໔. ທຸຏ຺ຐຸລ຺ລສິກ຺ຂາປທວຓ຺ຓນາ

ຈຕ຺ຕາຣິ ປາຣາຊິການິ ອຕ຺ຖຸທ຺ຘາຣວເສນ ປທຠາຊນິຍໍ ທສ຺ສິຕານີຕິ ອາຫ ‘‘ທຸຏ຺ຐຸລ຺ລນ຺ຕິ ສງ຺ຆາທິເສສໍ ອຘິປ຺ເປຕ’’ນ຺ຕິ. ເຍນ ເກນຈິ ອຸປາເຍນາຕິ ‘‘ສາມໍ ວາ ຊານາຕິ, ອຎ຺ເຎ ວາ ຕສ຺ສ ອາໂຣເຈນ຺ຕິ, ໂສ ວາ ອາໂຣເຈຕີ’’ຕິ (ປາຈິ. ໓໙໙) ວຸຕ຺ເຕສຸ ເຍນ ເກນຈິ ອຸປາເຍນ. ປາຈິຕ຺ຕິຍໍ ຘຸຣໍ ນິກ຺ຂິຕ຺ຕມຕ຺ເຕເຍວາຕິ ອຘິປ຺ປາໂຍ. ສເຈ ປຈ຺ຉາປິ ອາໂຣເຈຕິ, ຘຸຣນິກ຺ເຂປເນ ອາປຕ຺ຕິໂຕ ນ ມຸຈ຺ຈຕິ. ເຕນາຫ ‘‘ສເຈປີ’’ຕິອາທິ. ສມຓສຕມ຺ປິ ອາປຊ຺ຊຕິເຍວາຕິ ສມຓສຕມ຺ປິ ສຸຕ຺ວາ ຍທິ ຉາເທຕິ, ປາຈິຕ຺ຕິຍໍ ອາປຊ຺ຊຕິເຍວາຕິ ອຕ຺ໂຖ. ເຍນສ຺ສ ອາໂຣຈິຕນ຺ຕິ ເຍນ ທຸຕິເຍນ ອສ຺ສ ຕຕິຍສ຺ສ ອາໂຣຈິຕໍ. ຕສ຺ເສວາຕິ ຕສ຺ສ ທຸຕິຍສ຺ເສວ. ອາໂຣເຈຕີຕິ ປຏິຈ຺ຉາທນຕ຺ຖເມວ ‘‘ມາ ກສ຺ສຈິ ອາໂຣເຈສີ’’ຕິ ວທຕິ. ໂກຏິຉິນ຺ນາ ໂຫຕີຕິ (ສາຣຕ຺ຖ. ຏີ. ປາຈິຕ຺ຕິຍ ໓.໓໙໙) ຍສ຺ມາ ປຏິຈ຺ຉາທນປຈ຺ຈຍາ ອາປຕ຺ຕິໍ ອາປຊ຺ຊິຕ຺ວາວ ທຸຕິເຍນ ຕຕິຍສ຺ສ ອາໂຣຈິຕໍ, ຕສ຺ມາ ຕປ຺ປຈ຺ຈຍາ ປຸນ ເຕນ ອາປຊ຺ຊິຕພ຺ພາປຕ຺ຕິຍາ ອຠາວໂຕ ອາປຕ຺ຕິຍາ ໂກຏິ ຉິນ຺ນາ ນາມ ໂຫຕິ.

ອາທິປເທຕິ ທຸຏ຺ຐຸລ຺ລາປຕ຺ຕິສຎ຺ຎີ, ເວມຕິໂກ, ອທຸຏ຺ຐຸລ຺ລາປຕ຺ຕິສຎ຺ຎີຕິ ອິເມສຸ ຕີສຸ ‘‘ທຸຏ຺ຐຸລ຺ລາປຕ຺ຕິສຎ຺ຎີ ປຏິຈ຺ຉາເທຕີ’’ຕິ (ປາຈິ. ໔໐໐) ອິມສ຺ມິໍ ປຐມປເທ. ອິຕເຣສຸ ທ຺ວີສູຕິ ‘‘ເວມຕິໂກ ປຏິຈ຺ຉາເທຕິ, ອທຸຏ຺ຐຸລ຺ລາປຕ຺ຕິສຎ຺ຎີ ປຏິຈ຺ຉາເທຕີ’’ຕິ ອິເມສຸ ປເທສຸ. ອທຸຏ຺ຐຸລ຺ລາຍາຕິ ອວເສສປຎ຺ຈາປຕ຺ຕິກ຺ຂນ຺ເຘ. ອນຸປສມ຺ປນ຺ນສ຺ສ ທຸຏ຺ຐຸລ຺ເລ ວາ ອທຸຏ຺ຐຸລ຺ເລ ວາ ອຊ຺ຌາຈາເຣຕິ ອນຸປສມ຺ປນ຺ນສ຺ສ ປຸຣິມປຎ຺ຈສິກ຺ຂາປທວີຕິກ຺ກມສງ຺ຂາເຕ ທຸຏ຺ຐຸລ຺ເລ ວາ ອິຕຣສ຺ມິໍ ອທຸຏ຺ຐຸລ຺ເລ ວາ ອຊ຺ຌາຈາເຣ. ຍໍ ປນ ສມນ຺ຕປາສາທິກາຍໍ ‘‘ອນຸປສມ຺ປນ຺ນສ຺ສ ສຸກ຺ກວິສຏ຺ຐິ ຈ ກາຍສໍສຄ຺ໂຄ ຈາຕິ ອຍໍ ທຸຏ຺ຐຸລ຺ລອຊ຺ຌາຈາໂຣ ນາມາ’’ຕິ (ປາຈິ. ອຏ຺ຐ. ໔໐໐) ວຸຕ຺ຕໍ, ຕໍ ທຸຏ຺ຐຸລ຺ລາໂຣຈນສິກ຺ຂາປທຏ຺ຐກຖາຍ (ປາຈິ. ອຏ຺ຐ. ໗໘ ອາທໂຍ) ນ ສເມຕິ, ນ ຈາປິ ເອວໍ ວຕ຺ຕຸໍ ຍຸຊ຺ຊຕິ ‘‘ອາໂຣຈເນ ອນຸປສມ຺ປນ຺ນສ຺ສ ທຸຏ຺ຐຸລ຺ລໍ ອຎ຺ຎຖາ ອຘິປ຺ເປຕໍ, ປຏິຈ຺ຉາທເນ ອຎ຺ຎຖາ’’ຕິ (ສາຣຕ຺ຖ. ຏີ. ປາຈິຕ຺ຕິຍ ໔໐໐) ວິເສສກາຣຓສ຺ສານຸປລພ຺ຠນໂຕ, ຕສ຺ມາ ຕໍ ອຸປປຣິກ຺ຂິຕພ຺ພໍ.

ທຸຏ຺ຐຸລ຺ລສິກ຺ຂາປທວຓ຺ຓນາ ນິຏ຺ຐິຕາ.