໗໑. ສີມານຸຊານນກຖາ

໑໓໘. ນິມິຕ຺ຕາ ກິຕ຺ເຕຕພ຺ພາຕິ ນິມິຕ຺ຕານິ ກິຕ຺ເຕຕພ຺ພານິ. ນິກາຣສ຺ສ ຫິ ອາກາໂຣ. ນິມິຕ຺ຕໍ ກໂຕຕິ ເອໂສ ປພ຺ພໂຕ ນິມິຕ຺ຕໍ ກໂຕຕິ ໂຍຊນາ. ເອເສວ ນໂຍ ປຣໂຕປິ. ‘‘ເອເສວ ນໂຍ’’ຕິ ອິມິນາ ‘‘ປຸຣຕ຺ຖິມາຍ ທິສາຍ ກິໍ ນິມິຕ຺ຕໍ? ປາສາໂຓ ຠນ຺ເຕ, ເອໂສ ປາສາໂຓ ນິມິຕ຺ຕ’’ນ຺ຕິ ອຕ຺ຖໍ ອຕິທິສຕິ. ເອເສວ ນໂຍ ເສເສສຸປິ. ເກວລໍ ປນ ວນອຸທເກສຸ ‘‘ເອຕໍ ວນໍ, ເອຕໍ ອຸທກ’’ນ຺ຕິ ວຕ຺ຕພ຺ພໍ. ນທິຍໍ ‘‘ເອສາ ນທີ’’ຕິ ວຕ຺ຕພ຺ພາ. ເອຕ຺ຖ ປນາຕິ ເອຕິສ຺ສໍ ອຸຕ຺ຕຣາຍໍ ອນຸທິສາຍໍ ປນ. ຫີຕິ ຜລໂຊຕໂກ. ຕຕ຺ຖາຕິ ‘‘ນິມິຕ຺ຕາ ກິຕ຺ເຕຕພ຺ພາ’’ຕິ ວຈເນ. ສີມມຓ຺ຑລນ຺ຕິ ສີມພິມ຺ພໍ. ສມ຺ພນ຺ຘນ຺ເຕນາຕິ ປຸຣິມນິມິຕ຺ເຕນ ປຈ຺ຉິມນິມິຕ຺ຕໍ ສມ຺ພນ຺ຘນ຺ເຕນ. ອິມິນາ ເອກນ຺ຕຣິກາທິວເສນ ນິມິຕ຺ຕກິຕ຺ຕນໍ ນ ວຏ຺ຏຕິ ນິມິຕ຺ເຕນປິ ນິມິຕ຺ຕານໍ ສມ຺ພນ຺ຘາຠາວໂຕຕິ ທສ຺ເສຕິ. ປຸຣິມນິມິຕ຺ເຕນ ປຈ຺ຉິມນິມິຕ຺ຕສ຺ສ ສມ຺ພນ຺ເຘ ສຕິ ອຊ຺ຊ ເອກໍ ນິມິຕ຺ຕໍ ກິຕ຺ເຕຕ຺ວາ ສ຺ເວ ເອກໍ ນິມິຕ຺ຕໍ ກິຕ຺ເຕຕ຺ວາຕິ ເອວໍ ກາລນ຺ຕເຣປິ ນິມິຕ຺ຕໍ ກິຕ຺ເຕຕ຺ວາ ສມ຺ມນິຕຸໍ ວຏ຺ຏຕີຕິ ວທນ຺ຕິ.

ປພ຺ພໂຕຕິ ເອຕ຺ຖ ປພ຺ພໍ ວຸຈ຺ຈຕິ ຜຬຸ, ຕໍ ເອຕສ຺ມິໍ ອຕ຺ຖີຕິ ປພ຺ພໂຕ. ວາລິກຣາສິສ຺ສ ສຸທ຺ຘປໍສຸປພ຺ພຕປສງ຺ຄຕ຺ຕາ ວຸຕ຺ຕໍ ‘‘ວາລິກຣາສິ ປນ ນ ວຏ຺ຏຕີ’’ຕິ. ອິຕໂຣປີຕິ ວາລິກຣາສິໂຕ ອຎ຺ໂຎປິ ຕິວິໂຘ ປພ຺ພໂຕ. ຫຕ຺ຖິປ຺ປມາຓໂຕຕິ ອຑ຺ຒຏ຺ຐມຣຕນຫຕ຺ຖິປມາຓໂຕ. ຈຕູສຸ ທິສາສູຕິ ວິຫາຣສ຺ສ ຈຕູສຸ ທິສາສຸ. ຈຕູຫິ ວາ ຕີຫິ ວາຕິ ເອຕ຺ຖ ວາສທ຺ເທນ ຕໂຕ ອຘິການິປິ ຄເຫຕພ຺ພານິ. ເອເກນ ວາ ນິມິຕ຺ເຕນາຕິ ໂຍຊນາ. ອິໂຕຕິ ປພ຺ພຕນິມິຕ຺ຕໂຕ. ຕສ຺ມາຕິ ຍສ຺ມາ ເອເກນ ນິມິຕ຺ເຕນ ນ ວຏ຺ຏຕິ, ຕສ຺ມາ. ຕນ຺ຕິ ປພ຺ພຕໍ. ຕສ຺ມາຕິ ເອກສ຺ເສວ ນິມິຕ຺ຕສ຺ສ ກິຕ຺ຕິຕຕ຺ຕາ. ໂຍ ປພ຺ພໂຕ ອຕ຺ຖິ, ຕໍ ປພ຺ພຕນ຺ຕິ ໂຍຊນາ. ອນ຺ໂຕຕິ ປພ຺ພຕສ຺ສ ອນ຺ໂຕ.

ຕຕິຍຠາຄໍ ວາຕິ ເອຕ຺ຖ ວາສທ຺ເທນ ປຐມຠາໂຄປິ ເອກເທໂສປິ ຄເຫຕພ຺ໂພ. ຕສ຺ສາຕິ ຕຕ຺ຕກສ຺ສ ປເທສສ຺ສ. ຕຕິຍຠາຄາທິໂຕ ອປຣໍ ສພ຺ພປພ຺ພຕໍ ອນ຺ໂຕກຕ຺ວາ ສມ຺ມຕໍ ທສ຺ເສນ຺ໂຕ ອາຫ ‘‘ສເຈ’’ຕິອາທິ.

ປາສາຓນິມິຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ປສຕິ ຆນຠາເວນ ພນ຺ຘຕີຕິ ປາສາໂຓ. ອຍຄຸໂຬປິ ປາສາຓສງ຺ຂເມວ ຄຈ຺ຉຕິ ເຕນ ຕສ຺ສ ສທິສຕ຺ຕາ. ອຍຄຸໂຬປີຕິ ເອຕ຺ຖ ປິສທ຺ເທນ ຕມ຺ພກໍສວຏ຺ຏໂລຫສຸວຓ຺ຓຣຊຕາທໂຍປິ ສງ຺ຄຓ຺ຫາຕິ. ໂຍ ໂກຈີຕິ ສິລາປວາຬມຓິອາທີສຸ ໂຍ ໂກຈິ. ທ຺ວຕ຺ຕິໍສປລຄຸຬປິຓ຺ຑປຣິມາຓຕາ ສຓ຺ຐານໂຕ ຄເຫຕພ຺ພາ, ນ ຕຸລິຕ຺ວາ ຄຓນວເສນ. ຂຸທ຺ທກຕໂຣ ປາສາໂຓຕິ ໂຍຊນາ. ໂຍ ປິຏ຺ຐິປາສາໂຓ ວາ ໂຍ ອຸຏ຺ຐິຕປາສາໂຓ ວາຕິ ໂຍຊນາ ກາຕພ຺ພາ – ອຸຕ຺ຕຣວາກ຺ເຍ ຕສທ຺ທສ຺ສ ອນິຍມນິທ຺ເທສວຈນຕ຺ຕາ ‘‘ປາສາຓສງ຺ຂໍເຍວາ’’ຕິ ເອຕ຺ຖ ເອວກາເຣນ ‘‘ນ ປພ຺ພຕສງ຺ຂ’’ນ຺ຕິ ອຕ຺ຖໍ ທສ຺ເສຕິ. ມຫໂຕ ປິຏ຺ຐິປາສາຓສ຺ສາຕິ ອາຍາມວິຕ຺ຖາຣຸພ຺ເພຘໂຕ ມຫນ຺ຕສ຺ສ ປິຏ຺ຐິປາສາຓສ຺ສ ສກ຺ກສ຺ສ ປຓ຺ຑຸກມ຺ພລປິຏ຺ຐິປາສາຓສ຺ສ ວິຍ. ຕນ຺ຕິ ປິຏ຺ຐິປາສາຓໍ. ນ ວຏ຺ຏຕີຕິ ກິຕ຺ເຕຕຸໍ ນ ວຏ຺ຏຕິ. ຫີຕິ ລທ຺ຘໂທສໂຊຕໂກ. ຕນ຺ຕິ ປິຏ຺ຐິປາສາຓໍ. ສີມາຍາຕິ ສີມໂຕ. ວິຫາໂຣປີຕິ ນ ເກວລໍ ນິມິຕ຺ຕເມວ, ວິຫາໂຣປິ. ປິຏ຺ຐິປາສາໂຓ ນ ກິຕ຺ເຕຕພ຺ໂພຕິ ສມ຺ພນ຺ໂຘ. ກິຕ຺ເຕຕ຺ວາຕິ ເອຕ຺ຖ ‘‘ປິຏ຺ຐິປາສາຓ’’ນ຺ຕິ ໂຍເຊຕພ຺ພໍ.

ວນນິມິຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ວນິຍຕິ ມຍູຣໂກກິລາທີຫິ ສຕ຺ເຕຫິ ສມ຺ຠຊິຍຕີຕິ ວນໍ, ວນນ຺ຕິ ສມ຺ຠຊນ຺ຕິ ເອຕ຺ຖາຕິ ວາ ວນໍ. ຕໂຈ ເອວ ສາໂຣ ເອເຕສນ຺ຕິ ຕຈສາໂຣ, ຕາລນາຬິເກຣາທໂຍ. ອາທິສທ຺ເທນ ເວຓຸອາທໂຍ ສງ຺ຄຓ຺ຫາຕິ. ອນ຺ໂຕ ສາໂຣ ເອເຕສນ຺ຕິ ອນ຺ໂຕສາຣາ, ສາກສາລາທໂຍ. ອາທິສທ຺ເທນ ຂທິຣາທໂຍ ສງ຺ຄຓ຺ຫາຕິ. ອນ຺ໂຕສາຣມິສ຺ສການນ຺ຕິ ອນ຺ໂຕສາເຣຫິ ຣຸກ຺ເຂຫິ ມິສ຺ສການໍ. ຣຸກ຺ຂານໍ ວນນ຺ຕິ ເອຕ຺ຖ ອວຍວອວຍວິຠາເວນ ສມ຺ພນ຺ໂຘ ເວທິຕພ຺ໂພ. ອິມິນາ ຕິຓວນໍ ຣຸກ຺ຂວນນ຺ຕິ ເອຕ຺ຖ ‘‘ຕິຓານໍ ວນ’’ນ຺ຕິ ວາ ‘‘ຣຸກ຺ຂານໍ ວນ’’ນ຺ຕິ ວາ ອຕ຺ຖໍ ທສ຺ເສຕິ. ຕິຓເມວ ວນໍ, ຣຸກ຺ໂຂເຍວ ວນນ຺ຕິ ອຕ຺ໂຖປິ ຍຸຊ຺ຊເຕວ. ຈຕ຺ຕາໂຣ ວາ ປຎ຺ຈ ວາ ຣຸກ຺ຂາຕິ ຈຕຸປຎ຺ຈຣຸກ຺ຂາ, ເຕ ມຕ຺ຕໍ ປມາຓເມຕ຺ຖາຕິ ຈຕຸປຎ຺ຈຣຸກ຺ຂມຕ຺ຕໍ ວນໍ, ຕໂຕຕິ ຈຕຸປຎ຺ຈຣຸກ຺ຂມຕ຺ຕໂຕ. ເອກເທສນ຺ຕິ ວນສ຺ສ ເອກເທສໍ. ວນມຊ຺ເຌຕິ ວນສ຺ສ ເວມຊ຺ເຌ, ວນສ຺ສູປຣີຕິ ອຕ຺ໂຖ. ຣຸກ຺ຂນ຺ຕເຣສຸ ເອວ ຫິ ວິຫາຣໍ ກໂຣນ຺ຕິ. ເອກເທສນ຺ຕິ ວນສ຺ສ ເອກເທສໍ. ຕຕ຺ຖາຕິ ວເນ. ‘‘ຐິຕວນ’’ນ຺ຕິ ປທໍ ‘‘ກິຕ຺ເຕຕ຺ວາ’’ຕິ ປເທ ອວຸຕ຺ຕກມ຺ມໍ, ‘‘ນ ກິຕ຺ເຕຕພ຺ພ’’ນ຺ຕິ ປເທ ວຸຕ຺ຕກມ຺ມໍ.

ຣຸກ຺ຂນິມິຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ຣຸກ຺ຂິຍຕິ ຜລາທິກາເມຫິ ສໍວຣິຍຕິ ຣກ຺ຂິຍຕີຕິ ຣຸກ຺ໂຂ, ມຫິຍໍ ຣຸຫຕີຕິ ວາ ຣຸກ຺ໂຂ. ຊີວມານໂກຕິ ໂລກໂວຫາຣວເສນ ມູລງ຺ກຸຣາທິຫຣິຕສງ຺ຂາຕຊີວມານໂກ. ປຣິຓາຫໂຕຕິ ວິສາລຠາວໂຕ. ສູຈິທຓ຺ຑກປມາໂຓຕິ ສູຈິຍາ ເລຂນິຍາ ທຓ຺ຑຠູຕເວຬຸປມາໂຓ. ໂສ ເວຬຸ ກນິຏ຺ຐງ຺ຄຸລິປມາໂຓຕິ ທຏ຺ຐພ຺ໂພ. ຕໂຕຕິ ອຏ຺ຐງ຺ຄຸລຸພ຺ເພຘສູຈິທຓ຺ຑກປມາຓປຣິຓາຫຣຸກ຺ຂໂຕ. ວໍສນຬກສຣາວາທີສູຕິ ວໍໂສ ຈ ນຬໂກ ຈ ສຣາໂວ ຈ ວໍສນຬກສຣາວາ, ເຕ ອາທໂຍ ເຍສໍ ກປາລາທີນນ຺ຕິ ວໍສນຬກສຣາວາທໂຍ, ເຕສຸ. ຕໂຕຕິ ວໍສາທິໂຕ. ຕໍຂຓມ຺ປີຕິ ຕສ຺ມິໍ ນິມິຕ຺ຕກ຺ຂເຓປິ. ອກາຣຓນ຺ຕິ ອປມາຓໍ. ເອຕນ຺ຕິ ນວມູລສາຂານິຄ຺ຄມນໍ. ວຕ຺ຕຸໍ ວຏ຺ຏຕີຕິ ສາມຎ຺ຎນາເມນປິ ວິເສສນາເມນປິ ວຕ຺ຕຸໍ ວຏ຺ຏຕິ. ອິມິນາ ປພ຺ພຕາທີສຸປິ ‘‘ປພ຺ພໂຕ’’ຕິ ສາມຎ຺ຎນາເມນປິ ‘‘ວງ຺ກປພ຺ພໂຕ ເວປຸລ຺ລປພ຺ພໂຕ’’ຕິ ວິເສສນາເມນປິ ວຕ຺ຕຸໍ ວຏ຺ຏຕີຕິ ທສ຺ເສຕິ.

ມຄ຺ຄນິມິຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ມຄ຺ຄິຍຕິ ປຖິເກຫິ, ມຄ຺ຄມູຬ຺ເຫຫິ ວາ ອນ຺ເວສິຍຕີຕິ ມຄ຺ໂຄ. ໂຍ ຍາທິໂສ ຊງ຺ຆມຄ຺ໂຄ ວາ ສກຏມຄ຺ໂຄ ວາ ວິນິວິຊ຺ຌິຕ຺ວາ ທ຺ເວ ຕີຓິ ຄາມນ຺ຕຣານິ ຄຈ຺ຉຕິ, ໂສ ຕາທິໂສ ຊງ຺ຆມຄ຺ໂຄ ວາ ສກຏມຄ຺ໂຄ ວາ ວຏ຺ຏຕີຕິ ໂຍຊນາ. ອຸກ຺ກມິຕ຺ວາຕິ ປກ຺ກມິຕ຺ວາ. ໂຍ ຊງ຺ຆມຄ຺ໂຄ ໂອຕຣຕິ, ໂສ ນ ວຏ຺ຏຕີຕິ ໂຍຊນາ. ອວຬຎ຺ຊາຕິ ອປຣິໂຠຄາ. ຄມນໍ ຊເນຕີຕິ ຊງ຺ໂຆ. ຊຓ຺ຓຸໂຄປ຺ຜການໍ ມຊ຺ຌປເທໂສ. ສຫ ອຕ຺ເຖນ ປຓິຍຘເນນາຕິ ສຕ຺ໂຖ, ຊງ຺ເຆນ ວິຈຣນ຺ໂຕ ສຕ຺ໂຖ ຊງ຺ຆສຕ຺ໂຖ. ສກຕິ ສມຕ຺ເຖຕິ ຠາຣໍ ວຫິຕຸນ຺ຕິ ສກໂຏ, ເຕນ ວິຈຣນ຺ໂຕ ສຕ຺ໂຖ ສກຏສຕ຺ໂຖ. ຊງ຺ຆສຕ຺ໂຖ ຈ ສກຏສຕ຺ໂຖ ຈ ຊງ຺ຆສກຏສຕ຺ຖາ, ເຕຫິ. ຫີຕິ ສຈ຺ຈໍ, ຍສ຺ມາ ວາ. ເອຕນ຺ຕິ ນິມິຕ຺ຕໍ.

ໂກຓນ຺ຕິ ວິຫາຣໂກຓໍ. ຄຕໍ ປນ ມຄ຺ຄນ຺ຕິ ໂຍຊນາ. ປຣຠາເຄຕິ ວິຫາຣໍ ປຣິກ຺ຂິປິຕ຺ວາ ຄຈ຺ຉນ຺ເຕຫິ ຈຕູຫິ ມຄ຺ເຄຫິ ປຣຠາເຄ. ທສສຸ ນາເມສູຕິ ສຕິປຏ຺ຐານຏ຺ຐກຖາທີສຸ ອາຄເຕສຸ ‘‘ມຄ຺ໂຄ ປນ຺ໂຖ ປໂຖ ປຊ຺ໂຊ’’ຕິອາທີສຸ, ອຠິຘານາທີສຸ (ທີ. ນິ. ອຏ຺ຐ. ໒.໓໗໓; ມ. ນິ. ອຏ຺ຐ. ໑.໑໐໖) ຈ ອາຄເຕສຸ ‘‘ມຄ຺ໂຄ ປນ຺ໂຖ ປໂຖ ອທ຺ຘາ’’ຕິອາທີສຸ ທສສຸ ມຄ຺ຄນາເມສຸ. ເຍນ ເກນຈິ ນາເມນາຕິ ອິມິນາ ປພ຺ພຕາທີສຸປິ ‘‘ປພ຺ພໂຕ ຄິຣິ ເສໂລ ອທ຺ທິ ນໂຄ ອຈໂລ ສິລຸຈ຺ຈໂຍ ສິຂຣີ ຠູຘໂຣ’’ຕິອາທີສຸ ອເນເກສຸ ນາເມສຸ ເຍນ ເກນຈິ ນາເມນ ກິຕ຺ເຕຕຸໍ ວຏ຺ຏຕີຕິ ທສ຺ເສຕິ.

