໖. ສຸຣາປານວຄ຺ໂຄ

໑. ສຸຣາປານສິກ຺ຂາປທວຓ຺ຓນາ

ປິຏ຺ຐາທີຫິ ກຕໍ ມຊ຺ຊໍ ສຸຣາຕິ ປິຏ຺ຐປູວໂອທນກິຓ຺ຓສມ຺ຠາເຣຫິ ກຕໍ ມຊ຺ຊໍ ສຸຣາຕິ ອຕ຺ໂຖ. ອິທໍ ວຸຕ຺ຕໍ ໂຫຕິ – ປິຏ຺ຐສຸຣາ, ປູວສຸຣາ, ໂອທນສຸຣາ, ກິຓ຺ຓປກ຺ຂິຕ຺ຕາ, ສມ຺ຠາຣສໍຍຸຕ຺ຕາຕິ (ປາຈິ. ໓໒໘) ອິມານິ ປຎ຺ຈ ສຸຣາ ນາມາຕິ. ຕຕ຺ຖ ປິຏ຺ຐໍ ຠາຊເນ ປກ຺ຂິປິຕ຺ວາ ຕຊ຺ຊໍ ອຸທກໍ ທຕ຺ວາ ມທ຺ທິຕ຺ວາ ກຕາ ປິຏ຺ຐສຸຣາ (ສາຣຕ຺ຖ. ຏີ. ປາຈິຕ຺ຕິຍ ໓.໓໒໖-໓໒໘). ເອວໍ ເສສາສຸປິ. ກິຓ຺ຓາຕິ ປນ ຕສ຺ສາ ສຸຣາຍ ພີຊໍ ວຸຈ຺ຈຕິ. ເຍ ‘‘ສຸຣາໂມທກາ’’ຕິປິ ວຸຈ຺ຈນ຺ຕິ, ເຕ ປກ຺ຂິປິຕ຺ວາ ກຕາ ກິຓ຺ຓປກ຺ຂິຕ຺ຕາ. ຫຣີຕກິສາສປາທິນານາສມ຺ຠາເຣຫິ ສໍໂຍຊິຕາ ສມ຺ຠາຣສໍຍຸຕ຺ຕາ.

ປຸປ຺ຜາທີຫິ ກໂຕ ອາສໂວ ເມຣຍນ຺ຕິ ປຸປ຺ຜຜລມຘຸຄຸຬສມ຺ຠາເຣຫິ ກໂຕ ຈິຣປຣິວາສິໂຕ ເມຣຍນ຺ຕິ ອຕ຺ໂຖ. ອິທໍ ວຸຕ຺ຕໍ ໂຫຕິ – ປຸປ຺ຜາສໂວ, ຜລາສໂວ, ມຘ຺ວາສໂວ, ຄຸຬາສໂວ, ສມ຺ຠາຣສໍຍຸຕ຺ໂຕຕິ ປຎ຺ຈເມຣຍໍ ນາມາຕິ. ຕຕ຺ຖ ມຘຸກຕາລນາຬິເກຣາທິ ປຸປ຺ຜຣໂສ ຈິຣປຣິວາສິໂຕ ປຸປ຺ຜາສໂວ. ປນສາທິຜລຣໂສ ຜລາສໂວ. ມຸທ຺ທິກາຣໂສ ມຘ຺ວາສໂວ. ສມນ຺ຕປາສາທິກາຍໍ ປນ ‘‘ຜລາສໂວ ນາມ ມຸທ຺ທິກາຜລາທີນິ ມທ຺ທິຕ຺ວາ ເຕສໍ ຣເສນ ກໂຕ. ມຘ຺ວາສໂວ ນາມ ມຸທ຺ທິການໍ ຊາຕິຣເສນ ກໂຕ, ມກ຺ຂິກາມຘຸນາປິ ກຣີຍຕີຕິ ວທນ຺ຕີ’’ຕິ (ປາຈິ. ອຏ຺ຐ. ໓໒໘) ວຸຕ຺ຕໍ. ອຸຈ຺ຉຸຣໂສ ຄຸຬາສໂວ. ຫຣີຕກາມລກກຏຸກຠຓ຺ຑາທິນານາສມ຺ຠາຣານໍ ຣໂສ ຈິຣປຣິວາສິໂຕ ສມ຺ຠາຣສໍຍຸຕ຺ໂຕ. ເອຕ຺ຖ ຈ ສຸຣາຍ, ເມຣຍສ຺ສ ຈ ສມາເນປິ ສມ຺ຠາຣສໍໂຍເຄ ມທ຺ທິຕ຺ວາ ກຕາ ສຸຣາ, ຈິຣປຣິວາສິຕມຕ຺ເຕນ ເມຣຍນ຺ຕິ ເອວມິເມສໍ ນານາກຣຓໍ ທຏ຺ຐພ຺ພໍ. ພີຊໂຕ ປຏ຺ຐາຍາຕິ ສມ຺ຠາເຣ ປຏິຍາເທຕ຺ວາ ຈາຏິຍໍ ປກ຺ຂິຕ຺ຕກາລໂຕ ເຈວ ຕາລນາຬິເກຣາທີນໍ ປຸປ຺ຜຣສສ຺ສ ອຠິນວກາລໂຕ ຈ ປຏ຺ຐາຍ.

