໗໔. ອວິປ຺ປວາສສີມານຸຊານນກຖາ

໑໔໓. ອນ຺ຘກວິນ຺ທໍ ນາມາຕິ ຕສ຺ສ ຄາມສ຺ສ ນາມໍ. ຕນ຺ຕິ ອນ຺ຘກວິນ຺ທໍ. ເຖໂຣຕິ ມຫາກສ຺ສປຕ຺ເຖໂຣ. ຕໂຕຕິ ອນ຺ຘກວິນ຺ທໂຕ. ອິມິນາ ‘‘ອນ຺ຘກວິນ຺ທາ’’ຕິ ເອຕ຺ຖ ນິສ຺ສກ຺ກຕ຺ເຖ ນິສ຺ສກ຺ກວຈນນ຺ຕິ ທສ຺ເສຕິ. ອຸໂປສຖນ຺ຕິ ຕທຕ຺ເຖ ອຸປໂຍຄວຈນໍ. ອຸໂປສຖຕ຺ຖາຍາຕິ ຫິ ອຕ຺ໂຖ. ອນ຺ຘກວິນ຺ທາ ຣາຊຄຫໍ ອາຄມນສ຺ສ ກາຣຓໍ ທສ຺ເສນ຺ໂຕ ອາຫ ‘‘ຣາຊຄຫໍ ຫີ’’ຕິອາທິ. ຕຕ຺ຖ ຫີຕິ ຍສ຺ມາ. ອນ຺ຘກວິນ຺ທາ ວິຫາຣໍ ອນ຺ໂຕ ກຕ຺ວາ ‘‘ອຏ຺ຐາຣສ ມຫາວິຫາຣາ’’ຕິ ວຸຕ຺ຕໍ. ເນສນ຺ຕິ ອຏ຺ຐາຣສນ຺ນໍ ມຫາວິຫາຣານໍ. ສງ຺ຆສ຺ສ ສາມຄ຺ຄິທານຕ຺ຖນ຺ຕິ ເອຕ຺ຖ ສງ຺ຆສ຺ສ ສາມຄ຺ຄິທານໍ ອຕ຺ຕໂນ ອຸໂປສຖກິຈ຺ຈໍ ສິທ຺ຘໍ. ຕສ຺ມາ ປາຬິຍໍ ‘‘ອຸໂປສຖໍ ອາຄຈ຺ຉນ຺ໂຕ’’ຕິ ວຸຕ຺ຕໍ. ‘‘ສິປ຺ປິນິຍໍ ນາມາ’’ຕິ ອິມິນາ ນທິໍ ຕຣນ຺ໂຕຕິ ເອຕ຺ຖ ນທິຍາ ນາມໍ ທສ຺ເສຕິ. ມນໍ ວູຬ຺ໂຫຕິ ເອຕ຺ຖ ມນນ຺ຕິ ນິປາໂຕ ອີສກຕ຺ໂຖຕິ ທສ຺ເສນ຺ໂຕ ອາຫ ‘‘ອີສກ’’ນ຺ຕິ. ‘‘ອປ຺ປມຕ຺ຕ’’ນ຺ຕິ ອິມິນາ ‘‘ອີສກ’’ນ຺ຕິປທສ຺ສ ອຕ຺ຖໍ ທສ຺ເສຕິ. ‘‘ວູຬ຺ຫຠາໂວ’’ຕິ ອິມິນາ ຠາວປຈ຺ຈເຍນ ວິນາ ຠາວຕ຺ໂຖ ຎາຕພ຺ໂພຕິ ທສ຺ເສຕິ. ຈຓ຺ເຑນາຕິ ຂເຣນ. ຕຕ຺ຖາຕິ ນທິຍໍ. ອມນສິກໂຣນ຺ໂຕຕິ ‘‘ຈຓ຺ຑໂສຕ’’ນ຺ຕິ ອາໂຠຄໍ ອກໂຣນ຺ໂຕ. ນ ປນ ວູຬ຺ໂຫຕິ ນ ປນ ມຫາວູຬ຺ໂຫ. ອຸທກພ຺ຠາຫຕານີຕິ ອຸທເກນ ອຠິອາຫຕານິ. ອສ຺ສາຕິ ເຖຣສ຺ສ. ອລ຺ລານີຕິ ຕິນ຺ຕານິ.