ວມ຺ມິກນິມິຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ອຸປຈິກາຫິ ວມິຍຕິ, ສຣພູຆຣໂຄລິກາທໂຍ ສຕ຺ເຕ ວມຕີຕິ ວາ ວມ຺ມິໂກ. ຕໍທິວສຊາໂຕຕິ ຕສ຺ມິໍ ນິມິຕ຺ຕກິຕ຺ຕິຕທິວເສ ຊາໂຕ. ຕໂຕຕິ ອຏ຺ຐງ຺ຄຸລຸພ຺ເພຘໂຄວິສາຓປມາຓວມ຺ມີກໂຕ.

ນທີນິມິຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ນທຕິ ສນ຺ທຕີຕິ ນທີ, ນທນ຺ໂຕ ເອຕິ ຄຈ຺ຉຕີຕິ ວາ ນທີ. ຍສ຺ສາຕິ ນທິຍາ, ໂສຕນ຺ຕິ ສມ຺ພນ຺ໂຘ. ‘‘ອນ຺ວທ຺ຘມາສ’’ນ຺ຕິອາທິນາ ເອກປກ຺ເຂ ຕິກ຺ຂຕ຺ຕຸໍ ເອກມາເສ ຉກ຺ຂຕ຺ຕຸໍ ວສ຺ສນ຺ຕຠາວໍ ທີເປຕິ. ວິຄຕມຕ຺ເຕ ສຕີຕິ ສມ຺ພນ຺ໂຘ. ‘‘ອີທິເສ’’ຕິ ອິມິນາ ‘‘ອນ຺ວທ຺ຘມາສ’’ນ຺ຕິອາທິອຕ຺ຖໍ ອຕິທິສຕິ. ຕິມຓ຺ຑລນ຺ຕິ ເຫຏ຺ຐາ ຊາຓຸມຓ຺ຑລໍ, ອຸປຣິ ນາຠິມຓ຺ຑລນ຺ຕິ ຕິມຓ຺ຑລໍ. ຍຕ຺ຖ ກຕ຺ຖຈີຕິ ຕິຕ຺ເຖ ວາ ອຕິຕ຺ເຖ ວາ. ອຸທເກນ ເຕມິຍຕີຕິ ໂຍຊນາ, ຕິນ຺ຕິຍຕີຕິ ອຕ຺ໂຖ. ນ ເກວລໍ ນິມິຕ຺ເຕເຍວ ອຍໍ ນທີ ໂຫຕິ, ອຖ ໂຂ ນທີປາຣຄມນາທິເກປີຕິ ອາຫ ‘‘ຠິກ຺ຂຸນິຍາ’’ຕິອາທິ. ອິທໍ ‘‘ນທີປາຣຄມເນປີ’’ຕິ ປເທເນວ ສມ຺ພນ຺ຘິຕພ຺ພໍ.

ຍາ ປນາຕິ ນທີ ປນ, ຄຕາຕິ ໂຍຊນາ. ຕນ຺ຕິ ນທິໍ. ວຕິນ຺ຕິ ປາຬິໍ. ຣຸກ຺ຂປາເທຕິ ຣຸກ຺ຂສ຺ສ ມູເລ. ອຸທກຎ຺ຈ ອາວຣຓໍ ອຊ຺ໂຌຕ຺ຖຣິຕ຺ວາ ປວຕ຺ຕຕິເຍວາຕິ ໂຍຊນາ. ຍຖາຕິ ເຍນາກາເຣນ. ອປວຕ຺ຕມານາ ໂຫຕີຕິ ສມ຺ພນ຺ໂຘ.

ທຸພ຺ພຸຏ຺ຐິກາເລຕິ ຄິມ຺ຫສທິເສ ທຸພ຺ພຸຏ຺ຐິກາເລ. ‘‘ນິຣຸທກຠາເວນາ’’ຕິ ອິມິນາ ‘‘ອາວຣຓຠາເວນາ’’ຕິ ວິເສສນໍ ນິວຕ຺ເຕຕິ. ສາຕິ ອຸທກມາຕິກາ. ສມ຺ປາເທນ຺ຕີ ຫຸຕ຺ວາ ນິຈ຺ຈໍ ປວຕ຺ຕຕີຕິ ໂຍຊນາ. ນິມິຕ຺ຕໍ ກາຕຸໍ ນ ວຏ຺ຏຕີຕິ ມນຸສ຺ເສຫິ ນີຫຏຕ຺ຕາ, ສຍຎ຺ຈ ອຄມນຕ຺ຕາ ນ ວຏ຺ຏຕິ. ຍາ ປນາຕິ ອຸທກມາຕິກາ ປນ. ມູເລຕິ ປຐມກາເລ. ກາລນ຺ຕເຣນ ນທີ ໂຫຕີຕິ ສມ຺ພນ຺ໂຘ. ຕນ຺ຕິ ອຸທກມາຕິກໍ.

ອຸທກນິມິຕ຺ເຕ ເອວໍ ວິນິຈ຺ຉໂຍ ເວທິຕພ຺ໂພຕິ ໂຍຊນາ. ອຸທຕິ ປສວຕີຕິ ອຸທກໍ. ຠູມິຄຕເມວ ອຸທກນ຺ຕິ ສມ຺ພນ຺ໂຘ. ຕຎ຺ຈາຕິ ຠູມິຄຕອຸທກຎ຺ຈ. ອາວາຏ…ເປ… ສມຸທ຺ທາທີສຸ ຐິຕໍ ອປວຕ຺ຕນກອຸທກນ຺ຕິ ໂຍຊນາ. ອຸກ຺ເຂປິມນ຺ຕິ ອຸກ຺ຂິປິຕ຺ວາ ຄຫິຕໍ. ຕນ຺ຕິ ວຈນໍ. ສູກຣຂຕາຍປີຕິ ສູກເຣຫິ ຂຕາຍ ວາປິຍາປິ. ຕໍຂຓຎ຺ເຎວາຕິ ຕສ຺ມິໍ ນິມິຕ຺ເຕ ກິຕ຺ຕນກ຺ຂເຓເຍວ. ອາວາໂຏເຍວ ຂຸທ຺ທກຏ຺ເຐນ ອາວາຏກໍ. ຕນ຺ຕິ ນິມິຕ຺ຕສຎ຺ຎາກຣຓໍ. ກາຕຸຎ຺ຈາຕິ ສຍໍ ກາຕຸຎ຺ຈ. ກາຣາເປຕຸຎ຺ຈາຕິ ປເຣຫິ ກາຣາເປຕຸຎ຺ຈ. ກສ຺ມາ ລາຠສີມາຍໍ ນ ວຏ຺ຏຕິ? ລາຠສີມາ ຫິ ອຎ຺ເຎສໍ ປີຬນໍ ກໂຣຕີຕິ. ອິຕິ ອິມມຕ຺ຖໍ ນຍໂຕ ທສ຺ເສນ຺ໂຕ ອາຫ ‘‘ສມານສໍວາສກສີມາ’’ຕິອາທິ. ເອຕ຺ຖາຕິ ສມານສໍວາສກສີມາຍໍ.

ອຏ຺ຐທິສໍ ສນ຺ຘາຍ ອຏ຺ຐ ນິມິຕ຺ຕານິ ວຸຕ຺ຕານີຕິ ທຏ຺ຐພ຺ພໍ. ສາຕິ ສີມາ. ເອເກນ ວາ ນິມິຕ຺ເຕນາຕິ ໂຍຊນາ. ຕິຓ຺ຓໍ ນິມິຕ຺ຕານໍ ກິຕ຺ຕເນ ນິມິຕ຺ຕານໍ ຐິຕທິສໍ ສລ຺ລກ຺ເຂຕ຺ວາ ‘‘ປຸຣຕ຺ຖິມາຍ ທິສາຍາ’’ຕິອາທິນາ ກິຕ຺ເຕຕພ຺ພໍ. ນິມິຕ຺ຕານໍ ສຕກິຕ຺ຕເນ ສີມາຍ ອຏ຺ຐທິສໍ ສລ຺ລກ຺ເຂຕ຺ວາ ເອກິສ຺ສາຍປິ ທິສາຍ ພຫຸນິມິຕ຺ຕານິ ກິຕ຺ເຕຕພ຺ພານິ. ສິງ຺ຆາຏກສຓ຺ຐານາຕິ ຕິຓ຺ຓໍ ມຄ຺ຄານໍ ສມາຄມຏ຺ຐາເນ ສິງ຺ຆາຏກສຓ຺ຐານາ, ຕິໂກຓາ ນາມ ໂຫຕີຕິ ອຘິປ຺ປາໂຍ. ຈຕຸຣສ຺ສາຕິ ສມຈຕຸຣສ຺ສາ. ສິງ຺ຆາຏກສຓ຺ຐານາຕິ ຈຕຸນ຺ນໍ ມຄ຺ຄານໍ ສໂມຘານຏ຺ຐາເນ ສິງ຺ຆາຏກສຓ຺ຐານາ. ອຑ຺ຒຈນ຺ທມຸທິງ຺ຄາທິສຓ຺ຐານາ ປນ ນິມິຕ຺ຕານໍ ຐິຕສຓ຺ຐາເນນ ໂຫຕີຕິ ທຏ຺ຐພ຺ພາ. ຕນ຺ຕິ ສີມໍ. ພນ຺ຘິຕຸກາເມຫິ ນິສ຺ສຎ຺ຈາຣສມເຍ ພນ຺ຘິຕພ຺ພາຕິ ສມ຺ພນ຺ໂຘ. ພທ຺ຘສີມວິຫາຣານນ຺ຕິ ພທ຺ຘາ ສີມາ ເອເຕສູຕິ ພທ຺ຘສີມາ, ເຕ ເອວ ວິຫາຣາຕິ ພທ຺ຘສີມວິຫາຣາ, ເຕສໍ. ທິສາຈາຣິກຠິກ຺ຂູນນ຺ຕິ ທິສາສຸ ຈາຣິກຠິກ຺ຂູນໍ. ຕຕ຺ຖາຕິ ຕສ຺ມິໍ ເອກຄາມເຂຕ຺ເຕ, ຠິກ຺ຂູນໍ ເປເສຕພ຺ພນ຺ຕິ ສມ຺ພນ຺ໂຘ. ເອກຊ຺ຌນ຺ຕິ ເອກໂຕ. ອຎ຺ຎານິປີຕິ ສີມພນ຺ຘຄາມເຂຕ຺ຕໂຕ ອຎ຺ຎານິປິ. ມຫາປທຸມຕ຺ເຖໂຣ ປນ ອາຫາຕິ ໂຍຊນາ. ຕໂຕຕິ ເຕຫິ ນານາຄາມເຂຕ຺ເຕຫິ. ອາຄນ຺ຕພ຺ພນ຺ຕິ ສາມີຈິທສ຺ສນວເສນ ວຸຕ຺ຕໍ. ເຕນາຫ ‘‘ອາຄມນມ຺ປິ ອນາຄມນມ຺ປິ ວຏ຺ຏຕີ’’ຕິ. ເອກສີມຠາວໂຕ ວຸຕ຺ຕໍ ‘‘ອນ຺ໂຕນິມິຕ຺ຕຄເຕຫິ ອາຄນ຺ຕພ຺ພ’’ນ຺ຕິ.

