. ອູມິໂຍຕິ ວີຈິໂຍ. ຕາ ຫິ ປຣໍປຣາວເສນ ອຸຄ຺ຄນ຺ຕ຺ວາ ສວິຎ຺ຎາຓກາວິຎ຺ຎາຓເກ ມິຍນ຺ຕິ ຫິໍສນ຺ຕິ, ອນ຺ໂຕ ປກ຺ຂິປນ຺ຕີຕິ ວາ ອູມິໂຍຕິ ວຸຈ຺ຈນ຺ຕິ. ຕຕ຺ຖາຕິ ປິຏ຺ຐິປາສາເຓ. ຫີຕິ ສຈ຺ຈໍ, ຍສ຺ມາ ວາ. ອຸທເກເນວ ປິຏ຺ຐິປາສາໂຓ ໂອຕ຺ຖຣີຍຕີຕິ ໂຍຊນາ. ໂສຕິ ທີປກປພ຺ພໂຕ. ‘‘ທູເຣ’’ຕິ ວຕ຺ວາ ຕສ຺ສ ປມາຓໍ ທສ຺ເສນ຺ໂຕ ອາຫ ‘‘ມຈ຺ຉວຘານໍ ອນາຄມນປເຖ’’ຕິ. ມຈ຺ຉວຘານນ຺ຕິ ເກວຏ຺ຏານໍ. ເຕ ຫິ ຍສ຺ມາ ມຈ຺ເຉ ຫນນ຺ຕິ, ຕສ຺ມາ ມຈ຺ຉວຘາຕິ ວຸຈ຺ຈນ຺ຕິ. ‘‘ມຈ຺ຉພນ຺ຘານ’’ນ຺ຕິປິ ປາໂຐ. ມຈ຺ເຉ ພນ຺ຘນ຺ຕີຕິ ມຈ຺ຉພນ຺ຘາຕິ ວຈນຕ຺ໂຖ ກາຕພ຺ໂພ. ອນາຄມນປເຖຕິ ຍຕ຺ຖ ຄນ຺ຕ຺ວາ ຕທເຫວ ປຈ຺ຈາຄນ຺ຕ຺ວາ ນ ອາຄມນປຖິເກ ເທເສ. ນຕ຺ຖິ ອາຄມນປໂຖ ເອຕ຺ຖາຕິ ອນາຄມນປໂຖ, ເທໂສ. ຕສ຺ມິໍ ‘‘ອຄມນປເຖ’’ຕິປິ ປາໂຐ, ໂສ ອຍຸຕ຺ໂຕ. ກສ຺ມາ? ອຄມນປຖສ຺ສ ນາຘິປ຺ເປຕຕ຺ຕາ. ຄນ຺ຕ຺ວາ ຫິ ປຸນ ອນາຄມນປໂຖເຍວາຘິປ຺ເປໂຕ. ເຕສນ຺ຕິ ມຈ຺ຉວຘານໍ. ຄມນປຣິຍນ຺ຕສ຺ສາຕິ ຄມນໂກຏິຍາ. ໂອຣໂຕຕິ ໂອຣຠາເຄ ຐິໂຕ ທີປໂກ ວາ ປພ຺ພໂຕ ວາຕິ ໂຍເຊຕພ຺ໂພ. ຕຕ຺ຖາຕິ ໂອຣຠາເຄ ຐິເຕສຸ ທີປກປພ຺ພເຕສຸ. ໂອຕ຺ຖຣິຕ຺ວາຕິ ປກຕິອຸທເກນ ໂອຕ຺ຖຣິຕ຺ວາ. ຕຕ຺ຖາຕິ ໂອຕ຺ຖຣິຕ຺ວາ ຐິເຕ ສມຸທ຺ເທ.