ໂລຓໂສວີຣກໍ ວາ ສຸຕ຺ຕໍ ວາຕິ ອິເມ ທ຺ເວ ອເນເກຫິ ເຠສຊ຺ເຊຫິ ອຠິສງ຺ຂຕາ ອາສວວິເສສາ. ວາສຄ຺ຄາຫາປນຕ຺ຖນ຺ຕິ ສຸຄນ຺ຘຠາວຄາຫາປນຕ຺ຖໍ. ວຕ຺ຖຸໍ ອຊານນຕາຍ ເຈຕ຺ຖ ອຈິຕ຺ຕກຕາ ເວທິຕພ຺ພາ. ອກຸສເລເນວ ປາຕພ຺ພຕາຍ ໂລກວຊ຺ຊໍ. ຍໍ ປເນຕ຺ຖ ວຕ຺ຕພ຺ພໍ ສິຍາ, ຕໍ ສພ຺ພໍ ປຐມປາຣາຊິກວຓ຺ຓນາຍ ວຸຕ຺ຕນຍເມວ.

ສຸຣາປານສິກ຺ຂາປທວຓ຺ຓນາ ນິຏ຺ຐິຕາ.

໒. ອງ຺ຄຸລິປໂຕທກສິກ຺ຂາປທວຓ຺ຓນາ

ຫສາຘິປ຺ປາຍສ຺ສາຕິ ຂິຑ຺ຑາຘິປ຺ປາຍສ຺ສ, ອິມິນາ ກາຍສໍສຄ຺ຄາຘິປ຺ປາຍໍ ປຏິກ຺ຂິປຕິ.