ເອວໍ ສນ຺ນິປຕິເຕສຸ ສນ຺ເຕສຸ ສີມາ ພນ຺ຘິຕພ຺ພາຕິ ສມ຺ພນ຺ໂຘ. ປຣິຍນ຺ຕໍ ກຕ຺ວາຕິ ເຫຏ຺ຐິມປຣິຍນ຺ຕໍ ກຕ຺ວາ.

ປພ຺ພຊ຺ຊູປສມ຺ປທາທີນນ຺ຕິ ເອຕ຺ຖ ຠຓ຺ຑຸກມ຺ມາປຸຈ຺ຉນໍ (ມຫາວ. ອຏ຺ຐ. ໙໘; ວິ. ສງ຺ຄ. ອຏ຺ຐ. ໑໔໔) ສນ຺ຘາຍ ປພ຺ພຊ຺ຊາຄຫຓໍ ວຸຕ຺ຕໍ. ຂຓ຺ຑສີມາຕິ ວິຫາຣປຈ຺ຈນ຺ຕໍ ຂຓ຺ຑິຕໍ ວິຍ ຉິນ຺ທິຕໍ ວິຍ ປວຕ຺ຕາ ສີມາ ຂຓ຺ຑສີມາ. ຕນ຺ຕິ ຂຓ຺ຑສີມໍ. ວຕ຺ຕໍ ຊານິຕພ຺ພນ຺ຕິ ເອຕ຺ຖ ວຕ຺ຕໍ ວິຕ຺ຖາເຣນ຺ໂຕ ອາຫ ‘‘ສເຈ ຫີ’’ຕິອາທິ. ສີມນ຺ຕິ ຂຓ຺ຑສີມໍ. ຍຖາຕິ ເຍນາກາເຣນ ພນ຺ຘິຍມາເນຕິ ສມ຺ພນ຺ໂຘ. ຕສ຺ສາ ປມາຓໍ ທສ຺ເສນ຺ໂຕ ອາຫ ‘‘ສາ’’ຕິອາທິ. ສາຕິ ຂຓ຺ຑສີມາ. ອພ຺ຠານກມ຺ເມ ສທ຺ຘິໍ ກມ຺ມາຣເຫນ ວີສຕິ ຠິກ຺ຂູ ສນ຺ຘາຍ ວຸຕ຺ຕໍ ‘‘ເອກວີສຕິ ຠິກ຺ຂູ’’ຕິ. ຕໂຕຕິ ເອກວີສຕິຠິກ຺ຂຸໂຕ. ຄຓ຺ຫນ຺ຕີປີຕິ ເອຕ຺ຖ ປິສທ຺ໂທ ສຫສ຺ສໂຕ ໂອຣໍ ປນ ປເຄວາຕິ ທສ຺ເສຕິ. ສຫສ຺ສໂຕ ອຘິກໍ ຄຓ຺ຫນ຺ຕີປິ ວິຫາຣປຈ຺ຈນ຺ເຕ ຂຓ຺ຑິເຕ ຂຓ຺ຑສີມາເຍວ ນາມ. ຕນ຺ຕິ ຂຓ຺ຑສີມໍ.

ຕຕ຺ຣາຕິ ຂຓ຺ຑສີມມຫາສີມາສຸ ອາຘາເຣ ຠຸມ຺ມໍ. ອຖາຕິ ອນນ຺ຕຣໍ. ເອວນ຺ຕິ ອິມາຍ ອວິປ຺ປວາສກມ຺ມວາຈາຍ ສມ຺ມນິຍມາເນ. ຫີຕິ ຜລໂຊຕໂກ. ສີມນ຺ຕິ ສມານສໍວາສກສີມໍ. ນ ສກ຺ຂິສ຺ສນ຺ຕີຕິ ປຐມໍ ອວິປ຺ປວາສໍ ອສມູຫນິຕ຺ວາ ສີມໍ ສມູຫນິຕຸໍ ນ ສກ຺ຂິສ຺ສນ຺ຕິ. ສີມນ຺ຕຣິກປາສາຓາຕິ ທ຺ວິນ຺ນໍ ສີມານໍ ອນ຺ຕເຣ ເວມຊ຺ເຌ ຐປິຕາ ປາສາຓາ. ຈຕຸຣງ຺ຄຸລປມາຓາປີຕິ ປິສທ຺ໂທ ເອກງ຺ຄຸລິປມາຓາປິ ວຏ຺ຏຕີຕິ ທສ຺ເສຕິ.

ສມນ຺ຕາຕິ ຂຓ຺ຑສີມາຍ ສມນ຺ຕາ. ອນຸປຣິຍາຍນ຺ເຕຫີຕິ ອນຸກ຺ກເມນ ຂຓ຺ຑສີມປຣິຍາຍນ຺ເຕຫິ ຠິກ຺ຂູຫີຕິ ສມ຺ພນ຺ໂຘ. ຕໂຕຕິ ເຕຫິ ສີມນ຺ຕຣິກປາສາເຓຫິ, ທ຺ວິນ຺ນໍ ສີມານໍ ນິມິຕ຺ຕານິ ປຐມໍ ກິຕ຺ເຕຕ຺ວາ ປຈ຺ຉາ ຕາສຸ ຍໍ ອິຈ຺ຉນ຺ຕິ, ຕໍ ພນ຺ຘິຕພ຺ພຠາວໍ ທສ຺ເສນ຺ໂຕ ອາຫ ‘‘ສເຈ ປນາ’’ຕິອາທິ. ຍຖິຈ຺ຉິຕໍ ພນ຺ຘິຕຸໍ ວຏ຺ຏນ຺ໂຕປິ ໂປຣາຓາຈິຓ຺ຓໍ ທສ຺ເສຕຸໍ ວຸຕ຺ຕໍ ‘‘ເອວໍ ສນ຺ເຕປີ’’ຕິອາທິ. ອຸຠິນ຺ນມ຺ປີຕິ ທ຺ວີສຸ ສີມາສຸ ຐິຕານໍ ອຸຠິນ຺ນມ຺ປິ ກມ຺ມນ຺ຕິ ສມ຺ພນ຺ໂຘ. ຫີຕິ ສຈ຺ຈໍ, ຍສ຺ມາ ວາ.

ຈສທ຺ໂທ ວາກ຺ຍາຣມ຺ຠໂຊຕໂກ. ເອສາ ສີມາ ນາມາຕິ ໂຍຊນາ. ຕຕ຺ຖາຕິ ປິຏ຺ຐິປາສາຓາທີສຸ ປຎ຺ຈສຸ ຐາເນສຸ. ນິມິຕ຺ຕປາສາຓາ ຍຖາຐາເນ ນ ຕິຏ຺ຐນ຺ຕີຕິ ປິຏ຺ຐິປາສາຓສ຺ສຸປຣິ ນິມິຕ຺ຕປາສາຓໍ ຐປິຕມຕ຺ຕໍ ສນ຺ຘາຍ ວຸຕ຺ຕໍ. ປິຏ຺ຐິປາສາຓໍ ປນ ວິຊ຺ຌິຕ຺ວາ ນິມິຕ຺ຕປາສາຓໍ ຕຕ຺ຖ ນິຂຓິຕ຺ວາ ຍຖາ ຐານາ ນ ຈາເວນ຺ຕິ, ຕຖາ ຐເປນ຺ຕິ. ເອວໍ ສນ຺ເຕ ຍຖາຐາເນ ຕິຏ຺ຐນ຺ຕິເຍວາຕິ ທຏ຺ຐພ຺ພໍ. ນ ສີມາຕິ ສີມາຍ ປຖວິສນ຺ຘາຣກໍ ອຸທກໍ ປຣິຍນ຺ຕໍກຕ຺ວາ ຄຕຕ຺ຕາ ສີມາ ນ ຌາຍຕິ.

ກຸຏິເຄເຫປີຕິ ເອຕ຺ຖ ກຸຏີຕິ ຈ ເຄຫນ຺ຕິ ຈ ອຄາຣສ຺ເສວ ນາມໍ. ອຄາຣຎ຺ຫິ ສີຕາທິທຸກ຺ຂສ຺ສ ກຸຏນຏ຺ເຐນ ຉິນ຺ທນຏ຺ເຐນ ຈ ນານາທພ຺ພສມ຺ຠາຣສ຺ສ ຄຫຓຏ຺ເຐນ ຈ ກຸຏິເຄຫນ຺ຕິ ວຸຈ຺ຈຕິ. ກຸຏິ ເອວ ເຄຫໍ ກຸຏິເຄຫໍ, ຕສ຺ມິມ຺ປິ. ຠິຕ຺ຕິໍ ອກິຕ຺ເຕຕ຺ວາຕິ ອິທໍ ອິຏ຺ຐກທາຣຸມຍໍ ຠິຕ຺ຕິໍ ສນ຺ຘາຍ ວຸຕ຺ຕໍ. ສເຈ ສິລາມຍາ ຠິຕ຺ຕິ ນິມິຕ຺ຕູປຄາ ຠເວຍ຺ຍ, ຠິຕ຺ຕິປິ ກິຕ຺ເຕຕພ຺ພາ. ອນ຺ໂຕ ກຣິຕ຺ວາຕິ ກຸຏິເຄຫສ຺ສ ຠິຕ຺ຕິຍາ ວາ ອນ຺ໂຕ ກຕ຺ວາ. ປມຸເຂຕິ ກຸຏິເຄຫສ຺ສ ອາລິນ຺ເທ. ນິພ຺ໂພທກປຕນຏ຺ຐາເນຕິ ນິຄ຺ຄລິຕ຺ວາ ອຸທກສ຺ສ ປຕນຏ຺ຐາເນ. ເອວໍ ສມ຺ມຕາຍ ສີມາຍາຕິ ໂຍຊນາ.