ກໂຣນ຺ເຕຫິປິ ກາຕພ຺ພນ຺ຕິ ສມ຺ພນ຺ໂຘ. ຍຕ຺ຖາຕິ ຍສ຺ມິໍ ສເຣ. ອຍນ຺ຕິ ອຍໍ ສໂຣ, ນ ຊາຕສ຺ສໂຣ ໂຫຕິ. ອຍໍ ສໂຣ ຄາມເຂຕ຺ຕສງ຺ຂ຺ຍເມວ ຄຈ຺ຉຕີຕິ ໂຍຊນາ. ຕຕ຺ຖາຕິ ສເຣ. ຍຕ຺ຖ ປນາຕິ ຍສ຺ມິໍ ສເຣ ປນ. ຕສ຺ສາຕິ ຊາຕສ຺ສຣສ຺ສ. ຕຕ຺ຖາຕິ ປເທເສ. ສເຈ ຄມ຺ຠີຣໍ ອຸທກໍ ໂຫຕີຕິ ໂຍຊນາ. ຕຕ຺ຖາຕິ ອຏ຺ຏເກ. ເອຕ຺ຖາຕິ ຊາຕສ຺ສເຣ, ຐິເຕສຸ ປິຏ຺ຐິປາສາຓທີປເກສູຕິ ໂຍຊນາ. ປໂຫນກຊາຕສ຺ສໂຣຕິ ສງ຺ຆກມ຺ມໍ ກາຕຸໍ ປໂຫນໂກ ຊາຕສ຺ສໂຣ. ‘‘ສຸກ຺ຂຕີ’’ຕິ ວຕ຺ວາ ຕເທວ ສມຕ຺ເຖຕຸໍ ວຸຕ຺ຕໍ ‘‘ນິຣຸທໂກ’’ຕິ. ຕຕ຺ຖາຕິ ຊາຕສ຺ສເຣ. ສເຈ ນິຣຸທກມຕ຺ເຕນ ຄາມເຂຕ຺ຕໍ ຄຈ຺ຉຕິ. ກທາ ຄຈ຺ຉຕີຕິ ອາຫ ‘‘ສເຈ ປເນຕ຺ຖາ’’ຕິອາທິ. ຕຕ຺ຖ ເອຕ຺ຖາຕິ ຊາຕສ຺ສເຣ. ໂປກ຺ຂຣຓີອາທີນີຕິ ເອຕ຺ຖ ອາທິສທ຺ເທນ ອຸທກມາຕິກາທໂຍ ສງ຺ຄຓ຺ຫາຕິ. ຍທາ ຂຓນ຺ຕິ, ຕທາຕິ ປາຐເສໂສ ໂຍເຊຕພ຺ໂພ. ‘‘ຕໍ ຐານ’’ນ຺ຕິ ວຸຕ຺ເຕປິ ນ ຂຓນຏ຺ຐານເມວ ຄເຫຕພ຺ພໍ, ‘‘ເອຕ຺ຖາ’’ຕິ ສາມຎ຺ຎໂຕ ວຸຕ຺ຕຕ຺ຕາ ສພ຺ໂພເຍວ ຊາຕສ຺ສໂຣ ຄເຫຕພ຺ໂພ. ນ ເກວລໍ ອຊາຕສ຺ສຣມຕ຺ຕໍ ໂຫຕິ, ອຖ ໂຂ ຄາມເຂຕ຺ຕນ຺ຕິ ອາຫ ‘‘ຄາມສີມາສງ຺ຂ຺ຍເມວ ຄຈ຺ຉຕີ’’ຕິ.

ນນ຺ຕິ ຊາຕສ຺ສຣໍ. ປູເຣຕ຺ວາຕິ ມຕ຺ຕິກາທີຫິ ປູເຣຕ຺ວາ. ປາຬິນ຺ຕິ ອາວຣຓໍ. ສພ຺ພເມວ ນນ຺ຕິ ສກລເມວ ຕໍ ຊາຕສ຺ສຣໍ. ໂລຓີປີຕິ ປິສທ຺ເທນ ນ ເກວລໍ ໂສພ຺ໂຠເຍວ ຊາຕສ຺ສຣສງ຺ຂ຺ຍໍ ຄຈ຺ຉຕິ, ອຖ ໂຂ ໂລຓີປີຕິ ທສ຺ເສຕິ. ອຸທກຏ຺ຐາໂນກາເສຕິ ອຸທກສ຺ສ ຐາເນ ໂອກາເສ.