ເອຕ຺ຖ ຈ ຠິກ຺ຂຸນິມ຺ປິ ຫສາຘິປ຺ປາເຍນ ຜຸສໂຕ ຠິກ຺ຂຸສ຺ສ ທຸກ຺ກຏໍ. ຕຖາ ຠິກ຺ຂຸມ຺ປິ ຜຸສນ຺ຕິຍາ ຠິກ຺ຂຸນິຍາຕິ ອາຫ ‘‘ອິຘ ປນ ຠິກ຺ຂຸນີປິ ຠິກ຺ຂຸສ຺ສ, ຠິກ຺ຂຸ ຈ ຠິກ຺ຂຸນິຍາ ອນຸປສມ຺ປນ຺ໂນ ເອວາ’’ຕິ. ກາຍປ຺ປຏິພທ຺ຘາທີສຸ ສພ຺ພຕ຺ຖາຕິ ‘‘ກາເຍນ ກາຍປ຺ປຏິພທ຺ເຘ, ກາຍປ຺ປຏິພທ຺ເຘນ ກາເຍ, ກາຍປ຺ປຏິພທ຺ເຘນ ກາຍປ຺ປຏິພທ຺ເຘ, ນິສ຺ສຄ຺ຄິເຍນ ກາເຍ, ນິສ຺ສຄ຺ຄິເຍນ ກາຍປ຺ປຏິພທ຺ເຘ, ນິສ຺ສຄ຺ຄິເຍນ ນິສ຺ສຄ຺ຄິເຍ’’ຕິ (ປາຈິ. ໓໓໒) ສພ຺ພຕ຺ຖ. ສຕິ ກຣຓີເຍ ອາມສໂຕຕິ ສຕິ ກຣຓີເຍ ປຸຣິສໍ ອາມສໂຕ ອນາປຕ຺ຕິ. ອິຕ຺ຖີ ປນ ສຕິ ກຣຓີເຍປິ ອາມສິຕຸໍ ນ ວຏ຺ຏຕິ.

ອງ຺ຄຸລິປໂຕທກສິກ຺ຂາປທວຓ຺ຓນາ ນິຏ຺ຐິຕາ.

໓. ຫສຘມ຺ມສິກ຺ຂາປທວຓ຺ຓນາ

ອຸປຣິໂຄປ຺ຜເກຕິ ໂຄປ຺ຜການໍ ອຸປຣິຠາຄປ຺ປມາເຓ. ຫສາຘິປ຺ປາໂຍຕິ ກີຬາຘິປ຺ປາໂຍ. ເຍນ ເຍນ ອງ຺ເຄນາຕິ ຫຕ຺ຖປາທາທີສຸ ເຍນ ເຍນ ອງ຺ເຄນ. ຕຖາ ນາວາຍ ກີຬໂຕຕິ ຜິຍາຣິຕ຺ຕາທີຫິ ນາວໍ ປາເຊນ຺ຕສ຺ສ ວາ ຕີເຣ ອຸສ຺ສາເຣນ຺ຕສ຺ສ ວາ ທຸກ຺ກຏນ຺ຕິ ອຕ຺ໂຖ.

ຫສຘມ຺ມສິກ຺ຂາປທວຓ຺ຓນາ ນິຏ຺ຐິຕາ.

໔. ອນາທຣິຍສິກ຺ຂາປທວຓ຺ຓນາ

ທຸວິຘຎ຺ເຫຕ຺ຖ ອນາທຣິຍໍ ປຸຄ຺ຄລານາທຣິຍຎ຺ຈ ຘມ຺ມານາທຣິຍຎ຺ຈາຕິ ອາຫ ‘‘ປຸຄ຺ຄລສ຺ສ ວາ’’ຕິອາທິ. ຕຕ຺ຖ ໂຍ ຠິກ຺ຂຸ ອຸປສມ຺ປນ຺ເນນ ປຎ຺ຎຕ຺ເຕນ ວຸຈ຺ຈມາໂນ ‘‘ອຍໍ ອຸກ຺ຂິຕ຺ຕໂກ ວາ ວມ຺ຠິໂຕ ວາ ຄຣຫິໂຕ ວາ, ອິມສ຺ສ ວຈນໍ ອກຕໍ ຠວິສ຺ສຕີ’’ຕິ (ປາຈິ. ໓໔໒) ອນາທຣິຍໍ ກໂຣຕິ, ອຍໍ ປຸຄ຺ຄເລ ອນາທຣິຍໍ ກໂຣຕິ ນາມ. ໂຍ ປນ ປຎ຺ຎຕ຺ເຕນ ວຸຈ຺ຈມາໂນ ‘‘ກຖາຍໍ ນສ຺ເສຍ຺ຍ ວາ ວິນສ຺ເສຍ຺ຍ ວາ ອນ຺ຕຣຘາເຍຍ຺ຍ ວາ’’ຕິ, ຕໍ ວາ ນສິກ຺ຂິຕຸກາໂມ ອນາທຣິຍໍ ກໂຣຕິ, ອຍໍ ຘມ຺ເມ ອນາທຣິຍໍ ກໂຣຕິ ນາມ. ເຕນາຫ ‘‘ຕສ຺ມາ’’ຕິອາທິ.

