໙. ຣຕນວຄ຺ໂຄ

໑. ອນ຺ເຕປຸຣສິກ຺ຂາປທວຓ຺ຓນາ

ອນິກ຺ຂນ຺ຕຣາຊເກ ອນິຄ຺ຄຕຣຕນເກຕິ ເອຕ຺ຖ ‘‘ສຍນິຆເຣ’’ຕິ ປາຐເສໂສ ທຏ຺ຐພ຺ໂພຕິ ອາຫ ‘‘ອນິກ຺ຂນ຺ໂຕ ຣາຊາ ອິໂຕ’’ຕິອາທິ. ຕຕ຺ຖ ອິໂຕຕິ ສຍນິຆຣໂຕ. ສຍນິຆເຣຕິ ສຍນີຍຆເຣ. ຍຕ຺ຖ ຣຎ຺ໂຎ ສຍນໍ ປຎ຺ຎຕ຺ຕໍ ໂຫຕິ, ອນ຺ຕມໂສ ສາຓິປາກາຣປຣິກ຺ຂິຕ຺ຕມ຺ປິ, ຕສ຺ມິນ຺ຕິ ວຸຕ຺ຕໍ ໂຫຕິ. ຣຕິຊນນຏ຺ເຐນ ຣຕນໍ, ຫຕ຺ຖິອາທິ. ອິຘ ປນ ອິຕ຺ຖິຣຕນໍ ອຘິປ຺ເປຕນ຺ຕິ ອາຫ ‘‘ຣຕນໍ ວຸຈ຺ຈຕິ ມເຫສີ’’ຕິ.

ອຸໂຠສູຕິ ຣາຊມເຫສີສຸ. ກິຣິຍາກິຣິຍນ຺ຕິ ເອຕ຺ຖ ອິນ຺ທຂີລາຕິກ຺ກໂມ ກິຣິຍໍ, ອປ຺ປຏິສໍວິທິຕໍ ອກິຣິຍນ຺ຕິ ທຏ຺ຐພ຺ພໍ.

ອນ຺ເຕປຸຣສິກ຺ຂາປທວຓ຺ຓນາ ນິຏ຺ຐິຕາ.

໒. ຣຕນສິກ຺ຂາປທວຓ຺ຓນາ

ມຸຕ຺ຕາທິທສວິຘນ຺ຕິ ‘‘ມຸຕ຺ຕາ ມຓິ ເວຬຸຣິໂຍ ສງ຺ໂຂ ສິລາ ປວາຬໍ ຣຊຕໍ ຊາຕຣູປໍ ໂລຫິຕງ຺ໂກ ມສາຣຄລ຺ລ’’ນ຺ຕິ (ປາຈິ. ໕໐໖) ທສວິຘໍ ຣຕນໍ. ອຊ຺ຌາວສເຖຕິ ເຄເຫ. ເຕນາຫ ‘‘ປຣິກ຺ຂິຕ຺ຕສ຺ສາ’’ຕິອາທິ, ປຣິກ຺ຂິຕ຺ຕສ຺ສ ອາວສຖສ຺ສາຕິ ອຕ຺ໂຖ. ອາວສໂຖຕິ ເຈຕ຺ຖ ອນ຺ໂຕຄາເມ ນິວິຏ຺ຐເຄຫໍ ອຘິປ຺ເປຕໍ. ອາຣາເມ ນິວິຏ຺ຐເຄຫໍ ປນ ອຊ຺ຌາຣາມຄ຺ຄຫເຓເນວ ຄຫິຕໍ. ‘‘ອາວສໂຖຕິ ເຈຕ຺ຖ ອນ຺ໂຕອາຣາເມ ວາ ໂຫຕຸ, ອຎ຺ຎຕ຺ຖ ວາ, ອຕ຺ຕໂນ ວສນຏ຺ຐານໍ ວຸຈ຺ຈຕີ’’ຕິ (ສາຣຕ຺ຖ. ຏີ. ປາຈິຕ຺ຕິຍ ໓.໕໐໖) ເກຈິ. ສພ຺ເພສມ຺ປິ ອຕ຺ຖາຍ ທຸກ຺ກຏເມວາຕິ ອຕ຺ຕໂນ ວາ ເຕສໍ ສງ຺ຆາທີນໍ ວາ ອຕ຺ຖາຍ ອຸຄ຺ຄຓ຺ຫນ຺ຕສ຺ສ ວາ ອຸຄ຺ຄຓ຺ຫາເປນ຺ຕສ຺ສ ວາ ທຸກ຺ກຏເມວ. ສເຈ ປນ ມາຕາປິຕູນໍ ສນ຺ຕກໍ ອວສ຺ສໍ ປຏິສາເມຕພ຺ພໍ ກປ຺ປິຍຠຓ຺ຑໍ ໂຫຕິ, ອຕ຺ຕໂນ ອຕ຺ຖາຍ ຄເຫຕ຺ວາ ປຏິສາເມຕພ຺ພນ຺ຕິ ອາຫ ‘‘ຕາທິສໍ ປນາ’’ຕິອາທິ. ຕາທິສນ຺ຕິ ຍໍ ມາຕາປິຕູນໍ ສນ຺ຕກໍ ອວສ຺ສໍ ປຏິສາເມຕພ຺ພໍ ກປ຺ປິຍຠຓ຺ຑໍ, ຕາທິສໍ. ຉນ຺ເທນປິ ຠເຍນປີຕິ ວຑ຺ຒກິອາທີສຸ ຉນ຺ເທນປິ, ຣາຊວລ຺ລເຠສຸ ຠເຍນປິ.