‘‘ກຸຏ຺ຏໍ ອກິຕ຺ເຕຕ຺ວາ’’ຕິ ອິທໍ ປຸຣິມນເຍເນວ ເວທິຕພ຺ພໍ. ອນ຺ໂຕຕິ ເລຓສ຺ສ, ກຸຏ຺ຏສ຺ສ ວາ ອນ຺ໂຕ. ໂອກາເສຕິ ເອກວີສຕິຍາ ຠິກ຺ຂູນໍ ໂອກາເສ. ເອວນ຺ຕິ ອິມິນາກາເຣນ ສມ຺ມນິຍມາເນ. ອນ຺ໂຕຕິ ຠິຕ຺ຕິຍາ ອນ຺ໂຕ.

ເຫຏ຺ຐາ ນ ໂອຕຣຕີຕິ ເຫຏ຺ຐາ ອາກາສຕລຕ຺ຕາ ນ ໂອຕຣຕິ. ນນຸ ຖມ຺ເຠ ອນຸສາຣິຕ຺ວາ ໂອຕຣໂຓ ຠເວຍ຺ຍ, ກສ຺ມາ ນ ໂອຕຣຕີຕິ? ຖມ຺ຠານມຸປຣິ ເອກວີສຕິຍາ ຠິກ຺ຂູນໍ ໂອກາສາຠາວໂຕຕິ ທຏ຺ຐພ຺ພໍ. ເຫຏ຺ຐາ ໂອຕຣຓາກາຣໍ ທສ຺ເສນ຺ໂຕ ອາຫ ‘‘ສເຈ ປນາ’’ຕິອາທິ. ຕຸລານນ຺ຕິ ຖມ຺ຠານມຸປຣິ ຕິຣິຍວເສນ ຐິຕານໍ ຣຸກ຺ຂວິເສສານໍ. ອຸຏ຺ຐຫິຕ຺ວາຕິ ຠູມິໂຕ ອຸຏ຺ຐຫິຕ຺ວາ. ຕຸລາຣຸກ຺ເຂຫີຕິ ຕຸລາສງ຺ຂາເຕຫິ ຣຸກ຺ເຂຫິ. ‘‘ເອກສມ຺ພນ຺ໂຘ’’ຕິ ອິມິນາ ນ ເກວລໍ ຕຸລາຣຸກ຺ເຂເຫວ ເອກສມ຺ພນ຺ໂຘ, ຈຕູສຸ ທິສາສຸ ຈຕຸນ຺ນໍ ຠິຕ຺ຕີນໍ ອຎ຺ຎມຎ຺ຎມ຺ປິ ສມ຺ພນ຺ໂຘຕິ ທສ຺ເສຕິ. ເຫຏ຺ຐາປິ ໂອຕຣຕີຕິ ຠິຕ຺ຕີນມຸປຣິ ເອກວີສຕິຍາ ຠິກ຺ຂູນໍ ໂອກາສປໂຫນກຕ຺ຕາ ວຸຕ຺ຕໍ. ສເຈ ຖມ຺ຠມຕ຺ຖເກ…ເປ… ໂຫຕີຕິ ອິມິນາ ພຫູຫິ ຖມ຺ເຠຫິ ກຕປາສາທສ຺ສ ເອເກກສ຺ມິໍ ຖມ຺ຠມຕ຺ຖເກ ເອກວີສຕິຍາ ຠິກ຺ຂູນໍ ໂອກາເສ ສຕິ ເຫຏ຺ຐາ ໂອຕຣຕີຕິ ທສ຺ເສຕິ. ນິຍ຺ຍູຫກາທີສູຕິ ນາຄທນ຺ຕກາທີສຸ. ອາທິສທ຺ເທນ ຠິຕ຺ຕິຂິລາທໂຍ ສງ຺ຄຓ຺ຫາຕິ. ຠິຕ຺ຕິ ຈາຕິ ອິຏ຺ຐກທາຣຸມຍາ ຠິຕ຺ຕິ ຈ. ສເຈ ສິລາມຍາ ຠິຕ຺ຕິ ຈ ຖມ຺ຠາ ຈ ໂຫນ຺ຕິ, ກິຕ຺ເຕຕພ຺ພາ. ຠິຕ຺ຕິລຄ຺ເຄຕິ ຠິຕ຺ຕີສຸ ລຄ຺ເຄ, ຠິຕ຺ຕີນໍ ວາ ລຄ຺ຄຏ຺ຐາເນ. ເຫຏ຺ຐາປາສາທສ຺ສາຕິ ເຫຏ຺ຐາປາສາເທ ‘‘ຐິຕ’’ອິຕິ ປເທ ສມ຺ພນ຺ໂຘ. ເຫຏ຺ຐາປາສາທສ຺ສ ວາ ຖມ຺ຠານນ຺ຕິ ໂຍຊນາ. ເຫຏ຺ຐາ ສມ຺ມຕາຍ ສີມາຍ ອຸປຣິ ອາໂຣຫນາກາຣໍ ທສ຺ເສນ຺ໂຕ ອາຫ ‘‘ສເຈ ປນາ’’ຕິອາທິ. ນິພ຺ໂພທກປຕນຏ຺ຐາເນຕິ ຉທນໂກຏິຍໍ.

ຕຕ຺ຖາຕິ ຕສ຺ມິໍ ຕເລ. ປິຏ຺ຐິປາສາເຓ ສີມໍ ພນ຺ຘນ຺ຕິ ວິຍ ພນ຺ຘນ຺ຕີຕິ ໂຍຊນາ. ເຕເນວ ປຣິຈ຺ເຉເທນາຕິ ເຕເນວ ຕລປຣິຈ຺ເຉເທນ. ຕາລມູລປພ຺ພເຕປີຕິ ເອຕ຺ຖ ຕາລມູລໍ ນາມ ເຫຏ຺ຐາ ມຫນ຺ຕໍ ຫຸຕ຺ວາ ອນຸປຸພ຺ເພນ ຕນຸກໍ ໂຫຕິ, ເຕນ ສທິເສ ປພ຺ພເຕປິ. ວິຕານສຓ຺ຐາໂນຕິ ອຸລ຺ໂລຈສ຺ສ ສຓ຺ຐາໂນ. ຈຕູສຸ ທິສາສຸ ນິຄ຺ຄຕສາຂຣຸກ຺ຂສຓ຺ຐາໂນ ວາ ຂຸຊ຺ຊຣຸກ຺ຂສຓ຺ຐາໂນ ວາ ໂຫຕິ. ຍຖາ ປພ຺ພໂຕ ວິຕານສຓ຺ຐາໂນ ໂຫຕິ, ເອວໍ ມຸທິງ຺ຄສຓ຺ຐາໂນ ວາ ໂຫຕິ ປຓວສຓ຺ຐາໂນ ວາຕິ ໂຍຊນາ. ຕຕ຺ຖ ມຸທິງ຺ໂຄ ມຊ຺ເຌ ຖູໂລ ໂຫຕິ, ມູເລ ຈ ອນ຺ເຕ ຈ ຕນຸໂກ. ປຓໂວ ມຊ຺ເຌ ຕນຸໂກ ໂຫຕິ, ມູເລ ຈ ອຄ຺ເຄ ຈ ຖູໂລ. ເຕສໍ ສຓ຺ຐາໂນ ມຸທິງ຺ຄສຓ຺ຐາໂນ ວາ ປຓວສຓ຺ຐາໂນ ວາ. ເຫຏ຺ຐາ ວາຕິ ມຸທິງ຺ຄສຓ຺ຐານສ຺ສ ປພ຺ພຕສ຺ສ ເຫຏ຺ຐາ ວາ. ມຊ຺ເຌ ວາຕິ ປຓວສຓ຺ຐານສ຺ສ ມຊ຺ເຌ ວາ. ທ຺ເວ ກູຏານີຕິ ທ຺ເວ ສິຂຣານິ. ກູຏນ຺ຕຣນ຺ຕິ ກູຏານໍ ມຊ຺ຌໍ. ຈິນິຕ຺ວາ ວາຕິ ອິຏ຺ຐກສິລາຫິ ຈິນິຕ຺ວາ ວາ. ປູເຣຕ຺ວາ ວາຕິ ປໍສຸວາລິກາຫິ ປູເຣຕ຺ວາ ວາ.

