໖໘. ສນ຺ນິປາຕານຸຊານນາທິກຖາ

໑໓໒. ອຸໂປສຖກ຺ຂນ຺ຘເກ ຕຣນ຺ຕິ ໂອຕຣນ຺ຕິ ເອຕ຺ຖາຕິ ຕິຕ຺ຖໍ, ອຸທກຕິຕ຺ຖໍ, ຕິຕ຺ຖໍ ວິຍາຕິ ຕິຕ຺ຖໍ, ລທ຺ຘີຕິ ອາຫ ‘‘ຕິຕ຺ຖໍ ວຸຈ຺ຈຕິ ລທ຺ຘີ’’ຕິ. ລທ຺ຘິ ຫິ ພຫູນໍ ລທ຺ຘິການໍ ໂອຕຣຓຏ຺ຐານຕ຺ຕາ ຕິຕ຺ຖໍ ນາມ. ອຎ຺ຎນ຺ຕິ ສາສນິກລທ຺ຘິໂຕ ອຎ຺ຎໍ. ເອເຕສນ຺ຕິ ປຣິພ຺ພາຊການໍ. ອິໂຕຕິ ອິມສ຺ມາ ສາສນິກລທ຺ຘິໂຕ. ຍນ຺ຕິ ຍໍ ຘມ຺ມຊາຕໍ. ເຕສນ຺ຕິ ອຎ຺ຎຕິຕ຺ຖິຍານໍ ປຣິພ຺ພາຊການໍ. ເຕ ລຠນ຺ຕີຕິ ເອຕ຺ຖ ຕສທ຺ໂທ ມນຸສ຺ສວິສໂຍຕິ ອາຫ ‘‘ເຕ ມນຸສ຺ສາ’’ຕິ. ມູຄສູກຣາຕິ ເອຕ຺ຖ ຖູລສຣີຣສ຺ສ ສູກຣສ຺ສ ສທ຺ທມຕ຺ຕສ຺ສາປິ ອຠາວໂຕ ມູຄສູກໂຣ ນາມາຕິ ອາຫ ‘‘ຖູລສຣີຣສູກຣາ’’ຕິ.

໑໓໕. ອສ຺ສາຕິ ຠິກ຺ຂຸໂນ. ໂສຕິ ສມ຺ປຊານມຸສາວາໂທ. ກິນ຺ຕິ ກິໍ ອາປຕ຺ຕິ. ທຸກ຺ກຏນ຺ຕິ ປທສ຺ສ ທຸກ຺ກຏໍ ກມ຺ມນ຺ຕິ ອາສງ຺ກາ ຠເວຍ຺ຍາຕິ ອາຫ ‘‘ທຸກ຺ກຏາປຕ຺ຕີ’’ຕິ. ສາ ຈ ໂຂ ທຸກ຺ກຏາປຕ຺ຕິ ມຸສາວາທລກ຺ຂເຓນ ນ ໂຫຕີຕິ ໂຍຊນາ. ເກນ ໂຫຕີຕິ ອາຫ ‘‘ຠຄວໂຕ ປນ ວຈເນນາ’’ຕິ. ວຈເນນາຕິ ຈ ‘‘ສມ຺ປຊານມຸສາວາເທ ກິໍ ໂຫຕິ? ທຸກ຺ກຏໍ ໂຫຕີ’’ຕິ (ມຫາວ. ໑໓໕) ວຈເນນ. ອກິຣິຍສມຸຏ຺ຐານາຕິ ອາວິ ກຕ຺ຕພ຺ພາຍ ອາປຕ຺ຕິຍາ ອກຣເຓນ ອກິຣິຍສມຸຏ຺ຐານາ.