ອິທໍ ນ ສລ຺ເລຂາຍ ສໍວຕ຺ຕຕີຕິ ສມ຺ມາ ກິເລເສ ລິຂຕີຕິ ສລ຺ເລໂຂ, ອປ຺ປິຈ຺ຉຕາ, ຕທຕ຺ຖໍ ນຍິທໍ ສໍວຕ຺ຕຕິ. ອາທິສທ຺ເທນ ‘‘ອິທໍ ນ ຘຸຕຕ຺ຖາຍ ສໍວຕ຺ຕຕິ, ນ ປາສາທິກຕາຍ, ນ ອປຈຍາຍ, ນ ວີຣິຍາຣມ຺ຠາຍ ສໍວຕ຺ຕຕີ’’ຕິ (ປາຈິ. ໓໔໓) ອິທໍ ສງ຺ຄຓ຺ຫາຕິ. ອປຎ຺ຎຕ຺ເຕນາຕິ ສຸຕ຺ເຕ ວາ ອຠິຘມ຺ເມ ວາ ອາຄເຕນ. ປເວຓິອາຄຕນ຺ຕິ ສງ຺ຄີຕິກາລໂຕ ປຏ຺ຐາຍ ມຫາກສ຺ສປາທິອາຈຣິຍປຣມ຺ປຣາຍ ອາຄຕໍ. ສເຈ ປນ ຍສ຺ມາ ອຸຈ຺ຉຸຣໂສ ສຕ຺ຕາຫກາລິໂກ, ຕສ຺ສ ກສໂຏ ຍາວຊີວິໂກ, ທ຺ວິນ຺ນໍເຍວ ສມວາໂຍ ອຸຈ຺ຉຸຍຏ຺ຐິ, ຕສ຺ມາ ວິກາເລ ອຸຈ຺ຉຸຍຏ຺ຐິໍ ຂາທິຕຸໍ ວຏ຺ຏຕິ ຄຸຬຫຣີຕກໍ ວິຍາຕິ ເອວມາທິກໍ ຄາຣຍ຺ຫາຈຣິຍຸຄ຺ຄຫໍ ຄເຫຕ຺ວາ ‘‘ເອວໍ ອມ຺ຫາກໍ ອາຈຣິຍານໍ ອຸຄ຺ຄໂຫ ປຣິປຸຈ຺ຉາ’’ຕິ ຠຓຕິ, ອາປຕ຺ຕິເຍວ.

ອນາທຣິຍສິກ຺ຂາປທວຓ຺ຓນາ ນິຏ຺ຐິຕາ.

໕. ຠິໍສາປນສິກ຺ຂາປທວຓ຺ຓນາ

ຣູປາທີນີຕິ ຠຍານການິ ຣູປສທ຺ທຄນ຺ຘຣສໂຜຏ຺ຐພ຺ພານິ. ຠຍານກກຖນ຺ຕິ ໂຈຣກນ຺ຕາຣວາຬກນ຺ຕາຣປິສາຈກນ຺ຕາຣປ຺ປຏິສໍຍຸຕ຺ຕກຖໍ.

ຠິໍສາປນສິກ຺ຂາປທວຓ຺ຓນາ ນິຏ຺ຐິຕາ.

