໙. ອຸກ຺ຂິຕ຺ຕສມ຺ໂຠຄສິກ຺ຂາປທວຓ຺ຓນາ

ອກຕານຸຘມ຺ເມນາຕິ ອຸກ຺ຂິປິຕ຺ວາ ອໂນສາຣິເຕນ. ເຕນາຫ ‘‘ອນຸຘມ຺ໂມ ວຸຈ຺ຈຕີ’’ຕິອາທິ. ເອຕ຺ຖ ອນຸຘມ຺ໂມຕິ ໂອສາຣຓາ ວຸຈ຺ຈຕີຕິ ສມ຺ພນ຺ໂຘ. ອຸກ຺ເຂປນີຍກມ຺ມສ຺ສານຸຣູໂປ, ປຈ຺ຉາ ກຕ຺ຕພ຺ໂພ ວາ ຘມ຺ໂມຕິ ອນຸຘມ຺ໂມ. ອນຸໂລມວຕ຺ຕໍ ທິສ຺ວາຕິ ‘‘ນ ອຸປສມ຺ປາເທຕພ຺ພໍ, ນ ນິສ຺ສໂຍ ທາຕພ຺ໂພ’’ຕິອາທິກໍ (ຈູຬວ. ໗໐) ອຏ຺ຐາຣສວິຘໍ ວຕ຺ຕໍ ທິສ຺ວາ, ເອເຕສຸ ອຏ຺ຐາຣສສຸ ອນຸໂລມວຕ຺ເຕສຸ ວຕ຺ຕນ຺ຕໍ ທິສ຺ວາຕິ ອຘິປ຺ປາໂຍ. ອາມິສສມ຺ໂຠຄໍ ວາ ຘມ຺ມສມ຺ໂຠຄໍ ວາຕິ ເອຕ຺ຖ ຍໍ ກິຎ຺ຈິ ອາມິສສ຺ສ ທານໍ, ປຏິຄ຺ຄຫຓຎ຺ຈ ອາມິສສມ຺ໂຠໂຄ. ຘມ຺ມສ຺ສ ອຸທ຺ທິສນໍ, ອຸທ຺ທິສາປນຎ຺ຈ ຘມ຺ມສມ຺ໂຠໂຄ. ສໍວເສຍ຺ຍາຕິ ‘‘ອຸໂປສຖໍ ວາ ປວາຣຓໍ ວາ ສງ຺ຆກມ຺ມໍ ວາ’’ຕິ (ປາຈິ. ໔໒໕) ເອວໍ ປທຠາຊນິຍໍ ວຸຕ຺ຕໍ ຕິວິຘໍ ສໍວາສໍ ກເຣຍ຺ຍ. ຍສ຺ມາ ປເນຕ຺ຖ ອຸໂປສຖປວາຣຓາປິ ສງ຺ເຆຫິເຍວ ກາຕພ຺ພຕ຺ຕາ ສງ຺ຆກມ຺ມານິເຍວ ໂຫນ຺ຕິ, ຕສ຺ມາ ‘‘ອຸໂປສຖາທິກໍ ສງ຺ຆກມ຺ມໍ ກເຣຍ຺ຍາ’’ຕິ ວຸຕ຺ຕໍ. ປໂຍເຄ ປໂຍເຄຕິ ທາເນ ທາເນ, ຄຫເຓ ຄຫເຓ ຈາຕິ ອຕ຺ໂຖ.

ປຓ຺ຓຕ຺ຕິໍ ອຊານນ຺ເຕນ ອຣຫຕາປິ ກິຣິຍາພ຺ຍາກຕຈິຕ຺ເຕນ ອາປຊ຺ຊິຕພ຺ພຕ຺ຕາ ‘‘ຕິຈິຕ຺ຕ’’ນ຺ຕິ ວຸຕ຺ຕໍ.

ອຸກ຺ຂິຕ຺ຕສມ຺ໂຠຄສິກ຺ຂາປທວຓ຺ຓນາ ນິຏ຺ຐິຕາ.