໑໐໑. ລິງ຺ຄາທິທສ຺ສນກຖາ

໑໗໙. ‘‘ອາວາສິການໍ ອາກາຣ’’ນ຺ຕິ ອິມິນາ ອາວາສິກາກາຣນ຺ຕິ ປທສ຺ສ ຉຏ຺ຐີສມາສໍ ທສ຺ເສຕິ. ສພ຺ພຕ຺ຖາຕິ ສພ຺ເພສຸ ‘‘ອາວາສິກລິງ຺ຄ’’ນ຺ຕິອາທີສຸ. ເຍນາຕິ ສຸປຎ຺ຎຕ຺ຕມຎ຺ຈປີຐາທິນາ, ຄຓ຺ຫຕີຕິ ສມ຺ພນ຺ໂຘ. ເຕສນ຺ຕິ ອາວາສິການໍ. ອາຈາຣສຓ຺ຐານນ຺ຕິ ອາຈາຣສຓ຺ຐິຕິໍ. ໂສ ສຸປຎ຺ຎຕ຺ຕມຎ຺ຈປີຐາທິໂກ ອາກາໂຣ ນາມາຕິ ໂຍຊນາ. ຍນ຺ຕິ ສຸປຎ຺ຎຕ຺ຕມຎ຺ຈປີຐາທິໍ, ຄມຍຕີຕິ ສມ຺ພນ຺ໂຘ. ຕຕ຺ຖ ຕຕ຺ຖາຕິ ຕສ຺ມິໍ ຕສ຺ມິໍ ຐາເນ. ລີເນ ອາວາສິເກຕິ ສມ຺ພນ຺ໂຘ. ຕໍ ສຸປຎ຺ຎຕ຺ຕມຎ຺ຈປີຐາທິ ລິງ຺ຄໍ ນາມາຕິ ໂຍຊນາ. ‘‘ອທິສ຺ສມາເນ’’ຕິ ອິມິນາ ລີເນຕິ ປທສ຺ສ ອຕ຺ຖໍ ທສ຺ເສຕິ. ‘‘ຊານາເປຕີ’’ຕິ ອິມິນາ ຄມຍຕີຕິ ປທສ຺ສ ຎາຓຕ຺ຖໍ ທສ຺ເສຕິ. ຍນ຺ຕິ ສຸປຎ຺ຎຕ຺ຕມຎ຺ຈປີຐາທິໍ. ເຕຕິ ອາວາສິກາ. ຕໍ ສຸປຎ຺ຎຕ຺ຕມຎ຺ຈປີຐາທິ ນິມິຕ຺ຕໍ ນາມາຕິ ໂຍຊນາ. ເຍນາຕິ ສຸປຎ຺ຎຕ຺ຕມຎ຺ຈປີຐາທິນາ. ເຕຕິ ອາວາສິກາ ອຸທ຺ທິສິຍນ຺ຕິ, ໂສ ສຸປຎ຺ຎຕ຺ຕມຎ຺ຈປີຐາທິໂກ ອຸທ຺ເທໂສ ນາມາຕິ ໂຍຊນາ. ອິເມຫິ ປເທຫິ ອາກິຣິຍນ຺ຕິ ປກາສິຍນ຺ຕິ ເອເຕນາຕິ ອາກາໂຣ, ລີເນ ຄມຍຕິ ໂພເຘຕີຕິ ລິງ຺ຄໍ. ນິມິຍນ຺ຕິ ປຣິຈ຺ຉິຊ຺ຊ ຎາຍນ຺ຕິ ເອເຕນາຕິ ນິມິຕ຺ຕໍ, ອຸທ຺ທິສິຍນ຺ຕິ ອປທິສິຍນ຺ຕິ ເອເຕນາຕິ ອຸທ຺ເທໂສຕິ ວຈນຕ຺ຖໍ ທສ຺ເສຕິ. ສພ຺ພເມຕນ຺ຕິ ‘‘ອາວາສິກາກາຣ’’ນ຺ຕິອາທິ ເອຕໍ ສພ຺ພໍ. ຍຖາໂຍຄນ຺ຕິ ປາຬິຍໍ ໂຍຄານຸຣູປໍ. ຕຕ຺ຖາຕິ ອາຄນ຺ຕຸກາກາຣາທີສຸ. ‘‘ອມ຺ຫາກໍ ອິທ’’ນ຺ຕິ ນ ຎາຕພ຺ພນ຺ຕິ ອຎ຺ຎາຕໍ, ຕເທວ ອຎ຺ຎາຕກໍ, ນິສີທນາທິ. ‘‘ອມ຺ຫາກໍ ອິທ’’ນ຺ຕິ ອຊານນໍ ນາມ ອຕ຺ຕໂນ ອສນ຺ຕກຕ຺ຕາ, ອຎ຺ເຎສເມວ ສນ຺ຕກຕ຺ຕາ ໂຫຕີຕິ ອາຫ ‘‘ອຎ຺ເຎສໍ ສນ຺ຕກ’’ນ຺ຕິ. ອຸທກນິສ຺ເສກນ຺ຕິ ສິຎ຺ຈນວິຣຫິຕໍ ອຸທກໍ. ພຫຸວຈນສ຺ສາຕິ ‘‘ໂຘຕານ’’ນ຺ຕິ ເອຕ຺ຖ ຉຏ຺ຐີພຫຸວຈນສ຺ສ. ເອກວຈນນ຺ຕິ ‘‘ໂຘຕສ຺ສາ’’ຕິ ເອກວຈນໍ. ປຈ຺ຉິມປາເຐ ມລໍ ຘຸນາຕິ ອເນນາຕິ ໂຘຕໍ, ໂຘຕຎ຺ຈ ຕໍ ອຸທກຎ຺ເຈຕິ ໂຘຕອຸທກໍ, ຕເມວ ນິສ຺ເສກໍ ໂຘຕອຸທກນິສ຺ເສກໍ.

໑໘໐. ສມານສໍວາສກທິຏ຺ຐິນ຺ຕິ ປທສ຺ສ ອິຕິໂລປສມາສໍ ທສ຺ເສນ຺ໂຕ ອາຫ ‘‘ສມານສໍວາສກາ ເອເຕຕິ ທິຏ຺ຐິ’’ນ຺ຕິ. ເອເຕຕິ ອາວາສິກາ ຠິກ຺ຂູ. ‘‘ລທ຺ຘິ’’ນ຺ຕິ ອິມິນາ ນ ປຸຈ຺ຉນ຺ຕີຕິ ປທສ຺ສ ກມ຺ມໍ ທສ຺ເສຕິ. ນານາສໍວາສກຠາວນ຺ຕິ ເຕສໍ ລທ຺ຘິນານາສໍວາສກຠາວໍ. ‘‘ມທ຺ທິຕຸ’’ນ຺ຕິ ອິມິນາ ນາຠິວິຕຣນ຺ຕີຕິ ເອຕ຺ຖ ອຠິສທ຺ທສ຺ສຕ຺ຖໍ ທສ຺ເສຕິ. ‘‘ອຠິຠວິຕຸ’’ນ຺ຕິ ອິມິນາ ຈ ຕເທວຕ຺ຖໍ ທສ຺ເສຕິ. ນານາສໍວາສກຠາວສ຺ສ ມທ຺ທນໍ ນາມ ລທ຺ຘິນິສ຺ສຊ຺ຊາປນນ຺ຕິ ອາຫ ‘‘ຕໍ ທິຏ຺ຐິໍ ນ ນິສ຺ສຊ຺ຊາເປນ຺ຕີ’’ຕິ.