໖. ໂຊຕິສິກ຺ຂາປທວຓ຺ຓນາ

ອຄິລາໂນຕິ ຍສ຺ສ ວິນາ ອຄ຺ຄິນາ ຜາສຸ ໂຫຕິ, ໂສ ອິຘ ອຄິລາໂນ ນາມ. ໂຊຕິນ຺ຕິ ອຄ຺ຄິໍ.

ຠຄ຺ເຄສູຕິ ເອວໍນາມເກ ຊນປເທ. ຠຄ຺ຄານາມ ຊານປທິໂນ ຣາຊກຸມາຣາ, ເຕສໍ ນິວາໂສ ເອໂກປິ ຊນປໂທ ຣຸຬ຺ຫິສທ຺ເທນ ‘‘ຠຄ຺ຄາ’’ຕິ ວຸຈ຺ຈຕິ. ເຕນ ວຸຕ຺ຕໍ ‘‘ຠຄ຺ເຄສູຕິ ເອວໍນາມເກ ຊນປເທ’’ຕິ. ຕຖາ ປຕິລາຕໍ ອຸກ຺ຂິປນ຺ຕສ຺ສາຕິ ຑຍ຺ຫມານໍ ອລາຕໍ ປຕິຕໍ ອຸກ຺ຂິປນ຺ຕສ຺ສ ຕຖາ ທຸກ຺ກຏນ຺ຕິ ອຕ຺ໂຖ. ຕຎ຺ຈາຕິ ທຸກ຺ກຏໍ ປຣາມສຕິ. ອວິຊ຺ຌາຕນ຺ຕິ ອນິພ຺ພຸຕາລາຕໍ. ປທີປໂຊຕິກຊນ຺ຕາຆເຣຕິ ປທີປຸຊ຺ຊລນປຕ຺ຕປຈນເສທກມ຺ມາທີສຸ ໂຊຕິກຣເຓ ອຄ຺ຄິສາລາຍຎ຺ຈ ສມາທຫນ຺ຕສ຺ສ ອນາປຕ຺ຕີຕິ ອຕ຺ໂຖ. ຕຖາຣູປປ຺ປຈ຺ຈເຍຕິ ຐເປຕ຺ວາ ປທີປາທີນິ ອຎ຺ຎສ຺ມິມ຺ປິ ຕຖາຣູປປຈ຺ຈເຍ. ອາປທາສູຕິ ທຸຏ຺ຐວາຬມິຄອມນຸສ຺ເສຫິ ອຸປທ຺ທເວສຸ.

ໂຊຕິສິກ຺ຂາປທວຓ຺ຓນາ ນິຏ຺ຐິຕາ.

໗. ນຫານສິກ຺ຂາປທວຓ຺ຓນາ

‘‘ທິຍຑ຺ໂຒ ມາໂສ ເສໂສ ຄິມ຺ຫານ’’ນ຺ຕິ ‘‘ວສ຺ສານສ຺ສ ປຐໂມ ມາໂສ’’ອິຈ຺ເຈເຕ ອຑ຺ຒເຕຍ຺ຍມາສາ ອຸຓ຺ຫສມໂຍ, ປຣິຬາຫສມໂຍຕິ ຄິມ຺ຫານໍ ເສໂສ ທິຍຑ຺ໂຒ ມາໂສ ອຸຓ຺ຫສມໂຍ, ວສ຺ສານສ຺ສ ປຐໂມ ມາໂສ ປຣິຬາຫສມໂຍຕິ ເອວໍ ເອເຕ ອຑ຺ຒເຕຍ຺ຍມາສາ ກເມນ ອຸຓ຺ຫສມໂຍ, ປຣິຬາຫສມໂຍ ນາມ ໂຫຕີຕິ ອຕ຺ໂຖ ເຕເນວ ປທຠາຊນິຍໍ ‘‘ອຸຓ຺ຫສມໂຍ ນາມ ທິຍຑ຺ໂຒ ມາໂສ ເສໂສ ຄິມ຺ຫານ’’ນ຺ຕິ, ‘‘ປຣິຬາຫສມໂຍ ນາມ ວສ຺ສານສ຺ສ ປຐໂມ ມາໂສ’’ຕິ ວຸຕ຺ຕໍ. ຍທາ ວິນາ ນຫາເນນ ນ ຜາສຸ ໂຫຕິ, ອຍໍ ຄິລານສມໂຍ. ປທຠາຊນິຍໍ (ປາຈິ. ໓໖໔) ປນ ຄິລາເນ ນິຈ຺ຉິເຕ ຄິລານກາໂລ ນິຈ຺ຉິໂຕວ ໂຫຕີຕິ ‘‘ຍສ຺ສ ວິນາ ນຫາເນນ ນ ຜາສຸ ໂຫຕິ, ‘ຄິລານສມໂຍ’ຕິ ນຫາຍິຕພ຺ພ’’ນ຺ຕິ ວຸຕ຺ຕໍ. ປຣິເວຓສມ຺ມຊ຺ຊນມຕ຺ຕມ຺ປີຕິ ອນ຺ຕມໂສ ປຣິເວຓສມ຺ມຊ຺ຊນມຕ຺ຕມ຺ປິ.