ຕາທິເສ ຐາເນຕິ ມຫາວິຫາຣສທິສສ຺ສ ມຫາຣາມສ຺ສ ປາກາຣປຣິກ຺ຂິຕ຺ເຕ ປຣິເວເຓ. ສຎ຺ຎາຓໍ ກຕ຺ວາຕິ ‘‘ເອຕ຺ຕກາ ກຫາປຓາ’’ຕິອາທິນາ ຣູເປນ ວາ ລຎ຺ຉນາທິນິມິຕ຺ເຕນ ວາ ສຎ຺ຎາຓໍ ກຕ຺ວາ, ສລ຺ລກ຺ເຂຕ຺ວາຕິ ອຕ຺ໂຖ. ປຕິຣູປານໍ ຠິກ຺ຂູນໍ ຫຕ຺ເຖຕິ ລຊ຺ຊີນໍ ກຸກ຺ກຸຈ຺ຈການໍ ຠິກ຺ຂູນໍ ຫຕ຺ເຖ. ໂລລຊາຕິການຎ຺ຫິ ຫຕ຺ເຖ ຐເປຕຸໍ ນ ລພ຺ຠຕິ. ເນວ ປກ຺ກມຕີຕິ ເນວ ຕມ຺ຫາ ອາວາສາ ປກ຺ກມຕິ. ‘‘ຖາວຣໍ ເສນາສນໍ ວາ’’ຕິອາທິນາ ອຕ຺ຕໂນ ຈີວຣາທິມູລໍ ນ ກາຕພ຺ພນ຺ຕິ (ປາຈິ. ອຏ຺ຐ. ໕໐໖) ທສ຺ເສຕິ. ຕໍ ທສ຺ເສຕ຺ວາຕິ ຍໍ ຖາວຣເສນາສນາທິ ກຕໍ, ຕໍ ອຸປາສກ ຕວ ສນ຺ຕເກນ ອິທໍ ນາມ ກຕນ຺ຕິ ເອວໍ ທສ຺ເສຕ຺ວາ. ສມາທເປຕ຺ວາຕິ ອຎ຺ຎໍ ສມາທເປຕ຺ວາ, ‘‘ອຸທ຺ທິສ຺ສ ອຣິຍາ ຕິຏ຺ຐນ຺ຕິ, ເອສາ ອຣິຍານ ຍາຈນາ’’ຕິ ວຸຕ຺ຕນເຍນ ຍາຈິຕ຺ວາຕິ ອຕ຺ໂຖ.

ອນຸຎ຺ຎາຕຏ຺ຐາເນຕິ ອຊ຺ຌາຣາມອຊ຺ຌາວສເຖ. ອາມາສນ຺ຕິ ອາມສິຕພ຺ພຎ຺ເຈວ ປຏິສາເມຕພ຺ພຎ຺ຈ ວຕ຺ຖາທິ.

ຣຕນສິກ຺ຂາປທວຓ຺ຓນາ ນິຏ຺ຐິຕາ.

໓. ວິກາລຄາມປ຺ປເວສນສິກ຺ຂາປທວຓ຺ຓນາ

ຈາຣິຕ຺ເຕຕິ ຈາຣິຕ຺ຕສິກ຺ຂາປເທ. ອຸປຈາຣນ຺ຕິ ທຸຕິຍເລຑ຺ຑຸປາຕໍ. ອຎ຺ຎໍ ຄາມໍ ຄຈ຺ຉນ຺ຕານໍ ປຸນ ອາປຸຈ຺ຉນກິຈ຺ຈໍ ນຕ຺ຖີຕິ ອຸສ຺ສາຫໍ ອປ຺ປຏິປ຺ປສ຺ສມ຺ເຠຕ຺ວາ ອຎ຺ຎໍ ຄາມໍ ຄຈ຺ຉນ຺ຕານໍ ຄາມສຕມ຺ປິ ໂຫຕຸ, ປຸນ ອາປຸຈ຺ຉນກິຈ຺ຈໍ ນຕ຺ຖີຕິ ອຕ຺ໂຖ. ເຕນາຫ ‘‘ສເຈ ປນາ’’ຕິອາທິ. ອຸສ຺ສາຫນ຺ຕິ ຄາມປ຺ປວິສນຸສ຺ສາຫໍ. ອນ຺ຕຣາຣາມາທີສຸ (ປາຈິ. ອຏ຺ຐ. ໕໑໕) ນ ເກວລໍ ອນາປຸຈ຺ຉາ ຄຈ຺ຉນ຺ຕສ຺ເສວ, ກາຍພນ຺ຘນໍ ອພນ຺ຘິຕ຺ວາ ສງ຺ຆາຏິໍ ອປາຣຸປິຕ຺ວາ ຄຈ຺ຉນ຺ຕສ຺ສາປິ ອນາປຕ຺ຕິ. ອາປທາສູຕິ ສີໂຫ ວາ ພ຺ຍຄ຺ໂຆ ວາ ອາຄຈ຺ຉຕິ, ເມໂຆ ວາ ອຸຏ຺ເຐຕິ, ອຎ຺ໂຎ ວາ ໂກຈິ ອຸປທ຺ທໂວ ອຸປ຺ປຊ຺ຊຕິ, ອນາປຕ຺ຕິ. ເອວຣູປາສຸ ອາປທາສຸ ພຫິຄາມໂຕ ອນ຺ໂຕຄາມໍ ປວິສິຕຸໍ ວຏ຺ຏຕິ.

ວິກາລຄາມປ຺ປເວສນສິກ຺ຂາປທວຓ຺ຓນາ ນິຏ຺ຐິຕາ.

໔. ສູຈິຆຣສິກ຺ຂາປທວຓ຺ຓນາ

ຕໍ ອສ຺ສ ອຕ຺ຖີຕິ (ສາຣຕ຺ຖ. ຏີ. ປາຈິຕ຺ຕິຍ ໓.໕໑໗) ປຐມໍ ຠິນ຺ທິຕ຺ວາ ປຈ຺ຉາ ເທເສຕພ຺ພຕ຺ຕາ ຕໍ ເຠທນກໍ ອສ຺ສ ປາຈິຕ຺ຕິຍສ຺ສ ອຕ຺ຖີຕິ.