ສປ຺ປຜຓສທິໂສຕິ ສປ຺ປສ຺ສ ຜເຓນ ສທິໂສ, ຂຸຊ຺ໂຊ ປພ຺ພໂຕຕິ ອຕ຺ໂຖ. ອາກາສປພ຺ຠາຣນ຺ຕິ ຠິຕ຺ຕິຍາ ອປຣິກ຺ຂິຕ຺ຕໍ ອາກາສສງ຺ຂາຕໍ ປພ຺ຠາຣໍ. ສີມປ຺ປມາໂຓຕິ ສທ຺ຘິໍ ອນ຺ໂຕສຸສິເຣນ ສີມປ຺ປມາໂຓ. ອຄ຺ຄໂກຏິນ຺ຕິ ອຄ຺ຄສງ຺ຂາຕໍ ໂກຏິໍ. ສເຈ ປນ ປພ຺ພຕສ຺ສ ເຫຏ຺ຐາ ອນ຺ໂຕເລຓໍ ໂຫຕີຕິ ສມ຺ພນ຺ໂຘ. ອຸປຣິມສ຺ສາຕິ ອນ຺ໂຕເລຓສ຺ສ ອຸປຣິ ຐິຕສ຺ສ. ປາຣໂຕຕິ ພາຫິຣໂຕ. ອສ຺ສາຕິ ປພ຺ພຕສ຺ສ ພຫີຕິ ສມ຺ພນ຺ໂຘ. ໂອຣໂຕຕິ ອນ຺ຕໂຕ. ເລຓໍ ໂຫຕີຕິ ສມ຺ພນ຺ໂຘ. ກິຕ຺ຕກໍ ມຫນ຺ຕນ຺ຕິ ອາຫ ‘‘ສີມາປຣິຈ຺ເຉທມຕິກ຺ກມິຕ຺ວາ ຐິຕ’’ນ຺ຕິ. ກິຕ຺ຕກໍ ຂຸທ຺ທກນ຺ຕິ ອາຫ ‘‘ສພ຺ພປຈ຺ຉິມສີມາປຣິມາຓ’’ນ຺ຕິ. ຕນ຺ຕິ ຂຸທ຺ທກໍ ເລຓໍ. ອຕິຂຸທ຺ທກນ຺ຕິ ສພ຺ພປຈ຺ຉິມສີມາປຣິມາຓາຠາວໂຕ ອຕິຂຸທ຺ທກໍ. ຕໂຕຕິ ອຸປຣິສີມໂຕ. ພຫີຕິ ສີມໂຕ ພຫິ. ‘‘ຍທິ ສີມປ຺ປມາຓໍ, ສີມາ ໂຫຕິເຍວາ’’ຕິ ອິມິນາ ຍທິ ນ ສີມປ຺ປມາຓໍ, ນ ສີມາ ໂຫຕິເຍວາຕິ ທສ຺ເສຕິ.

ຕນ຺ຕິ ຂຓ຺ຑສີມໍ. ປູເຣຕ຺ວາຕິ ອິຏ຺ຐກມຕ຺ຕິກາທີຫິ ປູເຣຕ຺ວາ. ອຏ຺ຏໍ ພນ຺ຘິຕ຺ວາຕິ ອຏ຺ຏາລກໍ ພນ຺ຘິຕ຺ວາ. ອຸມງ຺ຄນທີຕິ ເອຕ຺ຖ ອຸກາໂຣ ໂອກາຣວິປຣີໂຕ, ຕສ຺ມາ ປຖວິຍໍ ໂອຕຣິຕ຺ວາ ປວິສິຕ຺ວາ ມງ຺ຄຕິ ຄຈ຺ຉຕີຕິ ອຸມງ຺ຄາຕິ ອຕ຺ໂຖ ທຏ຺ຐພ຺ໂພ. ອຸມງ຺ຄາຈ ສາ ນທີ ເຈຕິ ອຸມງ຺ຄນທີ. ຕຕ຺ຖາຕິ ອຸມງ຺ຄນທິຍໍ. ເຫຏ຺ຐາປຖວິຕເລ ຐິໂຕຕິ ສີມາຍ ເຫຏ຺ຐາປຖວິຕເລ ອິທ຺ຘິຍາ ຐິໂຕ.

ສີມາມາຬເກຕິ ຂຓ຺ຑສີມາຍ ມາຬເກ. ວຏຣຸກ຺ໂຂຕິ ນິຄ຺ໂຣຘຣຸກ຺ໂຂ. ຕໂຕຕິ ວຏຣຸກ຺ຂໂຕ. ນິຄ຺ຄຕປາໂຣໂຫຕິ ປວທ຺ຘໍວ ຫຸຕ຺ວາ ຣຸກ຺ໂຂ ອາໂຣຫຕິ ອເນນາຕິ ປາໂຣໂຫ, ເອໂກ ມູລວິເສໂສ. ນິຄ຺ຄໂຕ ປາໂຣໂຫ ນິຄ຺ຄຕປາໂຣໂຫ. ມຫາສີມໍ ໂສເຘຕ຺ວາຕິ ເອຕ຺ຖ ໂສຘນໍ ນາມ ມຫາສີມຄຕານໍ ຠິກ຺ຂູນໍ ຫຕ຺ຖປາສານຍນໍ, ສີມໂຕ ວາ ພຫິກຣຓໍ. ພຫິທ຺ຘາຕິ ທ຺ວີຫິ ສີມາຫິ ພຫິທ຺ຘາ. ‘‘ພຫິຏ຺ຐາ’’ຕິປິ ປາໂຐ. ພຫິ ຐິຕາ ກາຕພ຺ພາຕິ ອຕ຺ໂຖ. ອນາຫຈ຺ຈາຕິ ມຫາສີມາຍ ປຖວີຕລໍ ວາ ຕຕ຺ຖຊາຕຣຸກ຺ຂາທີນິ ວາ ນ ອາຫນິຕ຺ວາ. ເອວນ຺ຕິ ຍຖາ ຂຓ຺ຑສີມາຍ, ເອວໍ ຕຖາຕິ ອຕ຺ໂຖ. ສີມາມາຬເກຕິ ຂຓ຺ຑສີມາມາຬເກ.

ສີມາມາຬເກຕິ ທ຺ວິນ຺ນໍ ສີມານໍ ອງ຺ຄເຓ. ສີມາມາຬກສ຺ສາຕິ ກມ຺ມສ຺ສ ກຕຏ຺ຐານສ຺ສ ສີມາມາຬກສ຺ສ. ເວຫາສຏ຺ຐິຕສາຂາຍາຕິ ກມ຺ມສ຺ສ ອກຕຏ຺ຐາເນ ສີມາມາຬເກ ອຸຏ຺ຐິຕາຍ ເວຫາເສ ຐິຕາຍ ສາຂາຍ. ຕສ຺ສາຕິ ຠິກ຺ຂຸໂນ ປາທາ ວາ ນິວາສນປາຣຸປນໍ ວາຕິ ສມ຺ພນ຺ໂຘ. ປຸຣິມນເຍປີຕິ ‘‘ສີມາມາຬເກ ວຏຣຸກ຺ໂຂ ໂຫຕີ’’ຕິອາທິນາ ວຸຕ຺ເຕ ປຸຣິມນເຍປິ. ຕຕ຺ຣາຕິ ປຸຣິມນເຍ. ອຸກ຺ຂິປາເປຕ຺ວາ ກາຕຸໍ ນ ວຏ຺ຏຕີຕິ ທ຺ວີຫິ ສີມາຫິ ອຸຏ຺ຐິຕຣຸກ຺ຂສ຺ສ ສາຂາ ວາ ຕໂຕ ນິຄ຺ຄຕປາໂຣໂຫ ວາ ທ຺ວີສຸ ສີມາສຸ ປຖວີຕລໍ ວາ ຕຕ຺ຖ ຊາຕຣຸກ຺ຂາທີນິ ວາ ອາຫຈ຺ຈ ຐິຕຕ຺ຕາ ອຸກ຺ຂິປາເປຕ຺ວາ ກາຕຸໍ ນ ວຏ຺ຏຕິ. ອາເນຕພ຺ໂພຕິ ເອຕ຺ຖ ທ຺ວິກມ຺ມິກາຍ ນີຘາຕຸຍາ ອປຘານກມ຺ມສ຺ເສວ ວຸຕ຺ຕຕ຺ຕາ ‘‘ຠິກ຺ຂູ’’ຕິ ປຘານກມ຺ມໍ ອຊ຺ຌາຫຣິຕພ຺ພໍ. ອພ຺ຠຸຄ຺ຄຈ຺ຉຕີຕິ ອພ຺ຠໍ ອາກາສໍ ອຸຄ຺ຄຈ຺ຉຕິ. ຕຕ຺ຣາຕິ ປພ຺ພເຕ. ກສ຺ມາ ອາເນຕພ຺ໂພຕິ ອາຫ ‘‘ພຊ຺ຌມານາເຍວ ຫີ’’ຕິອາທິ. ຕຕ຺ຖ ພຊ຺ຌມານາເຍວາຕິ ກມ຺ມວາຈາຍ ພຊ຺ຌມານາເຍວ. ອິມິນາ ອພທ຺ຘສີມາ ປມາຓຣຫິຕໍ ເທສໍ ໂອຕຣຕີຕິ ທສ຺ເສຕິ. ຍໍກິຎ຺ຈີຕິ ຍໍກິຎ຺ຈິ ປພ຺ພຕາທິ. ຍຕ຺ຖ ກຕ຺ຖຈີຕິ ຍສ຺ມິໍ ກສ຺ມິໍຈິ ຐາເນ. ເອກສມ຺ພນ຺ເຘນາຕິ ພທ຺ຘສີມາຍ ເອກສມ຺ພນ຺ເຘນ. ອິຕີຕິ ຕສ຺ມາ ອາເນຕພ຺ໂພຕິ ໂຍຊນາ.

໑໔໐. ຕີຓິ ໂຍຊນານິ ຕິໂຍຊນໍ. ‘‘ປມາຓ’’ນ຺ຕິ ອິມິນາ ປຣມສທ຺ທສ຺ສ ອຕິເຣກອຸຕ຺ຕມຕ຺ເຖ ນິວຕ຺ເຕຕິ. ເອຕິສ຺ສາຕິ ສີມາຍ. ສມ຺ມນນ຺ເຕນ ຠິກ຺ຂຸນາຕິ ສມ຺ພນ຺ໂຘ. ໂກຓໂຕ ມິນິຕໍ ໂກຓນ຺ຕິ ໂຍຊນາ. ຫີຕິ ສຈ຺ຈໍ, ຍສ຺ມາ ວາ. ອາປຕ຺ຕິຎ຺ຈາຕິ ທຸກ຺ກຏາປຕ຺ຕິຎ຺ຈ.

