໘. ກຸມາຣິຠູຕວຄ຺ໂຄ

໑-໕. ປຐມກຸມາຣິຠູຕາທິສິກ຺ຂາປທວຓ຺ຓນາ

ສພ຺ພປຐມາ ທ຺ເວ ມຫາສິກ຺ຂມານາຕິ ຄພ຺ຠິນິວຄ຺ເຄ ວຸຕ຺ຕາ ທ຺ເວ ສິກ຺ຂມານາ. ‘‘ສິກ຺ຂມານາ’’ອິຈ຺ເຈວ ວຕ຺ຕພ຺ພາຕິ ສມ຺ມຸຕິກມ຺ມາທີສຸ ເອວໍ ວຕ຺ຕພ຺ພາ. ‘‘ຄິຫິຄຕາ’’ຕິ ວາ ‘‘ກຸມາຣິຠູຕາ’’ຕິ ວາ ນ ວຕ຺ຕພ຺ພາຕິ ສເຈ ວທນ຺ຕິ, ກມ຺ມໍ ກຸປ຺ປຕີຕິ ອຘິປ຺ປາໂຍ.

ຈຕຸຕ຺ຖປຎ຺ຈມານິ ອຸຕ຺ຕານຕ຺ຖາເນວ.

ປຐມກຸມາຣິຠູຕາທິສິກ຺ຂາປທວຓ຺ຓນາ ນິຏ຺ຐິຕາ.

໖-໘. ຂີຍນຘມ຺ມາທິສິກ຺ຂາປທວຓ຺ຓນາ

ວຸຏ຺ຐາປນສມ຺ມຸຕິຍາ ຍາຈິຕາຍາຕິ ອຸປສມ຺ປທາສມ຺ມຸຕິຍາ ຍາຈິຕາຍ.

ສຕ຺ຕມຏ຺ຐມານິ ອຸຕ຺ຕານຕ຺ຖາເນວ.

ຂີຍນຘມ຺ມາທິສິກ຺ຂາປທວຓ຺ຓນາ ນິຏ຺ຐິຕາ.

໙. ໂສກາວາສສິກ຺ຂາປທວຓ຺ຓນາ

ອາຄຈ຺ຉມານາຕິ ອາຄຈ຺ຉນ຺ຕີ.

ໂສກາວາສສິກ຺ຂາປທວຓ຺ຓນາ ນິຏ຺ຐິຕາ.

໑໐. ອນນຸຎ຺ຎາຕສິກ຺ຂາປທວຓ຺ຓນາ

ເຕສໍ ອຕ຺ຖິຠາວໍ ອຊານນ຺ຕິຍາຕິ (ປາຈິ. ອຏ຺ຐ. ໑໑໖໓) ເຕສໍ ມາຕາທີນໍ ອຕ຺ຖິຠາວໍ ອຊານນ຺ຕິຍາ. ອນນຸຎ຺ຎາຕສມຸຏ຺ຐານນ຺ຕິ ຍໍ ວາຈໂຕ, ກາຍວາຈໂຕ, ວາຈາຈິຕ຺ຕໂຕ, ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ຕໍ ອນນຸຎ຺ຎາຕສມຸຏ຺ຐານໍ. ກຖໍ? ອພ຺ຠານກມ຺ມາທີສຸ ເກນຈິເທວ ກຣຓີເຍນ ຂຓ຺ຑສີມາຍໍ ນິສິນ຺ນາ ‘‘ປກ຺ໂກສຖ ສິກ຺ຂມານໍ, ອິເຘວ ນໍ ອຸປສມ຺ປາເທສ຺ສາມາ’’ຕິ ອຸປສມ຺ປາເທຕິ, ເອວໍ ວາຈໂຕ ສມຸຏ຺ຐາຕິ. ‘‘ອຸປສ຺ສຍໂຕ ອຸຏ຺ຐາຍ ອຸປສມ຺ປາເທສ຺ສາມີ’’ຕິ ວຕ຺ວາ ຂຓ຺ຑສີມໍ ຄຈ຺ຉນ຺ຕິຍາ ກາຍວາຈໂຕ ສມຸຏ຺ຐາຕິ. ທ຺ວີສຸ ຐາເນສຸ ປຓ຺ຓຕ຺ຕິໍ ຊານິຕ຺ວາ ວີຕິກ຺ກມໍ ກໂຣນ຺ຕິຍາ ວາຈາຈິຕ຺ຕໂຕ, ກາຍວາຈາຈິຕ຺ຕໂຕ ຈ ສມຸຏ຺ຐາຕິ. ອນນຸຊານາເປຕ຺ວາ ອຸປສມ຺ປາທນໂຕ ກິຣິຍາກິຣິຍໍ.

ອນນຸຎ຺ຎາຕສິກ຺ຂາປທວຓ຺ຓນາ ນິຏ຺ຐິຕາ.

໑໑. ປາຣິວາສິກສິກ຺ຂາປທວຓ຺ຓນາ

ທາຣຸຓນ຺ຕິ ປາປໍ. ປຕິມາເນນ຺ຕນ຺ຕິ ໂອໂລເກນ຺ຕໍ.

ປາຣິວາສິກສິກ຺ຂາປທວຓ຺ຓນາ ນິຏ຺ຐິຕາ.

໑໒. ອນຸວສ຺ສສິກ຺ຂາປທວຓ຺ຓນາ

ເອກນ຺ຕຣິກນ຺ຕິ ເອເກນ ວສ຺ເສນ ອນ຺ຕຣິກໍ ກຕ຺ວາ.

ອນຸວສ຺ສສິກ຺ຂາປທວຓ຺ຓນາ ນິຏ຺ຐິຕາ.

໑໓. ເອກວສ຺ສສິກ຺ຂາປທວຓ຺ຓນາ

ມາຕິກາຍໍ ເອກໍ ວສ຺ສໍ ທ຺ເວຕິ ເອກນ຺ຕຣິເກ ເອເກກສ຺ມິໍ ສໍວຈ຺ຉເຣ ທ຺ເວ. ເອກນ຺ຕຣິກໍ ວຸຏ຺ຐາເປນ຺ຕິຍາຕິ ອິມສ຺ມິໍ ວສ຺ເສ ເອກໍ, ປຸນ ເອກນ຺ຕຣິກໍ ເອກນ຺ຕິ ທ຺ເວ ວຸຏ຺ຐາເປນ຺ຕິຍາ ອນາປຕ຺ຕິ.

ເອກວສ຺ສສິກ຺ຂາປທວຓ຺ຓນາ ນິຏ຺ຐິຕາ.

ກຸມາຣິຠູຕວຄ຺ໂຄ ອຏ຺ຐໂມ.