ອຣຓິເກຕິ ອຣຓິຘນຸເກ. ວິເຘຕິ ເວຘເກ. ວາສິຊເຏຕິ ວາສິທຓ຺ຑເກ ຈ.

ສູຈິຆຣສິກ຺ຂາປທວຓ຺ຓນາ ນິຏ຺ຐິຕາ.

໕. ມຎ຺ຈປີຐສິກ຺ຂາປທວຓ຺ຓນາ

ອຏ຺ຐງ຺ຄຸລປາທກນ຺ຕິ ຠາວນປຸໍສກນິທ຺ເທໂສ. ‘‘ເຉທນກໍ ເຠທນກສທິສເມວາ’’ຕິ ອິມິນາ ‘‘ເຉທນເມວ ເຉທນກໍ, ຕໍ ອສ຺ສ ອຕ຺ຖີຕິ ເຉທນກ’’ນ຺ຕິ ອິມມຕ຺ຖໍ ອຕິທິສຕິ.

ຍຖາ ປມາຓເມວ ອຸປຣິ ທິສ຺ສຕິ, ເອວໍ ນິຂຓິຕ຺ວາ ວາຕິ ສເຈ ປນ ນ ຉິນ຺ທິຕຸກາໂມ ໂຫຕິ, ຍຖາ ປມາຓເມວ ອຸປຣິ ທິສ຺ສຕິ, ເອວໍ ຠູມິຍໍ ນິຂຓິຕ຺ວາ ວາ. ອຏ຺ຏກໍ ວາ ພນ຺ຘິຕ຺ວາຕິ ອຸກ຺ຂິປິຕ຺ວາ ຕຸລາສງ຺ຆາເຕ ຐເປຕ຺ວາ ອຏ຺ຏໍ ກຕ຺ວາ.

ມຎ຺ຈປີຐສິກ຺ຂາປທວຓ຺ຓນາ ນິຏ຺ຐິຕາ.

໖. ຕູໂລນທ຺ຘສິກ຺ຂາປທວຓ຺ຓນາ

ຈິມິລິກໍ ປຕ຺ຖຣິຕ຺ວາ ຕູລໍ ປກ຺ຂິປິຕ຺ວາຕິ ມຎ຺ຈປີຐານໍ ອຸປຣິ ຈິມິລິກໍ ປຕ຺ຖຣິຕ຺ວາ ຕສ຺ສ ອຸປຣິ ຕູລໍ ປກ຺ຂິປິຕ຺ວາຕິ ອຕ຺ໂຖ. ອຸປຣິ ຈິມິລິກາຍາຕິ ອຸປຣິມຠາເຄ ຈິມິລິກາຍ.

ສີສປ຺ປມາຓນ຺ຕິ (ຈູຬວ. ອຏ຺ຐ. ໒໙໗; ສາຣຕ຺ຖ. ຏີ. ຈູຬວຄ຺ຄ ໓.໒໙໗) ຍຕ຺ຖ ຄລວາຏກໂຕ ປຏ຺ຐາຍ ສພ຺ພສີສໍ ອຸປທຫນ຺ຕິ, ຕໍ ສີສປ຺ປມາຓໍ. ຕຎ຺ຈ ອຸກ຺ກຏ຺ຐປຣິຈ຺ເຉທໂຕ ຕິຣິຍໍ ມຸຏ຺ຐິຣຕນໍ ໂຫຕິ, ທີຆໂຕ ທ຺ວິຣຕນນ຺ຕິ ທສ຺ເສຕຸໍ ‘‘ຍສ຺ສ ວິຕ຺ຖາຣໂຕ ຕີສຸ ໂກເຓສູ’’ຕິອາທິມາຫ. ທ຺ວິນ຺ນໍ ອນ຺ຕຣໍ ວິທຕ຺ຖິ ຈຕຸຣງ຺ຄຸລໍ ໂຫຕີຕິ ທ຺ວິນ຺ນໍ ໂກຓານໍ ອນ຺ຕຣໍ ມິນິຍມານໍ ວິທຕ຺ຖິ ເຈວ ຈຕຸຣງ຺ຄຸລຎ຺ຈ ໂຫຕິ. ມຊ຺ເຌ ມຸຏ຺ຐິຣຕນນ຺ຕິ ພິພ຺ໂພຫນສ຺ສ ມຊ຺ຌໍ ຕິຣິຍໂຕ ມຸຏ຺ຐິຣຕນປ຺ປມາຓໍ ໂຫຕິ. ອຍຎ຺ຫິ ສີສປ຺ປມາຓສ຺ສ ອຸກ຺ກຏ຺ຐປຣິຈ຺ເຉໂທ. ຕໂຕ ອຸທ຺ຘໍ ນ ວຏ຺ຏຕິ, ເຫຏ຺ຐາ ວຏ຺ຏຕິ. ອຄິລານສ຺ສ ສີສູປຘານຎ຺ຈ ປາທູປຘານຎ຺ຈາຕິ ທ຺ວຍເມວ ວຏ຺ຏຕິ. ຄິລານສ຺ສ ພິພ຺ໂພຫນານິ ສນ຺ຖຣິຕ຺ວາ ອຸປຣິ ປຈ຺ຈຕ຺ຖຣຓໍ ທຕ຺ວາ ນິປຊ຺ຊິຕຸມ຺ປິ ວຏ຺ຏຕິ.

ຕູໂລນທ຺ຘສິກ຺ຂາປທວຓ຺ຓນາ ນິຏ຺ຐິຕາ.

໗. ນິສີທນສິກ຺ຂາປທວຓ຺ຓນາ

ສຕ຺ຕມໍ ອຸຕ຺ຕານເມວ.

ນິສີທນສິກ຺ຂາປທວຓ຺ຓນາ ນິຏ຺ຐິຕາ.

໘. ກຓ຺ຑຸປ຺ປຏິຈ຺ຉາທິສິກ຺ຂາປທວຓ຺ຓນາ

ອໂຘນາຠິອຸພ຺ຠຊາຓຸມຓ຺ຑລນ຺ຕິ ນາຠິຍາ ເຫຏ຺ຐາ ຊາຓຸມຓ຺ຑລານໍ ອຸປຣິ. ກຓ຺ຑຸປີຬກອສ຺ສາວຖຸລ຺ລກຈ຺ຉາພາຘານນ຺ຕິ ເອຕ຺ຖ ກຓ຺ຑູຕິ ກຈ຺ຉຸ. ປີຬກາຕິ ໂລຫິຕຕຸຓ຺ຑິກາ ສຸຂຸມປີຬກາ. ອສ຺ສາໂວຕິ ອຣິສຠຄນ຺ທລມຘຸເມຫານໍ ວເສນ ອສຸຈິປຄ຺ຆຣຓໍ. ຖຸລ຺ລກຈ຺ຉາພາໂຘຕິ ມຫາປີຬກາພາໂຘ ວຸຈ຺ຈຕິ.

ກຓ຺ຑຸປ຺ປຏິຈ຺ຉາທິສິກ຺ຂາປທວຓ຺ຓນາ ນິຏ຺ຐິຕາ.

໙-໑໐. ວສ຺ສິກສາຏິກນນ຺ທສິກ຺ຂາປທວຓ຺ຓນາ

ນວມໍ ທສມຎ຺ຈ ອຸຕ຺ຕານເມວ.

ວສ຺ສິກສາຏິກນນ຺ທສິກ຺ຂາປທວຓ຺ຓນາ ນິຏ຺ຐິຕາ.

ຣຕນວຄ຺ໂຄ ນວໂມ.

ອິຕິ ກງ຺ຂາວິຕຣຓິຍາ ປາຕິໂມກ຺ຂວຓ຺ຓນາຍ

ວິນຍຕ຺ຖມຎ຺ຊູສາຍໍ ລີນຕ຺ຖປ຺ປກາສນິຍໍ

ປາຈິຕ຺ຕິຍວຓ຺ຓນາ ນິຏ຺ຐິຕາ.