໗໒. ອຸໂປສຖາຄາຣາທິກຖາ

໑໔໑. ອນຸປຣິເວຓິຍນ຺ຕິ ເອຕ຺ຖ ອນຸສທ຺ທສ຺ສ ວິຈ຺ຉຕ຺ຖໍ, ປຣິເວຓສທ຺ທສ຺ສ ຈ ລິງ຺ຄວິປລ຺ລາສຠາວໍ ທສ຺ເສຕຸໍ ວຸຕ຺ຕໍ ‘‘ຕສ຺ມິໍ ຕສ຺ມິໍ ປຣິເວເຓ’’ຕິ. ປຣິເວຓສທ຺ໂທ ຫິ ນປຸໍສກລິງ຺ໂຄ, ອິຘ ປນ ລິງ຺ຄວິປລ຺ລາສໍ ກຕ຺ວາ ອິຕ຺ຖິລິງ຺ຄວເສນ ວຸຕ຺ຕໍ. ‘‘ສງ຺ເກຕໍ ອກຕ຺ວາ’’ຕິ ອິມິນາ ອສງ຺ເກເຕນາຕິ ປທສ຺ສ ກິຣິຍາວິເສສນຕ຺ຕໍ ທີເປຕິ. ‘‘ກມ຺ມວາຈາຍາ’’ຕິ ອິມິນາ ສມູຫນິຕ຺ວາຕິ ປທສ຺ສ ກຣຓໍ ທສ຺ເສຕິ.

໑໔໒. ຍໂຕຕິ ເອຕ຺ຖ ໂຕປຈ຺ຈຍສ຺ສ ກາຣຓຕ຺ເຖ ປວຕ຺ຕຠາວໍ ທສ຺ເສນ຺ໂຕ ອາຫ ‘‘ຍສ຺ມາ’’ຕິ. ‘‘ຫຕ຺ຖປາເສ’’ຕິ ອິມິນາ ຫຕ຺ຖປາສໂຕ ພຫິ ນິສິນ຺ເນ ອກໂຕວສ຺ສ ອຸໂປສໂຖ ໂຫຕີຕິ ທສ຺ເສຕິ. ອສ຺ສາຕິ ຠິກ຺ຂຸໂນ. ວຕ຺ຖຸວເສນາຕິ ອຏ຺ຐຸປ຺ປຕ຺ຕິວເສນ. ອຸໂປສຖສ຺ສ ປມຸຂສ຺ສ ອພ຺ໂຠກາເສ ວາ ມາຬກາທີສຸ ວາຕິ ສມ຺ພນ຺ໂຘ. ນິມິຕ຺ຕຸປຄາ ວາ ອນິມິຕ຺ຕຸປຄາ ວາຕິ ເຫຏ຺ຐາ ອຏ຺ຐສຸ ນິມິຕ຺ເຕສຸ ວຸຕ຺ຕາ ນິມິຕ຺ຕຸປຄາ ວາ ອນິມິຕ຺ຕຸປຄາ ວາ ປພ຺ພຕາທໂຍ ວາ ອຎ຺ເຎ ວາ ກິຕ຺ເຕຕພ຺ພາ.

ປຐມຕຣໍ ນ ອາຄຈ຺ຉຕິ, ທຸກ຺ກຏນ຺ຕິ ອຸໂປສເຖ ໂຆສິຍມາເນ ປຐມຕຣໍ ນ ອາຄຈ຺ຉຕິ, ທຸກ຺ກຏໍ. ວິຫາຣສ຺ສ ມຊ຺ເຌ ໂຫຕີຕິ ໂຍຊນາ. ເອຕ຺ຖາຕິ ໂປຣາຓເກ ອາວາເສ. ຕຕ຺ຖາຕິ ໂປຣາຓເກ ອາວາເສ. ອສມ຺ພາໂຘຕິ ສງ຺ຆສ຺ສ ນິສຊ຺ຊຏ຺ຐານປໂຫນໂກ. ຕຕ຺ຖາຕິ ປຈ຺ຉາ ອຸຏ຺ຐິເຕ ອາວາເສ.

ສພ຺ເພສໍ ນິສຊ຺ຊຏ຺ຐານນ຺ຕິ ໂຍຊນາ. ຕຕ຺ຖາຕິ ເຖຣສ຺ສ ວິຫາເຣ. ໂສຕິ ເຖຣສ຺ສ ວິຫາໂຣ. ເອຕ຺ຖາຕິ ຕຸມ຺ຫາກໍ ວິຫາເຣ. ສພ຺ເພສໍ ໂອກາໂສ ນຕ຺ຖີຕິ ສມ຺ພນ຺ໂຘ. ຕຕ຺ຖາຕິ ຕໍ ອສຸກໍ ນາມ ອາວາສໍ. ‘‘ວຏ຺ຏຕີ’’ຕິ ວຕ຺ຕພ຺ພນ຺ຕິ ໂຍຊນາ. ຕສ຺ສາຕິ ເຖຣສ຺ສ.