໑໔໔. ປຸຣິມກມ຺ມວາຈາຕິ ‘‘ສມ຺ມຕາ ສາ ສີມາ ສງ຺ເຆນ ຕິຈີວເຣນ ອວິປ຺ປວາສາ’’ຕິ ປຸເຣ ວຸຕ຺ຕາ ກມ຺ມວາຈາ. ອຍເມວາຕິ ‘‘ຐເປຕ຺ວາ ຄາມຎ຺ຈ ຄາມູປຈາຣຎ຺ຈາ’’ຕິປທໍ ປກ຺ຂິປິຕ຺ວາ ອນຸປຎ຺ຎຕ຺ຕາ ອຍເມວ ກມ຺ມວາຈາ. ອຍນ຺ຕິ ປຈ຺ຉິມກມ຺ມວາຈາ. ຫິ ຍສ຺ມາ ຠິກ຺ຂຸນິສງ຺ໂຆ ອນ຺ໂຕຄາເມ ວສຕິ, ຕສ຺ມາ ປຸຣິມາເຍວ ວຏ຺ຏຕີຕິ ໂຍຊນາ. ຍທິ ເອວນ຺ຕິ ຍທິ ຠິກ຺ຂຸນິສງ຺ຆສ຺ສ ອຍໍ ປຈ຺ຉິມກມ຺ມວາຈາ ວຏ຺ຏນໍ ສິຍາ ຠເວຍ຺ຍ, ເອວໍ ສຕີຕິ ໂຍຊນາ. ໂສຕິ ຠິກ຺ຂຸນິສງ຺ໂຆ. ເອຕາຍ ກມ຺ມວາຈາຍາຕິ ປຈ຺ຉິມກມ຺ມວາຈາຍ. ນ ລເຠຍ຺ຍາຕິ ອນ຺ໂຕຄາເມ ວສນຕ຺ຕາ ຕິຈີວຣປຣິຫາຣໍ ນ ລເຠຍ຺ຍ. ກິໍ ນ ລຠຕິເຍວາຕິ ອາຫ ‘‘ອຕ຺ຖິ ຈສ຺ສ ປຣິຫາໂຣ’’ຕິ. ອສ຺ສາຕິ ຠິກ຺ຂຸນິສງ຺ຆສ຺ສ. ທ຺ເວປິ ສີມາໂຍຕິ ສມານສໍວາສກສີມາ ຈ ອວິປ຺ປວາສສີມາ ຈາຕິ ທ຺ເວປິ ສີມາໂຍ. ຕຕ຺ຖາຕິ ຠິກ຺ຂຸຠິກ຺ຂຸນີສຸ. ຕສ຺ສາຕິ ຠິກ຺ຂູນໍ ສີມາຍ. ເອເສວ ນໂຍຕິ ຠິກ຺ຂຸນີນໍ ສີມໍ ອຊ຺ໂຌຕ຺ຖຣິຕ຺ວາປິ ອນ຺ໂຕປວິສິຕ຺ວາປິ ຠິກ຺ຂູນໍ ສີມາຍ ສມ຺ມເນ ເອເສວ ນໂຍ. ເອເຕຕິ ຠິກ຺ຂຸຠິກ຺ຂຸນິໂຍ. ສາມຎ຺ຎຕ຺ຕາ ຫິ ປຸລ຺ລິງ຺ເຄນ ວຸຕ຺ຕໍ. ເອຕ຺ຖ ຈາຕິ ‘‘ຐເປຕ຺ວາ ຄາມຎ຺ຈ ຄາມູປຈາຣຎ຺ຈາ’’ຕິປເທ ຈ. ສງ຺ຄໂຫ ເວທິຕພ຺ໂພ, ກສ຺ມາ? ຄາເມນ ນິຄມນຄຣານໍ ເອກລກ຺ຂຓຕ຺ຕາ.

ປຣິກ຺ເຂໂປກາໂສຕິ ປຣິກ຺ເຂປາຣໂຫກາໂສ. ເຕສູຕິ ຄາມຄາມູປຈາເຣສຸ. ປຣິຫາຣນ຺ຕິ ຈີວຣວິປ຺ປວາສອາປຕ຺ຕິອປນຍນໍ. ‘‘ອິຕີ’’ຕິອາທິ ນິຄມນໍ. ເອຕ຺ຖາຕິ ສມານສໍວາສກອວິປ຺ປວາສສີມາສຸ. ອຕ຺ຕໂນ ຘມ຺ມຕາຍາຕິ ອຕ຺ຕໂນ ສຠາເວນ. ຍຕ຺ຖາຕິ ຍສ຺ມິໍ ຐາເນ. ຫີຕິ ສຈ຺ຈໍ, ຍສ຺ມາ ວາ. ຕສ຺ສາຕິ ອວິປ຺ປວາສສີມາຍ. ວິສຸນ຺ຕິ ສມານສໍວາສກສີມໂຕ ປາເຏກ຺ກໍ. ຕຕ຺ຖາຕິ ທ຺ວີສຸ ສີມາສຸ. ອວິປ຺ປວາສາຍາຕິ ອວິປ຺ປວາສສີມາຍ. ຕນ຺ຕິ ຄາມໍ. ສາຕິ ອວິປ຺ປວາສສີມາ. ສມ຺ມຕາຍ ສີມາຍາຕິ ອວິປ຺ປວາສສີມາຍ ສມ຺ມຕາຍ ສຕິຍາຕິ ສມ຺ພນ຺ໂຘ. ສມ຺ມຕໂຕ ປຈ຺ຉາຕິ ວາ ໂຍຊນາ. ນິວິສຕີຕິ ນິວາສຕ຺ຖາຍ ວິສຕິ ປວິສຕິ. ໂສປີຕິ ຄາໂມປິ. ສີມສງ຺ຂ຺ຍໍເຍວາຕິ ອວິປ຺ປາສສີມໂວຫາຣເມວ. ອຘິຏ຺ຐິຕເຕຈີວຣິກາ ຠິກ຺ຂູ ປຣິຫາຣໍ ລຠນ຺ຕີຕິ ອຘິປ຺ປາໂຍ. ຍຖາ ປຈ຺ຉາ ນິວິຏ຺ໂຐ ຄາໂມ ສີມສງ຺ຂ຺ຍໍເຍວ ຄຈ຺ຉຕິ, ເອວນ຺ຕິ ໂຍຊນາ. ‘‘ປວິສິສ຺ສາມາ’’ຕິ ເຄຫານິ ກຕານິ, ‘‘ປວິສິສ຺ສາມາ’’ຕິ ອາລໂຍປິ ອຕ຺ຖີຕິ ໂຍຊນາ. ອາລໂຍປີຕິ ອເປກ຺ໂຂປິ. ອປວິຏ຺ຐາຕິ ເຄຫານິ ອປວິຏ຺ຐາ. ເຄຫເມວ ຉຑ຺ເຑຕ຺ວາຕິ ເຄຫໍ ຉຑ຺ເຑຕ຺ວາ ເອວ. ອິມິນາ ເຄເຫ ຉຑ຺ຑິເຕ ສພ຺ພໍ ຉຑ຺ຑິຕເມວາຕິ ທສ຺ເສຕິ. ປວິຏ຺ຐໍ ວາ ອຄຕໍ ວາ ເອກມ຺ປິ ກຸລໍ ອຕ຺ຖິ ສເຈຕິ ໂຍຊນາ. ເອຕ຺ຖ ຈ ‘‘ເອກມ຺ປິ ກຸລໍ ປວິຏ຺ຐໍ ວາ’’ຕິ ອິທໍ ນວຄາມໍ ສນ຺ຘາຍ ວຸຕ຺ຕໍ. ‘‘ເອກມ຺ປິ ກຸລໍ ອຄຕໍ ວາ’’ຕິ ອິທໍ ໂປຣາຓກຄາມໍ ສນ຺ຘາຍາຕິ ທຏ຺ຐພ຺ພໍ.

ຕຕ຺ຣາຕິ ‘‘ວຕ຺ຕໍ ຊານິຕພ຺ພ’’ນ຺ຕິວຈເນ. ອວິປ຺ປວາສສີມາຍນ຺ຕິ ມຫາສີມາຍ. ສາ ເອວ ຫິ ຍສ຺ມາ ອວິປ຺ປວາສກມ຺ມວາຈາຍ ພຫຸລປໂຍຊນາ ໂຫຕິ, ຕສ຺ມາ ອວິປ຺ປວາສສີມາຕິ ວຸຈ຺ຈຕິ. ອິຕຣາຍາຕິ ອວິປ຺ປວາສສີມາຍ. ຕຕ຺ຖາຕິ ຕາສຸ ທ຺ວີສຸ ສີມາສຸ. ນິຣາສງ຺ກຏ຺ຐາເນສຸ ຐຕ຺ວາຕິ ເຈຕິຍງ຺ຄຓາທີນໍ ຂຓ຺ຑສີມາຍ ອໂນກາສຕ຺ຕາ ວຸຕ຺ຕໍ. ຂຓ຺ຑສີມຎ຺ຫິ ສມ຺ມນນ຺ຕາ ເຈຕິຍງ຺ຄຓາທິຏ຺ຐານໍ ປຫາຍ ອຎ຺ຎສ຺ມິໍ ວິວິຕ຺ໂຕກາເສ ວິຫາຣປຈ຺ຈນ຺ຕໍ ຂຓ຺ຑິຕ຺ວາ ສມ຺ມນນ຺ຕິ. ສມູຫນິຕຸນ຺ຕິ ອວິປ຺ປວາສສີມໍ ສມູຫນິຕຸໍ. ປຏິພນ຺ຘິຕຸໍ ນ ສກ຺ຂິສ຺ສນ຺ເຕວາຕິ ອວິປ຺ປວາສໍເຍວ ຊານິຕ຺ວາ ຂຓ຺ຑສີມາຍ ອຎ຺ຎາຕຕ຺ຕາ ປຏິພນ຺ຘິຕຸໍ ນ ສກ຺ຂິສ຺ສນ຺ເຕວ. ສີມສມ຺ເຠທນ຺ຕິ ຂຓ຺ຑສີມອວິປ຺ປວາສສີມານໍ ສມ຺ເຠທໍ. ສາສນນ຺ຕຣຘາເນນ ວາຕິ ສຕ຺ຖຸ ອາຓາຍ ອນ຺ຕຣຘາເນນ ວາ. ສາຘຸກໍ ປນາຕິ ນິກ຺ກງ຺ຂໍ ປນ.