ມນຸເຊນາຕິ ມນຸສ຺ເສນ. ວາຈາຕິ ວາຈາຍ. ຍກາຣສ຺ສ ຫິ ໂລໂປ. ຄິຣນ຺ຕິ ສທ຺ທໍ. ປເຣຕິ ອຎ຺ເຎ ປຸຄ຺ຄເລ. ວາຈສິກນ຺ຕິ ວາຈາໂຕ ສມຸຏ຺ຐິຕໍ. ອຍໍ ປເນຕ຺ຖ ໂຍຊນາ – ຠິກ຺ຂຸ ເກນຈິ ອາສນ຺ເນ ຐິເຕນ ມນຸເຊນ ວາຈາຍ ອນາລປນ຺ໂຕ ໂຫຕິ, ປເຣ ທູເຣ ຐິເຕ ປຸຄ຺ຄເລ ສນ຺ຘາຍ ຄິຣໍ ມຫາສທ຺ທໍ ໂນ ຈ ຠເຓຍ຺ຍ, ເອວມ຺ປິ ວາຈສິກເມວ ອາປຊ຺ເຊຍ຺ຍາຕິ.

ອນ຺ຕຣາຍິໂກຕິ ເອຕ຺ຖ ກໂຣຕ຺ຍຕ຺ເຖ ຓິກປຈ຺ຈໂຍຕິ ອາຫ ‘‘ອນ຺ຕຣາຍກໂຣ’’ຕິ. ‘‘ກິມຕ຺ຖາຍາ’’ຕິ ອິມິນາ ກິສ຺ສາຕິ ເອຕ຺ຖ ຕທຕ຺ເຖ ຈຕຸຕ຺ຖີຕິ ທສ຺ເສຕິ, ເຫຕ຺ວຕ຺ໂຖປິ ຍຸຊ຺ຊເຕວ. ສພ຺ພຕ຺ຖາຕິ ສພ຺ເພສຸ ‘‘ທຸຕິຍສ຺ສ ຌານສ຺ສ ອຘິຄມາຍາ’’ຕິອາທີສຸ. ອິຕີຕິອາທິ ນິຄມນໍ. ອຸທ຺ເທສໂຕ ຈາຕິ ‘‘ສຸຓາຕຸ ເມ ຠນ຺ເຕ ສງ຺ໂຆ’’ຕິອາທິອຸທ຺ເທສໂຕ ຈ. ນິທ຺ເທສໂຕ ຈາຕິ ‘‘ປາຕິໂມກ຺ຂນ຺ຕິ ອາທິເມຕ’’ນ຺ຕິອາທິນິທ຺ເທສໂຕ ຈ.

໑໓໖. ເທວສິກນ຺ຕິ ເອຕ຺ຖ ຓິກປຈ຺ຈໂຍ ວິຈ຺ຉຕ຺ເຖ ໂຫຕີຕິ ອາຫ ‘‘ທິວເສ ທິວເສ’’ຕິ. ຕຕິເຍ ຈ ສຕ຺ຕເມ ຈ ປກ຺ເຂຕິ ເອກສ຺ສ ອຸຕຸໂນ ອຏ຺ຐສຸ ປກ຺ເຂສຸ ຕຕິເຍ ຈ ສຕ຺ຕເມ ຈ ປກ຺ເຂ. ‘‘ວຈນໂຕ’’ຕິ ປທໍ ‘‘ວຏ຺ຏຕີ’’ຕິ ປເທ ຎາປກເຫຕຸ. ຕຖາຣູເປ ປຈ຺ຈເຍຕິ ຕຖາຣູເປ ວິກຕິຈາຣິຕ຺ຕສງ຺ຂາເຕ ປຈ຺ຈເຍ. ອນຸວຕ຺ຕິຕພ຺ພນ຺ຕິ ອນຸມຕິໍ ວຕ຺ຕິຕພ຺ພໍ. ວຈນໂຕປີຕິ ປິສທ຺ໂທ ປຸພ຺ເພ ຎາປກເຫຕຸໍ ສມ຺ປິຓ຺ເຑຕິ. ເອຕນ຺ຕິ ‘‘ຍສ຺ມິໍ ຕສ຺ມິໍ ຈາຕຸທ຺ທເສ ວາ ປນ຺ນຣເສ ວາ ອຸທ຺ທິສິຕຸໍ ວຏ຺ຏຕີ’’ຕິ ວຈນໍ.