໑໔໘. ສີມາຍ ສີມໍ ສມ຺ຠິນ຺ທນ຺ຕີຕິ ເອຕ຺ຖ ‘‘ສີມາຍ ສີມ’’ນ຺ຕິ ປທານໍ ສມ຺ພນ຺ຘາເປກ຺ຂຕ຺ຕາ ເຕສໍ ສມ຺ພນ຺ຘໍ ທສ຺ເສຕຸໍ ວຸຕ຺ຕໍ ‘‘ອຕ຺ຕໂນ ປເຣສ’’ນ຺ຕິ. ‘‘ພທ຺ຘສີມ’’ນ຺ຕິ ອິມິນາ ‘‘ສີມ’’ນ຺ຕິ ສາມຎ຺ຎໂຕ ວຸຕ຺ເຕປິ ວິເສສໂຕ ພທ຺ຘສີມາເຍວ ຄເຫຕພ຺ພາຕິ ທສ຺ເສຕິ. ຕເມວຕ຺ຖໍ ວິຕ຺ຖາເຣນ຺ໂຕ ອາຫ ‘‘ສເຈ ຫີ’’ຕິອາທິ. ສໍສຏ຺ຐວິຏປາຕິ ອຎ຺ຎມຎ຺ຎໍ ອາສນ຺ນຕ຺ຕາ ສໍສຏ຺ໂຐ ວິຏໂປ ເອເຕສນ຺ຕິ ສໍສຏ຺ຐວິຏປາ. ‘‘ສໍສຏ຺ຐວິຏປາ’’ຕິ ອິທໍ ອຸປລກ຺ຂຓມຕ຺ຕໍ, ມູລານິປິ ສໍສຏ຺ຐານິເຍວາຕິ ທຏ຺ຐພ຺ພໍ. ເຕສູຕິ ທ຺ວີສຸ ຣຸກ຺ເຂສຸ. ວິຫາຣສີມາ ຈາຕິ ໂປຣາຓກວິຫາຣສີມາ ຈ. ອນ຺ໂຕ ກຕ຺ວາຕິ ສີມາຍ ອນ຺ໂຕ ກຕ຺ວາ. ອຖ ປຈ຺ຉາຕິ ເອຕ຺ຖ ‘‘ປຈ຺ຉາ’’ຕິ ອິມິນາ ອຖສທ຺ທສ຺ສຕ຺ຖໍ ທສ຺ເສຕິ. ເອວໍ ເກ ອກໍສູຕິ ອາຫ ‘‘ເອວໍ ຉພ຺ພຄ຺ຄິຍາ ອກໍສູ’’ຕິ. ເຕນາຕິ ກຣເຓນ.

ອຊ຺ໂຌຕ຺ຖຣຓາກາຣໍ ທສ຺ເສນ຺ໂຕ ອາຫ ‘‘ປເຣສ’’ນ຺ຕິອາທິ. ຕສ຺ສາຕິ ພທ຺ຘສີມາຍ. ປເທສນ຺ຕິ ຠິກ຺ຂູຫິ ກມ຺ມໍ ກາຕຸໍ ປໂຫນກໍ ເອກເທສໍ. ອນ຺ຕມໂສ ເອກສ຺ສປິ ຠິກ຺ຂຸໂນ ຐຕ຺ວາ ອຘິຏ຺ຐານຸໂປສຖໍ ກາຕຸໍ ປໂຫນກໍ ປເທສໍ. ກມ຺ມໍ ກາຕຸໍ ອປ຺ປໂຫນກປເທສໍ ອນ຺ໂຕ ກຣິຕ຺ວາ ພນ຺ຘນ຺ຕາ ສີມາຍ ສີມໍ ສມ຺ຠິນ຺ທນ຺ຕິ ນາມ. ສີມາຍ ອຸປຈາໂຣຕິ ປຈ຺ຉາ ພນ຺ຘິຕພ຺ພາຍ ສີມາຍ ອຸປຈາໂຣ. ‘‘ວຑ຺ຒນ຺ໂຕ ສີມາສງ຺ກຣໍ ກໂຣຕີ’’ຕິ ອິມິນາ ສເຈ ອວຑ຺ຒນໂກ ປາສາໂຓ ໂຫຕິ, ທ຺ວິນ຺ນມ຺ປິ ສີມານໍ ນິມິຕ຺ຕໍ ກາຕຸໍ ວຏ຺ຏຕີຕິ ທສ຺ເສຕິ.