໑໐໓. ນຄນ຺ຕພ຺ພຄນ຺ຕພ຺ພວາຣກຖາ

໑໘໑. ສຠິກ຺ຂຸກາຕິ ປທສ຺ສ ສໍວິຊ຺ຊນ຺ຕິ ຠິກ຺ຂູ ເອຕສ຺ມິມາວາເສຕິ ສຠິກ຺ຂຸໂກຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ຍສ຺ມິໍ ອາວາເສ’’ຕິອາທິ. ຍນ຺ຕິ ອາວາສໍ. ຕທເຫວາຕິ ຕທຫຸໂປສເຖ ເອວ. ອິມິນາ ສເຈ ສກ຺ໂກຕິ, ຕທເຫວ ຄນ຺ຕຸໍ, ໂສ ຄນ຺ຕພ຺ໂພຕິ ທສ຺ເສຕິ. ‘‘ອກຕ຺ວາ’’ຕິ ອິມິນາ ກຕ຺ວາ ປນ ຄນ຺ຕພ຺ໂພຕິ ທສ຺ເສຕິ. ‘‘ອຎ຺ຎຕ຺ຣາ’’ຕິ ນິປາໂຕ ‘‘ວິນາ’’ຕິ ນິປາຕສ຺ສ ປຣິຍາໂຍຕິ ອາຫ ‘‘ວິນາ’’ຕິ. ອຕ຺ຕຈຕຸຕ຺ເຖນ ວາ ອຕ຺ຕປຎ຺ຈເມນ ວາ ສງ຺ເຆນ ຄນ຺ຕຸໍ ວຏ຺ຏຕີຕິ ໂຍຊນາ. ເອຕ຺ຖ ຈ ‘‘ອຕ຺ຕຈຕຸຕ຺ເຖນ ວາ’’ຕິ ອິທໍ ອຸໂປສຖກມ຺ມໍ ສນ຺ຘາຍ ວຸຕ຺ຕໍ. ‘‘ອຕ຺ຕປຎ຺ຈເມນ ວາ’’ຕິ ອິທໍ ປວາຣຓາກມ຺ມໍ ສນ຺ຘາຍ ວຸຕ຺ຕນ຺ຕິ ທຏ຺ຐພ຺ພໍ. ວິຫາເຣຕິ ວິຫາຣສີມາຍ ມຫາສີມາຍນ຺ຕິ ອຕ຺ໂຖ. ອິທຎ຺ຫິ ວິຫາຣສີມານໍ ອເຠເທນ ວຸຕ຺ຕໍ. ສີມາປີຕິ ຂຓ຺ຑສີມາປິ. ນ ຄນ຺ຕພ຺ພາຕິ ສງ຺ຆສ຺ສ ຄຣຸກຕ຺ຕາ ນ ຄນ຺ຕພ຺ພາ. ເອຕ຺ຖາຕິ ຂຓ຺ຑສີມາທີສຸ. ຕສ຺ສາຕິ ຠິກ຺ຂຸສ຺ສ. ຄນ຺ຕຸໍ ວຏ຺ຏຕີຕິ ຄຓຸໂປສຖຏ຺ຐານໂຕ ຄນ຺ຕຸໍ ວຏ຺ຏຕິ, ສງ຺ຆຸໂປສຖຏ຺ຐານໂຕ ປນ ນ ວຏ຺ຏຕິເຍວາຕິ ທຏ຺ຐພ຺ພໍ. ວິສ຺ສຏ຺ຐອຸໂປສຖາ ອາວາສາປິ ອຎ຺ຎໍ ຄນ຺ຕຸໍ ວຏ຺ຏຕີຕິ ໂຍຊນາ. ອາຣຎ຺ຎເກນາປີຕິ ອຣຎ຺ເຎ ເອກເກນ ນິວາເສນປິ. ຕຕ຺ຖາຕິ ອຎ຺ຎວິຫາເຣ. ອຸໂປສຖນ຺ຕິ ສງ຺ຆຸໂປສຖຎ຺ຈ ຄຓຸໂປສຖຎ຺ຈ.

໑໘໒. ຍນ຺ຕິ ອາວາສໍ. ຕຕ຺ຖາຕິ ຕໍ ອາວາສໍ. ຄນ຺ຕຸໍ ສກ຺ໂກມິ ອິຕິ ຊາເນຍ຺ຍາຕິ ໂຍຊນາ. ຕຕ຺ຖາຕິ ຕສ຺ມິໍ ອາວາເສ. ອິມິນາ ເນວ ກໂຕຕິ ສມ຺ພນ຺ໂຘ. ເນວ ກໂຕ ຠວິສ຺ສຕິ ອິຕິ ຊາເນຍ຺ຍາຕິ ໂຍຊນາ.