ວາລຸກໍ ອຸກ຺ກິຣິຕ຺ວາຕິ ສຸກ຺ຂາຍ ນທິຍາ ວາລິກໍ ອຸຕ຺ຕິຣິຕ຺ວາ. ອາວາເຏສຸປີຕິ ປິ-ສທ຺ເທນ ນທິຍໍ ວຕ຺ຕພ຺ພເມວ ນຕ຺ຖີຕິ ທສ຺ເສຕິ. ອາປທາສູຕິ ຠມຣາທີຫິ ອນຸພນ຺ເຘສຸ.

ນຫານສິກ຺ຂາປທວຓ຺ຓນາ ນິຏ຺ຐິຕາ.

໘. ທຸພ຺ພຓ຺ຓກຣຓສິກ຺ຂາປທວຓ຺ຓນາ

ລາຠສທ຺ໂທຍໍ ກມ຺ມສາຘໂນ ‘‘ໂກ ຠວຕາ ລາໂຠ ລທ຺ໂຘ’’ຕິອາທີສຸ ວິຍ, ໂສ ເຈຕ຺ຖ ອຕີຕກາລິໂກຕິ ອາຫ ‘‘ອລພ຺ຠີຕິ ລໂຠ’’ຕິ, ລທ຺ຘນ຺ຕິ ອຕ຺ໂຖ. ‘‘ລໂຠ ເອວ ລາໂຠ’’ຕິ ອິມິນາ ສກຕ຺ເຖ ຓປຈ຺ຈໂຍຕິ ທສ຺ເສຕິ. ກິໍ ອລພ຺ຠີຕິ ກິໍ ລທ຺ຘໍ. ນວນ຺ຕິ ອຠິນວໍ. ເອຕ຺ຕາວຕາ ຈ ນວຎ຺ຈ ຕໍ ຈີວຣຎ຺ຈາຕິ ນວຈີວຣໍ, ນວຈີວຣໍ ລາໂຠ ເອເຕນາຕິ ນວຈີວຣລາໂຠຕິ ເອວເມຕ຺ຖ ສມາໂສ ທຏ຺ຐພ຺ໂພຕິ. ຍທິ ເອວໍ ກຖໍ ‘‘ນວໍ ຈີວຣລາເຠນາ’’ຕິ ວຸຕ຺ຕນ຺ຕິ ອາຫ ‘‘ອິຕິ ນວຈີວຣລາເຠນາ’’ຕິອາທິ. ເອຕ຺ຖ ຈ ‘‘ວິກປ຺ປນຸປຄໍ ປຈ຺ຉິມ’’ນ຺ຕິ ນ ວຸຕ຺ຕຕ຺ຕາ ຈີວຣນ຺ຕິ ຍໍ ນິວາເສຕຸໍ ວາ ປາຣຸປິຕຸໍ ວາ ສກ຺ກາ ໂຫຕິ, ຕເທວ ເວທິຕພ຺ພນ຺ຕິ ອາຫ ‘‘ນິວາສນປາຣຸປນຸປຄໍ ຈີວຣ’’ນ຺ຕິ. ‘‘ທຸພ຺ພຓ຺ຓກຣຓໍ ອາທາຕພ຺ພ’’ນ຺ຕິ ເອຕໍ ກປ຺ປພິນ຺ທຸໍ ສນ຺ຘາຍ ວຸຕ຺ຕໍ, ນ ນີລາທີຫິ ສກລຈີວຣໍ ທຸພ຺ພຓ຺ຓກຣຓໍ, ຕຎ຺ຈ ປນ ກປ຺ປໍ ອາທິຍນ຺ເຕນ ຈີວຣໍ ຣຊິຕ຺ວາ ຈຕູສຸ ວາ ໂກເຓສຸ, ຕີສຸ ວາ ທ຺ວີສຸ ວາ ເອກສ຺ມິໍ ວາ ໂກເຓ ໂມຣສ຺ສ ອກ຺ຂິມຓ຺ຑລມຕ຺ຕໍ ວາ ມງ຺ຄຸລປິຏ຺ຐິມຕ຺ຕໍ ວາ ອາທາຕພ຺ພນ຺ຕິ ອາຫ ‘‘ຕສ຺ສາ’’ຕິອາທິ. ກໍສນີເລນາຕິ ຈມ຺ມກາຣນີເລນ. ມຫາປຈ຺ຈຣິຍໍ ປນ ‘‘ອໂຍມລໍ ໂລຫມລໍ, ເອຕໍ ກໍສນີລໍ ນາມາ’’ຕິ (ປາຈິ. ອຏ຺ຐ. ໓໖໘) ວຸຕ຺ຕໍ. ປຕ຺ຕນີເລນາຕິ ເຍນ ເກນຈິ ນີລວຓ຺ເຓນ ປຓ຺ຓຣເສນ. ກປ຺ປພິນ຺ທຸໍ ອາທິຍິຕ຺ວາຕິ ວຏ຺ຏໍ ເອກໍ ກປ຺ປພິນ຺ທຸໍ ອາທິຍິຕ຺ວາ.

ປາຬິກປ຺ປກຓ຺ຓິກກປ຺ປາທໂຍ ປນ ສພ຺ພຏ຺ຐກຖາສຸ ປຏິສິທ຺ຘາ. ອຄ຺ຄຬາທີນິ ກປ຺ປກຕຈີວເຣ ປນ ປຈ຺ຉາ ອາໂຣເປຕ຺ວາ ກປ຺ປກຣຓກິຈ຺ຈໍ ນຕ຺ຖີຕິ ອາຫ ‘‘ປຈ຺ຉາ ອາໂຣປິເຕສູ’’ຕິອາທິ. ອຄ຺ຄຬອນຸວາຕປຣິຠຓ຺ເຑສູຕິ ອຸທ຺ຘຣິຕ຺ວາ ອລ຺ລິຍາປນກຂຓ຺ຑປິຏ຺ຐິອນຸວາຕກຸຈ຺ຉິອນຸວາເຕສຸ. ກິຣິຍາກິຣິຍນ຺ຕິ ນິວາສນປາຣຸປນໂຕ, ກປ຺ປສ຺ສ ອນາທານໂຕ ກິຣິຍາກິຣິຍໍ.

ທຸພ຺ພຓ຺ຓກຣຓສິກ຺ຂາປທວຓ຺ຓນາ ນິຏ຺ຐິຕາ.