ປາຣຍຕີຕິ ອຊ຺ໂຌຕ຺ຖຣຕິ. ‘‘ກິຕກາຠິເຘຍ຺ຍລິງ຺ຄາ’’ຕິ (ກຈ຺ຈາຍນສາເຣ ໔໕ ຄາຖາຍໍ) ວຈນໂຕ ອຠິເຘຍ຺ຍຠູຕໍ ສີມໍ ສນ຺ຘາຍ ອິຕ຺ຖິລິງ຺ຄວເສນ ປາຣາຕິ ວຸຕ຺ຕໍ. ນທິຍາຕິ ອຸປໂຍຄຕ຺ເຖ ສາມິວຈນໍ. ນທິນ຺ຕິ ຫິ ອຕ຺ໂຖ. ນທິໍ ອຊ຺ໂຌຕ຺ຖຣມານໍ ສີມນ຺ຕິ ສມ຺ພນ຺ໂຘ. ເອຕ຺ຖາຕິ ນທິປາຣສີມາຍໍ. ຍຕ຺ຖສ຺ສາຕິ ເອຕ຺ຖ ຍຕ຺ຖ ອສ຺ສາຕິ ປທວິຠາຄໍ ທສ຺ເສນ຺ໂຕ ອາຫ ‘‘ຍຕ຺ຖ ນທິຍາ’’ຕິອາທິ. ‘‘ນທິຍາ’’ຕິ ອິມິນາ ຍໍສທ຺ທສ຺ສ ວິສຍໍ ທສ຺ເສຕິ. ຘຸວນາວາຕິ ເອຕ຺ຖ ຘຸວສທ຺ໂທ ນິຈ຺ຈຕ຺ໂຖຕິ ອາຫ ‘‘ນິຈ຺ຈສຎ຺ຈຣຓນາວາ’’ຕິ. ອິມິນາ ຘຸເວນ ນິຈ຺ເຈນ ສຎ຺ຈຣຓນາວາ ຘຸວນາວາຕິ ວຈນຕ຺ຖໍ ທສ຺ເສຕິ. ອສ຺ສາຕິ ໂຫຕິ, ຠເວຍ຺ຍ ວາ. ນາວາຍ ປມາຓໍ ທສ຺ເສນ຺ໂຕ ອາຫ ‘‘ຍາ’’ຕິອາທິ. ຕຕ຺ຖ ຍາຕິ ນາວາ. ປາຊນປຸຣິເສນາຕິ ເອຕ຺ຖ ປາຊນໍ ນາມ ເອໂກ ນາວາຍ ຄມນູປກຣຓວິເສໂສ. ໂສ ຫິ ປຊຕິ ນາວາ ຄຈ຺ຉຕິ ອເນນາຕິ ປາຊນນ຺ຕິ ວຸຈ຺ຈຕິ. ຊກາຣສ຺ສ ຈກາຣໍ ກຕ຺ວາ ປາຈນນ຺ຕິປິ ຍຸຊ຺ຊເຕວ. ຕສ຺ສ ຄາຫເກນ ປຸຣິເສນ ສທ຺ຘິນ຺ຕິ ອຕ຺ໂຖ. ສາ ນາວາ ນີຕາຕິ ສມ຺ພນ຺ໂຘ. ອຸທ຺ຘໍ ວາ ອໂຘ ວາຕິ ນທິຍາ ປຏິໂສຕໍ ວາ ເຫຏ຺ຐາໂສຕໍ ວາ. ເຖເນຫິ ວາຕິ ໂຈເຣຫິ ວາ. ກິຎ຺ຈາປິ ຫຏາ, ປນ ຕຖາປິ ອວສ຺ສໍ ລພ຺ຠເນຍ຺ຍາ, ຘຸວນາວາວ ໂຫຕີຕິ ໂຍຊນາ. ວາເຕນ ວາຕິ ມາລຸເຕນ ວາ ‘‘ຉິນ຺ນ’’ອິຕິ ສມ຺ພນ຺ໂຘ. ວີຈີຫີຕິ ຕຣງ຺ເຄຫິ. ຕຣງ຺ໂຄ ຫິ ວິຈິຕ຺ຕາກາເຣນ ຈິໂນຕິ ວຑ຺ຒຕີຕິ ວີຈີຕິ ວຸຈ຺ຈຕິ. ກິຎ຺ຈາປິ ນທີມຊ຺ຌໍ ນີຕາ, ປນ ຕຖາປິ ອວສ຺ສໍ ອາຫຣິຕພ຺ພາ, ຘຸວນາວາວ ໂຫຕີຕິ ໂຍຊນາ. ໂອຄເຕຕິ ໂອຕຣິຕ຺ວາ ຄເຕ. ຖລໍ ອຸສ຺ສາຣິຕາຕິ ຖລໍ ອຸກ຺ຂິປິຕ຺ວາ ສາຣິຕາ ປາປິຕາ ນາວາປີຕິ ສມ຺ພນ຺ໂຘ. ວິສງ຺ຂຕປທຣາຕິ ສງ຺ຂຕວິຣຫິຕຜລກາ ວາ. ຘຸວນາວາວ ໂຫຕີຕິ ນິມິຕ຺ຕກິຕ຺ຕນກາເລ ນິຈ຺ຈສຎ຺ຈຣຓນາວຕ຺ຕາ ຘຸວນາວາວ ໂຫຕີຕິ ອຘິປ຺ປາໂຍ. ຕຕ຺ຣາຕິ ‘‘ຘຸວນາວາ’’ຕິວຈເນ. ນິມິຕ຺ຕໍ ວາ ສີມາ ວາ ກມ຺ມວາຈາຍ ຄຈ຺ຉຕີຕິ ເອຕ຺ຖ ກິຎ຺ຈາປິ ນ ນິມິຕ຺ຕໍ ກມ຺ມວາຈາຍ ຄຈ຺ຉຕິ, ສີມາຍ ປນ ອວິນາຠາວໂຕ ວຸຕ຺ຕໍ ‘‘ກມ຺ມວາຈາຍ ຄຈ຺ຉຕີ’’ຕິ. ຕສ຺ມາຕິ ຍສ຺ມາວ ນາວາຍ ອາຄຈ຺ຉນ຺ຕາປິ ຠຄວຕາ ອນຸຎ຺ຎາຕາ, ຕສ຺ມາ.

ຍຕ຺ຖາຕິ ນທິປາຣສີມສມ຺ມນນຏ຺ຐາເນ. ຣຸກ຺ຂສງ຺ຆາຏມໂຍຕິ ຣຸກ຺ຂສມູເຫນ ກໂຕ. ປທຣພທ຺ໂຘຕິ ຜລເກຫິ ພທ຺ໂຘ. ສຎ຺ຈຣຓໂຍຄ຺ໂຄຕິ ສຎ຺ຈຣຓກ຺ຂໂມ. ປາຬິຍໍ ‘‘ອສ຺ສາ’’ຕິ ຐາເນ ອຏ຺ຐກຖາຍໍ ‘‘ອຕ຺ຖີ’’ຕິ ວຸຕ຺ຕຕ຺ຕາ ‘‘ອສ຺ສາ’’ຕິປທສ຺ສ ໂຫຕີຕິ ອຕ຺ໂຖເຍວ ທຏ຺ຐພ຺ໂພ. ຕໍຂຓຎ຺ເຎວາຕິ ຕສ຺ມິໍ ນິມິຕ຺ຕກິຕ຺ຕກ຺ຂເຓເຍວ. ຣຸກ຺ຂໍ ຉິນ຺ທິຕ຺ວາ ກໂຕຕິ ສມ຺ພນ຺ໂຘ. ເອກປທິກເສຕູຕິ ເອເກນ ປເທນ ຄມນໂຍຄ຺ໂຄ ເອກປທິໂກ, ໂສເຍວ ເສຕູຕິ ເອກປທິກເສຕຸ. ອກປ຺ປິຍເສຕຸໍ ທສ຺ເສນ຺ໂຕ ອາຫ ‘‘ສເຈ ປນາ’’ຕິອາທິ. ເຕນາຕິ ເສຕຸນາ. ສຎ຺ຈຣິຕຸໍ ນ ສກ຺ກາ ໂຫຕີຕິ ໂຍຊນາ.

ຍຕ຺ຖາຕິ ຍສ຺ມິໍ ນທິປາຣສີມສມ຺ມນນຏ຺ຐາເນ. ອຠິມຸຂຕິຕ຺ເຖເຍວາຕິ ສີມາຍ ອຠິມຸຂຕິຕ຺ເຖ ເອວ. ຘຸວນາວາ ວາ ຘຸວເສຕຸ ວາ ອຠິມຸຂຕິຕ຺ຖໂຕ ອີສກໍ ອຸທ຺ຘໍ ອາໂຣຫນ຺ໂຕປິ ອໂຘ ໂອໂຣຫນ຺ໂຕປິ ກປ຺ປຕີຕິ ທສ຺ເສນ຺ໂຕ ອາຫ ‘‘ສເຈ’’ຕິອາທິ. ອີສກນ຺ຕິ ເອກອຸສຠ ທ຺ວິອຸສຠາທິວເສນ ມນໍ ອປ຺ປມຕ຺ຕໍ. ອຸທ຺ຘໍ ວາຕິ ອຠິມຸຂຕິຕ຺ຖໂຕ ອຸປຣິ ວາ. ອໂຘ ວາຕິ ຕໂຕ ເຫຏ຺ຐາ ວາ. ຄາວຸຕມຕ຺ຕພ຺ຠນ຺ຕເຣຕິ ຄາວຸຕປມາຓສ຺ສ ຐານສ຺ສ ອພ຺ຠນ຺ຕເຣ.

