໔. ປຫາຣສິກ຺ຂາປທວຓ຺ຓນາ

ປຫາຣໍ ທເທຍ຺ຍາຕິ ອນ຺ຕມໂສ ອຸປ຺ປລປຕ຺ຕໍ ອຸປາທາຍ ກາຍກາຍປ຺ປຏິພທ຺ຘນິສ຺ສຄ຺ຄິຍານໍ ອຎ຺ຎຕເຣນ ປຫາຣໍ ທເທຍ຺ຍ. ເອວໍ ປນ ປຫາເຣ ທິນ຺ເນ ຫຕ຺ໂຖ ວາ ຠິຊ຺ຊຕຸ, ປາໂທ ວາ ສີສໍ ວາ, ມຣຕຸ ວາ, ປາຈິຕ຺ຕິຍເມວ. ເຕນາຫ ‘‘ປຫຣິຕຸກາມຕາຍາ’’ຕິອາທິ.

ອນຸປສມ຺ປນ຺ເນຕິ ຄຫຏ຺ເຐ ວາ ປພ຺ພຊິເຕ ວາ ອິຕ຺ຖິຍາ ວາ ປຸຣິເສ ວາ ອນ຺ຕມໂສ ຕິຣຈ຺ຉານຄເຕປິ. ສເຈ ປນ ຣຕ຺ຕຈິຕ຺ໂຕ ອິຕ຺ຖິໍ ປຫຣຕິ, ສງ຺ຆາທິເສໂສ. ເກນຈິ ວິເຫຐິຍມານສ຺ສາຕິ ມນຸສ຺ເສນ ວາ ຕິຣຈ຺ຉານຄເຕນ ວາ ວິເຫຐິຍມານສ຺ສ. ໂມກ຺ຂາຘິປ຺ປາຍສ຺ສາຕິ ຕໂຕ ອຕ຺ຕໂນ ໂມກ຺ຂໍ ປຕ຺ຖຍມານສ຺ສ. ສເຈປິ ອນ຺ຕຣາມຄ຺ເຄ (ປາຈິ. ອຏ຺ຐ. ໔໕໓) ໂຈຣໍ ວາ ປຈ຺ຈຕ຺ຖິກໍ ວາ ວິເຫເຐຕຸກາມໍ ທິສ຺ວາ ‘‘ອຸປາສກ, ເອຕ຺ເຖວ ຕິຏ຺ຐ, ມາ ອາຄມິຕ຺ຖາ’’ຕິ ວຕ຺ວາ ວຈນໍ ອນາທິຍິຕ຺ວາ ອາຄຈ຺ຉນ຺ຕໍ ‘‘ຄຈ຺ຉ ເຣ’’ຕິ ມຸຄ຺ຄເຣນ ວາ ສຕ຺ຖເກນ ວາ ປຫຣິຕ຺ວາ ຍາຕິ, ໂສ ເຈ ເຕນ ປຫາເຣນ ມຣຕິ, ອນາປຕ຺ຕິເຍວ. ວາຬມິເຄສຸປິ ເອເສວ ນໂຍ.

ປຫາຣສິກ຺ຂາປທວຓ຺ຓນາ ນິຏ຺ຐິຕາ.