໙. ວິກປ຺ປນສິກ຺ຂາປທວຓ຺ຓນາ

ສມ຺ມຸເຂນ ວິກປ຺ປນາ ສມ຺ມຸຂວິກປ຺ປນາ. ປຣມ຺ມຸເຂນ ວິກປ຺ປນາ ປຣມ຺ມຸຂວິກປ຺ປນາ. ສນ຺ນິຫິຕາສນ຺ນິຫິຕຠາວນ຺ຕິ ອາສນ຺ນທູຣຠາວໍ. ອາສນ຺ນທູຣຠາໂວ ຈ ອຘິຏ຺ຐາເນ ວຸຕ຺ຕນເຍເນວ ເວທິຕພ຺ໂພ.

ມິຕ຺ໂຕຕິ ທຬ຺ຫມິຕ຺ໂຕ. ສນ຺ທິຏ຺ໂຐຕິ ທິຏ຺ຐມຕ຺ໂຕ ນາຕິທຬ຺ຫມິຕ຺ໂຕ. ອກຕປຈ຺ຈຸທ຺ຘາຣນ຺ຕິ ‘‘ມຍ຺ຫໍ ສນ຺ຕກໍ ປຣິຠຸຎ຺ຊ ວາ ວິສ຺ສຊ຺ເຊຫິ ວາ’’ຕິອາທິນາ ອກຕປຈ຺ຈຸທ຺ຘາຣໍ. ເຍນ ວິນຍກມ຺ມໍ ກຕນ຺ຕິ ເຍນ ສທ຺ຘິໍ ວິນຍກມ຺ມໍ ກຕໍ.

ປຣິໂຠເຄນ ກາຍກມ຺ມໍ, ອປຈ຺ຈຸທ຺ຘາຣາປເນນ ວຈີກມ຺ມນ຺ຕິ ອາຫ ‘‘ສມຸຏ຺ຐານາທີນິ ປຐມກຖິນສທິສາເນວາ’’ຕິ. ກິຣິຍາກິຣິຍນ຺ຕິ ເອຕ຺ຖ ປຣິຠຸຎ຺ຊນໍ ກິຣິຍໍ. ອປຈ຺ຈຸທ຺ຘາຣາປນໍ ອກິຣິຍໍ.

ວິກປ຺ປນສິກ຺ຂາປທວຓ຺ຓນາ ນິຏ຺ຐິຕາ.

໑໐. ອປນິຘານສິກ຺ຂາປທວຓ຺ຓນາ

ອຘິຏ຺ຐານຸປຄນ຺ຕິ ອຘິຏ຺ຐານໂຍຄ຺ຄໍ ອໂຍປຕ຺ຕຎ຺ເຈວ ມຕ຺ຕິກາປຕ຺ຕຎ຺ຈ. ສູກຣນ຺ຕກໍ ນາມ ກຸຎ຺ຈິກາໂກໂສ ວິຍ ອນ຺ໂຕ ສຸສິຣໍ ກຕ຺ວາ ໂກຏ຺ຏິຕໍ.

ອຎ຺ຎໍ ປຣິກ຺ຂາຣນ຺ຕິ ປາຬິຍາ ອນາຄຕປຕ຺ຕຕ຺ຖວິກາທິໍ. ຘມ຺ມກຖໍ ກຕ຺ວາຕິ ‘‘ສມເຓນ ນາມ ອນິຫິຕປຣິກ຺ຂາເຣນ ຠວິຕຸໍ ນ ວຏ຺ຏຕີ’’ຕິ ເອວໍ ‘‘ຘມ຺ມກຖໍ ກເຖຕ຺ວາ ທສ຺ສາມີ’’ຕິ ນິກ຺ຂິປໂຕ ອນາປຕ຺ຕິ.

ອປນິຘານສິກ຺ຂາປທວຓ຺ຓນາ ນິຏ຺ຐິຕາ.

ສຸຣາປານວຄ຺ໂຄ ຉຏ຺ໂຐ.