ສຫນິມິຕ຺ຕກິຕ຺ຕນວິຘິນາ ສມ຺ມນິຕພ຺ພວິຘິໍ ທສ຺ເສນ຺ໂຕ ອາຫ ‘‘ອິມຎ຺ຈ ປນາ’’ຕິອາທິ. ທ຺ວີສຸ ຕີເຣສຸ ຐາຕຸມສກ຺ກຸເຓຍ຺ຍຕ຺ຕາ ວຸຕ຺ຕໍ ‘‘ເອກສ຺ມິໍ ຕີເຣ ຐຕ຺ວາ’’ຕິ. ຕໂຕຕິ ນິມິຕ຺ຕໂຕ. ອຕ຺ຕານນ຺ຕິ ນິມິຕ຺ຕກິຕ຺ຕນໍ ວິນຍຘຣໍ ສນ຺ຘາຍ ວຸຕ຺ຕໍ. ປຣິກ຺ຂິປນ຺ເຕນາຕິ ປຣິຍາຍນ຺ເຕນ. ຕສ຺ສາຕິ ຕຕ຺ຕກສ຺ສ ປຣິຈ຺ເຉທສ຺ສ. ສມ຺ມຸຂຏ຺ຐາເນຕິ ອໂຘໂສເຕ ນທິຕີເຣ ຐິຕສ຺ສ ນິມິຕ຺ຕສ຺ສ ສມ຺ມຸຂຏ຺ຐາເນ. ຕໂຕຕິ ນິມິຕ຺ຕໂຕ. ຕສ຺ສາຕິ ຕຕ຺ຕກສ຺ສ ປຣິຈ຺ເຉທສ຺ສ. ສມ຺ມຸຂາ ນທິຕີເຣ ນິມິຕ຺ຕໍ ອຕ຺ຖີຕິ ສມ຺ພນ຺ໂຘ. ສງ຺ຆເຏຕພ຺ພນ຺ຕິ ສມ຺ພນ຺ຘິຕພ຺ພໍ. ອຖາຕິ ນິມິຕ຺ຕກິຕ຺ຕນໂຕ ປຈ຺ຉາ. ‘‘ສພ຺ພນິມິຕ຺ຕານໍ ອນ຺ໂຕ ຐິເຕ ຠິກ຺ຂູ ຫຕ຺ຖປາສຄເຕ ກຕ຺ວາ’’ຕິ ອິທໍ ສພ຺ພໍ ເອກໍ ຄາມເຂຕ຺ຕໍ ພ຺ຍາເປຕ຺ວາ ສມ຺ມນິຕຠາວໍ ສນ຺ຘາຍ ວຸຕ຺ຕໍ. ສເຈ ສກລໍ ຄາມເຂຕ຺ຕໍ ອພ຺ຍາເປຕ຺ວາ ເອກເທເສ ສມ຺ມນິຕໍ ໂຫຕິ, ນິມິຕ຺ຕໂຕ ພຫິ ຐິເຕ ຠິກ຺ຂູປິ ຫຕ຺ຖປາສຄເຕ ກຕ຺ວາ ສມ຺ມນິຕພ຺ພາ. ກມ຺ມນ຺ຕິ ສີມສມ຺ມຸຕິກມ຺ມໍ. ‘‘ຐເປຕ຺ວາ ນທິ’’ນ຺ຕິວຈນສ຺ສ ກາຣຓໍ ທສ຺ເສນ຺ໂຕ ອາຫ ‘‘ນທີ ປນ ພທ຺ຘສີມສງ຺ຂ຺ຍໍ ນ ຄຈ຺ຉຕີ’’ຕິ.

ທີປໂກ ໂຫຕີຕິ ເອຕ຺ຖ ທີໂປຕິ ອນ຺ຕຣທີໂປ. ໂສ ຫິ ຍສ຺ມາ ຊລມຊ຺ເຌ ທິປ຺ປຕິ, ຍສ຺ມາ ຈ ທ຺ວິຘາ ອາໂປ ເອຕ຺ຖ ສນ຺ທຕິ, ຕສ຺ມາ ທີໂປຕິ ວຸຈ຺ຈຕິ, ໂສເຍວ ຂຸທ຺ທກຏ຺ເຐນ ທີປໂກ. ກກາໂຣ ຫິ ຂຸທ຺ທກຕ຺ຖວາຈໂກ. ຕນ຺ຕິ ທີປກໍ. ອຕ຺ຕນາຕິ ວິນຍຘເຣນ. ໂອຣິມນ຺ເຕ ຈ ປາຣິມນ຺ເຕ ຈາຕິ ອໂຘໂສເຕ ນທິຕີເຣ ຐິຕສ຺ສ ນິມິຕ຺ຕສ຺ສ ສມ຺ມຸເຂ ໂອຣິມນ຺ເຕ ຈ ປາຣິມນ຺ເຕ ຈ. ປຣຕີເຣ ນິມິຕ຺ຕໍ ກິຕ຺ເຕຕ຺ວາຕິ ສມ຺ພນ຺ໂຘ. ກິສ຺ສ ສມ຺ມຸຂຏ຺ຐາເນ ນິມິຕ຺ຕນ຺ຕິ ອາຫ ‘‘ນທິຍາ ໂອຣິມຕີເຣ ນິມິຕ຺ຕສ຺ສ ສມ຺ມຸຂຏ຺ຐາເນ’’ຕິ. ຕໂຕຕິ ນິມິຕ຺ຕໂຕ. ສມ຺ມຸຂາ ນິມິຕ຺ຕໍ ອຕ຺ຖີຕິ ສມ຺ພນ຺ໂຘ. ປາຣິມນ຺ເຕ ຈ ໂອຣິມນ຺ເຕ ຈາຕິ ປຣຕີເຣ ອຸປຣິໂສເຕ ຐິຕສ຺ສ ນິມິຕ຺ຕສ຺ສ ສມ຺ມຸເຂ ປາຣິມນ຺ເຕ ຈ ໂອຣິມນ຺ເຕ ຈ. ປຐມກິຕ຺ຕິຕນິມິຕ຺ເຕນາຕິ ໂອຣິມຕີເຣ ອຸປຣິໂສເຕ ປຐມໍ ກິຕ຺ຕິເຕນ ນິມິຕ຺ເຕນ. ເອກາ ສີມາ ອິມສ຺ສາຕິ ເອກສີໂມ, ທີປໂກ. ‘‘ຕີຣທ຺ວຍຎ຺ຈາ’’ຕິ ປທມເປກ຺ຂິຕ຺ວາ ‘‘ເອກສີມ’’ນ຺ຕິ ສມ຺ພນ຺ຘິຕພ຺ພໍ. ວຈ຺ຈມນເປກ຺ຂິຕ຺ວາ ‘‘ເອກສີມາ’’ຕິປິ ນິຈ຺ຈອິຕ຺ຖິລິງ຺ຄວເສນ ປາໂຐ ອຕ຺ຖິ.

ອຸທ຺ຘໍ ວາ ອໂຘ ວາຕິ ເອຕ຺ຖ ວາສທ຺ໂທ ອນິຍມວິກປ຺ປຕ຺ໂຖ. ອຖາຕິ ຕສ຺ມິໍ ອຘິກຕເຣ ສຕີຕິ ໂຍຊນາ. ວິຫາຣສີມປຣິຈ຺ເຉທນິມິຕ຺ຕສ຺ສ ອຸຊຸກເມວາຕິ ສເຈ ທີປໂກ ອໂຘ ອຘິກຕໂຣ ໂຫຕິ, ໂອຣິມຕີເຣ ອໂຘໂສເຕ ຐິຕສ຺ສ ວິຫາຣສີມປຣິຈ຺ເຉທນິມິຕ຺ຕສ຺ສ ອຸຊຸກເມວ. ສິຂຣນ຺ຕິ ສິງ຺ຄໍ. ຕຎ຺ຫິ ສິຂໍ ມຕ຺ຖກໍ ຣາຕິ ຄຓ຺ຫາຕີຕິ ສິຂຣນ຺ຕິ ວຸຈ຺ຈຕິ. ຕໂຕຕິ ທີປກສ຺ສ ປາຣິມນ຺ຕນິມິຕ຺ຕໂຕ. ປຣຕີຣນິມິຕ຺ຕານິ ກິຕ຺ເຕຕ຺ວາຕິ ສມ຺ພນ຺ໂຘ. ອຍໍ ທີປກສ຺ສ ວິຫາຣສີມປຣິຈ຺ເຉທໂຕ ອໂຘ ອຘິກຕເຣ ວິນິຈ຺ຉໂຍ. ອຸທ຺ຘໍ ອຘິກຕເຣປິ ອິມິນານຸສາເຣນ ເວທິຕພ຺ໂພຕິ ໂສ ນ ທສ຺ສິໂຕ. ປພ຺ພຕສຓ຺ຐານາຕິ ປພ຺ພເຕນ ສມໍ ຐານໍ ເອຕິສ຺ສາຕິ ປພ຺ພຕສຓ຺ຐານາ.

ອຸທ຺ຘມ຺ປິ ອໂຘປີຕິ ປິສທ຺ໂທ ສມຸຈ຺ຈຍຕ຺ໂຖ. ອຸໂຠປິ ສິຂຣານີຕິ ອຸທ຺ຘໍ ສິຂຣໍ, ອໂຘ ສິຂຣນ຺ຕິ ອຸໂຠປິ ສິຂຣານິ. ມຸທິງ຺ຄສຓ຺ຐານາຕິ ມູເລ ຈ ອຄ຺ເຄ ຈ ຕນຸກສ຺ສ ມຊ຺ເຌ ຖູລສ຺ສ ມຸທິງ຺ຄສ຺ສ ສຓ຺ຐານາ.

ສພ຺ພປຐເມນ ນເຍນາຕິ ອຸທ຺ຘໍ ອຘິກນຍສ຺ສ, ອໂຘ ອຘິກນຍສ຺ສ, ອຸທ຺ຘໍອໂຘອຘິກນຍສ຺ສ ຈາຕິ ສພ຺ເພສໍ ນຍານໍ ປຐເມນ ວິຫາຣສີມທີປການໍ ສເມນ ນເຍນ. ປຓວສຓ຺ຐານາຕິ ມູເລ ຈ ອຄ຺ເຄ ຈ ຖູລສ຺ສ ມຊ຺ເຌຕນຸກສ຺ສ ປຓວສ຺ສ ສຓ຺ຐານາ.